?Bambae Yu Mekem Wanem Blong Talem Tangkiu Long Jehova From Ransom?

1-2. ?Ransom sakrefaes blong Jisas i pulum yumi blong mekem wanem, mo from wanem? (2 Korin 5:​14, 15) (Mo tu, yu luk pija.)

SIPOS yu bin fas insaed long wan bilding we i foldaon nao wan man i sevem yu, ?bambae yu yu gat wanem tingting long man ya? Nating sipos hem i sevem ol narafala man tu, be yu wan bambae yu wantem go luk hem mo talem tangkiu long hem, blong soemaot se yu tinghae long samting we hem i mekem blong sevem laef blong yu.

² Olsem we yumi bin luk long laswan stadi, yumi wan yumi no save kamaot long sin ya we yumi bon wetem. Be ransom sakrefaes blong Jisas i mekem se (1) God i save fogivim ol sin blong yumi, (2) yumi save kam stret gud olgeta, mo (3) yumi save fren gud bakegen wetem God. From samting ya, yumi save gat janis ya blong laef olwe long niufala wol. Ransom i soemaot se Jisas i lavem ol man. Mo hem i lavem ol man finis bifo we hem i bon i kam long wol olsem wan man we i stret gud. (Prov. 8:​30, 31) Aposol Pol i talem se “lav blong Kraes nao i pulum” yumi. (Ridim 2 Korin 5:​14, 15.) Hemia i min se yumi mas mekem sam samting blong talem tangkiu from ransom mo soemaot se yumi tinghae long hem.

3. ?From wanem samting we yumi wanwan i mekem blong talem tangkiu from ransom i defdefren?

³ ?Bambae yu yu mekem wanem blong talem tangkiu from ransom? Maet ansa blong yu bambae i defren long ol narafala. ?From wanem? Traem tingbaot pijatok ya. Sipos tri man we oli stap long ol defdefren taon oli wantem travel i go long semfala ples, rod we bambae oli folem i defdefren. Long sem fasin, rod we yumi wanwan i folem blong talem tangkiu long Jehova from ransom i defdefren, mo i dipen se frensip blong yumi wetem Jehova i strong olsem wanem. Taswe long stadi ya, bambae yumi tokbaot samting we ol man long trifala grup ya oli save mekem blong talem tangkiu from ransom: (1) Olgeta we oli stadi Baebol, (2) ol Kristin we oli baptaes, mo (3) ol sipsip we oli lusum rod.

OLGETA WE OLI STADI BAEBOL

4. ?Wanem tingting blong Jehova long ol man we oli stap stadi Baebol?

⁴ Sipos yu stap stadi Baebol, i gud yu tingbaot se taem yu lesin long gud nius, hemia i soemaot se Jehova i pulum yu yu kam long hem, from i wantem se yu fren gud wetem hem. (Jon 6:44; Wok 13:48) “Jehova i man blong skelem hat blong ol man.” Hemia i min se hem i luk ol samting we yu traehad blong mekem from yu wantem save hem. Mo hem i glad taem hem i luk we yu stap jenisim sam samting long laef blong yu blong folem ol loa blong hem. (Prov. 17:3; 27:11) Ransom i mekem se yu save fren gud wetem Jehova. (Rom 5:​10, 11) Taswe yu mas tinghae long ransom.

5. ?Olsem wanem olgeta we oli stadi Baebol oli save folem advaes ya long Filipae 3:16?

⁵ Sipos yu stap stadi Baebol, ?yu save mekem wanem blong talem tangkiu from ransom? Wan samting we yu save mekem, hemia blong folem advaes we aposol Pol i talem long ol Kristin long Filipae se: “Yumi stap traehad finis blong wokbaot long sem rod ya, be . . . i gud yumi gohed yet blong wokbaot olsem we yumi stap mekem finis.” (Fil. 3:16) Wan narafala translesen blong Baebol i tanem vas ya se: “Yumi mas gohed blong folem rod ya we yumi stap folem finis.” Taswe yu no mas letem eni samting i stopem yu blong yu gohed blong wokbaot long rod ya we i lidim man i go long laef.—Mat. 7:14; Luk 9:62.

6. ?Olgeta we oli stadi Baebol oli save mekem wanem sipos i had blong oli jenisim wan bilif o fasin blong olgeta? (Dutronome 30:​11-14) (Mo tu, yu luk pija.)

⁶ ?Yu save mekem wanem sipos i had blong yu akseptem wan tijing blong Baebol we yu lanem? I gud yu mekem risej long tijing ya mo yu prea blong Jehova i givhan long yu blong kasemsave moa long tijing ya. (Sam 86:11) Be sipos i had yet blong yu kasemsave long tijing ya, i gud yu letem sam taem i pas, be yu no mas stop blong stadi Baebol. ?Olsem wanem sipos i had blong yu lego wan fasin we Baebol i agensem? I gud yu tingbaot se Jehova i neva askem ol sinman blong mekem samting we oli no naf blong mekem. Taswe yu naf blong folem ol loa blong Jehova. (Ridim Dutronome 30:​11-14.) Mo Jehova i promes blong halpem yu. (Aes. 41:​10, 13; 1 Kor. 10:13) Taswe yu no mas givap. I gud yu tingbaot moa ol samting we Jehova i givim long yu, we hemia i minim ransom tu, i bitim we yu stap tingbaot nomo ol samting we i had blong yu lego. Sipos yu lavem Jehova moa, bambae yu luk se “ol komanmen blong hem oli no had tumas blong folem.”—1 Jon 5:3.a

7. ?Ol yangfala we oli gruap long trutok oli save tingting dip long wanem?

⁷ ?Olsem wanem sipos yu yu wan yangfala we yu gruap long trutok? Yu tu yu wan Baebol stadi. Long olgeta Baebol stadi we perens blong yu i gat, yu nao yu impoten moa. Baebol i talem se: “Yufala i mas kam klosap long God, nao hem bambae i kam klosap long yufala.” (Jem. 4:8; 1 Kron. 28:9) Taem yu tekem faswan step blong kam klosap long Jehova, Jehova bambae i kam klosap long yu. Hem i tinghae long yu, i no from we famle blong yu i stap long trutok, be hem i pulum yu yu kam long hem from we hem i wantem se yu fren gud wetem hem. ?Mo Jehova i mekem wanem blong yu wan yu save fren gud wetem hem? Hem i givim ransom, hemia wan samting we yu no mas ting nating long hem. (Rom 5:​1, 2) Taswe bifo we yu go long Memoriol long yia ya, i gud yu tingting dip long samting we Jehova mo Jisas i mekem blong yu. Olsem nao, hemia bambae i pulum yu blong putum ol mak long saed blong spirit, blong soemaot se yu wantem talem tangkiu long Jehova.b

OL KRISTIN WE OLI BAPTAES

8. ?Olsem wanem ol Kristin we oli baptaes oli soemaot finis se oli bilif long ransom?

⁸ Sipos yu yu wan Kristin we i baptaes, yu mekem plante samting finis blong soemaot se yu bilif long ransom. Eksampol, yu jenisim laef blong yu blong mekem Jehova i glad mo blong yu kam fren blong hem. Yu obei long komanmen blong Jisas blong talemaot bilif blong yu long ol narafala. Yu givim laef blong yu long Jehova mo yu baptaes. Maet ol man oli agensem yu from we yu sapotem tru wosip. (2 Tim. 3:12) Be yu stanap strong from we yu lavem Jehova mo yu wantem talem tangkiu long hem from ransom.—Hib. 12:​2, 3.

9. ?Wanem i save hapen long ol Kristin we oli baptaes finis?

⁹ ?Be wanem i save hapen long ol Kristin we oli baptaes finis? Taem ol yia oli pas, sloslo maet oli no moa tinghae long ransom olsem bifo. ?Samting ya i save hapen olsem wanem? Traem tingbaot eksampol blong ol fas Kristin long Efesas. Jisas i talem ol gudfala toktok long olgeta from we oli holemstrong long hem blong plante yia. Be biaen hem i talem se: “I gat wan samting we mi mi no glad long hem. Yu yu no moa gat lav ya we yu gat fastaem.” (Rev. 2:​3, 4) Ol tok ya blong Jisas i soemaot se sipos wan Kristin i no lukaot gud, sloslo hem i save ting nating long ol samting we i joen wetem wosip blong hem. Maet hem i prea, go long ol miting, mo joen long wok blong prij, be hem i mekem olsem wan kastom nomo. Hem i no mekem from we hem i lavem Jehova. Taswe sipos yu luksave se yu no moa lavem Jehova olsem fastaem, ?yu save mekem wanem?

10. ?Olsem wanem yu save folem advaes we aposol Pol i givim long Timoti? (1 Timoti 4:​13, 15)

¹⁰ Aposol Pol i talem long Timoti blong i “tingting plante” long ol wok we i joen wetem wosip blong hem, mo i “putum tingting blong [hem] i stap fulwan” long ol wok ya. (Ridim 1 Timoti 4:​13, 15.) Folem advaes ya, i gud yu tingbaot ol defren rod we yu save folem blong wok strong long ol wok we i joen wetem wosip blong yu, olsem nao yu save “letem tabu spirit i mekem se [yu] wok olsem we faea i laet.” (Rom 12:11) Eksampol, maet yu save tekem moa taem blong rere gud from ol miting, blong yu save lesin gud moa long ol miting. O maet yu save jusum blong mekem prapa stadi blong yu long wan ples we i kwaet, blong yu save tingting dip moa long samting we yu stadi long hem. Yu traem tingbaot: Yu nidim blong putum plante faea wud blong wan faea i save gohed blong laet. Long sem fasin, sipos yu mekem ol samting ya, bambae yu tinghae moa long ransom mo ol narafala samting we Jehova i givim long yu. Mo tu, long ol wik bifo long Memoriol, i gud yu tingting dip long ol blesing we yu kasem from we yu yu wan Witnes blong Jehova. Olsem nao, bambae yu wantem moa blong talem tangkiu long Jehova from ransom, we i mekem se yu save fren gud wetem Hem.

11-12. Sipos yu no moa gat strong tingting blong mekem samting we Jehova i wantem, ?hemia i min se Jehova i no moa givim tabu spirit long yu? Yu eksplenem. (Mo tu, yu luk pija.)

¹¹ Sipos samtaem yu harem se yu no moa gat strong tingting blong mekem samting we Jehova i wantem, i nogud yu letem tingting blong yu i foldaon o yu ting se Jehova i no moa givim tabu spirit long yu. Be i gud yu tingbaot tok we aposol Pol i talem long ol Kristin long Korin long saed blong wok blong prij, i se: “Sipos mi mi no wantem be mi fosem mi nomo blong mekem wok ya, be i oraet nomo, hemia wan wok we God i putum long han blong mi.” (1 Kor. 9:17) ?Tok ya i minim wanem?

¹² Samtaem Pol tu i no gat strong tingting blong prij, be hem i gohed nomo, nating se samtaem hem i no wantem. Hemia sem tingting we yumi mas gat. Yumi mas gohed nomo blong mekem samting we i stret, nating se samtaem yumi no wantem. I gud yu prea long Jehova blong i ‘mekem se yu wantem wok mo i givim paoa long yu’ blong mekem wok. (Fil. 2:13) Mo i gud yu gohed blong mekem ol samting we i givhan long yu blong fren gud wetem Jehova. Olsem nao, sloslo bambae yu lavem moa Jehova mo yu gat strong tingting bakegen olsem fastaem.

13. ?Yumi save mekem wanem blong jekem sipos yumi “stap holem yet fasin blong bilif”?

¹³ I gud sipos wanwan taem, yumi mekem samting we 2 Korin 13:5 i talem, we i se: “Yufala i mas gohed blong jekem yufala blong luk sipos yufala i stap holem yet fasin blong bilif. Yufala i mas gohed blong faenemaot se yufala i wanem kaen man.” Yumi save askem yumi wan se: ‘?Mi mi putum Kingdom fasples long laef blong mi?’ (Mat. 6:33) ‘?Ol samting we mi jusum blong mekem blong spel mo pleplei, oli soemaot se mi agensem ol samting we oli nogud?’ (Sam 97:10) ‘?Mi mi traehad blong holemtaet pis mo joen gud wetem ol brata mo sista?’ (Efes. 4:​2, 3) Memoriol i wan taem blong tingting dip long presen ya ransom we Jehova i givim, mo i wan janis blong jekem yumi wan. Yumi wantem soemaot se yumi no laef blong mekem samting we yumi nomo i wantem, be blong mekem samting we Kraes i wantem.c

OL SIPSIP WE OLI LUSUM ROD

14. ?Wanem i mekem se sam Kristin oli lusum rod?

¹⁴ Sam Kristin oli stop blong joen wetem kongregesen, nating se oli mekem wok blong Jehova blong plante yia. ?From wanem? Samfala oli “wari from ol samting blong laef.” (Luk 21:34) Sam narafala oli harem nogud from sam samting we wan brata o sista i talem o i mekem long olgeta. (Jem. 3:2) Mo sam narafala bakegen oli bin mekem wan bigfala sin mo oli sem blong askem help. ?Yu save mekem wanem sipos yu lusum rod, mo yu no moa joen wetem kongregesen? ?Presen ya ransom i pulum yu blong mekem wanem?

15. ?Jehova i soemaot olsem wanem se hem i kea long ol sipsip we oli lusum rod? (Esikel 34:​11, 12, 16)

¹⁵ Traem tingbaot filing we Jehova i gat long ol sipsip ya we oli lusum rod. Hem i no kros long olgeta o fogetem olgeta. Be hem i stap lukaotem olgeta. Hem i fidim olgeta mo i givhan long olgeta blong oli kambak long hem. (Ridim Esikel 34:​11, 12, 16.) ?Olsem wanem? ?Jehova i stap mekem sem samting long yu tu? !Yes! Sipos yu stap stadi long atikol ya, hemia i soemaot se yu wantem yet blong mekem samting we i stret. Bifo, Jehova i bin luk ol gudfala samting long hat blong yu mo i pulum yu yu kam long trutok. Mo naoia, hem i wantem pulum yu yu kambak long hem bakegen.

16. ?Ol sipsip we oli lusum rod oli save mekem wanem blong kambak long Jehova? (Mo tu, yu luk pija.)

¹⁶ Long buklet ya Kambak Long Jehova, i gat ol gudfala toktok ya we i save leftemap tingting blong yu, we i se: “Taem yu stap traehad blong kambak, yu save gat strong tingting se Jehova bambae i givhan long yu. Bambae hem i givhan long yu blong yu no wari tumas, yu no moa harem nogud, mo yu gat pis long tingting mo hat blong yu from we tingting blong yu i no moa stap stikim yu. Nao bambae yu yu wantem joen wetem ol man blong Jehova bakegen blong mekem wok blong hem.” I gud yu tingbaot tu se ol elda oli wantem tumas blong halpem yu. Olgeta oli olsem “wan ples blong haed long win, mo wan ples blong haed taem i gat strong win mo ren.” (Aes. 32:2) Sipos yu wantem talem tangkiu from ransom, i gud yu askem yu wan se: ‘?Mi save mekem wanem blong “toktok gud wanples” wetem Jehova “blong stretem ol samting ya”?’ (Aes. 1:18; 1 Pita 2:25) Eksampol, ?yu save go long wan miting long Haos Kingdom? ?Yu save go toktok long wan long ol elda mo askem help long hem, maet blong oli save mekem plan blong yu save stadi Baebol bakegen? Yu save sua se Jehova bambae i blesem yu taem yu traehad blong talem tangkiu long hem from presen ya ransom.

?BAMBAE YU YU MEKEM WANEM?

17-18. ?Yumi save mekem wanem long ol dei bifo long Memoriol?

¹⁷ Jisas i talem se Jehova i sanem hem i kam blong i givim laef blong hem, “blong olgeta man we oli soemaot se oli bilif long hem, oli no ded be oli kasem laef we i no save finis.” (Jon 3:16) Jehova i yusum ransom blong tekemaot yumi long sin mo ded. Taswe yumi wantem gohed blong tinghae long ransom. (Rom 3:​23, 24; 2 Kor. 6:1) Long ol dei bifo long Memoriol, yumi gat janis blong tingting dip long lav we Jehova mo Jisas i soemaot long yumi. Hemia bambae i pulum yumi blong mekem sam samting blong talem tangkiu long Jehova from ransom.

¹⁸ ?Ransom bambae i pulum yu blong mekem wanem? Maet ansa blong yu bambae i defren long ansa blong ol narafala. Be yu save sua se Jehova bambae i blesem yu, taem yu joen wetem plante narafala milian man we oli traehad blong wosipim hem, mo “oli no moa laef blong mekem samting we olgeta nomo oli wantem, be blong mekem samting we man ya we i ded . . . i wantem.”—2 Kor. 5:15.