?From Wanem Yumi Nidim Ransom?

1-2. ?From wanem yumi nidim we wan man i sevem yumi? (Rom 7:​22-24) (Mo tu, yu luk pija.)

TRAEM tingbaot sipos wan bilding i foldaon mo wan man i fas insaed. Hem i laef i stap, be hem i no save kamaot hem wan. Ale, hem i stap singsingaot mo i hop se wan man bambae i kam sevem hem.

² Yumi olsem man ya. ?From wanem yumi talem olsem? Taem Adam i rebel agensem God, hem i kam wan sinman. Biaen, hem i pasem sin long ol pikinini blong hem. From samting ya, yumi evriwan i fas long sin mo yumi no save kamaot long hem. Long leta we aposol Pol i raetem long ol Kristin long Rom, hem i tokbaot filing we sin i mekem se yumi gat. (Ridim Rom 7:​22-24.) Hem i wantem tumas se wan man i sevem hem ‘long bodi ya we bambae i mekem se hem i ded.’ Pol tu i fas long sin, taswe bambae hem i ded. (Rom 6:23) Yumi evriwan i sem mak long Pol. !Yumi nidim we wan man i sevem yumi!

3. ?Olsem wanem ransom i sevem yumi?

³ Afta we Pol i askem se: “?Hu bambae i sevem mi long bodi ya we bambae i mekem se mi ded?” hem i ansarem kwestin blong hem wan, i se: “!Mi mi talem tangkiu long God from we bambae hem i yusum Masta blong yumi Jisas Kraes blong sevem mi!” (Rom 7:25) Yes, Pol i stap tokbaot ransom sakrefaesa blong Jisas. Ransom ya nao i sevem yumi, taem i mekem se (1) God i save fogivim ol sin blong yumi, (2) yumi save kam stret gud olgeta, mo (3) yumi save fren gud bakegen wetem God. Taem yumi tokbaot ol poen ya, bambae yumi lavem moa Jehova, “God ya we i stap givim hop.” (Rom 15:13) Mo tu, bambae yumi lavem moa Jisas, we hem nao “i givim ransom blong yumi kam fri.”—Kol. 1:14.

RANSOM I MEKEM SE GOD I SAVE FOGIVIM YUMI

4-5. ?From wanem yumi evriwan i nidim ransom? (Prija 7:20)

⁴ Yumi nidim ransom blong God i save fogivim ol sin blong yumi. From we yumi sinman, yumi evriwan i mestem long ol toktok blong yumi mo ol samting we yumi mekem. (Ridim Prija 7:20.) Sam sin oli nogud moa. Eksampol, Loa blong Moses i talem se wan man we i mekem adaltri o i kilim narafala i ded, oli mas kilim hem i ded. (Lev. 20:10; Nam. 35:​30, 31) Sam narafala samting we yumi mekem oli no nogud olsem, be oli ol sin yet. Eksampol, Deved i talem se: “Bambae mi lukaot gud taem mi wokbaot blong mi no mekem sin long tang blong mi.” (Sam 39:1) Yes, samtaem yumi save mestem long ol toktok blong yumi, mo hemia tu i wan sin.—Jem. 3:2.

⁵ Traem tingbaot: ?Yu yu bin talem wan samting we biaen yu harem se yu no sud talem? ?O yu bin mekem wan samting we biaen yu rigret from? Ating bambae yu ansa se yes. Baebol i talem se: “Sipos yumi talem se: ‘Yumi no gat sin,’ yumi stap giaman nomo long yumi, mo trutok i no stap long yumi.”—1 Jon 1:8.

6-7. ?Wanem i openem rod blong Jehova i fogivim ol sin blong yumi? (Mo tu, yu luk pija.)

⁶ Jehova i sanem Jisas blong i ded from yumi blong mekem se Hem i save fogivim ol sin blong yumi. (Efes. 1:7) Hemia i no minim se Jehova i ting nating long ol sin we yumi mekem. Hem i no laekem nating taem yumi mekem sin. (Aes. 59:2) Be from we hem i gat stret fasin, hem i mekem wan rod blong hem i save fogivim ol sin blong yumi.

⁷ Folem Loa blong Moses, ol man Isrel oli mas givim ol animol i go olsem sakrefaes, blong Jehova i save fogivim ol sin blong olgeta. (Lev. 4:​27-31; 17:11) Ol sakrefaes ya oli pija blong wan samting we i gud moa, hemia sakrefaes blong Jisas mo ol blesing we bambae i kamaot from. Sakrefaes blong hem i openem rod blong Jehova i save fogivim ol sin blong yumi. Samting we Pol i talem long leta we hem i raetem long ol Kristin long Korin i soemaot se hem i kasemsave ol blesing we bambae i kamaot from ransom sakrefaes blong Jisas. Afta we hem i tokbaot ol nogud fasin we ol Kristin ya oli bin mekem bifo, hem i talem se: “God i wasem yufala, i mekem yufala i klin finis, mo yufala i tabu, mo i talemaot se yufala i stret man finis long nem blong Masta Jisas Kraes mo long spirit blong God blong yumi.”—1 Kor. 6:​9-11.

8. ?Yu save tingting dip long wanem bifo we yu go long Memoriol long yia ya?

⁸ Bifo we yu go long Memoriol long yia ya, i gud yu tekem taem blong tingting dip long ol blesing we yu kasem from we Jehova i fogivim yu. Eksampol, from we Jehova i givim ransom, yu no nid blong harem nogud from ol sin we yu tanem tingting blong yu finis from. ?Be olsem wanem sipos yu faenem i had blong bilivim se Jehova i fogivim yu? Maet samtaem yu gat tingting ya se: ‘Mi save se Jehova i save fogivim mi, be mi no save fogivim mi wan.’ Sipos yu harem olsem, tingbaot se Jehova nao i gat raet blong fogivim man, mo hem i givim raet ya blong jajem man long Boe blong hem. Hem i no givim raet ya long yu o long wan narafala man blong jusum hu we bambae hem i fogivim. Baebol i talem se: “Sipos yumi stap wokbaot long laet olsem we [Jehova] i stap long laet, . . . blad blong Jisas we i Pikinini blong hem, bambae i stap mekem yumi klin long olgeta sin blong yumi.” (1 Jon 1:​6, 7) Yumi save bilif strong long samting ya, sem mak olsem we yumi bilif strong long ol narafala tijing blong Baebol. Ransom i openem rod blong Jehova i save fogivim yumi, mo Baebol i talem se hem i “rere blong fogif.”—Sam 86:5.

RANSOM I MEKEM SE YUMI SAVE KAM STRET GUD OLGETA

9. Long Baebol, ?tok ya sin i save minim wanem tu? (Ol Sam 51:5 mo futnot)

⁹ Long Baebol, tok ya “sin” i no jes minim ol sin we yumi mekem, be i minim tu sin we yumi bon wetem. (Ridim Ol Sam 51:5 mo futnot.) Sin we yumi bon wetem i pulum yumi blong mekem samting we i nogud, mo tu i mekem se yumi save kasem ol sik, yumi kam olfala, mo yumi ded. Hemia nao from wanem ol bebi we oli no mekem sin yet oli save kasem ol sik mo ded. Mo tu, ol gudfala man mo ol rabis man, olgeta evriwan oli safa mo ded. Hemia from we yumi evriwan i kasem sin long Adam.

10. ?Adam mo Iv i harem olsem wanem afta we tufala i mekem sin?

¹⁰ Afta we Adam mo Iv i mekem sin, tufala i stat blong harem nogud from we tufala i brekem loa blong God, hemia wan loa we Hem i “raetem long hat” blong tufala. (Rom 2:15) Tufala i haremsave se wan samting i no stret, ale tufala i kavremap bodi blong tufala mo tufala i traem blong haed long Jehova. (Jen. 3:​7, 8) Stat long taem ya, Adam mo Iv i harem se tufala i gilti, tufala i wari, harem nogud, mo sem. Mo ol filing ya oli spolem tufala go kasem taem we tufala i ded.—Jen. 3:​16-19.

11. ?Sin i mekem yumi harem olsem wanem?

¹¹ Sin we yumi kasem long Adam mo Iv i mekem se yumi gat ol sem filing olsem tufala. Nating se yumi traehad blong glad long laef blong yumi, be oltaem yumi harem nogud from ol problem we yumi stap fesem. ?From wanem? From we Baebol i talem se ol problem we yumi fesem from sin i mekem yumi harem se laef blong yumi “i blong nating nomo.” (Rom 8:20) Sin i spolem yumi wanwan, be i mekem tu se i gat ol trabol we i spolem olgeta man. Eksampol, ol man oli traehad blong lukaot gud long wol, finisim raf fasin, mekem se ol man oli no moa pua, mo mekem se i gat pis bitwin ol kantri, be oli no naf blong mekem ol samting ya. ?Olsem wanem ransom i save sevem yumi long ol trabol ya we oli kamaot from sin?

12. ?Ransom i mekem se yumi save gat wanem kaen fiuja?

¹² Ransom i mekem se long fiuja, “olgeta samting we [God] i mekem bambae oli kam fri, oli no moa slef blong wan bodi we i save kam roten.” (Rom 8:21) Taem yumi kam stret gud long niufala wol, bambae yumi no moa gat ol sik long bodi o long tingting, mo bambae yumi no moa harem se yumi gilti, yumi wari, harem nogud, o sem. Mo tu, taem “Prins Blong Pis” i rul, hemia Jisas Kraes we i givim laef blong hem from yumi, bambae hem i givhan long yumi blong stretem ol problem long wol we yumi no naf blong stretem.—Aes. 9:​6, 7.

13. ?Wanem narafala samting we yu save tingting dip long hem bifo long Memoriol long yia ya?

¹³ Traem tingbaot se laef bambae i olsem wanem taem yu kam stret gud olgeta. Evri dei taem yu girap, bambae yu harem gud mo yu no moa wari se yu o wan famle o fren blong yu bambae i sot long kakae, i sik, o i ded. Mo nating se promes ya i no kamtru yet, be yu save gat pis long tingting naoia, taem yu “holemtaet hop ya we . . . i olsem wan angka blong holem sol blong yumi, hem i fas strong mo yumi save trastem.” (Hib. 6:​18, 19) Wan angka i holemtaet wan sip blong ol wef blong solwota i no saksakem hem i go olbaot. Long sem fasin, hop i save mekem bilif blong yu i strong blong yu naf blong stanap strong long eni hadtaem we yu fesem naoia. Yes, yu save trastem se Jehova “bambae i givim pei long ol man we oli stap traehad blong faenem hem.” (Hib. 11:6) Ransom nao i mekem se yu save harem gud long promes ya naoia, mo yu save gat wan gudfala fiuja.

RANSOM I MEKEM SE YUMI SAVE FREN GUD BAKEGEN WETEM GOD

14. ?Sin i mekem wanem long yumi, mo from wanem?

¹⁴ Stat long taem we Adam mo Iv i mekem sin, ol man oli stap longwe long God. Baebol i talem se ol man oli kam enemi blong hem. (Rom 8:​7, 8; Kol. 1:21) ?From wanem? From we Jehova i stret gud olgeta mo hem i no save agri long sin. Baebol i tokbaot Jehova se: “Ae blong yu i klin tumas, yu no save luk ol samting nogud, mo yu no glad long ol fasin nogud.” (Hab. 1:13) Taswe sin i mekem se yumi seraot long God, mo yumi nidim wan samting we i olsem wan brij blong mekem se yumi save kam klosap long hem. Ransom nao i olsem brij ya we i mekem se yumi save kam klosap long God mo fren gud bakegen wetem hem.

15. ?Olsem wanem ransom i mekem se ol man oli save fren gud bakegen wetem God?

¹⁵ Baebol i talem se Jisas i wan “sakrefaes blong kavremap ol sin blong yumi.” (1 Jon 2:2) ?Olsem wanem sakrefaes blong Jisas i mekem se ol man oli save fren gud bakegen wetem Jehova? Ded blong Jisas i pemaot ol sin blong yumi mo i mekem se yumi save gat pis bakegen wetem God. (Rom 3:​23-26) Mo tu, God i save luk ol man we oli wosipim hem bifo we Jisas i ded se oli ol stret man. (Jen. 15:​1, 6) ?From wanem? From we Jehova i sua fulwan se Boe blong hem Jisas bambae i givim ransom. (Aes. 46:10) Taswe ransom i openem rod blong ol man oli fren gud bakegen wetem God.

16. ?Yumi save tingbaot wanem moa bifo we yumi go long Memoriol long yia ya? (Mo tu, yu luk pija.)

¹⁶ Traem tingbaot ol blesing we yu kasem from we yu fren gud wetem God. Eksampol, maet yu tokbaot Jehova se hem i “Papa” blong yu, olsem we Jisas i talem. (Mat. 6:9) Mo maet samtaem yu tokbaot Jehova se hem i “Fren” blong yu. Taem yumi yusum ol tok olsem “Papa” o “Fren” blong tokbaot Jehova, yumi mas soemaot se yumi gat bigfala respek mo tingting daon. ?From wanem? From we yumi ol sinman, mo yumi no save kam klosap long Jehova yumi nomo. Ransom nomo i mekem se yumi save kam klosap long Hem. Jehova i givim Jisas blong mekem se “olgeta narafala samting oli fren bakegen wetem [God]. . . . God i yusum blad blong Kraes we i ron long pos, blong mekem pis ya.” (Kol. 1:​19, 20) Hemia nao from wanem yumi save fren gud wetem Jehova naoia, nating se yumi sinman yet.

RANSOM I SOEMAOT SE JEHOVA I GAT BIGFALA SORE

17. ?Olsem wanem ransom i soemaot se Jehova i gat bigfala sore? (Efesas 2:​1, 4, 5)

¹⁷ Ransom i soemaot se Jehova i “gat bigfala sore.” Nating se ‘i olsem we yumi ded finis from ol rong mo ol sin blong yumi, be God i mekem yumi laef.’ (Ridim Efesas 2:​1, 4, 5.) Tede, olgeta we oli “soemaot se oli stret blong kasem laef we i no save finis” oli luksave se oli fas long sin, mo oli wantem tumas se narafala i givhan long olgeta blong kam fri. Oli olsem man ya we i fas long wan bilding we i foldaon. (Wok 13:48) Jehova i harem ol krae blong olgeta mo i meksua se oli harem gud nius blong Kingdom, blong oli save kam klosap long hem mo Boe blong hem, Jisas. (Jon 17:3) Setan i ting se taem Adam mo Iv i mekem sin, hemia bambae i blokem stamba tingting blong God blong i no kamtru, be hem i rong.

18. Taem yumi tingting dip long ransom, ?yumi no mas fogetem wanem?

¹⁸ I gud we yumi tingting dip long ol blesing we yumi wanwan i kasem from ransom, be yumi no mas fogetem bigfala risen from wanem Jehova i givim ransom. Jehova i no givim ransom blong sevem yumi nomo, be hem i givim ransom blong ansarem kwestin we Setan i stanemap long garen blong Iden. (Jen. 3:​1-5, 15) Tru long ransom, Jehova i mekem nem blong hem i stap tabu, mo i soemaot se ol tok blong Setan i giaman. Mo tu, hem i sevem yumi long sin mo ded, mo hemia i soemaot se hem i wan God blong lav. Nating se yumi ol sinman, be from we Jehova i kaen tumas, hem i givim janis long yumi tu blong givim ansa long Setan. (Prov. 27:11) ?Yu save mekem wanem blong talem tangkiu long Jehova from presen ya ransom? Bambae yumi tokbaot ansa blong kwestin ya long nekis stadi.