?Laef Bambae i Nomol Bakegen Samtaem? Long Wol Ya We Pandemik i Jenisim, ?Olsem Wanem Baebol i Save Givhan?

“Yumi evriwan i wantem se laef blong yumi i nomol bakegen.”—Angela Merkel, hedgavman blong Jemani.

Maet yu agri wetem ol tok ya taem yu luk we COVID-19 pandemik i stap gohed long fulwol. ?Be “nomol” i minim wanem? ?Ol man oli wantem wanem?

• Gohed long sem fasin blong laef olsem bifo. Samfala oli wantem tumas blong joen bakegen wetem ol narafala, hagem olgeta, sekhan, mo travel bakegen. Dokta Anthony Faucia i talem se, “long tingting blong olgeta, ‘nomol’ i min se oli save go long ol restoron, ol sinema, mo ol nara samting olsem.”

• Mekem laef i kam gud moa. Samfala oli luk se hemia janis blong gat wan “niufala nomol,” we laef i moa gud i bitim bifo. Oli harem se wol ya i mas jenis, from we i gat tumas stres long wok, ol man oli lukluk daon long samfala, mo plante man oli sik long tingting blong olgeta. Klaus Schwab we hem i stanemap World Economic Forum, i talem se: “Pandemik ya i givim wan smol janis long yumi blong tingbaot laef blong yumi mo mekem ol jenis we yumi wantem long wol ya.”

Pandemik ya i mekem se plante oli kasem trabol, taswe oli ting se bambae oli no save gat wan “nomol” laef bakegen. Sam long olgeta oli lusum wok blong olgeta, haos blong olgeta, helt blong olgeta, mo samting we i moa nogud se, sam famle mo fren blong olgeta oli ded.

I tru, i no gat man i save talem se laef bambae i olsem wanem afta long pandemik. (Prija 9:11) Be Baebol i talem sam samting we yumi save ekspektem, mo i givhan long yumi blong rere from. Antap long hemia, Baebol i tokbaot wan gudfala fiuja we yumi save bilif fulwan se bambae hem i kamtru, wan fiuja we ating yu no bin tingbaot bifo.

Stret tingting long COVID-19 pandemik

Longtaem finis, Baebol i talemaot se bambae i gat “ol strong sik” long wol, long “lashaf blong sistem blong wol ya.” (Luk 21:11; Matiu 24:3) Taswe, COVID-19 pandemik i wan long ol strong sik ya, mo tu, profet tok blong Baebol i talem se bambae i gat ol faet, ol bigfala etkwek, mo kakae i sot.

?Save ya i givhan olsem wanem?: Maet ol trabol we pandemik i mekem i stap kam gud moa, be Baebol i givim woning se long taem blong yumi, bambae ‘laef i strong tumas mo i had blong winim ol trabol.’ (2 Timoti 3:1) Taswe, yumi ekspektem se bambae yumi kasem sam moa trabol long taem ya we laef i had.

Baebol i givim stret tingting long yumi: I no longtaem, bambae i gat wan bigfala jenis long wol ya we i fulap long trabol. ?Wanem jenis ya?

Wan fiuja we maet yu no tingbaot afta long pandemik

Baebol i talemaot ol bigfala trabol we yumi stap kasem naoia, be hem i talem tu se i no longtaem, bambae ol samting i kam gud. Hem i tokbaot wan fiuja we i moa gud i bitim samting we ol gavman blong man oli save mekem, God nomo i save mekem. ‘Hem bambae i ravemaot wota blong ae, i no moa gat man i ded, man i no moa sore, i no moa gat man i krae, mo man i no moa harem nogud long bodi blong hem.’—Revelesen 21:4.

Jehovab God i promes se: “!Yu luk! Mi mi stap mekem olgeta samting oli kam niuwan.” (Revelesen 21:5) Bambae hem i stretem ol problem long wol, wetem ol trabol we pandemik i mekem. Bambae hem i mekem ol samting ya:

• Bodi mo tingting blong ol man bambae i kam stret gud olgeta, mo i no moa gat sik mo ded.—Aesea 25:8; 33:24.

• Ol man bambae oli mekem ol gudfala wok we oli harem gud long hem, i no ol wok we i mekem olgeta oli kros mo oli stres bitim mak.—Aesea 65:22, 23.

• Evriwan bambae oli gat plante samting, i min se bambae i no moa gat fasin pua mo hanggri.—Ol Sam 72:12, 13; 145:16.

• Filing blong ol man we oli bin safa bitim mak bambae i kam gud bakegen, mo bambae yumi gat janis blong luk ol famle mo fren we oli ded, taem oli laef bakegen.—Aesea 65:17; Ol Wok 24:15.

?Save ya i givhan olsem wanem?: Baebol i talem se: “Hop ya we yumi gat, hem i olsem wan angka blong holem laef blong yumi.” (Hibru 6:19, futnot) Hop ya blong wan gudfala fiuja i save mekem yumi strong. Hem i save givhan long yumi blong gotru long ol trabol tede, daonem ol wari, gat tingting we i kwaet, mo stap glad.

?Be yu save bilif long ol promes ya blong Baebol? Luk atikol ya “Baebol—Buk Blong Trutok.”

Advaes blong Baebol we i save givhan long laef blong yumi afta long pandemik

• Tinghae long laef

  Vas: “Man we i waes, waes ya i lukaot gud long laef blong hem.”—Prija 7:12.

  ?I minim wanem?: Mekem ol waes desisen we oli givhan long yu blong blokem sik. Skelem gud situesen long eria blong yu mo luksave ol denja. Tingbaot ol rul blong gavman long saed blong helt mo sefti, hamas man long ples blong yu oli gat COVID-19, mo hamas man oli kasem vaksin finis.

• Lukaot gud

  Vas: “Man we i waes, i lukaot gud mo i tanem baksaed long samting we i nogud, be man we i stupid, i no kea mo i trastem hem wan bitim mak.”—Ol Proveb 14:16.

  ?I minim wanem?: Gohed blong mekem ol samting we oli save protektem helt blong yu. Ol man we oli gat bigfala save long COVID-19, oli talem se sik ya bambae i stap wetem yumi blong longtaem.

• Folem ol save we i tru

  Vas: “Man we i no save samting, i bilif long evri toktok, be man we i tingting gud, hem i skelem gud wanwan step blong hem.”—Ol Proveb 14:15.

  ?I minim wanem?: Jusum gud ol advaes we yu folem. Hemia i impoten tumas, from we yu save spolem helt blong yu sipos yu mekem wan desisen we i stanap long rong infomesen.

• Holem positif tingting

  Vas: “Yu no mas talem se: ‘?From wanem ol dei we oli pas finis, oli gud moa long hemia?’ From we hemia i no tok blong man we i waes.”—Prija 7:10.

  ?I minim wanem?: Mekem bes blong yu blong enjoem laef blong yu. I nogud yu tingting oltaem long laef blong yu bifo, mo ol janis we yu mestem long taem blong pandemik.

• Soemaot respek long ol narafala

  Vas: “Yufala i mas ona long ol defren kaen man.”—1 Pita 2:17.

  ?I minim wanem?: Ol man oli gat defdefren tingting long saed blong pandemik mo trabol we i kamaot from. I gud yu lesin taem oli talemaot tingting blong olgeta, be wetem respek, yu gohed blong folem ol gudfala desisen we yu mekem finis. Tingbaot olgeta we oli no kasem vaksin, ol olfala, mo olgeta we oli gat ol nara strong sik tu.

• Gat longfala tingting

  Vas: “Man we i gat lav, hem i gat longfala tingting mo i kaen.”—1 Korin 13:4.

  ?I minim wanem?: Soemaot kaen fasin long olgeta we oli fraet blong mekem ol samting we oli bin mekem bifo long pandemik. Taem gavman i tekemaot sam rul, yu no mas hariap tumas blong mekem samting we yu plan from.

?Baebol i givhan olsem wanem long ol man, long taem blong pandemik?

Promes blong Baebol se bambae i gat wan gudfala fiuja i kamfotem ol Witnes blong Jehova, mo hemia i givhan long olgeta blong tingbaot gudfala laef we oli save gat afta long pandemik ya. Mo tu, ol Witnes oli givgivhan long olgeta, taem oli obei long tok blong Baebol blong joen wanples oltaem blong mekem wosip. (Hibru 10:24, 25) Evriwan oli welkam blong joen long ol miting blong ol Witnes blong Jehova, we mifala i mekem long zoom long taem blong pandemik.

Samfala oli talem se taem oli joen wetem ol Witnes blong Jehova blong wosip, hemia i givhan bigwan long olgeta long ol hadtaem ya. Wan woman we i kasem COVID-19, i akseptem invetesen blong ol Witnes blong joen long ol miting blong olgeta. Ol miting ya oli halpem hem blong harem gud, nating se vaeras i mekem hem i sik blong longtaem. Hem i talem se: “Mi harem se mi tu mi joen long famle ya. Taem mi ridim Baebol, tingting blong mi i kwaet mo mi gat pis, mo i givhan long mi blong no tingting tumas long ol problem blong mi, be blong tingbaot gudfala hop blong fiuja. Tangkiu blong halpem mi blong kam klosap long God, hemia wan samting we mi wantem long ful laef blong mi.”