Jon 14:27—“Mi Lego Pis i Stap Wetem Yufala”

“Mi lego pis i stap wetem yufala. Mi givim pis blong mi long yufala. Pis ya we mi givim long yufala, hem i defren long pis we wol i givim. Yufala i no mas letem hat blong yufala i trabol, mo yufala i no mas fraet.”—Jon 14:27, Baebol Long Niu Wol Translesen.

“Mi lego pis i stap wetem yufala. Pis blong mi, mi givim long yufala, be mi no givim olsem we wol i givim. Yufala i no letem hat blong yufala i trabol mo yufala i no fraet.”—Jon 14:27, American Standard Version.

Mining blong Jon 14:27

Jisas i talem ol gudfala tok ya long ol aposol blong hem, blong mekem tingting blong olgeta i strong se oli no nid blong wari bitim mak taem oli fesem ol problem. Wetem help blong God, oli save gat pis long hat blong olgeta, olsem hem.

?Jisas i lego o i givim wanem kaen pis long ol aposol blong hem? Hem i givim pis blong hem, i min se, sem kaen pis we hem i gat. Hemia i no min se bambae oli no kasem trabol. (Jon 15:20; 16:33) Ol man oli mekem i nogud long Jisas gogo oli kilim hem i ded, be nating se i olsem, hem i holem pis i stap long tingting mo hat blong hem. (Luk 23:27, 28, 32-34; 1 Pita 2:23) Tingting blong hem i stap kwaet from we hem i save se Papa blong hem Jehova i lavem hem mo i glad long hem.a—Matiu 3:16, 17.

Jisas i givim pis long ol aposol taem hem i talem se hem mo Papa blong hem i lavem olgeta mo i glad long olgeta. (Jon 14:23; 15:9, 10; Rom 5:1) Pis ya we i stanap long bilif blong olgeta se Jisas i Pikinini blong God, i kwaetem wari mo fraet blong olgeta. (Jon 14:1) Bambae Jisas i no moa stap wetem olgeta, be hem i promes se tabu spirit blong God bambae i halpem olgeta blong oli gat strong tingting mo pis long hat blong olgeta. (Jon 14:25-27) Ol man blong Jisas oli save fesem ol trabol wetem strong tingting, from we oli save se Jehova i glad long olgeta mo i stap givhan long olgeta.—Hibru 13:6.

Long taem blong Jisas, taem ol man oli talem halo long narafala, oli gat kastom blong talem se oli wantem we pis i stap wetem olgeta. (Matiu 10:12, 13) Be Jisas i no talem se hem i wantem nomo we ol aposol oli gat pis, be hem i givim pis long olgeta. Mo tu, pis we Jisas i givim i defren long pis we wolb i save givim. Wol i yusum ol fren, mane, paoa, o posisen, blong givim smol pis long ol man. Be pis we Jisas i givim i no dipen long ol samting ya. Pis ya i stap oltaem long hat blong man.

Ol vas raonabaot long Jon 14:27

Jisas i talem ol tok ya long ol gudfala aposol blong hem long naet bifo we hem i ded. Hem i talem long olgeta se i no longtaem, bambae hem i lego olgeta. (Jon 13:33, 36) Ol aposol oli harem nogud. (Jon 16:6) Ale Jisas i leftemap tingting blong olgeta, i eksplenem from wanem oli no mas wari long ol samting we i save hapen taem hem i no moa stap.

Tede tu, ol tok ya blong Jisas i leftemap tingting blong ol Kristin. Yumi save gat pis ya. (2 Tesalonaeka 3:16) Taem yumi kam disaepol blong Jisas, yumi kasem save se Papa blong yumi Jehova, i lavem yumi mo i glad long yumi. (Kolosi 3:15; 1 Jon 4:16) Taswe, yumi no nid blong wari bitim mak. ?From wanem? From we God i stap wetem yumi.—Ol Sam 118:6; Filipae 4:6, 7; 2 Pita 1:2.

Wajem sot video ya blong luk wanem samting we buk blong Jon i tokbaot.