Trutok i Mekem Mi Mi Friman

TAEM mi mi gat seven yia blong mi, papa blong mi i ded, mama blong mi i pua, be hem i mas lukaotem sikis pikinini. Mifala i gruap long taon ya Joanesbeg, long Saot Afrika. Taem mi mi yangfala, mi no stap kampani wetem ol narafala. ?From wanem? Mi mi sem blong toktok, from we tang blong mi i sot.

Be trabol ya i mekem se mi mi kamgud long sam narafala wok. Long skul, plante taem mi kasem mak antap long ol narafala long klas long ol store we mi raetem. Samtaem ol tija oli ridim ol store we mi raetem long ol narafala klas tu. Mo tu, nating we mi no save toktokgud, be mi save singsing. Long haos, mi spenem bighaf blong fri taem blong mi long rum blong mi, mi stap plei gita mo singsing.

Sloslou, myusek i kam bigfala samting long laef blong mi. Mi wantem plei long wan rok grup, mo samting ya i mekem se mi no moa wokgud long skul. Yes, mi finis long skul bifo we mi kasem gud edukesen. Mi mekem wan grup, mo mifala i spenem kolosap evri wiken, mifala i plei myusek long ol defren ples raonabaot long Joanesbeg. I no longtaem hea blong mi i longfala, mo mi stat blong dring alkol bitim mak.

Mi rimemba mi bin plei long wan naet klab long Joanesbeg long plante wik. Wan woman we i wok long ples ya, hem i luk olsem wan naes woman, hem i laekem mi mo hem i pem ol dring blong mi. !Mi mi harem nogud bitim mak taem mi faenemaot se woman ya hem i rili wan man we i putum klos olsem woman! Yes, naet klab ya i ples we ol man blong slip wetem man oli kam long hem. Blong mifala i naf blong folem program long naet klab ya, hemia 9 klok long naet kasem 5 klok long moning, long sikis naet evri wik, mifala i dipen long ol drag.

Mi plei faef yia long grup ya, nao biaen wan samting i hapen long mi we i mekem se mi stat blong tingting hevi long saed blong skul. Wan Katolik pris i askem long mifala blong plei long wan grup blong ol yangfala long ples kolosap long jyos blong hem. Bitim 500 yangfala oli kam, mo Katolik pris ya i lukaot long ol mane long naet ya. Mifala i plei ol myusek we i wael tumas, mo plante long ol yangfala ya oli drong. Be wan narafala grup blong ol yangfala oli pulum ae blong mi. Oli stap sidaon long floa long ples we ol man oli danis long hem mo oli stap pasem ol drag oli goraon long olgeta. Naoia mi stat blong askem kwestin ya se, ?God i stap no i no stap?

?God i Stap?

Blong traem faenem ansa long kwestin ya, mi mi go long skul blong Seven-Dei Adventis, Metodis, Katolik, mo plante narafala skul. Be oli no givhan long mi nating, mo i no longtaem mi no moa go. Samting we i hapen long wan Sande naet long disko i no mekem filing blong mi i jenis. Ol laet oli daon mo myusek i bigwan, mo mi luk wan man i wok long ba, we hem i Katolik pris long ples ya. Hem i putum traoses ya ‘jin,’ wan sot we i no gat han long hem, mo wan bigfala kros i hang raon long nek blong hem. Mifala i no ting se hem i moa gud long mifala, mo mifala i singaotem hem se ‘hipi’ pris (pris we i folem ol stael blong wol long taem ya).

Mi mi stat blong intres long skul Buda mo mi pem wan smol pija blong Buda, mi putum long rum blong mi kolosap long bed blong mi. Evri dei mi mi bodaon long fored blong pija ya mo mi talem se: “O Buda, plis yu givhan long mi.” Mo tu mi mi bilif se ol man oli gat wan sol we man i no save luk, mo wan selva string i joenem sol long bodi blong man, mekem se man i save wokbaot eniples we hem i wantem go long hem long heven mo long wol.

Gyaman bilif ya se sol i no save ded i gat paoa long myusek blong mifala. (Skelem Eklesiastis 9:5, 10 mo Esikel 18:4.) Mi stat blong raetem ol singsing taem mi stap aninit long paoa blong ol drag. Grup ya i lanem blong plei ol myusek blong mi, mo mifala i mekem kaset blong ol singsing ya. Kaset ya i ron tu haoa, mo store insaed long ol singsing se laef blong wan man we i save wokbaot eniples long heven no long wol. Wan long ol singsing ya i tokbaot Setan. Hem i leftemap rabis tingting ya se Devel Setan i gat moa paoa i bitim God.

Mi mi krangke long tingting ya long saed blong ol speret man mo tu long ol drag, mo samting ya i stap spolem mi. Mi mi stap wekap long naet mo mi luk ol samting olsem ol man oli stap wokbaot long rum blong mi. Wan naet mi fraet tumas, ol han blong mi oli no moa gat paoa, mo mi no moa save muf taem wan bigfala nogud samting i wokbaot i kam kolosap long mi. Narafala taem mi stap slip long bed blong mi, nao ol narakaen samting oli kamtru wantaem long rum blong mi. Mi mi stat blong wantem kam fri long ol tingting ya we mi stap kalabus long hem.

Dei We i Jenisim Laef Blong Mi

Nao brata blong mi Jarls mo waef blong hem Loren tufala i kam Wetnes blong Jeova. Plante taem long Sarede moning, mi harem nogud taem mi wekap from mi bin drong long naet, mo plante taem mi faenem wan smol pepa i stap kolosap long bed blong mi. Long pepa ya Jarls i bin raetem sam vas blong Baebol we oli stret long rabis fasin long laef blong mi.

Nao long wan Sande, Jarls mo Loren, tufala i invaetem mi blong go wetem tufala blong luk wan Baebol drama we ol Wetnes blong Jeova oli mekem long distrik asembli blong olgeta long Pritoria. Mi wantem luk pleplei ya taswe mi go wetem tufala. !Mi mi glad tumas mo mi sapraes blong luk wan bigfala grup blong ol klin man! Mi haremgud long dei ya, nating se mi no kasem save long bighaf long ol samting we mi harem. Taem mi sekhan long ol fren blong Jarls, mi mi haremgud from oli welkamem mi, nating we hea blong mi i longfala mo ol klos blong mi oli no stret long asembli ya. Oli mekem plan se wan Wetnes bambae i kam blong stadi wetem mi long Baebol.

Long nekis wik blong hem, mi no moa go plei myusek long grup blong mi, mi go long ol miting blong ol Wetnes blong Jeova long Haos Kingdom. Long en blong wik ya, mi mekem disisin blong livim grup blong myusek mo blong salem ol gita blong mi. Taem grup ya i finis, evriwan long grup oli agri se mi mi mas holem kaset blong ol myusek blong mifala from mi nao mi bin raetem ol singsing mo myusek blong hem. Samting ya i pulum mi blong holem ol myusek ya. Mo tu mi holem wan gita blong mi mo mi gohed blong plei long ol myusek blong ol rabis speret we mi bin mekem taem mi stap aninit long paoa blong ol drag.

Mi gohed blong stadi long Baebol mo go long ol Kristin miting, nao save blong mi long saed blong ol loa blong God sloslou i gru. I no longtaem mi mi luksave se sipos mi wantem mekem God i glad, mi mas joen long ol Kristin miting mo long wok blong talemaot gud nyus long ol haos wanwan olsem wan Wetnes blong Jeova. (Ol Wok 5:42; Rom 10:10) Be mi mi fraet. Mi no save toktokgud nating, from samting ya, mi kam man blong sem we mi stap tingbaot mi wan nomo, mo mi dipen long ol narafala blong talemaot tingting blong mi.

Fasin Blong No Toktokgud i No Blokem Mi

Fastaem taem mi go long ol miting, mi ting se: ‘Sipos mi mi save givim wan ansa olsem ol narafala.’ !Nao wan dei mi givim ansa, be hem i hadwok blong mi talem ol faswan tok long hem! Taem miting i finis, plante man oli kam long mi mo oli talem sam gudfala toktok blong leftemap tingting blong mi. Oli mekem mi mi harem olsem wan man blong plei futbol we i jes winim faswan poen blong hem. Nao mi stat blong filim trufala lav ya we hem i makem ol tru Kristin.—Jon 13:35.

Narafala bigfala samting we mi mas winim, se taem mi joen long Tiokratik Skul mo mi mas ridim Baebol long fored blong ol man. Long taem ya fasin blong toktok blong mi i nogud tumas mekem se mi no save finisim tok blong mi long stret taem blong hem. Taem miting i finis, brata we i lukaot long Tiokratik Skul i givim sam gudfala advaes long mi long kaen fasin. Hem i talem se i gud we mi traem blong rid long bigfala voes long haos. Mi mekem olsemia, evri dei mi spenem taem long hem, mi ridim Baebol mo Wajtaoa magasin long strong voes. Tiokratik Skul i mekem tingting blong mi i strong moa, nao samting ya i halpem mi blong no fraet blong go long haos blong ol strenja blong prij long olgeta. Long Oktoba 1973, mi mi tekem baptaes blong makem promes blong mi blong givim laef blong mi long Jeova God.

Laswan Bigfala Jenis

Be mi mi wan nyufala Kristin we mi no bigman nating long saed blong speret. Eksampel, wan Sande we i kolkol tumas mifala i prij finis long ol haos wanwan, nao mi mi sidaon long trak blong mi mo mi satem ol windo. Mi haremgud long hot san, mo mi lesin long kaset blong ol myusek blong mi. Long taem ya, mi mi stat blong fren wetem wan gudfala yangfala woman, Debi, we hem i mekem wok blong talemaot gud nyus fultaem. Wan taem, taem mi stap lesin long kaset ya, Debi i kam kolosap long trak, nao kwiktaem mi kilim kaset. Long hat blong mi, mi luksave se i no stret blong wan Kristin i lesin long myusek olsem.

Mitufala i mared, nao i no longtaem biaen, mitufala i stat blong kasem trabol. Plante taem mi wekap long medel naet, mi stap swet mo mi seksek. Mi luk ol rabis drim olsem we mi stap wokbaot long ol reva we oli fulap long blad mo ol rabis speret oli stap ronem mi. Sore tumas long waef blong mi, long plante manis hem i harem nogud from we ol rabis speret oli stap mekem ol trabol olsem long mi. Debi i no save fulwan ol tingting insaed long myusek blong mi, be hem i luksave se i gat paoa long mi we i nogud, mo hem i talem olsem long mi. Be mi mi stronghed, mi talem strong long hem se: “Bambae mi mi holem kaset ya foreva, olsem wan memori.”

Mitufala i rao long plante samting, mo plante taem mi mi singaot strong long hem. From we mitufala i stap rao oltaem, long waes fasin Debi i askem help blong ol elda long kongregesen. Samtaem wan elda i kam luk mitufala blong traem givhan long mitufala, be taem elda i go, mi mi kros long Debi bakegen. Mi mi flas tumas, taswe mi no luksave se mitufala i nidim help, mi talem long hem se: “Yu yu no gat raet blong go luk ol elda mo storeyan wetem olgeta long bisnes ya. Hemia wok blong mi ya. Mi mi bos long haos ya.” Yes, mi mi no gat stret tingting long saed blong fasin blong lidim famle. Afta, bambae mi mi no moa toktok wetem hem gogo plante dei i pas. Naoia mi luksave se hem i bin traehad blong sevem mi, hasban blong hem, mo blong sevem mared blong hem.

Wan naet Debi i storeyan long wan elda long saed blong fasin blong mi blong pleplei gita mo ol nogud myusek we mi stap lesin long hem. Nao wan elda i kam luk mi mo hem i storeyan longtaem wetem mi. Mi rimemba hem i bin askem long mi se: “?Yu ting se i gat wan samting long haos blong yutufala we maet hem i stap mekem ol trabol ya i kamaot long yutufala?” Naoia mi openem hat blong mi mo mi talem long hem long saed blong kaset ya, mo mi talem tu se tingting blong mi i stap stikim mi from.—1 Timote 1:5, 19.

Long naet ya, taem elda ya i aot long haos, mi mi mekem disisin blong sakem kaset ya. Mitufala i karem i go long yad mo mitufala i traem blong bonem long faea, be hem i no save bon. Ale mi digim wan hol mo mi berem. Mo tu mi salem gita blong mi. Mi tingting olsem se: ‘Sipos mi rili wantem livim ol rabis myusek ya mi mas sakem hem olgeta.’ Mo tru ya, mi mi no moa luk ol rabis drim. Stat long taem ya, sloslou evri samting i kamgud long mared blong mitufala.

Hadwok Blong Toktok Long Fored Blong Ol Man

Nating we Tiokratik Skul i mekem tingting blong mi i moa strong, be i hadwok long mi yet blong toktok. Mi wantem tumas blong givim wan tok long kongregesen we mi save toktokgud long hem. Long kaen fasin Debi i askem mi blong go luk wan dokta we i givhan long ol man blong toktokgud. Mi mi agri, mo long fo manis, dokta ya i givhan long mi wan taem long wan wik. Mi traehad blong mekem ol samting we hem i talem mo tu blong folem ol gudfala advaes we i kamaot long ogenaesesen blong Jeova, nao ol samting ya i mekem se mi mi kamgud long fasin blong toktok long fored blong ol man.

Long 1976, mi kasem bigfala blesing blong kam wan elda long kongregesen. Tu manis biaen, mi givim faswan pablik tok blong mi long 45 menet. Sam yia biaen, mi gat blesing blong givim faswan tok blong mi long seket asembli. Afta, mi givim wan tok long kolosap evri seket asembli. Long Desemba 1990 mi kasem bigfala mak blong mi long saed blong toktok long fored blong ol man. Mi gat blesing blong givim wan tok blong 20 menet long saed blong famle laef blong ol Kristin long “Klin Lanwis” Distrik Asembli blong ol Wetnes blong Jeova long Joanesbeg, mo bitim fo taosen man oli lesin long tok ya we mi givim long Engglis.

Mi mas traehad oltaem blong winim trabol ya long saed blong toktok blong mi. Sipos no, trabol ya i save stat bakegen, mo bambae i hadwok blong mi winim bakegen. Wanwan taem, trabol ya i stap kam antap bakegen, be taem mi dipen long Jeova, hem i givhan bigwan long mi. Taem mi wokbaot blong go antap long platfom blong givim wan tok, mi mi prea long Jeova blong givhan long mi blong mi no seksek tumas mo blong mi save toktokgud. Mo neva mi fogetem blong talem tangkyu long Jeova wetem tingting daon afta long tok, from help blong hem nomo i mekem se mi mi save givim tok ya.

Jeova i blesem mitufala wetem tu naesfala pikinini, Pendrai, we hem i gat 15 yia, mo Kael we hem i gat 11 yia. Olsem wan famle, mifala i faenem bigfala glad long wok blong prij long evri haos wanwan. Strong tingting we Pendrai mo Kael i soem long wok ya hem i pulum mi mo Debi tu blong wok strong.

Taem mi tingtingbak long laef blong mi, mi harem glad mo mi harem sore tu. Mi sore from we myusek blong mi i gat paoa we i nogud long plante man, be mi glad from mi faenem trutok, mi finis long ol rabis myusek ya, mo mi winim trabol ya we mi no save toktokgud. Plante taem mi tingbaot tok we Jisas i talem long ol disaepol blong hem se: “Bambae yufala i save ol trutok, mo trutok ya bambae i mekem yufala i friman.” (Jon 8:32) From gladhat blong Jeova, samting ya i kamaot long laef blong mi tu.—William Jordaan i talem store ya.

[Tok blong pija long pej 15]

Debi mo William Jordaan tede

Mi mas traehad oltaem blong winim trabol ya long saed blong toktok blong mi