“Yu Lesin Gud Long Toktok Blong Ol Waes Man”

1. ?Wanem ol defren rod blong kasem advaes, mo from wanem yumi nidim?

WANWAN taem yumi evriwan i nidim advaes. Samtaem yumi nao yumi askem advaes long wan man we yumi respektem hem. Be samtaem wan brata we i wari long yumi, maet i save talem stret long yumi se yumi “stap folem wan rod we i no stret,” wan rod we bambae yumi rigret from. (Gal. 6:1) Mo samtaem, wan man i save stretem yumi mo givim advaes long yumi afta we yumi mekem wan bigfala sin. Nomata se yumi kasem ol advaes ya from wanem risen, yumi mas lesin from we hemia bambae i mekem i gud long yumi, mo i save sevem laef blong yumi.—Prov. 6:23.

2. Folem Ol Proveb 12:15 ?from wanem yumi mas lesin long advaes?

² Stamba vas blong Wajtaoa ya i enkarejem yumi blong “lesin gud long toktok blong ol waes man.” (Prov. 22:17) I no gat wan man we i save evri samting, oltaem i mas gat wan man we i gat moa save o ekspiriens i bitim yumi. (Ridim Ol Proveb 12:15.) Taswe taem yumi lesin long advaes, yumi soemaot se yumi gat tingting daon. Mo tu, yumi luksave se i gat sam samting we yumi no naf blong mekem, mo yumi nidim we narafala i givhan long yumi blong kasem ol mak blong yumi. Jehova i pulum waes King Solomon blong raetem se: “Wok i save gohed gud, taem i gat plante man blong givim advaes.”—Prov. 15:22.

3. ?Wanem tu defren rod blong kasem advaes?

³ Yumi save kasem advaes we i kam stret long yumi o i kam long wan defren rod. ?I minim wanem se i kam long wan defren rod? Maet yumi ridim sam samting long Baebol o long wan long ol buk blong yumi we i mekem se yumi tingbaot sam samting we yumi stap mekem, mo i pulum yumi blong jenisim ol tingting mo fasin blong yumi. (Hib. 4:12) Hemia nao advaes we yumi kasem long wan defren rod. ?Be i minim wanem se advaes i kam stret long yumi? Maet wan elda o wan narafala brata we i naf blong givim advaes i talem stret long yumi samting we yumi mas kamgud moa long hem. Hemia nao advaes we i kam stret long yumi. Sipos wan man i lavem yumi mo i givim advaes long yumi we i kamaot long Baebol, yumi sud glad mo lesin long advaes ya mo traehad blong folem.

4. Folem Prija 7:9, ?yumi no mas mekem wanem taem yumi kasem advaes?

⁴ Maet yumi faenem i had blong lesin mo folem ol advaes we i kam stret long yumi. Mo maet yumi save kam kros. ?From wanem? Nating se yumi luksave se yumi sinman, be maet i had blong akseptem advaes taem wan man i talem stret long yumi mastik we yumi mekem. (Ridim Prija 7:9.) Maet yumi save mekem eskius. Maet yumi talem se hem i no toktok kaen o yumi traem faenem poen long man we i givim advaes o yumi tok nogud long hem se: ‘?Hem i ting se hem i hu blong givim advaes long mi? ?Hem i ting se hem i gud moa long mi?’ Sipos yumi no laekem advaes ya, bambae yumi no wantem save o maet yumi go askem advaes long wan narafala man mo yumi hop se bambae i talem wan advaes we yumi glad long harem.

5. ?Bambae yumi tokbaot wanem long stadi ya?

⁵ Long stadi ya, bambae yumi tokbaot eksampol blong sam man long Baebol we oli sakemaot advaes mo olgeta we oli akseptem advaes. Mo tu, bambae yumi tokbaot samting we i save halpem yumi blong akseptem advaes mo kasem gudfala samting from.

OLI SAKEMAOT ADVAES

6. ?Yumi lanem wanem long eksampol blong King Rehoboam?

⁶ Tingbaot eksampol blong Rehoboam. Taem hem i kam king blong Isrel, ol man oli kam askem long hem blong i mekem hevi yok ya we papa blong hem Solomon i putum long olgeta, i kam laet. Ale, Rehoboam i go luk ol olfala man long Isrel mo i askem advaes long olgeta se bambae hem i talem wanem long ol man ya. Nao olgeta oli givim advaes long hem se sipos hem i mekem samting we ol man ya oli askem, bambae oli gohed blong wok blong hem oltaem. (1 King 12:3-7) Be Rehoboam i no glad long advaes ya, ale i go askem advaes long ol man we hem i gruap wetem olgeta. Ol man ya oli gat samwe long 40 yia, taswe i sua se oli gat sam ekspiriens long laef. (2 Kron. 12:13) Be long taem ya, oli givim nogud advaes long Rehoboam. Oli talem long hem blong i mekem yok blong ol man ya i kam hevi moa. (1 King 12:8-11) Rehoboam i kasem tu defren advaes, taswe hem i sud prea mo askem Jehova se weswan advaes nao hem i mas folem. Be hem i jusum blong akseptem advaes we hem i glad blong harem, mo i lesin long advaes blong ol yangfala man ya. From samting ya, Rehoboam mo ol man Isrel oli kasem trabol. Hemia i sem mak tede, ol advaes we yumi kasem, plante taem i no samting we yumi wantem harem. Be sipos advaes ya i kamaot long Baebol, yumi mas akseptem.

7. ?Yumi lanem wanem long eksampol blong King Usia?

⁷ King Usia i sakemaot advaes. Hem i go insaed long tempol blong Jehova long ples ya we ol pris nomo oli gat raet blong go long hem mo i traem blong bonem insens. Ol pris blong Jehova oli talem long hem se: “!Usia, i no stret we yu bonem insens i go long Jehova! Ol pris nomo oli mas bonem insens.” ?Usia i mekem wanem? Sipos hem i gat tingting daon, i akseptem advaes mo i aot kwiktaem long tempol, maet Jehova i save fogivim hem. Be, “Usia . . . i kros we i kros.” ?From wanem hem i sakemaot advaes? Maet from we hem i ting se hem i king, hem i save mekem eni samting we hem i wantem. Be Jehova i no agri long samting ya. Mo from we Usia i mekem samting we hem i no gat raet blong mekem, Jehova i mekem we hem i kasem leprosi, mo ‘leprosi i stap long hem go kasem we hem i ded.’ (2 Kron. 26:16-21) Eksampol blong Usia i tijim yumi se nomata se yumi yangfala o olfala, sipos yumi sakemaot ol advaes we i kamaot long Baebol, Jehova bambae i no moa glad long yumi.

OLI AKSEPTEM ADVAES

8. ?Job i mekem wanem taem hem i kasem advaes?

⁸ Baebol i tokbaot sam rabis eksampol, be i tokbaot eksampol blong sam gudfala man tu we oli kasem blesing from we oli lesin long advaes. Tingbaot eksampol blong Job. Nating se hem i no stret gud olgeta, be hem i lavem Jehova mo i wantem mekem hem i glad. Taem hem i fesem sam hadtaem, hem i gat sam rong tingting. From samting ya, Elihu mo Jehova oli givim advaes blong stretem hem. ?Job i mekem wanem? Hem i gat tingting daon mo i akseptem advaes. Hem i se: “Mi toktok, be mi no kasemsave . . . mi tekembak ol samting we mi talem, mo mi tanem tingting blong mi, mi sidaon long das mo asis.” Jehova i blesem Job from we hem i gat tingting daon.—Job 42:3-6, 12-17.

9. ?Moses i mekem wanem taem hem i kasem advaes, mo from wanem hemia i wan gudfala eksampol?

⁹ Moses i soem gudfala eksampol taem i akseptem advaes afta we hem i mekem wan bigfala mastik. I gat wan taem we Moses i kros tumas mo i no moa ona long Jehova. From samting ya, Moses i lusum privilej we hem i gat blong go insaed long Promes Lan. (Nam. 20:1-13) Taem Moses i askem long Jehova blong i lukluk bakegen long desisen ya, Jehova i talem long hem se: “Yu no moa tokbaot samting ya long mi bakegen.” (Dut. 3:23-27) Moses i no kam kros from samting ya. Be hem i akseptem desisen blong Jehova, nao i gohed blong yusum hem blong lidim ol man Isrel. (Dut. 4:1) Job mo Moses oli soem gudfala eksampol we yumi save folem blong akseptem advaes. Job i jenisim rong tingting we hem i gat mo i no mekem eskius. Moses i soemaot se hem i akseptem advaes blong Jehova taem hem i gohed blong holemstrong long Jehova, nating se hem i lusum privilej we hem i tinghae long hem.

10. (1) Folem Ol Proveb 4:10-13 ?yumi kasem wanem taem yumi akseptem advaes? (2) ?Wanem tingting blong samfala long advaes we oli kasem?

¹⁰ Sipos yumi folem eksampol blong ol gudfala man olsem Job mo Moses, yumi save kasem gudfala samting from. (Ridim Ol Proveb 4:10-13.) Hemia nao samting we plante brata mo sista blong yumi oli mekem. Makem samting we wan brata nem blong hem Emmanuel, we i laef long Kongo, i talem taem hem i kasem wan advaes. Hem i se: “Ol brata long kongregesen blong mi we oli bigman long spirit, oli luksave se mi stap folem wan rod we i save spolem frensip blong mi wetem Jehova, mo oli traem blong halpem mi. Mi folem advaes blong olgeta, mo hemia i halpem mi blong blokem plante problem.”b Wan paenia long Kanada we nem blong hem Megan, i talem se: “Plante taem, advaes we mi kasem, i no samting we mi wantem harem. Be blong talem stret, hemia samting we mi nidim blong harem.” Mo wan brata long Kroasia we nem blong hem Marko, i se: “Mi lusum privilej we mi gat, be taem mi tingtingbak mi luksave se advaes we mi kasem i halpem mi blong frengud bakegen wetem Jehova.”

11. ?Brata Karl Klein i talem wanem long saed blong fasin blong akseptem advaes?

¹¹ Brata Karl Klein we i wok olsem wan memba blong Hed Kampani, hem tu i wan gudfala eksampol blong akseptem advaes. Long laef stori blong hem, hem i tokbaot wan taem we hem i bin kasem wan strong advaes long Joseph F. Rutherford, we i wan gudfala fren blong hem. Brata Klein i talem se: “Fastaem, mi mi harem nogud taem mi kasem advaes ya. Nekis taem we [Brata Rutherford] i luk mi, hem i talem se, ‘!Halo Karl!’ Be from we mi harem nogud yet, mi talem halo long hem long smol voes nomo. Nao hem i talem se, ‘!Karl, yu lukaot! !Setan i rere blong kakae yu!’ Nao mi talem se, ‘O, mi mi no kros long yu Brata Rutherford.’ Be hem i savegud se mi kros long hem yet, mo hem i ripitim bakegen se, ‘I oraet. Be yu lukaot, Setan i rere blong kakae yu.’ !Hem i talem samting we i stret nomo! Taem yumi gohed blong kros long wan brata, speseli sipos hem i gat raet stretem yumi . . . i isi nomo blong Setan i kasem yumi.”c (Efes. 4:25-27) Brata Klein i akseptem advaes blong Brata Rutherford mo tufala i gohed blong stap olsem gudfala fren.

?WANEM I SAVE HALPEM YUMI BLONG AKSEPTEM ADVAES?

12. ?Olsem wanem tingting daon i save halpem yumi blong akseptem advaes? (Ol Sam 141:5)

¹² ?Wanem i save halpem yumi blong akseptem advaes? Yumi mas gat tingting daon mo tingbaot se yumi no stretgud olgeta mo samtaem yumi save mekem samting we i krangke. Olsem we yumi bin tokbaot, fastaem Job i gat rong tingting. Be biaen, hem i jenisim tingting blong hem mo Jehova i blesem hem. ?From wanem? From we Job i gat tingting daon. Mo hem i soemaot samting ya taem hem i akseptem advaes we Elihu i givim long hem, nating se Elihu i yang moa long hem. (Job 32:6, 7) Tingting daon bambae i givhan long yumi tu blong folem advaes nating se maet yumi ting se yumi no nidim, o taem wan we i yang moa i givim advaes long yumi. Wan elda long Kanada i talem se: “Bambae i had blong yumi gohed gud, sipos i no gat wan man i givim advaes long yumi.” Yumi evriwan i nidim moa blong wokem ol frut blong tabu spirit, mo blong kam wan gudfala man blong prij mo tijim gud nius long narafala.—Ridim Ol Sam 141:5.

13. ?Yumi mas gat wanem tingting long ol advaes we yumi kasem?

¹³ Tingbaot advaes we yu kasem olsem wan rod we i soemaot se God i lavem yu. Jehova i wantem se yumi gat gudfala laef. (Prov. 4:20-22) Taem hem i yusum Tok blong hem, wan buk blong yumi, o wan Kristin we i gat ekspiriens blong givim advaes long yumi, hemia i soemaot se hem i lavem yumi. Olsem Hibru 12:9, 10 i talem, “oltaem hem i stap stretem yumi blong mekem i gud long yumi.”

14. ?Yumi mas tingbaot wanem taem yumi kasem advaes?

¹⁴ Tingbaot advaes, be i no fasin blong man blong givim advaes. Samtaem, maet yumi harem se fasin we man i folem blong givim advaes long yumi i no stret. I tru se eniman we i givim advaes, i sud mekem long wan fasin we bambae i isi blong yumi akseptem.d (Gal. 6:1) Be sipos yumi nao yumi kasem advaes, yumi mas tingbaot moa mesej, nating we yumi ting se man ya i sud talem long wan fasin we i gud moa. Maet yumi save askem se: ‘Sipos mi no laekem fasin blong man ya blong givim advaes, ?be i gat sam samting long advaes ya we i save givhan long mi? ?Mi mi naf blong no tingbaot fasin blong man ya blong givim advaes mo lanem lesen from advaes ya?’ Yumi waes sipos yumi traehad blong faenem gudfala samting long eni advaes we narafala i givim long yumi.—Prov. 15:31.

ASKEM ADVAES MO KASEM GUDFALA SAMTING FROM

15. ?From wanem yumi mas askem advaes?

¹⁵ Baebol i leftemap tingting blong yumi se yumi mas askem advaes. Ol Proveb 13:10 i talem se: “Waes, hem i blong olgeta we oli lukaotem advaes.” !Hemia i tru! Olgeta we oli askem advaes i bitim we oli wet nomo blong narafala i givim advaes long olgeta, plante taem bambae oli gohed gud moa long saed blong spirit i bitim olgeta we oli no askem advaes. Taswe i gud yu tekem janis blong askem advaes.

16. ?Wetaem yumi save askem advaes?

¹⁶ ?Wetaem yumi save askem advaes long wan narafala Kristin? Tingbaot sam long ol situesen ya. (1) Wan sista i askem wan ekspiriens pablisa blong i joen wetem hem long stadi blong hem. Biaen, hem i askem advaes blong hem i save kam gud moa long fasin blong hem blong tij. (2) Wan singel sista i wantem pem sam klos, ale hem i askem wan sista we i strong long saed blong spirit blong i talemaot tingting blong hem long saed blong ol klos ya. (3) Wan brata bambae i givim faswan pablik tok blong hem. Ale hem i askem wan ekspiriens brata blong i lesin gud long tok blong hem, mo biaen i save givim sam advaes blong hem i save kam gud moa. Wan brata we i givim tok blong plante yia finis, hem tu i save askem advaes long ol ekspiriens brata mo biaen i folem advaes we oli givim.

17. ?Wanem i kamaot taem yumi lesin mo akseptem advaes?

¹⁷ Long ol wik o manis we i kam, bambae yumi evriwan i kasem sam advaes, we maet i kam stret long yumi o long wan narafala rod. Sipos samting ya i hapen long yu, i gud yu tingbaot ol poen we yumi jes tokbaot. Gat tingting daon. Tingbaot advaes, be i no fasin blong man blong givim advaes. Mo folem advaes we yu kasem. I no gat wan long yumi we i bon wetem waes. Be sipos yumi ‘lesin long advaes, mo yumi akseptem we man i stretem yumi,’ Tok blong God i promes se bambae yumi “kam waes.”—Prov. 19:20.