Ol Refrens Blong Kristin Wok Mo Laef—Buk Blong Miting
6-12 NOVEMBA
OL GUDGUDFALA SAMTING LONG BAEBOL | AMOS 1-9
“Traem Faenem Jehova, Nao Bae Yufala i Save Stap Laef”
jd pej 90-91 haf 16-17
Wosipim Jehova Folem Ol Stret Fasin Blong Hem
16 Faswan man ya Adam, i mas jus bitwin samting we i gud mo samting we i nogud, be hem i mekem wan jus we i no waes. ?Bambae yumi mekem wan jus we i waes? Amos i talem klia se yumi mas tinghevi long samting ya taem hem i se: “Fasin we i no stret, yufala i mas tanem baksaed long hem, be fasin we i stret, yufala i mas glad long hem, mo oltaem yufala i mas folem.” (Amos 5:15) Wan profesa, Wiliam Rainey Harper, we i savegud Semitik lanwis mo ol buk long yunivesiti blong Chicago, i tokbaot vas ya se: “Gudfala fasin mo nogud fasin we [Amos] i tokbaot, i stret gud wetem samting we Yahweh i wantem.” Hemia wan stamba samting we yumi save lanem long ol 12 profet ya. ?Yumi rere blong akseptem ol rul blong Jehova long saed blong stret fasin mo fasin we i no stret? Ol rul ya oli stap long Baebol, mo sam Kristin we oli bigman long tingting oli stap tokbaot ol rul ya tu long yumi, hemia ol Kristin we oli mekemap “gudfala slef we i waes.”—Matiu 24:45-47.
17 Taem yumi tanem baksaed long ol fasin we i no stret, hemia i givhan long yumi blong no mekem ol samting we i save mekem God i harem nogud. Eksampol, wan man i luksave denja we ol rabis pija oli save mekem long hem, nao i traem blong no lukluk olgeta. Be, ?olsem wanem long “hat mo tingting” blong hem long ol websaet blong ol rabis pija? (Efesas 3:16) Sipos hem folem tok we i stap long Amos 5:15, bae i isi nomo long hem blong wokem fasin ya blong no laekem nating nogud fasin. Mo tu maet hem i save stanap strong taem hem i fesem wan nara traem.
13-19 NOVEMBA
OL GUDGUDFALA SAMTING LONG BAEBOL | OBADAEA 1–JONA 4
“Lanem Lesen From Mastik Blong Yu”
ia pej 114 haf 22-23
Hem i Lanem Lesen From Mastik Blong Hem
22 ?Olsem wanem long Jona? ?Hem i lanem lesen se hem i mas i obei long Jehova blong soem fasin tangkiu? Yes. Afta we tri dei mo tri naet i pas, bigfala fis ya i tekem Jona i goso mo “i traot, nao wantaem nomo Profet Jona i kamaot i foldaon long sanbij.” (Jona 2:10) !Traem tingbaot, Jona i no nid nating blong swim i goso! Be, taem hem i stap long so, hem i faenem rod blong hem, mo i faenem se hem i stap wea. Be biaen, Jehova i traem Jona bakegen. Jona 3:1, 2, i se: “Nao Hae God i toktok bakegen long Profet Jona, i talem se: ‘Jona. Yu go long bigfala taon ya Nineve, yu talemaot tok blong mi we bambae mi givim long yu.’” ?Bae Jona i mekem wanem?
23 Jona i no tingting tu taem. Baebol i se: “Nao hem i girap, i go long Nineve olsem we Hae God i talem long hem.” (Jona 3:3) Yes, hem obei. I klia se hem i lanem lesen from ol mastik blong hem. Yumi mas folem fasin blong bilif blong Jona. Yumi evriwan i mekem mastik, from we yumi evriwan i sinman. (Rom. 3:23) Be yumi no mas lego Jehova taem yumi mekem wan mastik, yumi mas lanem lesen from ol mastik blong yumi mo gohed blong obei long God mo mekem wok blong hem.
Traem Faenem Ol Gudfala Samting Ya
jd pej 112 haf 4-5
Mekem i Gud Long Ol Narafala Olsem We God i Wantem
4 Yu save lanem lesen tru long jajmen we God mekem agensem ol man Edom, wan kantri we i stap klosap long Isrel. Hem i tok long ol man Edom se: “Ol man Juda ya oli brata blong yufala. ?Be taem oli stap long trabol, from wanem yufala i laf nogud long olgeta? ?Taem ol enemi blong olgeta oli spolem ples blong olgeta, be yufala i harem gud from wanem?” (Obadaea 12) Maet ol man Taea oli “brata” blong ol man Isrel jes from we oli joen blong mekem bisnes tugeta, be ol man Edom oli ol stret “brata” blong ol man Isrel, from we olgeta oli kamaot long laen blong Esau, twin brata blong Jekob. Jehova tu i talem se ol man Edom oli “brata” blong ol man Isrel.” (Dutronome 2:1-4, NW) Be, ol man Edom oli mekem wan samting we Jehova i no laekem olgeta from, hemia se oli glad taem ol man Jiu oli stap safa bigwan long han blong ol man Babilon.—Esikel 25:12-14.
5 I klia nomo se God i no glad nating long fasin we ol man Edom oli mekem long ol brata blong olgeta. Taswe, maet i gud yumi askem long yumi wan se, ‘?God i harem olsem wanem taem i luk fasin we mi mekem long ol brata mo sista?’ Wan samting we yumi mas tingbaot, hemia, fasin we yumi mekem long wan brata o sista taem i gat wan trabol i kamaot. Eksampol, sipos wan brata o sista i mekem yu harem nogud o i gat wan problem wetem wan famle blong yu, i tru se yu “gat poen agens” long hem, be ?bae yu stap kros longtaem long hem, yu no wantem lego nomo, o bae yu stretem trabol ya? (Kolosi 3:13; Josua 22:9-30; Matiu 5:23, 24) Sipos yu mekem olsem, fasin ya i save gat paoa long ol samting we yu mekem long brata o sista ya. Maet yu no joen gud wetem hem, yu no wantem joen nating wetem hem, o yu talem sam nogud samting long saed blong hem. Trabol ya i save kam mowas sipos brata o sista ya i mekem wan nogud samting, nao maet ol elda oli mas givim advaes long hem o stretem hem. (Galesia 6:1) Long taem olsem, bae yu mekem wanem. ?Bae yu mekem olsem ol man Edom, bae yu glad from we brata o sista ya i kasem trabol? ?God i wantem se yu mekem wanem?
20-26 NOVEMBA
OL GUDGUDFALA SAMTING LONG BAEBOL | MEAKA 1-7
“?Jehova i Wantem Se Yumi Mekem Wanem?”
“?Jehova i Askem Wanem Long Yu?”
“Mekem ol fasin we i stret gud.” Wan buk i talem se long lanwis Hibru tok ya “fasin we i stret gud” i “minim stret fasin insaed long wan komuniti.” God i askem yumi blong tritim ol narafala long fasin we i stret folem ol stret fasin blong hem. Yumi mekem stret fasin taem yumi mekem i sem mak long evri man, yumi mekem i stret, mo yumi no giaman taem yumi wok wetem ol narafala. (Levitikas 19:15; Aesea 1:17; Hibrus 13:18) Taem yumi mekem i stret long ol narafala, bae samting ya i pusum olgeta tu blong oli mekem sem mak long yumi.—Matiu 7:12.
‘Laekem kaen fasin.’ God i no askem yumi blong soem kaen fasin nomo, be hem i askem yumi long laekem tu. Hibru Tok ya “kaen” (cheʹsedh), oli save tanem tu i kam “lav” o “holemstrong.” Wan man blong stadi long Baebol i talem se: “Ol tok ya wanwan, lav, sore, mo kaen, oli no stret mining blong Hibru tok ya [cheʹsedh]; be olgeta evriwan oli mining blong Hibru tok ya.” Sipos yumi laekem kaen fasin, bae yumi soemaot samting ya taem yumi kaen long narafala, mo yumi glad blong halpem olgeta we oli gat nid. Frut we i kamaot se, yumi kasem glad we i kamaot from fasin ya blong givim samting.—Ol Wok 20:35.
‘Wokbaot wetem God we tingting blong yumi i stap daon.’ Long Baebol, tok ya “wokbaot” i min se “man i folem wan rod o wan fasin blong laef.” Yumi wokbaot wetem God taem yumi folem fasin blong laef we God i talem long Baebol. Yumi mas mekem “tingting blong yumi i stap daon” blong wokbaot wetem God. Taem yumi gat tingting daon long fored blong God, yumi luksave se hem i hae moa long yumi mo yumi luksave se yumi dipen long hem from we yumi no naf blong mekem sam samting. Taswe, blong ‘wokbaot wetem God we tingting blong yumi i stap daon’ i min se yumi mas luksave samting we God i wantem yumi blong mekem mo samting we yumi naf blong givim long hem.
Yumi glad se Jehova i neva askem yumi blong mekem wan samting we yumi no naf blong mekem. Hem i glad long wanem we yumi naf blong mekem long wok blong hem. (Kolosi 3:23) Hem i kasemsave se yumi no naf blong mekem sam samting. (Ol Sam 103:14) Sipos yumi gat tingting daon blong akseptem wanem we Jehova i askem, bae yumi save harem gud taem yumi wokbaot wetem hem. Taswe, i gud yumi lanem naoia blong wokbaot wetem God. Bae Jehova i blesem yumi sipos yumi mekem olsem.—Ol Proveb 10:22.