Revelesen 21:1—“Wan Niufala Heven Mo Wan Niufala Wol”

“Nao mi luk wan niufala heven mo wan niufala wol. Heven mo wol we tufala i stap fastaem, tufala i lus finis, mo solwota tu i no moa stap.”—Revelesen 21:1, Baebol Long Niu Wol Translesen.

“Nao mi luk ‘wan niufala heven mo wan niufala wol.’ Faswan heven mo faswan wol i lus, mo i no moa gat solwota tu.”—Revelesen 21:1, New International Version.

Mining blong Revelesen 21:1

Ol tok long vas ya i olsem pijatok blong soemaot se Kingdom blong God long heven bambae i tekem ples blong ol gavman blong man. Kingdom ya bambae i tekemaot ol rabis man, mo rul long ol man we oli glad blong obei.

Buk blong Revelesen i fulap long “ol saen” o pijatok. (Revelesen 1:1) Taswe, i stret se heven mo wol long vas ya i no minim prapa heven mo wol, be hem i wan pijatok. Mo tu, sam narafala vas long Baebol oli tokbaot “niufala heven” mo “niufala wol,” olsem pijatok. (Aesea 65:17; 66:22; 2 Pita 3:13) Ol vas ya mo sam narafala vas tu, oli givhan long yumi blong kasem save mining blong ol pijatok ya.

“Wan niufala heven.” Long sam ples long Baebol, tok ya “heven” i minim fasin blong rul o ol gavman. (Aesea 14:12-14; Daniel 4:25, 26) Wan buk blong eksplenem mining blong Baebol, i talem se long ol vison we oli olsem profet tok, “heven i minim paoa blong rul o gavman.”a Long Revelesen 21:1, i klia se “niufala heven” i minim Kingdom blong God. Revelesen mo sam narafala buk blong Baebol, oli tokbaot gavman ya long heven, we samtaem Baebol i kolem “Kingdom blong heven.” (Matiu 4:17; Ol Wok 19:8; 2 Timoti 4:18; Revelesen 1:9; 5:10; 11:15; 12:10) Kingdom blong God we Jisas i King blong hem, bambae i tekem ples blong ‘heven we i stap fastaem,’ hemia ol gavman blong man.—Daniel 2:44; Luk 1:31-33; Revelesen 19:11-18.

“Wan niufala wol.” Baebol i talem se prapa graon we yumi wokbaot long hem bambae i neva lus, mo i no gat wan narafala samting i save tekem ples blong hem. (Ol Sam 104:5; Prija 1:4) ?Ale, pijatok blong wol i minim wanem? Plante taem, Baebol i yusum tok ya “wol” blong minim ol man. (1 Kronikel 16:31; Ol Sam 66:4; 96:1; Jenesis 11:1) Taswe “wan niufala wol” i mas minim ol man we oli defren long ol man tede, from we bambae oli glad blong obei long gavman blong God long heven. ‘Wol we i stap fastaem,’ hemia ol man we oli agensem Kingdom blong God, mo olgeta ya bambae oli lus.

“Solwota tu i no moa stap.” Long Revelesen 21:1, “solwota” tu i olsem wan saen o pijatok. Plante taem, bigfala win i mekem solwota i raf, mo hemia wan pijatok blong ol man we oli mekem plante trabol, mo oli mekem laef i paspas from we oli no wantem obei long God. (Aesea 17:12, 13; 57:20; Revelesen 17:1, 15) Olgeta ya tu bambae oli lus. Ol Sam 37:10 i talem se: “I no longtaem, ol man nogud bambae oli lus. Bambae yu lukluk i go long ples we oli stap long hem, be bambae oli no moa stap.”

Ol vas raonabaot long Revelesen 21:1

Revelesen i talemaot samting we bambae i hapen long “dei blong Masta.” (Revelesen 1:10) Profet tok blong Baebol i soemaot se dei ya i stat long 1914, taem Jisas i stat blong rul olsem King long Kingdom blong God.b Be long taem ya, hem i no rulum fulwol. Sam narafala profet tok oli talemaot se, wol bambae i kam moa nogud long faswan haf blong “dei blong Masta,” hemia “ol las dei.” (2 Timoti 3:1-5, 13; Matiu 24:3, 7; Revelesen 6:1-8; 12:12) Taem ol las dei we oli fulap long ol trabol oli finis, Kingdom blong God bambae i tekemaot olfala heven mo wol, mo i mekem se pis mo fasin joen gud i stap. Nao ol man we oli stap aninit long rul blong Kingdom, we olgeta ya oli olsem “niufala wol,” bambae oli harem gud blong laef long wan gudfala wol we oli no moa sik.—Revelesen 21:3, 4.

Wajem sot video ya blong luk wanem samting we buk blong Revelesen i tokbaot.