Lukaotem Taon Ya We Bambae i Stap Oltaem

1. ?Jisas i talemaot se wanem bambae i hapen long Jerusalem?

SAM DEI bifo we Jisas Kraes i ded, hem i talemaot wan profet tok long ol man blong hem. Hem i givim woning se wan dei bambae “ol soldia oli raonemgud Jerusalem.” (Luk 21:20) Jisas i talem long ol man blong hem se taem oli luk ol soldia raonemgud Jerusalem, oli mas kwik blong ronwe long Judia.—Luk 21:​21, 22.

2. ?Wanem advaes we aposol Pol i givim long ol Kristin long Judia mo Jerusalem?

² Sam yia bifo we ol soldia blong Rom oli raonemgud Jerusalem, aposol Pol i raetem wan leta we i givhan bigwan long ol Kristin, hemia buk blong Hibru. Long leta ya, Pol i givim ol impoten advaes long ol Kristin long Judia mo Jerusalem blong rerem olgeta from samting we bambae i hapen long fiuja. ?Wanem samting bambae i hapen long fiuja? Ol enemi bambae oli spolem Jerusalem. Sipos ol Kristin ya oli wantem stap laef, oli mas rere blong lego haos blong olgeta mo bisnes blong olgeta tu. Taswe Pol i tokbaot taon blong Jerusalem se: “Long ples ya yumi no gat wan taon we i save stap oltaem.” Biaen, hem i gohed se: “Be yumi stap traehad blong lukaotem taon ya we bambae i kam.”—Hib. 13:14.

3. ?“Taon we fandesen blong hem i strong” i minim wanem? ?Mo from wanem yumi stap wet long taon ya?

³ I sua se ol man oli tok nogud mo jikim ol Kristin we oli lego Jerusalem mo Judia, be desisen blong olgeta i sevem laef blong olgeta. Tede, ol man oli jikim yumi from we yumi no trastem ol man blong oli stretem ol problem blong wol, mo yumi no mekem mane i kam impoten samting long laef blong yumi. Taswe, ?from wanem nao yumi mekem desisen ya? Hemia from we yumi save se i no longtaem, Kingdom blong God bambae i spolem rabis wol ya. Taswe yumi stap lukaotem “wan taon we fandesen blong hem i strong,” hemia “taon ya we bambae i kam,” we i minim Kingdom blong God.a (Hib. 11:10; Mat. 6:33) Ol smol stamba tok blong stadi ya bambae oli tokbaot: (1) olsem wanem ol advaes blong Pol i halpem ol fas Kristin blong oli gohed blong lukaotem “taon ya we bambae i kam,” (2) olsem wanem Pol i rerem olgeta from ol samting we bambae oli hapen long fiuja, mo (3) olsem wanem ol advaes blong Pol i save halpem yumi tede.

TRASTEM JEHOVA FROM WE BAMBAE HEM I NEVA LIVIM YU YU STAP YU WAN

4. ?From wanem Jerusalem i wan impoten ples long ol Kristin?

⁴ Taon blong Jerusalem i wan impoten ples long ol Kristin. Faswan Kristin kongregesen i stat long taon ya long yia 33 K.T., mo hed kampani i stap long ples ya. Antap long hemia, plante Kristin oli gat ol haos mo plante samting insaed long taon ya. Be Jisas i givim woning long ol man blong hem se bambae oli mas kamaot long Jerusalem mo long Judia tu.—Mat. 24:16.

5. ?Olsem wanem Pol i halpem ol Kristin blong oli rere blong lego Jerusalem?

⁵ Pol i wantem halpem ol Kristin blong oli rere blong lego Jerusalem, taswe hem i givhan long olgeta blong kasemsave tingting we Jehova i gat long taon ya. Pol i mekem olgeta oli tingbaot se Jehova i no moa glad long ol pris long tempol mo long ol sakrefaes we oli stap givim long ples ya. (Hib. 8:13) Mo tu, plante man long taon ya oli no wantem luksave se Jisas nao i Mesaea. Taswe ol man oli no moa nid blong go long Jerusalem blong mekem wosip long Jehova, mo i no longtaem Jerusalem mo tempol bambae i lus.—Luk 13:​34, 35.

6. ?From wanem ol Kristin oli nidim blong harem ol tok ya we Pol i talem long Hibru 13:​5, 6?

⁶ Taem Pol i raet i go long ol Hibru Kristin, ol man long taon blong Jerusalem oli gat wan gudfala laef. Wan man Rom long taem ya we i stap raetem ol buk i tokbaot Jerusalem se i wan taon we plante man oli save long hem. Evri yia, ol man Jiu we oli stap long ol defdefren ples oli stap go long Jerusalem blong joen long ol lafet, mo oli stap spenem plante mane long ples ya. I luk olsem se sam Kristin tu oli winim plante mane long ples ya. Maet hemia nao from wanem Pol i talem long olgeta se: “I nogud yufala i gat fasin ya blong laekem mane tumas. Sipos yufala i gat wanem samting, be yufala i mas harem gud long hem.” Biaen, hem i talem bakegen ol tok blong wan vas we i tokbaot promes we Jehova i mekem long ol man blong hem, se: “Bambae mi mi neva lego yu, mo bambae mi neva livim yu yu stap yu wan.” (Ridim Hibru 13:​5, 6; Dut. 31:6; Sam 118:6) Ol Kristin long Jerusalem mo long Judia oli nidim blong harem ol tok ya. ?From wanem? Smoltaem afta we oli kasem leta ya, bambae oli mas lego haos blong olgeta, bisnes blong olgeta, mo plante samting blong olgeta, mo oli go laef long wan narafala ples. Hemia i no isi.

7. ?From wanem yumi mas lanem naoia blong trastem Jehova fulwan?

⁷ Lesen we yumi lanem: I no longtaem, ?wanem bambae i hapen? Bambae “bigfala trabol” i stat, mo biaen bambae rabis sistem blong wol ya i lus. (Mat. 24:21) Olsem ol Kristin long Jerusalem, yumi mas gohed blong holemstrong long Jehova mo rere from taem ya. (Luk 21:​34-36) Long taem blong bigfala trabol, maet bambae yumi mas lego sam samting we yumi gat, o evri samting blong yumi. Taswe yumi mas trastem fulwan se Jehova bambae i neva livim ol man blong hem oli stap olgeta wan. Bifo we bigfala trabol i stat, yumi gat janis blong soemaot sipos yumi trastem fulwan Jehova o nogat. Taswe i gud yu askem yu wan se: ‘?Ol desisen blong mi mo ol samting we mi wantem mekem long fiuja oli soemaot se mi no trastem mane, be mi trastem promes ya blong God se bambae hem i lukaot gud long mi?’ (1 Tim. 6:17) Nating se yumi save lanem ol lesen long samting we i hapen long taem blong ol fas Kristin, be “bigfala trabol” long fiuja bambae i had moa long ol trabol we oli bin fesem. ?So olsem wanem bambae yumi save stret samting we yumi mas mekem taem bigfala trabol i stat?

OBEI LONG OLGETA WE OLI STAP LIDIM YUMI

8. ?Jisas i talem long ol disaepol blong hem se oli mas mekem wanem?

⁸ Sam yia afta we ol Hibru Kristin oli kasem leta blong Pol, oli luk we ol soldia blong Rom oli raonemgud taon blong Jerusalem. Hemia i soemaot se i stret taem blong oli ronwe, from we i no longtaem Jerusalem bambae i lus. (Mat. 24:3; Luk 21:​20, 24) ?Be bambae oli ronwe i go wea? Jisas i bin talem nomo se: “Olgeta we oli stap long Judia, i gud oli ronwe i go long ol bigfala hil.” (Luk 21:21) Be i gat plante bigfala hil olbaot long ples ya. Taswe, ?olgeta oli mas ronwe i go long weswan hil?

9. ?From wanem maet i had blong ol Kristin oli save weswan hil we oli mas ronwe i go long hem? (Mo tu, yu luk map.)

⁹ Traem tingbaot sam long ol bigfala hil we ol Kristin ya oli save ronwe i go long hem. I gat ol hil blong Sameria, ol hil blong Galili, Hil Ya Hemon, ol hil blong Lebanon, mo ol hil narasaed long Jodan Reva. (Yu luk map.) Maet i luk olsem se sipos ol Kristin ya oli ronwe i go long ol taon we oli stap long ol hil ya, bambae oli sef. Eksampol, taon blong Gamla i stap antap long wan bigfala hil, mo i had blong ol enemi oli kasem taon ya. Taswe, sam man Jiu oli ting se taon ya i wan gudfala ples blong haed. Be biaen ol soldia blong Rom oli spolem taon ya, mo oli kilim plante man i ded long ples ya.b

10-11. (1) ?Olsem wanem Jehova i lidim ol fas Kristin? (Hibru 13:​7, 17) (2) ?Wanem i kamaot taem ol Kristin ya oli obei long olgeta we oli stap lidim kongregesen? (Mo tu, yu luk pija.)

¹⁰ I luk olsem se Jehova i yusum ol man we oli stap lidim kongregesen long taem ya, blong oli talem weples ol Kristin ya oli mas ronwe i go long hem. Wan man blong raetem histri we nem blong hem Eusebius i tokbaot samting we i hapen long taem ya. Hem i talem se God i soemaot long sam brata long Jerusalem, se ol Kristin oli mas ronwe i go long taon blong Pela we i stap long Perea. Taon blong Pela i wan gudfala ples we ol Kristin ya oli save go long hem, from we hem i no stap longwe tumas long Jerusalem mo i isi blong oli ronwe i go long hem. Mo tu, plante man long Pela oli no ol man Jiu, taswe oli no stap traehad blong faet agensem ol man Rom.—Yu luk map.

¹¹ Ol Kristin we oli folem advaes blong Pol blong “obei long olgeta we oli stap lidim” kongregesen, oli ronwe i go long ol bigfala hil long Pela. (Ridim Hibru 13:​7, 17.) Hemia i sevem laef blong olgeta. Ol Kristin ya oli “stap wet long wan taon we fandesen blong hem i strong,” hemia Kingdom blong God. Taswe Jehova i no lego olgeta.—Hib. 11:10.

12-13. ?Olsem wanem Jehova i lidim ol man blong hem long ol hadtaem?

¹² Lesen we yumi lanem: Jehova i yusum olgeta we oli stap lidim yumi blong talem long yumi samting we yumi mas mekem. I gat plante eksampol long Baebol we i soemaot olsem wanem Jehova i putumap sam man we oli holemstrong long hem, blong oli lidim ol man blong hem long ol hadtaem. (Dut. 31:23; Sam 77:20) Mo tede tu, i gat plante pruf we i soemaot se Jehova i stap yusum ol gudfala man blong lidim ol man blong hem tede.

¹³ Eksampol, taem COVID-19 pandemik i stat, ‘olgeta we oli stap lidim yumi’ oli talem samting we yumi mas mekem. Oli talemaot long ol elda olsem wanem ol kongregesen oli save gohed blong mekem ol miting mo wosipim Jehova. Sam manis afta we pandemik i stat, yumi gat wan bigfala asembli we i stap long bitim 500 lanwis, mo ol brata mo sista oli save wajem program ya long intenet o TV, o oli save lesin long hem long radio. !Hemia faswan taem we yumi mekem wan asembli olsem! Yumi gohed blong kasem ol kakae long saed blong spirit, nating se i gat pandemik. From samting ya, yumi gohed blong joen gud. Yumi save sua se nomata wanem trabol we bambae yumi fesem long fiuja, Jehova bambae i gohed blong halpem olgeta we oli stap lidim yumi blong oli mekem ol waes desisen. Yes, sipos yumi wantem rere from bigfala trabol mo mekem ol waes desisen long taem ya, yumi mas trastem Jehova mo obei long olgeta we oli stap lidim yumi. ?Be wanem sam narafala fasin we yumi mas gat?

SOEMAOT LAV MO WELKAMEM OL BRATA MO SISTA

14. Folem Hibru 13:​1-3, ?ol Kristin oli mas soemaot wanem fasin long ol laswan yia bifo we Jerusalem i lus?

¹⁴ Taem bigfala trabol i stat, bambae yumi mas soemaot se yumi lavlavem yumi moa i bitim bifo. Long taem ya, bambae yumi mas folem eksampol blong ol Kristin long Jerusalem mo Judia. Olgeta oli soemaot se oli lavlavem olgeta oltaem. (Hib. 10:​32-34) Be long ol laswan yia bifo we Jerusalem i lus, ol Kristin ya oli mas soemaot moa se oli ‘lavlavem olgeta, olsem we oli brata nomo.’c Mo tu, oli mas “welkamem” ol brata mo sista. (Ridim Hibru 13:​1-3.) Yumi tu bambae yumi mas soemaot moa se yumi lavem ol brata mo sista, taem yumi stap kam klosap moa long en.

15. ?From wanem ol Hibru Kristin oli mas soemaot lav mo givgivhan long olgeta afta we oli ronwe?

¹⁵ Taem ol soldia blong Rom we oli raonemgud Jerusalem oli aot, ol Kristin oli ronwe we oli no karem plante samting. (Mat. 24:​17, 18) Ol Kristin ya oli mas givgivhan long olgeta taem oli stap ronwe i go long ol bigfala hil, mo taem oli go stap long wan niufala ples. Plante brata mo sista oli nidim kakae, klos, mo wan ples blong stap long hem. Taswe taem oli givgivhan long olgeta, mo oli serem ol samting we oli gat, oli stap soemaot se oli lavlavem olgeta olsem we oli brata nomo, mo oli welkamem gud olgeta.—Taet. 3:14.

16. ?Olsem wanem yumi save soemaot lav long ol brata mo sista we oli nidim help? (Mo tu, yu luk pija.)

¹⁶ Lesen we yumi lanem: Lav nao i pulum yumi blong givhan long ol brata mo sista taem oli nidim help. Plante man blong Jehova oli glad nomo blong givhan long ol brata mo sista we oli ronwe long ples blong olgeta from i gat faet o disasta. Oli givim ol samting we ol brata mo sista ya oli nidim blong oli gohed blong stap laef, mo blong oli gohed blong wosipim Jehova. Wan sista blong Yukren we i mas lego haos blong hem from we i gat faet, i talem se: “Mifala i luk olsem wanem Jehova i yusum ol brata mo sista blong oli lidim mo lukaot gud long mifala. Oli welkamem mifala mo oli givhan bigwan long mifala taem mifala i stap long Yukren, long Hangari, mo naoia we mifala i stap long Jemani.” Taem yumi kaen long ol brata mo sista mo yumi givim ol samting we oli nidim, yumi stap wok wetem Jehova.—Prov. 19:17; 2 Kor. 1:​3, 4.

17. ?From wanem i impoten we yumi lanem naoia blong soemaot lav mo welkamem ol brata mo sista?

¹⁷ Long taem blong bigfala trabol, bambae yumi mas givgivhan moa long yumi i bitim tede. (Hab. 3:​16-18) Jehova i stap trenem yumi naoia blong soemaot lav mo welkamem ol brata mo sista, from we hemia ol impoten fasin we bambae yumi nidim long fiuja.

SAMTING WE BAMBAE I HAPEN LONG FIUJA

18. ?Olsem wanem yumi save folem eksampol blong ol fas Kristin?

¹⁸ Ol Kristin we oli obei mo oli ronwe i go long ol bigfala hil, oli stap laef taem Jerusalem i lus. Nating se oli mas lego evri samting blong olgeta we i stap long taon ya, be Jehova i gohed blong lukaot gud long olgeta. Hem i neva livim olgeta oli stap olgeta wan. ?Yumi save lanem wanem long eksampol blong olgeta? Yumi no save evri samting we bambae i hapen long fiuja. Be yumi save we Jisas i talem se yumi mas rere oltaem blong obei. (Luk 12:40) Yumi save folem tu ol advaes we Pol i talem long leta we hem i raetem i go long ol Hibru Kristin. Mo tu, Jehova hem wan i promes se bambae hem i neva lego yumi, o livim yumi we yumi stap yumi wan nomo. (Hib. 13:​5, 6) I gud yumi gohed blong lukaotem taon ya we bambae i stap oltaem, hemia Kingdom blong God. Nao bambae yumi save harem gud blong olwe long ol nambawan blesing we bambae oli kamtru long fiuja.—Mat. 25:34.