“Bigbigfala Trabol Long Saed Blong Mane”

MAN BLONG WEKAP! LONG NAEJERIA I RAETEM STORE YA

FOLEM ripot blong UNICEF (United Nations Children’s Fund), ol ples long Afrika we oli stap long saot blong Sahara, oli kasem wan “bigbigfala trabol long saed blong mane.” Kolosap stret haf blong ol man long ol ples ya—raonabaot 220 milyan—oli laef long wan fasin we i pua bitim mak, we oli no save kasem ol impoten samting we oli nidim. Ol wanwan man mo woman, oli moa pua bitim ten yia bifo, i godaon 20 pesen.

Ripot i talem se: “Long saed blong edukesen, yumi save talem se ol yia biaen long 1980 oli olsem ol yia blong lus nomo.” Mane we oli spenem long ol wanwan studen i godaon tate tri pesen, mo namba blong ol pikinini we oli stat skul, we bifo i 79 pesen, i godaon long 67 pesen. Mo tu, ol program blong lukaot long helt blong ol man, oli godaon long plante kantri blong Afrika. Oli klosem plante klinik from we oli no moa gat ol man blong wok mo ol meresin.

Ripot i mekem wan lis blong ol defren samting we oli stampa blong bigfala trabol ya long saed blong mane long kantri ya. Sam long olgeta se: oli spenem bigfala mane long ol faet, bisnes i godaon, ol kaon oli bigbigwan tumas, mo ol man blong big save oli talem se neva kantri ya i save pem ol kaon ya. Ripot blong UNICEF i talem se: “Afrika i no save kamgud bakegen, sipos hem i no kasem help long olgeta narafala kantri, hemia help we i bigfala moa bitim samting we yumi tingbaot kasem naoia.”

?Samting ya i save hapen? Baebol i talem samting we i tru tumas se: “Yufala i no mas trastem ol lida blong wol ya. Ol man ya oli no save sevem yufala.” (Ol Sam 146:3) Rod blong winim ol bigfala trabol long Afrika i no stap long ol gavman blong man. Kingdom blong God nomo bambae i finisim ol trabol ya blong olwe—i no long kantri blong Afrika nomo be long ful wol.—Matyu 6:10.

[Foto Credit Line blong pija long pej 31]

WHO/OXFAM