?Baebol i Talem Wanem Long Saed Blong Bonem Dedbodi?
Ansa we Baebol i givim
Baebol i no talem wan stret ansa long fasin ya blong bonem dedbodi. Mo i no gat wan stret loa long Baebol we i tokbaot se oli mas berem o oli bonem dedbodi.
Be Baebol i tokbaot sam man blong God we oli folem fasin ya blong berem dedbodi. Eksampol, Ebraham i faenem wan ples blong oli save berem waef blong hem, Sera.—Jenesis 23:2-20; 49:29-32.
Mo tu Baebol i tokbaot sam man blong God we oli folem fasin ya blong bonem dedbodi. Eksampol, taem King Sol mo ol trifala boe blong hem oli ded long faet, bodi blong olgeta i stap long ples blong ol enemi blong olgeta. Taem ol strong soldia blong Isrel oli harem nius ya, oli go tekem dedbodi blong king wetem trifala boe blong hem mo oli bonem, biaen oli karem ol bun blong olgeta oli go berem. (1 Samuel 31:8-13) Baebol i no agensem fasin we ol soldia ya oli mekem.—2 Samuel 2:4-6.
Rong tingting we man i gat long fasin ya blong bonem dedbodi
Rong tingting: Man i no soem respek long dedbodi.
Tingting we i tru: Baebol i talem se man we i ded bambae i kam graon bakegen, mo samting ya i hapen taem dedbodi i kam roten. (Jenesis 3:19) Fasin blong bonem dedbodi i mekem i isi moa blong dedbodi i kam asis o graon.
Rong tingting: Long taem bifo, oli bonem nomo dedbodi blong man we God i no glad hem.
Tingting we i tru: Sam man we oli no stap tru long God, olsem Akan mo famle blong hem, oli bonem ded bodi blong olgeta. (Josua 7:25) From we oli no obei long God. (Dutronome 21:22, 23) Be olsem we yumi tokbaot finis, i gat sam gudfala man we oli bonem dedbodi blong olgeta, olsem Jonatan we i pikinini blong King Sol.
Rong tingting: Fasin blong bonem dedbodi i mekem se God bambae i no mekem man i laef bakegen.
Tingting we i tru: Long saed blong laef bakegen, ol man we oli ded long solwota, no oli berem olgeta long beregraon, oli bonem olgeta no anamol i kakae olgeta, be God bambae i mekem olgeta oli laef bakegen. (Revelesen 20:13) Jehova i save givim niufala bodi long man we i ded.—1 Korin 15:35, 38.