Pijarem Ol Stori Long Baebol

Baebol i tokbaot plante tru stori we yumi save lanem plante impoten lesen long olgeta. Sipos yumi traem blong pijarem ol stori ya, bambae yumi kasemsave gud moa long samting we yumi ridim mo bambae oli save givhan bigwan long yumi. Hemia sam samting we yu save mekem blong pijarem ol stori long Baebol.

• Ridim long bigfala voes. Taem yu ridim Baebol long bigfala voes, yu save pijarem klia samting we i stap hapen. Taem yufala evriwan long famle i joen wanples blong ridim Baebol, wanwan long yufala i save mekem voes blong wanwan man long stori we yufala i stap ridim.

• Pijarem samting we i hapen. Traem kasemsave gud long tingting mo filing blong ol man we i stap long stori ya. Eksampol, askem yu wan se: ‘?From wanem man ya i talem tok ya o i mekem olsem? Sipos mi nao man ya, ?bambae mi gat wanem tingting o filing?’

• Droem samting we yu ridim. Nating se yu no gat gudhan blong dro, be sipos yu traem blong droem samting we yu ridim, bambae yu naf blong pijarem mo tingbaot gud stori we yu ridim.