?Baebol i Tokbaot Pegatri?

Ansa we Baebol i givim

Nogat. Wod ya “pegatri” i no stap long Baebol, mo Baebol i no tijim se taem man i ded, sol blong hem i go long pegatri blong mekem hem i kam klin from sin.a Faenemaot samting we Baebol i tijim long saed blong sin mo ded, mo olsem wanem i no laenap wetem doktrin ya blong pegatri.

• Man i kam klin long ol sin blong hem taem i bilif long blad blong Jisas, be i no from hamas taem hem i spenem long pegatri. Baebol i talem se “blad blong Jisas we i Pikinini blong [God], . . . i stap mekem yumi klin long olgeta sin blong yumi” mo se “Jisas Kraes . . . i yusum blad blong hem blong mekem yumi kam fri long ol sin blong yumi.” (1 Jon 1:7; Revelesen 1:5) Jisas i givim “laef blong hem olsem wan ransom” blong pemaot sin blong plante man.—Matiu 20:28, NAB.

• Ol man we oli ded oli no moa save wan samting. “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5, NAB) Wan dedman i no save filim eni samting, mo from samting ya hem i no save kam klin long faea blong pegatri.

• Afta we wan man i ded, hem i no save kasem panis from ol sin blong hem. Baebol i talem se “pei blong sin, hemia ded” mo se taem “wan man i ded, man ya i no moa stap aninit long paoa blong fasin blong sin, hem i fri.” (Rom 6:7, 23, BLB) Ful panis blong sin, hemia ded.