Refrens Blong Kristin Wok Mo Laef Buk Blong Miting
3-9 JUN
OL GUDGUDFALA SAMTING LONG BAEBOL | GALESIA 4-6
“Wan‘Pija’ We i Gat Mining Long Yumi”
it-1 pej 1018 haf 2
Hega
Tok blong Pol i soemaot se Hega i pija blong neson blong Isrel bifo, we i joen wetem Jehova tru long kontrak blong Loa we Jehova i givim long olgeta long Hil ya Sinae, mo kontrak ya i makemaot olgeta olsem ‘ol pikinini slef.’ Be from we oli sin man, nesen ya i no naf blong folemgud olgeta loa. Long sem fasin, kontrak ya i no mekem ol man Isrel oli kam fri, be i soemaot se oli sinman mo i stret nomo blong oli ded. From samting ya, oli ol slef. (Jon 8:34; Ro 8:1-3) Jerusalem long taem blong Pol i sem mak olsem hemia long taem blong Hega, from we hem i bigfala taon we i representem ogenaesesen blong Isrel long saed blong bodi, mo hemia i mekem se ol man long nesen ya wetem ol pikinini blong olgeta oli slef. Be ol Kristin we tabu spirit i makemaot olgeta, oli ol pikinini blong “Jerusalem blong heven,” we i pija blong woman blong God. Jerusalem ya i olsem fri woman ya Sera we i neva stap olsem wan slef. Be olsem we Ismael i stap mekem i nogud long Aesak, ol pikinini blong “Jerusalem blong heven” we oli kam fri tru long Kraes, oli stap kasem fasin agens long han blong ol pikinini blong Jerusalem we oli slef. Nating se i olsem, oli sanemaot Hega mo boe blong hem, we hemia i pija blong prapa nesen blong Isrel we Jehova i sakemaot olgeta.—Ga 4:21-31; mo tu Jon 8:31-40.
w14 15/10 pej 6 haf 11
Yumi Save Bilif Strong Long Kingdom
11 Taem ol laen blong Ebraham oli go insaed long Promes Lan, kontrak we God i mekem wetem Ebraham i kamtru. Be Baebol i talem se kontrak ya bambae i kamtru bakegen long fasin we i bigwan moa. (Gal. 4:22-25) Aposol Pol i eksplenem se, impoten pikinini we bambae i kamaot long laen blong Ebraham, hemia Jisas Kraes. Mo ol narafala pikinini long laen ya, hemia ol 144,000 Kristin we tabu spirit i makemaot olgeta. (Gal. 3:16, 29; Rev. 5:9, 10; 14:1, 4) Long promes we God i mekem long garen blong Iden, hem i tokbaot wan woman. Woman ya, hem i ogenaesesen blong Jehova long heven, hemia ol spirit pikinini blong God. Baebol i singaot woman ya se ‘Jerusalem long heven.’ (Gal. 4:26, 31) Pikinini blong woman ya bambae i blesem ol man blong olwe, olsem kontrak wetem Ebraham i talem.
Traem Faenem Ol Gudfala Samting Ya
w09 1/4 pej 13
?Yu Yu Save?
?From wanem taem Jisas i prea long Jehova hem i se “Aba, Papa”?
Arameik tok ya aba i save minim “papa” no “O Papa.” Long ol trifala taem we tok ya i kamaot long Baebol, hem i long wan prea mo tok ya i go moa long Jehova we i Papa long heven. ?Tok ya i impoten olsem wanem?
Buk ya The International Standard Bible Encyclopedia i talem se: “Ol pikinini long taem blong Jisas oli singaot papa blong olgeta se aba. Tok ya i soemaot se oli lavem papa blong olgeta mo oli respektem hem.” Hemia wan naesfala fasin blong pikinini i singaotem papa blong hem wetem respek, mo plante taem hemia i wan long ol fas toktok we pikinini i lanem. Jisas i yusum tok ya long wan fasin we i soem se hem i frengud wetem Papa blong hem. Taem Jisas i stap long garen blong Getsemane, bifo we oli kilim hem i ded, hem i prea long Jehova se, “Aba, Papa.”—Mak 14:36.
Buk ya i gohed se: “Long ol buk blong ol man Jiu long taem bifo, oli neva yusum tok ya Aba blong tokbaot God from oli ting se i no soem respek long God. Be taem Jisas i yusum tok ya long prea blong hem, hem i soemaot wan spesel fasin fren we hem i gat wetem God.” Long tu narafala buk we aposol Pol i raetem, hem i yusum tok ya “Aba.” Hemia i soemaot se ol fas Kristin tu oli yusum tok ya long ol prea blong olgeta.—Rom 8:15; Galesia 4:6.
w10 1/11 pej 15
?Yu Yu Save?
?From wanem aposol Pol i talem se “mi gat mak long bodi blong mi we i soemaot se mi mi slef blong Jisas”?—Galesia 6:17.
▪ Maet ol tok ya blong Pol oli save gat plante mining long tingting blong ol man we oli stap lesin long taem ya. Eksampol, long taem bifo oli yusum wan aean we oli bonem long faea blong makem wan presina we oli winim long faet, ol man blong stil long haos tempol, mo ol slef we oli ronwe. Wan man we i gat mak olsem long bodi blong hem, ol man oli no gat respek long hem.
Nating se i olsem, i no oltaem we ol man oli luk nogud long ol mak ya. Plante man long taem bifo oli yusum ol mak olsem blong makem se oli joen long wan kaen laen o wan jos. Eksampol, buk ya Theological Dictionary of the New Testament i talem se: “Wan saen we i soemaot se ol man Siria oli givim laef blong olgeta i go long god ya Hadad mo Atargatis, hemia taem oli putum mak long han mo nek blong olgeta . . . Mo olgeta we oli wosipim god ya Dionisus, oli gat mak blong lif ya ivi long skin blong olgeta.”
Be plante man tede oli ting se Pol i stap tokbaot ol mak we hem i kasem long ol taem we hem i stap mekem misinari trip blong hem. (2 Korin 11:23-27) Be maet Pol i stap minim fasin blong laef blong hem we i makemaot hem olsem wan Kristin, be i no wan prapa mak long bodi blong hem.
KAMGUD MOA LONG WOK BLONG PRIJ
w12 15/3 pej 30-31
Kwestin
?Olsem wanem? ?Kongregesen i save putumaot wan Kristin we i stap gohed blong lukluk ponografi?
▪ Yes, kongregesen i save putumaot wan man olsem. Taswe i no stret nating we wan Kristin i ridim o i lukluk ponografi long ol magasin, ol muvi, ol video o long intenet.
Long olgeta ples long wol, i gat ponografi. Naoia intenet i mekem i isi blong plante man oli lukluk ponografi i bitim bifo, mo i spolem plante moa man olsem wan rabis sik. Sam yangfala mo olfala oli lukluk ponografi long ol websaet from we oli jes kamaot nomo we oli no minim blong lukluk ol websaet ya. Be samfala oli minim nomo blong go ridim o lukluk ponografi, from we oli stap olgeta nomo—long haos o long ofis. ?From wanem ol Kristin oli mas stap longwe long ponografi?
Yumi fanem wan risen long woning ya blong Jisas, se: “Man we i stap gohed blong lukluk wan woman nao i wantem hem tumas, hem i mekem adaltri finis wetem woman ya long hat blong hem.” (Mat. 5:28) Fasin blong seks i stret nomo blong man mo woman we i mared tufala i save harem gud long tufala. (Prov. 5:15-19; 1 Kor. 7:2-5) Be hemia i no mak blong ponografi. Ponografi i soem ol fasin blong seks we oli no stret, mo i pulum ol man blong gat ol rabis tingting. Hemia ol rabis tingting we Jisas i givim woning long yumi from. Taswe i klia se fasin ya blong ridim o lukluk ponografi, i no laenap wetem advaes blong God we i se: “Yufala i mas kilimaot ol haf blong bodi blong yufala long wol ya, blong yufala i no mekem enikaen doti fasin blong seks, mo blong yufala i no mekem ol doti samting, mo blong yufala i no wantem ol rabis fasin blong seks nao yufala i bitim mak long hem, mo blong yufala i no wantem tumas ol samting we oli nogud, mo blong yufala i no wantem plante samting, we hemia i olsem we man i wosipim aedol.”—Kol. 3:5.
?Olsem wanem sipos wan Kristin i lukluk ponografi wan o tu taem nomo? Sipos Kristin ya i mekem olsem, yumi save talem se hem i stap long denja olsem man ya Asaf we i raetem Ol Sam. Hem i tokbaot denja we hem i stap long hem, i se: “Be mi, klosap tingting blong mi i no moa stap long hem, bilif blong mi klosap i lus.” Sipos Kristin ya i stap lukluk ponografi we i soem neked pija blong man o woman o blong wan man mo woman we tufala i mekem nogud fasin blong seks, ?yu ting se Kristin ya i save gat klin tingting mo pis wetem God? Nogat, Asaf i no gat pis, hem i se: “Mi mi harem nogud, i stat long moning, gogo i kasem long sapa. Evri moning, yu yu stap panisim mi.”—Sam. 73:2, 14.
Wan Kristin we i stap long denja olsem, i mas luksave se hem i nidim help blong God. Hem i save kasem help long kongregesen, from we Baebol i talem se: “Sipos wan man i stap folem wan rod we i no stret, be hem i no luksave, yufala we i bigman long Kristin fasin, yufala i mas traem blong givhan long hem blong hem i kambak long stret rod. Be yufala i mas mekem long kwaet fasin. Mo long semtaem, yufala i mas lukaot gud long yufala.” (Gal. 6:1) Wan o tu elda i save halpem Kristin ya, from we ‘prea blong man we i bilif bambae i mekem sikman ya i gud bakegen, mo blong God i fogivim sin blong hem.’ (Jem. 5:13-15) Olgeta we oli askem help blong karemaot ol nogud tingting blong ponografi, oli gat sem filing olsem Asaf we i haremgud tumas blong frengud bakegen wetem God.—Sam. 73:28.
Nating se i olsem, aposol Pol i talem se i gat samfala we oli no tanem tingting blong olgeta from ol “doti fasin blong seks, mo ol nogud fasin we man i no sem blong mekem.” (2 Kor. 12:21) Folem Grik tok we oli tanem i kam “doti fasin,” Profesa Marvin R. Vincent i talem se, “tok ya i min se wan samting i doti bitim mak.” Sam ponografi oli soem ol fasin we i moa nogud i bitim neked pija blong man o woman o blong man mo woman we i mekem nogud fasin blong seks. Sam narafala oli soem rabis fasin blong homoseksuol (seks bitwin man o woman), grup seks, seks wetem animol, ponografi wetem pikinini, gang rep, fosem ol woman, slef seks, o vaelens seks. Long taem blong Pol, samfala we “tingting blong olgeta i stap long tudak . . . oli no moa gat sem nating, nao oli stap gohed olbaot, oli stap mekem ol nogud fasin we man i no sem blong mekem, ale oli mekem evri samting we i no klin mo oli wantem tumas blong gohed long ol fasin ya.”—Efes. 4:18, 19.
Pol i tokbaot “ol doti fasin” long Galesia 5:19. Wan man Inglan we i stadi dip long Baebol i talem se tok ya “maet i save minim eni kaen doti fasin blong seks we i no nomol.” Ating i no gat wan Kristin we bambae i agri long ol rabis fasin blong seks we yumi tokbaot finis se oli doti mo oli rabis olgeta. Pol i givim ansa long Galesia 5:19-21 se “olgeta we oli stap mekem” ol doti fasin ya “bambae oli no save kasem Kingdom blong God.” Nao, sipos wan Kristin i stap gohed blong lukluk ponografi we i soem ol doti fasin blong seks mo i no wantem tanem tingting blong hem, kongregesen i mas putumaot hem. Long rod ya, bambae hem i no spolem ol narafala mo kongregesen i save stap klin.—1 Kor. 5:5, 11.
Yumi glad tumas se olgeta we oli bin foldaon long fasin ya blong lukluk ponografi, oli go luk ol elda mo oli kasem help blong sakemaot fasin ya blong lukluk ponografi. Jisas i talem long ol Kristin blong Sadis bifo se: “Yu mas mekem ol samting we klosap oli ded, oli kam strong bakegen, . . . yu mas gohed blong tingbaot ol samting we yu kasem finis, mo ol samting we yu harem. Mo yu mas gohed blong holemgud samting ya, mo yu mas tanem tingting blong yu. Sipos yu no wekap, . . . bambae yu no save nating se bambae mi kam long wanem taem.” (Rev. 3:2, 3) Wan Kristin i save tanem tingting blong hem mo kamaot long fasin ya blong lukluk ponografi we i olsem faea we i stap kakae hem.—Jud 22, 23.
Yes, yumi wanwan i mas lukaotgud blong no go klosap nating long eni doti fasin mo yumi mas stap longwe long ponografi.
10-16 JUN
OL GUDGUDFALA SAMTING LONG BAEBOL | EFESAS 1-3
“Ol Wok Mo Ol Plan Blong Jehova”
it-2 pej 837 haf 4
Tabu Tokhaed
Kingdom blong Mesaea. Long ol leta we Pol i raetem, hem i givim wan bigfala pija long saed blong ol tabu tokhaed we oli tokbaot Kraes. Long Efesas 1:9-11, Pol i tokbaot samting we God i mekem blong yumi save “ol tabu tokhaed” we bambae oli mekem stamba tingting blong hem i kamtru, mo i talem se: “Hemia i laenap wetem samting we hem nomo i glad blong mekem, mo i laenap wetem tingting we hem i gat fastaem. Mo tingting ya blong hem i blong putum wan rod blong manejem ol samting, we bambae i kamtru long en blong taem we hem i putumap. Hemia i blong hivimap olgeta samting oli kam long Kraes. Yes, olgeta samting long heven mo long wol oli kam wanples long hem, mo mifala i joen long hem, mo God i makemaot mifala blong mifala i kasem samting we hem i promes blong givim, from we hem i jusumaot mifala bifo finis, mo hemia i folem tingting blong hem. Mo evri samting we hem i mekem, oli laenap wetem samting we hem i wantem.” “Ol tabu tokhaed” ya oli joen wetem wan gavman, hemia Kingdom blong God we Mesaea i rul long hem. “Olgeta samting long heven” we Pol i tokbaot, hemia ol man we bambae oli laef long Kingdom ya blong heven wetem Kraes. Mo bambae oli rul long ‘olgeta samting long wol’ ya. Jisas i soemaot long ol disaepol blong hem se ol tabu tokhaed ya oli joen wetem Kingdom taem hem i talem long olgeta se: “God i letem yufala i kasem save ol tabu tokhaed blong Kingdom blong hem.”—Mk 4:11.
w12 1/7 pej 27-28 haf 3-4
Jehova i Mekem Famle Blong Hem, i Joen Gud
3 Ol samting we Jehova i mekem oli givhan blong plan blong hem i kamtru. Hem i mekemrere olgeta samting long heven mo long wol, blong oli kam joen wanples olsem wan famle nomo. I gat tu samting we God i mekem blong plan ya blong hem i kamtru. (Ridim Efesas 1:8-10.) Fastaem, God i rerem ol tabu Kristin blong oli laef long heven. Taem oli stap long heven, bambae oli gohed blong wok aninit long Jisas we i hed blong olgeta. Long dei blong Pentekos long yia 33, God i stat blong jusumaot ol man we bambae oli rul wetem Jisas. Hem i makemaot olgeta wetem tabu spirit. (Wok 2:1-4) From ded blong Jisas, God i luk olgeta se oli stret man long fes blong hem mo oli save kasem laef. Ol tabu Kristin oli save se God i adoptem olgeta olsem ol ‘pikinini blong hem.’—Rom 3:23, 24; 5:1; 8:15-17.
4 Nambatu samting, se God i rerem ol man we bambae oli laef long Paradaes long wol ya. Olgeta ya oli wantem stap aninit long Kingdom we Jisas mo ol tabu Kristin oli joen long hem. Bambae “bigfala hip blong ol man” i faswan blong laef long Paradaes. (Rev. 7:9, 13-17; 21:1-5) Long 1,000 yia rul blong Kraes, bambae plante milian man oli laef bakegen mo bambae oli laef wetem bigfala hip blong man ya. Olgeta ya oli ‘ol samting long wol.’ (Rev. 20:12, 13) !Tru, bambae yumi gat plante janis blong soemaot se yumi joen gud! Long en blong 1,000 yia, bambae Setan i fri blong smoltaem, mo bambae hem i traem ol man laswan. Olgeta man we oli stanap strong, bambae God i adoptem olgeta, oli kam ol ‘pikinini blong hem’ long wol ya.—Rom 8:21; Rev. 20:7, 8.
Traem Faenem Ol Gudfala Samting Ya
w13 15/2 pej 28 haf 15
Yu No Mas Mekem Eni Samting We i Blokem Jehova Blong i No Ona Long Yu
15 Taem yumi stanap strong blong mekem wok blong Jehova, hemia i save givhan long ol narafala blong oli mekem samting we Jehova i save leftemap olgeta from. Aposol Pol i raetem leta long kongregesen blong Efesas i se: “Mi askem strong long yufala, se plis yufala i no letem tingting blong yufala i foldaon from ol trabol ya we mi mi stap kasem from yufala, we oli stap traem mi tumas. Olgeta samting ya oli blong leftemap yufala.” (Efes. 3:13) ?From wanem Pol i talem se ol trabol we oli kasem hem, oli blong leftemap ol Kristin blong Efesas? Taem Pol i gohed blong halpem olgeta nating se hem i kasem trabol, hem i soemaot long olgeta se samting we i moa impoten long wan Kristin, hemia blong mekem wok blong God. Sipos Pol i lego wok blong God taem hem i kasem trabol, maet ol Kristin ya oli save ting se wosip we oli mekem long Jehova, wok blong prij, mo promes we oli putum tingting blong olgeta i stap long hem, oli no impoten. Be taem Pol i stanap strong, hem i soemaot long olgeta se oli mas rere blong lego eni samting, blong oli stap olsem disaepol blong Kraes.
cl pej 299 haf 21
“Save Lav Ya We Kraes i Soemaot”
21 Grik tok we oli tanem i kam “save,” i minim se yumi “ekspiriensem wan samting.” Yumi save soemaot lav long semfala rod we Jisas i mekem, taem yumi yusum laef blong yumi blong givhan long narafala, yumi givim samting we oli nidim, mo yumi fogivim olgeta long fulhat blong yumi. Long rod ya, yumi ekspiriensem “lav ya we Kraes i soemaot long yumi we i bigwan tumas i bitim save blong yumi.” Yumi neva mas fogetem se moa we yumi folem ol fasin blong Kraes, moa we bambae yumi kam klosap long man ya we Jisas i folem gud ol fasin blong hem, hemia Jehova God.
17-23 JUN
OL GUDGUDFALA SAMTING LONG BAEBOL | EFESAS 4-6
“Putum Olgeta Klos Blong Faet We God i Givim”
Ol Yangfala Stanap Strong Agensem Setan
APOSOL POL i talem se ol Kristin oli olsem ol soldia. !Yumi gat ol enemi, mo yumi stap faet! Faet blong yumi i no agensem ol man, be i agensem Setan mo ol rabis enjel. Olgeta oli gat gudhan blong faet, from we oli faet plante taosen yia finis. Maet yu ting se yu no save winim faet ya, antap moa sipos yu yu wan yangfala. ?Olsem wanem? ?Ol yangfala oli save winim ol strong enemi ya? !Yes, oli stap win finis! ?From wanem oli win? From we Jehova i givim paoa long olgeta. Mo tu, oli “putum olgeta klos blong faet we God i givim,” olsem ol soldia we oli tren gud mo oli rere blong faet.—Ridim Efesas 6:10-12.
Ol Yangfala Stanap Strong Agensem Setan
4 Trutok blong Baebol i olsem wan strap we i protektem yumi long ol giaman tijing. (Jon 8:31, 32; 1 Jon 4:1) Sloslo yumi laekem ol trutok blong Baebol, nao i isi moa blong folem ol rul blong God, hemia “aean klos we i kavremap jes.” (Ol Sam 111:7, 8; 1 Jon 5:3) Mo tu, taem yumi kasem save moa long trutok, yumi kam gud moa blong yusum trutok ya blong agensem ol enemi blong yumi.—1 Pita 3:15.
7 Sipos yumi mekem ol stret fasin we Jehova i wantem, samting ya i save protektem “hat” blong yumi. Taswe stret fasin i olsem aean klos we i kavremap jes. (Ol Proveb 4:23, NW) Wan soldia i no save jenisim aean klos ya, wetem klos we oli wokem long wan narafala samting we i no strong. Long sem fasin, yumi neva mas jenisim ol stret fasin we Jehova i wantem, wetem ol fasin we yumi nomo i wantem. Yumi no gat naf waes blong protektem hat blong yumi. (Ol Proveb 3:5, 6) Taswe, oltaem yumi mas jekem “aean klos we i kavremap jes,” blong meksua se oli stap protektem hat blong yumi.
10 Sus blong soldia blong Rom i givhan long hem blong i faet, be sus we God i givim, i givhan long yumi blong yumi “talemaot gud nius blong pis.” (Aesea 52:7; Rom 10:15) Nating se i olsem, yumi nidim strong tingting blong prij. Bo we i gat 20 yia, i talem se: “Taem mi skul, mi fraet blong prij long ol yangfala long klas. Ating mi mi sem. Taem mi tingting bak, mi no save from wanem mi sem. Naoia mi glad blong prij long ol yangfala.”
w18.05 pej 25-26 haf 13, 16, 20
Ol Yangfala Stanap Strong Agensem Setan
13 ?Wanem ol ara blong Setan we ‘faea i laet long olgeta’? Maet hemia ol giaman toktok long saed blong Jehova. Setan i wantem we yu ting se Jehova i no lavem yu, mo se i no gat wan man we i tingbaot yu. Ida we i gat 19 yia, i talem se: “Plante taem mi harem se Jehova i stap longwe, mo i no wantem kam Fren blong mi.” Taem Ida i harem nogud olsem, ?hem i mekem wanem? Hem i se: “Ol miting oli givhan bigwan long bilif blong mi. Bifo, mi no ting se i gat wan we i wantem lesin long mi, taswe mi no ansa, mi jes sidaon nomo. Be naoia, mi rere gud mo mi traem ansa tu o tri taem. I had, be biaen mi harem gud. Ol brata mo sista tu oli leftemap tingting blong mi. Ol miting oli mekem mi mi harem se Jehova i lavem mi.”
16 Hat i protektem bren blong soldia, mo long sem fasin, ‘strong tingting se God bambae i sevem yumi’ i save protektem tingting blong yumi. (1 Tesalonaeka 5:8; Ol Proveb 3:21) Sipos yumi tingting oltaem long ol promes blong God, ol trabol oli no save mekem tingting blong yumi i foldaon. (Ol Sam 27:1, 14; Ol Wok 24:15) Be sipos yumi wantem se strong tingting ya i protektem yumi, yumi mas bilif se ol promes ya oli tru. I min se: !Oltaem yumi mas werem “hat” ya, yumi no karem long han nomo!
20 Aposol Pol i talem se Tok blong God i olsem wan naef blong faet we Jehova i givim. Be yumi mas lan blong yusum gud naef ya blong pruvum se bilif blong yumi i tru, mo blong stretem tingting blong yumi. (2 Korin 10:4, 5; 2 Timoti 2:15) ?Olsem wanem blong kam gud moa? Sebastian we i gat 21 yia, i talem se: “Mi raetemdaon wan vas long evri japta blong Baebol we mi ridim. Hemia i olsem wan lis blong ol vas we mi laekem tumas.” Samting ya i mekem se hem i kasem save moa long tingting blong Jehova. Daniel i gohed se: “Taem mi ridim Baebol, mi jusum ol vas we mi save yusum blong givhan long ol man long wok blong prij. Ol man oli glad taem oli luk se yu laekem tumas Baebol mo yu stap traehad blong givhan long olgeta.”
Traem Faenem Ol Gudfala Samting Ya
it-1 pej 1128 haf 3
Tabu
Tabu Spirit. Paoa o spirit we i wok folem samting we Jehova i wantem blong mekem stamba tingting blong hem i kamtru. Hem i klin, i tabu, mo God i yusum blong mekem ol gudfala wok. Oli singaotem se “tabu spirit.” (Sam 51:11; Lu 11:13; Ro 1:4; Ef 1:13) Taem tabu spirit i wok long wan man, hem i mekem we man ya i kam tabu o i gat klin fasin. Eni rabis o doti fasin we man i mekem, i save mekem tabu spirit i “harem nogud.” (Ef 4:30) Tabu spirit i soemaot klia fasin blong God mo se hem i save “harem nogud.” Eni nogud fasin we man i mekem, i save “kilim i ded faea blong spirit.” (1Te 5:19) Sipos man i gohed blong mekem ol nogud fasin, tabu spirit blong God bambae i “harem nogud,” mo man ya bambae i stap olsem wan enemi blong God. (Aes 63:10) Jisas i talem se man we i tok agensem tabu spirit, God bambae i no save fogivim hem long wol ya no long wol we bambae i kam.—Mt 12:31, 32; Mk 3:28-30; yu luk SPIRIT.
it-1 pej 1006 haf 2
Griri
Fasin i soemaot. Bambae i gat wan taem we fasin blong man hem wan bambae i soemaot se hem i griri. Wan man blong raetem Baebol we nem blong hem Jemes, i talem se taem man i wantem wan samting tumas, mo samting ya i kam strong long tingting blong hem, hemia i save pulum hem blong mekem sin. (Jem 1:14, 15) I isi blong luksave wan man we i griri, tru long ol fasin blong hem. Aposol Pol i talem se man we i griri, hem i olsem man we i stap mekem wosip long ol aedol. (Ef 5:5) Man we i griri i putum ol samting we hem i wantem tumas i stap fasples olsem god blong hem, mo i putum wosip blong Jehova long seken ples.—Ro 1:24, 25.
24-30 JUN
OL GUDGUDFALA SAMTING LONG BAEBOL | FILIPAE 1-4
“No Letem Tingting Blong Yu i Trabol From Eni Samting”
“Pis Ya Blong God . . . i Bitim Olgeta Save Blong Yumi”
10 ?Wanem i save givhan long yu, blong yu ‘no letem tingting i trabol,’ be yu gat “pis ya blong God”? Ol tok we Pol i raetem long ol Kristin long Filipae, oli soemaot se taem yu wari, yu mas prea blong talemaot ol wari ya. (Ridim 1 Pita 5:6, 7.) Taem yu prea, yu mas bilif strong se Jehova i lavem yu mo i wantem givhan long yu. Yu mas talem tangkiu long hem from evri blesing we yu kasem. Mo yu no mas fogetem se, Jehova i save “mekem plante moa samting i bitim olgeta samting we yumi askem no yumi tingbaot.”—Efesas 3:20.
“Pis Ya Blong God . . . i Bitim Olgeta Save Blong Yumi”
7 Taem ol brata long Filipae oli ridim leta blong Pol, ?oli tingbaot wanem? Ating plante oli tingbaot samting we i bin hapen long Pol mo Saelas, mo samting we Jehova i mekem we tufala i sek long hem. ?Leta blong Pol i tijim olgeta long wanem samting? I tijim olgeta se: Yufala i no mas wari. Yufala i prea, nao bambae yufala i kasem ‘pis ya blong God we i bitim olgeta save blong yumi.’ ?Hem i minim wanem? Sam Baebol oli talem se, “i bitim ol samting we yumi drim long hem,” o “i moagud i winim ol plan blong man.” Ale, Pol i stap talem se “pis ya blong God” i moa gud i bitim eni samting we yumi save tingbaot. Plante taem, yumi no save rod blong winim problem blong yumi, be Jehova i save. Mo hem i save mekem samting we yumi no tingbaot nating.—Ridim 2 Pita 2:9.
“Pis Ya Blong God . . . i Bitim Olgeta Save Blong Yumi”
16 ?Wanem i hapen taem yumi kasem “pis ya blong God we i bigwan tumas i bitim olgeta save blong yumi”? Baebol i talem se pis ya bambae i “lukaot gud” long hat mo tingting blong yumi. (Filipae 4:7) Long olfala lanwis, oli yusum tok ya “lukaot gud” blong tokbaot wan grup blong ol soldia we oli protektem wan taon. Wan grup olsem i protektem taon ya Filipae. Ol man oli save slip gud long naet from we oli save se ol soldia oli stap lukaot gud long taon blong olgeta. Long sem fasin, taem yumi gat “pis ya blong God,” yumi no wari, be tingting blong yumi i spel gud. Yumi save se Jehova i stap lukaot gud long yumi mo i wantem se yumi win. (1 Pita 5:10) Hemia i protektem tingting mo hat blong yumi, i mekem se yumi no wari tumas mo tingting i no foldaon.
Traem Faenem Ol Gudfala Samting Ya
it-2 pej 528 haf 5
Ol Presen
Waen we oli kafsaedem. Taem ol man Isrel oli stap long Promes Lan, oli givim waen olsem ol narafala presen we man i givim blong mekem sakrefaes. (Na 15:2, 5, 8-10) Oli kafsaedem waen long ol presen we oli stap antap long olta blong mekem sakrefaes. (Na 28:7, 14; skelem wetem Eks 30:9; Na 15:10.) Aposol Pol i raet i go long ol Kristin blong Filipae se: “Bilif blong yufala i pulum yufala blong mekem sakrefaes mo tabu wok blong God, mo hemia i olsem wan presen we yufala i givim long hem. Mo sipos mi mi olsem waen we oli kafsaedem i go long presen ya blong yufala, bambae mi mi glad.” Pol i yusum pijatok ya blong waen we oli kafsaedem i go long presen blong soemaot se hem i rere blong givim laef blong hem long bihaf blong ol Kristin. (Fil 2:17) Bifo we hem i ded, hem i raet i go long Timoti se: “Mi mi olsem waen we oli kafsaedem finis i go long olta, mo klosap nao bambae mi mi fri.”—2Ti 4:6.
!‘Olgeta We Oli Laef Bakegen Fastaem’ Oli Stat Girap Finis!
5 Afta long hem, ol tabu Kristin we oli mekemap “Isrel blong God,” olgeta tu oli mas go joen wetem Masta Jisas Kraes we i king long heven, nao bambae oli “stap oltaem wetem Masta.” (Galesia 6:16, NW; 1 Tesalonaeka 4:17) Blong go long heven oli mas “laef bakegen fastaem long ol narafala,” yes oli “ol faswan man blong laef bakegen.” (Filipae 3:10, 11, NW; Revelesen 20:6, NW) Taem olgeta evriwan ya oli laef bakegen finis, ale bambae i taem blong mekem ol narafala milian dedman oli laef bakegen blong kasem janis blong laef olwe long Paradaes long wol. Taswe, nating se bambae yumi laef long heven no long wol, yumi intres tumas blong kasem save long ‘laef bakegen ya we i mas hapen fastaem.’ ?Bambae oli laef bakegen wetem wanem kaen bodi? ?Bambae oli laef bakegen wetaem?