Jon 15:13—“Lav Ya We i Bigwan Moa Long Lav Blong Ol Narafala”

“Man we i rere blong ded blong sevem ol fren blong hem, lav ya blong hem i bigwan moa i bitim lav blong ol narafala man.”—Jon 15:13, Baebol Long Niu Wol Translesen.

“Lav ya we i bigwan moa long lav blong ol narafala, hemia se man i givim laef blong hem blong sevem ol fren blong hem.”—Jon 15:13, New King James Version.

Mining blong Jon 15:13

Jisas i stap givhan long ol disaepol blong hem blong oli kasem save se lav blong olgeta i mas strong gogo i pusum olgeta blong oli rere blong ded blong sevem ol narafala.

Bifo we Jisas i talemaot ol tok ya long ol aposol blong hem, hem i se: “Komanmen blong mi i olsem: Yufala i mas lavlavem yufala olsem we mi mi lavem yufala.” (Jon 15:12) ?Jisas i soemaot wanem kaen lav long olgeta? Lav ya i pusum hem blong no tingbaot hem wan be blong lego samting we hem i wantem blong halpem narafala. Taem hem i stap long wol, hem i kea moa long nid mo wari blong ol disaepol blong hem mo ol narafala, i bitim ol filing blong hem. Hem i mekem ol sikman oli kam gud bakegen, mo i tijim olgeta long saed blong Kingdom blong God.a Mo tu, blong givhan long ol narafala, hem i rere blong mekem ol wok we ol man oli ting nating long olgeta. (Matiu 9:35; Luk 22:27; Jon 13:3-5) Be long Jon 15:13, Jisas i stap tokbaot wan lav we i bigwan moa. Sam aoa afta we hem i talem ol tok ya, hem i soemaot bigfala lav ya taem hem i givim “laef blong hem olsem wan ransom, blong pembak plante man oli go fri.” (Matiu 20:28; 22:39) Hem i soemaot long wan nambawan rod se hem i lavem ol narafala i bitim we i lavem hem wan.

Jisas i lavem olgeta man. Be hem i lavem moa olgeta we oli folem ol tijing blong hem. Long tingting blong hem, ol disaepol oli ol gudfala fren blong hem from we oli obei long ol tok blong hem, mo oli stap wetem hem long olgeta trabol blong hem. (Luk 22:28; Jon 15:14, 15) Taswe hem i gat gudfala risen blong ded blong sevem laef blong olgeta.

Ol faswan Kristin oli folem tok blong Jisas long laef blong olgeta, mo oli rere blong ded blong sevem ol narafala Kristin. (1 Jon 3:16) Yes, lav ya we Jisas i soemaot we i tingbaot narafala fastaem, hem i mak blong ol trufala Kristin.—Jon 13:34, 35.

Ol vas raonabaot long Jon 15:13

Long Gospel blong Jon japta 13 kasem 17, yumi faenem ol advaes we Jisas i givim long ol 11 gudfala aposol blong hem bifo we hem i ded, mo laswan prea blong hem. Hem i ded smoltaem biaen. Long japta 15, Jisas i talem se ol disaepol blong hem oli olsem ol han blong rop we i stap karem frut, taswe blong soemaot se oli man blong hem, oli mas gohed blong gat sem tingting olsem hem. Hem i talemaot se oli mas “gohed blong karem plante frut.” (Jon 15:1-5, 8) Wan rod blong soemaot lav ya, i blong talemaot sem mesej we Jisas i talemaot—“gud nius blong Kingdom blong God.”—Luk 4:43; Jon 15:10, 17.

Wajem sot video ya blong luk wanem samting we buk blong Jon i tokbaot.