?Yu Mas Mekem Wanem Taem Man i Mekem i No Stret Long Yu o Long Narafala?

1-2. ?Plante man oli mekem wanem taem man i mekem i no stret long olgeta o long narafala? ?Mo yumi save gat wanem tingting?

TEDE, plante man oli harem nogud taem man i mekem i no stret long olgeta, maet from we oli pua, from ples we oli kamaot long hem, kala blong skin blong olgeta, o from sam narafala risen. Mo tu, from we ol haeman blong gavman mo ol bisnesman oli tingbaot mane nomo, oli stap spolem wol blong yumi mo mekem plante man oli safa. Yumi evriwan i harem nogud taem we man i mekem i no stret long yumi, o long wan fren o famle blong yumi.

² Taswe yumi no sapraes se plante man oli kros taem man i mekem i no stret long olgeta. Yumi evriwan i wantem se man i mekem i gud long yumi mo yumi harem se yumi sef. From samting ya, sam man oli mekem sam samting blong traem stretem ol problem ya. Oli joen long ol protes, mo oli sapotem ol lida blong politik we oli promes se bambae oli finisim fasin we i no stret. Be yumi ol Kristin, yumi lanem se yumi “no man blong wol ya,” mo se yumi mas wet long Kingdom blong God blong i finisim fasin we i no stret. (Jon 17:16) Nating se i olsem, samtaem yumi harem nogud o kros taem yumi luk we wan man i mekem i no stret long narafala. Maet yumi tingting se: ‘?I gat eni samting we mi save mekem naoia taem man i tritim nogud mi o narafala?’ Blong ansarem kwestin ya, i gud yumi luk tingting we Jehova mo Jisas i gat long fasin ya blong mekem i no stret long narafala.

JEHOVA MO JISAS I NO LAEKEM NATING TAEM MAN I MEKEM I NO STRET LONG NARAFALA

3. ?From wanem i stret nomo we yumi kros taem man i mekem i no stret long yumi o long narafala? (Aesea 5:7)

³ Baebol i givhan long yumi blong kasemsave from wanem yumi kros taem man i mekem i no stret long yumi o long narafala. Hem i eksplenem se Jehova i wokem yumi long pija blong hem, mo hem i “laekem stret fasin mo jastis.” (Sam 33:5; Jen. 1:26) Jehova i neva mekem fasin we i no stret, mo hem i no laekem tu blong luk man i mekem i no stret long narafala. (Dut. 32:​3, 4; Maeka 6:8; Sek. 7:9) Eksampol, long taem blong profet Aesea, Jehova i luk taem plante man Isrel we narafala i mekem i no stret long olgeta, “oli stap krae from we oli harem nogud.” (Ridim Aesea 5:7.) Mo hem i tekem aksen blong panisim olgeta we oltaem oli no wantem folem Loa blong hem mo oli stap tritim nogud ol narafala.—Aes. 5:​5, 13.

4. ?Jisas i harem olsem wanem taem man i mekem i no stret long narafala? (Mo tu, yu luk pija.)

⁴ Jisas tu i laekem jastis, taswe hem i no laekem nating taem man i mekem i no stret long narafala. Taem Jisas i stap long wol, wan dei hem i luk wan man we wansaed han blong hem i ded. Jisas i sore long man ya mo i hilim hem. Be ol lida blong skul blong ol man Jiu oli kros, mo oli se Jisas i brekem loa blong Sabat, be oli no tingbaot filing blong man ya we Jisas i hilim hem. ?Jisas i harem olsem wanem taem hem i luk fasin blong olgeta? Hem i “harem nogud . . . from we hat blong olgeta i strong tumas.”—Mak 3:​1-6.

5. ?Yumi mas tingbaot wanem sipos yumi kros from we wan man i mekem i no stret long yumi o long narafala?

⁵ Jehova mo Jisas i kros taem man i mekem i no stret long narafala, taswe i stret nomo we yumi tu yumi harem olsem. (Efes. 4:26) Be yumi mas tingbaot se sipos yumi kros, hemia i no save stretem wan problem. Sipos yumi gohed blong kros o yumi kros bitim mak, hemia i save mekem yumi wan yumi harem nogud o yumi sik from. (Sam 37:​1, 8; Jem. 1:20) Taswe, ?yumi mas mekem wanem taem man i mekem i no stret long yumi o long narafala? I gud yumi folem eksampol blong Jisas.

SAMTING WE JISAS I MEKEM TAEM MAN I MEKEM I NO STRET LONG NARAFALA

6. Taem Jisas i stap long wol, ?ol man oli stap tritim ol narafala olsem wanem? (Mo tu, yu luk pija.)

⁶ Taem Jisas i stap long wol, hem i luk we plante man oli stap harem nogud from we narafala i mekem i no stret long olgeta. Ol lida blong skul oli stap mekem i strong tumas long ol man. (Mat. 23:​2-4) Mo tu, ol haeman blong ol man Rom oli stap tritim nogud ol man. Plante man Jiu oli wantem kam fri long rul blong Rom, mo sam long olgeta oli rere blong faet from. Be Jisas i no joen long eni grup we oli traem blong jenisim gavman. Taem hem i faenemaot se ol man oli wantem mekem hem i kam king, hem i aot long olgeta.—Jon 6:15.

7-8. Taem Jisas i stap long wol, ?from wanem hem i no traem blong stretem ol problem we oli stap hapen? (Jon 18:36)

⁷ Taem Jisas i stap long wol, hem i no joen long politik blong traem stretem ol problem we oli stap hapen. ?From wanem? From we hem i save se ol man oli no gat raet mo oli no naf blong rulum ol narafala. (Sam 146:3; Jer. 10:23) Mo tu, oli no naf blong stretem ol stamba samting we i mekem se ol man oli stap mekem i no stret long narafala. Devel Setan i stap rulum wol ya, mo hem i stap yusum paoa blong hem blong pulum ol man blong mekem i no stret long narafala. (Jon 8:44; Efes. 2:2) Mo from we ol man oli no stret gud olgeta, oli no naf blong mekem i stret oltaem long ol narafala, nating se oli wantem blong mekem olsem.—Pri. 7:20.

⁸ Jisas i save se Kingdom blong God nomo i naf blong stretem ol stamba samting we i pulum man blong mekem i no stret long narafala. From samting ya, hem i yusum taem mo paoa blong hem blong “prij” mo “talemaot gud nius blong Kingdom blong God.” (Luk 8:1) Long rod ya, hem i mekem “olgeta we oli tosta mo oli hanggri from stret fasin” oli sua, se i no longtaem bambae i no moa gat ol problem ya. (Mat. 5:6; Luk 18:​7, 8) Ol gavman blong man oli no naf blong mekem samting ya, be Kingdom blong God nomo we “i no blong wol ya,” bambae i mekem.—Ridim Jon 18:36.

FOLEM EKSAMPOL BLONG JISAS

9. ?From wanem yu sua se Kingdom blong God nomo i naf blong finisim fasin we i no stret?

⁹ Tede, yumi stap laef long “ol las dei,” mo yumi luk plante moa man oli stap harem nogud from we man i mekem i no stret long olgeta, i bitim long taem blong Jisas. Hemia from we Setan mo ol man we hem i kontrolem olgeta, oli stap gohed blong mekem man i safa. (2 Tim. 3:​1-5, 13; Rev. 12:12) Olsem Jisas, yumi save se Kingdom blong God nomo i naf blong stretem ol stamba samting we i mekem man i safa. From we yumi sapotem Kingdom ya, yumi no joen nating long ol protes mo ol narafala samting we ol man oli mekem blong traem stretem ol problem ya. Traem tingbaot ekspiriens blong wan sista we nem blong hem Stacy.a Bifo we Stacy i lanem trutok, hem i stap joen long ol protes agensem fasin we i no stret. Be sloslo hem i no sua sipos samting we hem i stap mekem bambae i givhan o nogat. Hem i se: “Taem mi joen long ol protes, samtaem mi no sua sipos tingting we mifala i gat i stret o nogat. Naoia mi save se Kingdom blong God nomo i naf blong stretem ol problem, mo mi save se Jehova bambae i finisim evri samting we i stap mekem man i safa. Hemia wan samting we mi wan mi no naf blong mekem.”—Sam 72:​1, 4.

10. ?From wanem ol protes oli no laenap wetem samting we Jisas i talem long Matiu 5:​43-48? (Mo tu, yu luk pija.)

¹⁰ Taem ol man oli joen long ol protes, plante taem oli kros, oli brekem loa, mo oli spolem ol narafala. Hemia i no laenap wetem ol tijing mo eksampol blong Jisas. (Efes. 4:31) Wan brata we nem blong hem Jeffrey i talem se: “Mi save se wan protes we i luk olsem se i gud nomo, i save jenis kwiktaem. Ol man oli save kros bitim mak, nao oli faet mo oli stil.” Be Jisas i tijim yumi se yumi mas soemaot lav long olgeta man, nating sipos tingting blong olgeta i defren long tingting blong yumi, o oli mekem i no stret long yumi. (Ridim Matiu 5:​43-48.) Yumi ol Kristin, yumi no wantem joen long eni samting we i no laenap wetem ol tijing mo eksampol blong Jisas.

11. ?Wanem i save pulum yumi blong joen long ol protes?

¹¹ Yumi save se Kingdom blong God nomo i naf blong finisim fasin ya we man i mekem i no stret long narafala. Be taem narafala i mekem i no stret long yumi, samtaem i had blong folem eksampol blong Jisas. Traem tingbaot samting we i hapen long Janiya, we narafala i mekem i no stret long hem from kala blong skin blong hem. Hem i talem se: “Mi mi kros we mi kros, mo mi wantem givimbak long olgeta. Ale, mi tingbaot blong joen long wan grup blong protes agensem fasin ya we man i mekem i no stret long narafala from kala blong skin blong hem. Mi ting se sipos mi mekem olsem, bambae mi no moa kros.” Be biaen, Janiya i luksave se hem i mas jenisim tingting blong hem. Hem i talem se: “Mi stap letem ol narafala oli pulum mi blong trastem ol man i bitim we mi trastem Jehova. Ale, mi mekem desisen blong no moa joen long grup ya.” I stret nomo we samtaem yumi kros, be yumi mas lukaot gud se yumi no letem kros ya i pulum yumi blong joen long politik o ol protes blong wol ya.—Jon 15:19.

12. ?From wanem yumi mas jusum gud ol samting we yumi ridim, lesin long hem, mo wajem?

¹² ?Wanem i save givhan long yumi blong no kros bitim mak taem man i mekem i no stret long yumi o long narafala? Yumi save jusum gud ol samting we yumi ridim, lesin long hem, mo wajem. Ol man oli putum plante samting long sosol media blong tokbaot ol nogud samting we man i mekem long narafala. Hemia i pulum ol man blong oli harem nogud mo oli komplen agensem gavman. Mo tu, plante taem ol man long nius oli tokbaot prapa tingting blong olgeta, i bitim we oli talem stret samting we i hapen. Be nating se wan nius i tru, i gud yumi tingbaot se: ‘Sipos mi gohed blong tingbaot nius ya, ?hemia bambae i givhan long mi?’ Sipos yumi spenem plante taem blong tingbaot ol nius ya, maet bambae yumi harem nogud moa mo tingting blong yumi i foldaon. (Prov. 24:10) Antap moa, maet yumi save fogetem se Kingdom blong God nao bambae i stretem ol problem ya.

13. Sipos yumi ridim Baebol evri dei, ?olsem wanem hemia i save givhan long yumi taem wan man i mekem i no stret long yumi o long narafala?

¹³ Sipos yumi ridim Baebol mo tingting dip evri dei, hemia bambae i givhan long yumi taem wan man i mekem i no stret long yumi o long narafala. Wan sista we nem blong hem Alia i harem nogud tumas from we ol man oli stap mekem i no stret long ol man long komuniti blong hem, mo i luk olsem se oli no kasem panis from. Hem i talem se: “Mi mas tekem taem blong tingbaot se: ‘?Mi mi rili bilif se Jehova bambae i stretem ol problem ya?’ Long taem ya, mi ridim Job 34:​22-29. Ol vas ya oli mekem mi tingbaot se i no gat man i save haed long Jehova. Hem bambae i jajem olgeta man long stret fasin, mo long fiuja bambae hem i stretem olgeta problem ya.” Be, ?yumi mas mekem wanem go kasem taem ya we Kingdom blong God i mekem se i gat jastis?

SAMTING WE YUMI SAVE MEKEM NAOIA

14. ?Yumi save mekem wanem naoia? (Kolosi 3:​10, 11)

¹⁴ Yumi no save kontrolem ol nogud fasin we man i mekem long narafala, be yumi save kontrolem ol fasin we yumi mekem long narafala. Olsem we yumi tokbaot finis, yumi folem eksampol blong Jisas taem yumi soemaot lav long ol man. Lav ya i pulum yumi blong respektem olgeta, nating sipos oli mekem i no stret long yumi. (Mat. 7:12; Rom 12:17) Jehova i glad taem yumi kaen mo yumi mekem i stret long olgeta man.—Ridim Kolosi 3:​10, 11.

15. Taem yumi talemaot ol trutok blong Baebol long ol man, ?olsem wanem hemia i givhan long olgeta?

¹⁵ Beswan samting we yumi save mekem taem yumi luk ol fasin we i no stret, hemia blong talemaot ol trutok blong Baebol long ol man. ?From wanem? Hemia from we “save blong Jehova” i save jenisim wan man we bifo i man blong kros mo i raf, i kam wan man we i kaen mo i mekem pis. (Aes. 11:​6, 7, 9) Bifo we Jemal i lanem trutok, hem i joen long wan grup blong ol rebel we oli stap faet agensem gavman, from we hem i ting se gavman i stap mekem i strong tumas long ol man. Hem i talem se: “Sipos yumi faet agensem ol man, hemia i no save jenisim fasin blong olgeta. Be ol trutok blong Baebol nomo i save jenisim olgeta. Hemia nao samting we i jenisim mi.” Ol trutok blong Baebol we Jemal i lanem i mekem se hem i no moa wantem faet agensem ol narafala. Sipos yumi tijim ol trutok blong Baebol long plante moa man, bambae oli naf blong jenisim fasin blong olgeta, nao oli no moa tritim nogud ol narafala.

16. ?From wanem yu wantem tokbaot Kingdom long ol narafala?

¹⁶ Olsem Jisas, yumi wantem tumas blong talemaot long ol narafala se Kingdom blong God nomo i naf blong finisim fasin ya blong mekem i no stret long narafala. Hemia i save givim hop long ol man. (Jer. 29:11) Stacy, we yumi tokbaot hem finis, i talem se: “Ol trutok blong Baebol we mi lanem i mekem se mi no harem nogud tumas taem man i mekem i no stret long mi o long narafala. Jehova i yusum ol tok blong Baebol blong mekem yumi harem gud.” Sipos yu wantem tokbaot ol promes blong Baebol long narafala, yu mas rere gud fastaem. Taem yu trastem fulwan ol trutok blong Baebol we yumi lanem long stadi ya, bambae yu naf blong jusum gud ol toktok blong yu sipos yu mas tokbaot topik ya long ol narafala long skul o long wok.b

17. ?Jehova i mekem wanem blong givhan long yumi taem narafala i mekem i no stret long yumi?

¹⁷ Naoia we Setan i “rula blong wol ya” yet, bambae yumi gohed blong harem nogud from we man i mekem i no stret long yumi o long narafala. Be yumi save se i no longtaem, Jehova bambae i “sakemaot” Setan. (Jon 12:31) Jehova i yusum Baebol blong eksplenem from wanem ol man oli stap mekem i no stret long ol narafala, mo filing we hem i gat taem hem i luk we yumi safa. (Sam 34:​17-19) Jehova i yusum eksampol blong Jisas blong tijim yumi long samting we yumi mas mekem taem man i mekem i no stret long yumi, mo samting we Kingdom bambae i mekem i no longtaem blong finisim ol fasin we i no stret. (2 Pita 3:13) I gud yumi gat strong tingting blong talemaot gud nius blong Kingdom, mo blong wet long taem ya we wol bambae i fulap long “jastis mo stret fasin.”—Aes. 9:7.