Ol Refrens Blong Kristin Wok Mo Laef—Buk Blong Miting
25-31 DISEMBA
OL GUDGUDFALA SAMTING LONG BAEBOL | MALAKAE 1-4
“?Mared Blong Yu i Mekem Jehova i Glad?”
jd pej 125-126 haf 4-5
Mekem Jehova i Glad Long Famle Blong Yu
4 Long ol yia 400 Bifo Kraes long taem blong Malakae, plante man Jiu oli stap divos. Malakae i talem long olgeta se: “Taem we yufala i yangfala, yufala i mared, mo long taem ya, yufala i promes long fes blong God, se bambae yufala i holemtaet promes ya we yufala i mekem wetem ol woman ya blong yufala. . . . be yufala i girap, yufala i brekem promes blong yufala.” From we ol hasban oli stap brekem promes blong mared blong olgeta, ol waef blong olgeta oli stap go long olta blong Jehova nao oli “krae gogo wota blong ae blong [olgeta] i kavremapgud olta blong hem.” !Ol pris tu oli agri nomo long fasin ya blong mekem divos!—Malakae 2:13, 14.
5 ?Wanem tingting blong Jehova long nogud fasin we i stap hapen long ol mared long taem blong Malakae? Malakae i raetem se “Yumi ol laen blong Isrel, mo Hae God i God blong yumi, mo hem i talem se, ‘Mi mi no laekem nating fasin ya we man i mekem divos long woman blong hem.’” Hem i talem tu se Jehova i “no save jenis samtaem.” (Malakae 2:16; 3:6) ?Hem i wantem minim wanem? Long stat taem God i wokem faswan man mo woman, hem i no laekem fasin ya blong divos. (Jenesis 2:18, 24) Long taem blong Malakae tu i sem mak. Mo tede tu i sem mak. Samfala oli mekem desisen blong divos from we oli no laekem hasban o waef blong olgeta. Nating se i olsem, Jehova i luk hat blong olgeta. (Jeremaea 17:9, 10) Hem i save gud wanem nao i pusum olgeta blong oli mekem divos, nating se oli haedem. Yes, “olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong yumi.”—Hibrus 4:13.