Kuskus We i Olsem Puskat
Store ya i blong man blong raetem store blong Wekap! long Papua Nyu Gini
ANAMOL ya we i olsem puskat, hem i sapraes we mifala i stap lukluk hem. Hem i luklukbak long mifala wetem naes fes blong hem mo ol bigfala ae we oli luk olsem oli fulap long wora. I gat wan bigfala nus long fes blong hem we i raon mo ol sora blong hem oli haed long hea blong hem. Anamol ya nao we i defren we hea blong hem i yala mo waet wetem wan longfala tel we i no gat hea long hem, hem i kuskus.
Taem mifala i wantem go kolosap moa blong luklukgud, hem i klaem i go moa antap long ol tri, hem i holemtaet ol branj wetem fofala leg blong hem mo tu wetem tel blong hem, blong traem blong stap hem wan.
Kasen Blong Koala
Kuskus i wan long ol anamol we yumi save faenem nomo long aelan blong Nyu Gini, long not blong Ostrelya, mo long ol aelan kolosap. I luk olsem se ol man oli no savegud long hem olsem kasen blong hem koala, be long plante fasin tufala i sem mak.
Olsem koala, taem kuskus i bonem pikinini blong hem finis hem i karem mo hem i stap fidim ol yangwan blong hem—evritaem hem i karem tu kasem fo pikinini—long wan poket we i joen long bodi blong hem aninit. Kuskus hem i stap sem tu mo hem i muf slou mo hem i stap laef long ol tri nomo. Wok blong hem long dei i blong slip, slip, mo slip bakegen. Hem i stap long medel blong tu branj blong tri antap olgeta, tel blong hem we kala blong hem i pink i stap hangdaon olsem wan kwestin mak we oli tanem, nao long fuldei hem i no save nating long ol noes mo wok we i stap gohed long graon we i stap daon long hem. From se kuskus i wan anamol blong slip long dei, ale long naet hem i stap muvmuf strong.
Long prapa ples blong hem, kuskus i stap kakae ol lif blong ol tri nomo, ol yang gru blong tri, mo ol frut we skin blong olgeta i sofsof wetem ol smosmol pijin mo ol bebet. Nem blong hem long saed blong sayens hem i Phalanger, we i min se “Hemia we i gat plante fingga.” Mifala i luk wan kuskus i stap sidaon long bigfala as blong hem, nao hem i karemaotgud skin blong wan banana, mo hem i stap likim olsem yumi stap mekem long wan aeskrim.
Wan Anamol We i Save Pulum Man
From we kuskus i wan kwaet anamol, samting ya i pulum plante man blong wantem fren wetem hem. Mo i tru se fasin blong hem i save pulum man. Faswan samting, hemia kala blong hem. Hem i save gat hea we i waet, red, braon lelebet no hem i save blak fulwan. Samfala oli gat ol mak blong olgeta long defren kala, mo sam narafala oli gat blak laen long bak blong olgeta. Hem i gat fulap hea mekem se hem i luk olsem i raon, mo fasin blong hem blong lukluk wetem bigfala ae oltaem, mo fasin blong hem blong wokbaot slou mo hem i save muvmufum bodi blong hem—olgeta samting ya oli mekem se kuskus i save pulum man.
Sipos yu no fogetem se ol nil long fingga blong hem oli sap yu save holem kuskus i stap kolosap long yu olsem wan puskat. Ating wan kuskus i save gruap olsem 60 sentimita long, taem yumi no kaontem tel blong hem, we hem tu i samwe long 30 sentimita. Long en blong tel blong hem i no gat hea mo ol skel oli kavremap, mekem se hem i olsem wan naesfala sanpepa we i no smutgud—samting ya i mekem i isi blong hem i holemgud samting.
Wan anamol olsem i soemaot long mifala olsem wanem hem i kakae kon. Hem i holem kon wetem tufala han blong hem, nao hem i kakae wan laen fastaem mo bifo we hem i go long narafala laen hem i smelemgud bakegen hemia we hem i jes finisim blong mekemsua se hem i no mestem wan frut blong kon. Taem hem i finisim, hem i likimgud han blong hem mo hem i stretem bodi blong hem blong slip long wan han blong tri, blong soemaot se hem i haremgud.
Kuskus i no gat plante enemi blong hem, man nomo. Ol man ples oli stap kasem anamol ya from mit blong hem mo oli yusum naes hea blong hem blong wokem ol kot mo hat long hem. Tede, ol man oli stap spolem prapa ples blong kuskus, olsem bigfala bus, blong bildim haos long hem, blong mekem maen, ol samting long saed blong turis mo sam samting olsem, from ol samting ya, oli kilimaot plante kuskus. Hemia nao wan narafala eksampel olsem wanem man i stap spolem ol samting we God i putum long han blong hem blong kea long hem.—Jenesis 1:26; Revelesen 11:18.