?God i Stat Wetaem Blong Krietem Yunives?
Ansa We Baebol i Givim
Baebol i no talem wetaem God i stat blong krietem yunives, mo hamas yia hem i tekem, be i talem nomo se: “Long stat God i mekem heven mo wol.” (Jenesis 1:1) Baebol i no talem stret taem blong “stat” ya. Be ol samting we Jenesis i tokbaot, i soemaot se i hapen bifo long sikis “dei” we hem i mekem ol narafala samting.
?Wanwan long ol sikis dei ya we God i krietem evri samting, oli 24 aoa?
Nogat. Baebol i yusum tok ya “dei” blong minim ol taem we longfala blong olgeta i defdefren, i dipen long samting we Baebol i stap tokbaot. Eksampol: Wan vas long Jenesis i tokbaot olgeta yia we God i krietem ol samting, olsem wan dei.—Jenesis 2:4.
?Wanem i hapen long ol sikis dei blong kriesen?
God i mekem wol ya we “i narafala olgeta, mo i no gat wan samting nating i stap long hem,” i kam wan ples we ol laef samting oli save stap long hem. (Jenesis 1:2) Afta, hem i krietem laef long wol. Baebol i tokbaot sikis defren samting we oli hapen long ol dei o taem blong kriesen:
Dei 1: God i mekem laet i kasem wol, nao i gat dei mo naet.—Jenesis 1:3-5.
Dei 2: God i mekem wan spes bitwin wota we i stap daon mo wota we i stap antap.—Jenesis 1:6-8.
Dei 3: God i mekem drae graon i kamaot. Mo tu, hem i mekem ol defdefren kaen tri, plant, mo gras.—Jenesis 1:9-13.
Dei 4: God i mekem laet blong san, mun, mo ol sta i kasem wol.—Jenesis 1:14-19.
Dei 5: God i wokem ol samting we oli save laef aninit long wota, mo ol samting we oli save flae.—Jenesis 1:20-23.
Dei 6: God i wokem ol animol we oli wokbaot long graon mo man.—Jenesis 1:24-31.
Long en blong namba sikis dei, God i spel long wok blong hem, i min se hem i no moa krietem wan samting.—Jenesis 2:1, 2.
?Ol save long Jenesis i laenap wetem sayens?
Taem Baebol i tokbaot kriesen, hemia i no blong givim ol save long saed blong sayens. Be hem i eksplenem kriesen long fasin we ol man, wetem olgeta long taem blong Baebol tu, oli save kasem save long oda we God i folem blong wokem ol samting. Ol save long Baebol i no agensem ol samting we ol saentis oli pruvum. Wan saentis we i stadi long yunives, Robert Jastrow, i talem se: “Ol bigfala samting we mifala i faenemaot long saed blong kriesen oli sem mak long ol save long Baebol, ol smosmol samting nomo oli defren. Ol samting we oli hapen bifo we man i laef, oli stat kwik, mo long wan stret taem.”
?Wetaem God i wokem san, mun, mo ol sta?
God i wokem san, mun, mo ol sta “long stat,” taem hem i mekem “heven.” (Jenesis 1:1) Be i klia se laet blong olgeta i no kasem wol, from we ples i tudak nomo. (Jenesis 1:2) Nating se i gat sam laet long fas dei, be ples we laet ya i kamaot long hem, i no klia. Long namba fo dei, ples ya i kam klia. Baebol i talem se san, mun, mo ol sta oli stat blong “saen i kamdaon long wol,” i min se sipos i gat wan man long wol, bambae hem i save luk olgeta.—Jenesis 1:17.
Folem Baebol, ?wol ya i olfala olsem wanem?
Baebol i no talem se wol ya i gat hamas yia. Jenesis 1:1 i talem nomo se yunives, wetem wol blong yumi tu, i gat wan stat blong hem. Hemia i no agensem sayens mo save blong ol saentis long hamas yia we oli ting se wol i stap.