Mekem Fasin Blong Rid i Kam Wan Haf Blong Laef Blong Yu
“Gogo kasem taem we mi bambae mi kamtru, yu mas mekem we wok ya blong ridim Baebol long ol man, mo blong prij, mo blong tijim olgeta long ol trutok i nambawan wok blong yu.”—1 TIMOTE 4:13.
1. ?Yumi save kasem wanem blesing sipos yumi ridim Baebol oltaem?
JEOVA GOD i mekem ol man wetem wan nambawan fasin we oli naf blong lanem blong rid mo raet. Mo tu, hem i givim Tok blong hem, Baebol, blong yumi save kasem ol gudfala tijing. (Aesea 30:20, 21) I olsem se, ol tok blong hem oli mekem se yumi save “wokbaot” wetem ol olfala blong bifo we oli fraetgud long God, olsem Ebraham, Aesak, mo Jekob. Yumi save “luk” ol woman we oli obei long God olsem Sera, Rebeka, mo woman Moab ya, Rut, we i holemstrong long God. Yes, mo yumi save “harem” Jisas Kraes taem i givim Bigfala Tok blong hem antap long Hil. Yumi save haremgud long ol samting ya mo kasem ol nambawan tijing ya blong Tabu Baebol, sipos yumi laekem blong rid.
2. ?Wanem samting i soemaot se Jisas mo ol aposol blong hem oli save ridgud?
2 I klia se, stret man ya Jisas Kraes i save rid long nambawan fasin, mo hem i savegud ol Hibru Hanraet. Taswe, taem Setan i traem hem, hem i ansa evritaem wetem tok blong ol hanraet ya, i se: “Baebol i talem se.” (Matyu 4:4, 7, 10) Wan taem, long fored blong olgeta man long haos prea long Nasaret, hem i ridim wan haf blong profet tok blong Aesea, mo i talem se profet tok ya i stret long hem. (Luk 4:16-21) ?Olsem wanem long ol aposol blong Jisas? Long ol buk blong Baebol we oli raetem, plante taem oli yusum tok we i kamaot long ol Hibru Hanraet. Ol rula blong ol man Jyu oli luk Pita mo Jon olsem ol man we oli no skulgud mo we oli no gat nem, from we oli no bin go long sam hae skul blong ol man Hibru. Be, ol leta we God i pusum ol aposol ya blong raetem, oli pruvum se oli save ridgud mo raetgud. (Ol Wok 4:13) ?Olsem wanem? ?Fasin blong ridgud hem i rili impoten?
‘Man We i Ridim Ol Tok Ya Long Bigfala Voes, Hem i Save Haremgud’
3. ?From wanem i impoten blong ridim Baebol mo ol narafala Kristin buk?
3 Yumi save kasem laef we i no save finis sipos yumi kasem mo folem ol stret save blong Baebol. (Jon 17:3) Taswe, ol Wetnes blong Jeova oli luksave se i impoten tumas blong ridim Tabu Baebol mo stadi long hem. Mo tu, i impoten blong ridim mo stadi long ol narafala Kristin buk we God i givim tru long grup ya blong ol tabu Kristin, slef we i stret mo waes. (Matyu 24:45-47) Yes, tru long sam spesel buk we Watch Tower Sosaeti i wokem, plante taosen man oli bin lanem blong rid. Long rod ya, oli kasem fulap save long saed blong Tok blong God, mo save ya i givim laef.
4. (a) ?From wanem yumi save glad taem yumi ridim, stadi mo folem Tok blong God? (b) Long saed blong fasin blong rid, ?Pol i talem wanem long Timote?
4 Yumi kasem glad taem yumi ridim Tok blong God, stadi long hem, mo mekem i wok long laef blong yumi. Taem yumi mekem olsemia, yumi ona long God mo mekem hem i glad, ale, from samting ya, hem i givim blesing long yumi, mo yumi faenem glad. Jeova i wantem se ol man blong hem oli glad. Taswe, hem i givim oda long ol pris long Isrel bifo, blong ridim Loa blong hem long ol man. (Dutronome 31:9-12) Esra, we i bin mekem ol kopi blong Loa, mo sam narafala man bakegen, oli ridim Loa ya long ol man we oli hivap long Jerusalem. Oli mekem mining blong hem i kam klia, mo from samting ya, ol man oli kasem “bigfala glad.” (Nehemaea 8:6-8, 12) Biaen, Kristin aposol Pol i talem long Timote we i stap wok wetem hem, se: “Gogo kasem taem we mi bambae mi kamtru, yu mas mekem we wok ya blong ridim Baebol long ol man, mo blong prij, mo blong tijim olgeta long ol trutok i nambawan wok blong yu.” (1 Timote 4:13) Wan narafala Baebol i talem se: “Mekem fasin blong ridim Baebol long fored blong ol man i kam haf blong laef blong yu.”—New International Version.
5. ?Olsem wanem Revelesen 1:3 i joenem fasin glad wetem fasin blong rid?
5 Revelesen 1:3 i soemaot klia se glad blong yumi i dipen long fasin blong ridim Tok blong God mo mekem i wok long laef blong yumi. Long vas ya yumi ridim se: ‘Man we i ridim tok ya long bigfala voes, hem i save haremgud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud. From we taem blong ol samting ya i kam kolosap.” Yes, yumi nidim blong ridim long bigfala voes, mo harem ol profet tok blong God we oli stap long Revelesen mo long fulwan Baebol tu. Man we i rili haremgud, hemia man ya we i ‘glad blong folem loa blong Hae God, mo i stap ridim ol loa ya oltaem, i stap tingting long hem long dei mo long naet.’ ?Wanem risal blong samting ya? ‘Hem i stap win long evri samting we hem i stap mekem.’ (Ol Sam 1:1-3) Taswe, ogenaesesen blong Jeova i gat gudfala risen blong pusum yumi evriwan blong ridim mo stadi long Tok blong God, wanwan, mo tugeta wetem famle blong yumi, mo wetem ol fren.
Traehad Blong Yusum Tingting Mo Tingting dip
6. ?Josua i kasem oda blong ridim wanem, mo olsem wanem samting ya i givhan long hem?
6 ?Olsem wanem yu save kasem moa save taem yu ridim Tok blong God mo ol Kristin buk? Bambae yu luksave se i givhan long yu sipos yu mekem olsem Josua, wan lida blong Isrel bifo, we i fraetgud long God. Hem i bin kasem oda ya se: “Buk ya blong loa i no mas livim maot blong yu, mo yu mas ridim wetem voes we i kwaet long dei mo long naet, blong yu lukaotgud blong mekem olgeta samting we oli raetem i stap long hem; nao bambae yu save win long rod blong yu mo bambae yu save wok long fasin waes.” (Josua 1:8) “Ridim wetem voes we i kwaet” i minim se yu talem ol tok ya long yu wan long wan voes we i smol. Fasin ya i save givhan long yu blong rimemba, from we i makemgud ol tok ya long tingting blong yu. Josua i mas ridim Loa blong God “long dei mo long naet,” hemia i minim oltaem. Long rod ya, hem i save win mo soem waes, long olgeta wok we God i givim long hem blong mekem. Sipos yu ridim Tok blong God oltaem, samting ya i save halpem yu long sem fasin.
7. ?From wanem yumi no mas gat tingting ya blong spid taem yumi ridim Tok blong God?
7 Yu no mas ting se yu mas spid taem yu ridim Tok blong God. Sipos yu mekem plan blong ridim Baebol no wan narafala Kristin buk, i moa gud blong ridim slou. Samting ya i impoten moa taem yu stap stadi mo yu wantem rimemba sam bigfala poen. Mo taem yu rid, yusum tingting blong yu. Tingbaot mining blong ol tok we yu ridim long Baebol. Askem long yu wan se: ‘?From wanem man we i raetem ol tok ya i talem samting ya? ?Bambae mi yusum ol save ya olsem wanem?’
8. ?From wanem i impoten blong tingting dip taem yumi ridim Baebol?
8 Taem yu stap ridim Tabu Baebol, tekem taem blong tingting dip long hem. Samting ya bambae i halpem yu blong rimemba ol store blong Baebol, mo blong folem ol rul blong Baebol long laef blong yu. Fasin blong tingting dip long Tok blong God mo rimemba sam bigfala poen blong hem, bambae i givhan tu blong yu talem ol tok we i kamaot long hat blong yu. Olsem nao, bambae yu save ansa wetem ol gudfala toktok, long man we i rili wantem save wan samting. Bambae yu no talem wan samting we biaen yu save harem nogud from. Wan proveb we i kamaot long God, i talem se: “Man we i stret, i tingting dip long hat blong hem, bifo we hem i givim ansa.”—Proveb 15:28.
Traem Joenem Ol Nyufala Poen Wetem Save Blong Yu
9, 10. ?Olsem wanem yu save mekem Baebol riding blong yu i kam moagud taem yu joenem ol nyufala poen wetem olgeta we yu save finis?
9 Bighaf blong ol Kristin oli luksave se bifo, oli save smol nomo long saed blong God, Tok blong hem, mo ol stampa tingting blong hem. Be, tede, ol Kristin man ya blong prij, oli save eksplenem olsem wanem God i wokem evri samting fastaem, man i foldaon long sin, mo from wanem Kraes i ded olsem wan sakrifaes. Oli save tokbaot taem we rabis fasin long wol ya bambae i lus, mo olsem wanem olgeta man we oli obei long God, bambae oli kasem blesing ya blong laef we i no save finis long wol ya taem i kam wan paradaes. Ol man ya blong Jeova oli naf blong mekem samting ya from we oli kasem ‘stret save blong God’ tru long stadi blong Baebol mo ol Kristin buk. (Proveb 2:1-5) Sloslou, oli joenem ol nyufala poen wetem ol save we oli kasem finis.
10 Taem yu joenem ol nyufala poen blong Baebol wetem olgeta we yu save finis, samting ya i givhan long yu mo yu save kasem blesing from. (Aesea 48:17) Taem yu faenem sam loa, sam rul, no sam tingting we oli haed insaed long ol tok blong Baebol, traem skelem olgeta wetem ol samting we yu yu save finis. Joenem save ya long ol samting we yu lanem finis long saed blong ‘ol stret toktok we i blong soemaot rod long yu.’ (2 Timote 1:13) Traem faenem ol save we bambae i halpem yu blong mekem fasin fren blong yu wetem God i kam strong moa, no i givhan long yu blong kamgud moa long ol Kristin fasin, mo blong serem trutok blong Baebol wetem ol narafala.
11. ?Yumi save mekem wanem taem yumi ridim wan haf blong Baebol we i tokbaot fasin blong yumi? Givim wan eksampel.
11 Taem yu ridim wan samting we Baebol i talem long saed blong fasin blong wan man, traem luksave wanem rul i joen wetem store ya. Tingting dip long hem, mo traem tingbaot wanem samting bambae yu mekem sipos yu fesem semkaen traem olsem. Josef, pikinini boe blong Jekob, i talem plante taem long woman blong Potifa se hem i no wantem mekem nogud fasin long saed blong seks wetem hem. Josef i talem se: “Sipos mi mi kam slip wetem yu, bambae . . . mi mekem sin long God. Hemia i nogud tumas ya.” (Jenesis 39:7-9) Long store ya, yu save faenem wan rul—rabis fasin long saed blong seks i wan sin agensem God. Long tingting blong yu, yu save joenem rul ya wetem sam narafala haf blong Tok blong God, nao rul ya i save givhan long yu sipos yu tingbaot hem bakegen taem yu kasem traem we i pulum yu blong mekem rong ya.—1 Korin 6:9-11.
Mekem Pija Long Tingting Blong Yu Taem Yu Ridim Store Long Baebol
12. ?From wanem i gud blong mekem pija long tingting blong yumi taem yumi ridim store long Baebol?
12 Blong rimemba ol poen taem yu rid, traem mekem pija long tingting blong yu long samting we yu stap ridim. Traem mekem pija blong graon, ol haos, mo ol man long store ya. Harem voes blong olgeta. Smelem bred we oli stap kukum long oven. Mekem ol store ya oli laef. Ale, bambae olgeta samting we yu ridim oli gat paoa long yu, from we yu save luk wan taon blong bifo, yu klaem antap long wan bigfala hil, yu sapraes long ol nambawan samting we God i wokem, mo yu joen wetem ol man mo woman we oli gat strong bilif.
13. ?Olsem wanem yu save eksplenem store we i stap long Jajes 7:19-22?
13 Tingbaot sipos yu stap ridim Jajes 7:19-22. Traem mekem pija long tingting blong yu long wanem samting i stap kamaot long store ya. Jaj Gideon mo tri handred strongfala man Isrel, oli stanap jes afsaed long kamp blong ol man Midian. Hem i raonabaot ten klok long naet, taem we ol gad “oli stat blong lukaot long kamp tru long medel naet.” Ale, ol gad blong ol man Midian oli tekem ples blong olgeta, mo tudak i kavremap kamp blong ol enemi blong Isrel we oli stap slip. !Yu luk! Gideon mo ol man blong hem oli karem sam pupu. Long lefhan blong olgeta, oli holem sam faea toj we oli haedem insaed long ol bigfala botel blong karem wora. Wantaem nomo, trifala grup blong handred man ya oli stat bloem pupu, brekem ol botel, mo leftemap tos laet blong olgeta, mo oli singaot bigfala se: “!Naef blong faet blong Jeova mo Gideon!” Yu lukluk kamp ya. !Yes, olgeta man Midian oli girap, oli stat ronwe mo oli stap singsingaot bigwan! Ol tri handred man ya oli gohed blong bloem pupu blong olgeta, nao God i mekem ol man Midian oli kilkilim olgeta bakegen wetem naef blong faet. Ol man Midian i ronwe, mo Jeova i mekem Isrel i win.
Lanem Sam Impoten Lesen
14. ?Olsem wanem yumi save yusum Jajes japta 9 blong tijim wan pikinini se hem i mas gat tingting daon?
14 Taem yumi ridim Tok blong God, yumi save lanem plante gudfala lesen. Wan eksampel, maet yu wantem makem long tingting blong ol pikinini blong yu se i impoten blong gat tingtingdaon. Oraet, hem i isi blong mekem pija long tingting mo kasem save long profet tok long saed blong pikinini blong Gideon, Jotam. Stat blong ridim store ya long Jajes 9:8. Jotam i talem se: “Wan dei, ol tri oli go faenem wan king blong olgeta.” Olif tri, figtri, mo rop blong mekem waen long frut blong hem, olgeta evriwan oli no wantem rul. Be wan smol tri we i gat plante nil long hem i glad blong kam rula blong olgeta. Afta we yu ridim store ya long ol pikinini blong yu, ating yu save eksplenem se ol tri ya we oli sas mo naes oli minim ol man we oli naf, be oli no wantem mekem wok ya blong king long ol man Isrel. Mo smol tri ya we i gat plante nil mo we oli yusum olsem faeawud nomo, hem i minim flas king ya Abimelek. Hem i wan man blong kilim man i ded, we i wantem rul strong long ol narafala man. Biaen, hem i ded olsem profet tok blong Jotam i talem. (Jajes, japta 9) ?I gat wan pikinini we i wantem gruap mo kam olsem smol tri ya we i fulap long ol nil?
15. ?Olsem wanem buk blong Rut i soemaot se i impoten blong holemstrong long God oltaem?
15 Fasin blong holemstrong long Jeova i kamaot klia long buk blong Rut long Baebol. Tingbaot sipos famle blong yu i joen tugeta mo wanwan i ridim haf blong store ya long bigfala voes, mo oli traem kasem save long hem. Long tingting blong yu, yu luk woman Moab ya, Rut, i stap wokbaot i go long Betlehem wetem mama blong man blong hem, Naomi, we i wan wido finis. Nao, yu harem Rut i talem se: “Ol man ples blong yu bambae oli man ples blong mi, mo God blong yu bambae i God blong mi.” (Rut 1:16) Nao yu luk Rut we i wan woman blong wok strong, i stap pikimap ol haf kakae we ol man blong wok oli mestem i foldaon long graon, long plantesin blong Boas. Yu harem gudfala toktok we Boas i talem long Rut, se: “Olgeta man long ples blong mi oli luksave se yu yu wan woman we yu gat nambawan fasin.” (Rut 3:11) I no longtaem biaen, Boas i maredem Rut. Folem loa, wan woman i mas mared wetem brata blong man blong hem, sipos man blong hem i ded we i no gat pikinini. Taswe, pikinini we Rut i karem long Boas i olsem pikinini boe “blong Naomi.” Rut i kam wan bubu blong Deved mo Jisas Kraes tu. Olsem nao, hem i kasem “pei we i stretgud olgeta.” Antap moa, olgeta we oli ridim store ya long Baebol oli lanem wan impoten lesen: Holemstrong long Jeova oltaem, mo bambae yu yu kasem bigfala blesing.—Rut 2:12; 4:17-22; Proveb 10:22; Matyu 1:1, 5, 6.
16. ?Ol trifala man Hibru oli kasem wanem traem, mo olsem wanem store ya i save halpem yumi?
16 Store blong trifala Hibru man ya, Sedrak, Mesak, mo Abednigo, i save halpem yumi blong no brekem loa blong God taem yumi kasem ol traem. Mekem pija long tingting blong yu taem narafala i ridim Daniel japta 3 wetem bigfala voes. Wan bigfala aedol we oli wokem long gol, i stanap long flat ples blong Dura. Long ples ya, ol haeman blong Babilon oli hivap. Taem oli harem myusek, oli foldaon mo wosip long bigfala aedol ya we King Nebukadnesa i wokem. Olgeta evriwan oli mekem olsem, be trifala ya nomo, Sedrak, Mesak, mo Abednigo oli no bodaon. Wetem respek, oli talem stret long king ya se bambae oli no mekem wosip long ol god blong hem mo long aedol ya we oli wokem long gol. Ale, oli sakem tri yangfala man Hibru ya insaed long wan faea, we oli mekem i hot bitim mak. ?Be, wanem i hapen? Taem king ya i lukluk i go insaed long faea ya, hem i luk fo strongfala man, wan long olgeta ya i “luk olsem wan pikinini blong ol god.” (Daniel 3:25) Oli karemaot trifala man Hibru ya long faea, mo Nebukadnesa i presem God blong olgeta. I rili givhan long yumi blong tingbaot store ya wetem pija long tingting blong yumi. !Mo hem i givim wan nambawan lesen long yumi long fasin blong stap tru long Jeova long ol traem!
Kasem Blesing From Fasin Blong Ridim Baebol Wetem Famle
17. Talem sam long ol gudfala samting we famle blong yu i save lanem sipos yufala i ridim Baebol tugeta.
17 Famle blong yu i save kasem plante blesing sipos evri dei yufala i spenem smoltaem blong ridim Baebol tugeta. Sipos yufala i stat long Jenesis, yufala i save mekem pija long tingting blong yufala long saed blong taem we God i wokem wol, mo tu, Paradaes we man i laef long hem fastaem. Yufala i save joen long laef blong ol olfala blong bifo wetem famle blong olgeta, we oli soem strong bilif. Mo yufala i save folem ol man Isrel taem oli pastru long Red Si, we leg blong olgeta i no wetwet nating. Yufala i save luk long tingting blong yufala, boe ya blong lukaot long sipsip, Deved, we i faetem mo winim bigfala Filistaen man ya Golaeat. Famle blong yu i save tokbaot taem ya we oli bildim haos prea blong Jeova long Jerusalem. Oli save luk taem ya we ol ami blong Babilon oli kam spolem Jerusalem. Oli save luk tu, taem ya we oli bildim Jerusalem bakegen, aninit long oda blong Hedgavman ya Serubabel. Yufala i save harem tok we enjel i talemaot long ol man blong lukaot long sipsip kolosap long Betlehem, se Jisas i bon. Yufala i save faenemaot ol poen long saed blong baptaes mo minista wok blong Jisas. Yufala i save luk tu, olsem wanem hem i lego laef blong hem olsem wan ransom, mo yufala i save haremgud taem yufala i ridim se hem i laef bakegen long ded. Afta, yufala i save wokbaot wetem aposol Pol mo luk olsem wanem hem i stanemap ol kongregesen olbaot taem plante man oli kam Kristin. Nao, long buk blong Revelesen, famle blong yu i save glad blong ridim nambawan drim blong aposol Jon long saed blong fyuja, wetem Wan Taosen Yia Rul Blong Kraes tu.
18, 19. ?Wanem sam gudfala rod we yu save folem taem yu ridim Baebol wetem famle blong yu?
18 Taem famle blong yu i ridim Baebol tugeta long bigfala voes, ridim long wan fasin we i klia mo i laef. Long sam haf blong Baebol, wan memba blong famle—maet papa—i save ridim ol tok we i talem store, i no ol toktok blong ol man. Maet ol wanwan memba blong famle oli save ridim tok blong ol wanwan man insaed long store ya. Evriwan i save ridim haf blong hem wetem filing.
19 Taem olgeta memba blong famle oli joen tugeta blong ridim Baebol, samting ya i save givhan long evriwan blong kamgud moa long fasin blong rid. I tru tu, se save blong yu long saed blong God bambae i kam bigwan moa, mo samting ya i mas mekem se yu kam kolosap moa long Hem. Asaf i singsing se: “Taem we mi mi kam, mi stap kolosap long yu, hemia i gud tumas long mi. Yu yu sefples blong mi, yu yu stap blokem mi, mo oltaem bambae mi mi stap talemaot olgeta samting we yu yu mekem.” (Ol Sam 73:28) Samting ya bambae i halpem famle blong yu blong kam olsem Moses, we i “stap gohed olwe nomo, olsem we i stap luk God ya we man i no save luk long ae blong hem,” hemia, Jeova God.—Hibrus 11:27.
Fasin Blong Rid Mo Kristin Wok Blong Prij
20, 21. ?Olsem wanem oda ya blong prij i joen wetem fasin blong rid?
20 Filing ya we yumi wantem tumas blong wosip long “God ya we man i no save luk long ae blong hem,” i mas pusum yumi blong wokhad blong kam man we i ridgud. Sipos yumi save ridgud, samting ya bambae i givhan long yumi blong givim wetnes long Tok blong God. Hem i rili halpem yumi blong mekem wok ya blong talemaot Kingdom we Jisas i givim oda long ol man blong hem blong mekem, se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala.” (Matyu 28:19, 20; Ol Wok 1:8) Yes, givim wetnes i bigfala wok blong ol man blong Jeova, mo sipos yumi save ridgud bambae samting ya i halpem yumi blong mekemgud wok ya.
21 I nidim fasin traehad blong save ridgud mo blong kam wan man we i gat gudhan blong tijim narafala long Tok blong God. (Efesas 6:17) Taswe, ‘traehad long evri rod blong kam wan man blong wok we God i stap haremgud long yu, we yu stap tijim ol man long trutok blong God, long stret fasin nomo.’ (2 Timote 2:15) Sipos yu mekem fasin blong rid i wan haf blong laef blong yu, samting ya bambae i mekem save blong yu long saed blong ol trutok blong Baebol i kam bigwan moa. Mo tu, bambae yu kam moagud long wok we yu mekem olsem wan Wetnes blong Jeova.
?Wanem Ansa Blong Yu?
◻ ?Olsem wanem glad i dipen long fasin blong ridim Tok blong God?
◻ ?From wanem yumi mas tingting dip long ol samting we yumi ridim long Baebol?
◻ ?From wanem yumi mas joenem ol poen mo mekem pija long tingting blong yumi, taem yumi ridim Baebol?
◻ ?Wanem sam lesen we yumi save lanem taem yumi ridim Baebol?
◻ ?From wanem i gud blong ridim Baebol long bigfala voes wetem famle, mo olsem wanem fasin blong rid i joen wetem Kristin wok blong prij?
[Tok blong pija long pej 13]
Taem yu ridim Baebol tugeta wetem famle blong yu, traem mekem pija long tingting blong yu long ol store ya mo tingting dip long mining blong olgeta