Kasem Plante Moa Man Wetem Ol Han We Oli Mekem Saen Blong Toktok

STAT long Jun 1995 i gotru long hot taem, ol Wetnes blong Jeova long ol ples we branj ofis blong Yunaeted Stet i lukaot long olgeta, oli mekem 181 distrik asembli we oli karem nem ya “Ol Hapi Man Blong Presem God.” Tu blong ol asembli ya​—wan long is mo narawan long wes​—oli mekem fulwan long lanwis blong ol man we sora i fas, hemia Saen Lanwis blong Amerika. Long rod ya ol tok blong asembli ya oli kliagud​—taem wan man i yusum han blong hem blong toktok stret long wan man we sora blong hem i fas, i moa klia i bitim taem narafala i lesin mo i mekem saen blong talemaot tok blong hem.

Ol man blong asembli ya oli kamaot long 11 kongregesena mo samwe long 30 grup blong ol man we sora blong olgeta i fas, long olgeta ples blong Yunaeted Stet. Be i gat sam man we oli kam long Briten, Kanada, Denmak, Dominikan Ripablik, Ekwado, Jemani, Japan, Meksiko, Nowei, Porto Riko, mo Rasia tu. Taswe, hem i wan asembli we i fulap long ol man blong ol defdefren ples.

Oli yusum sam video kamera tu long taem blong asembli ya, blong mekem se samfala oli save folem long televisin. Be, sam man we oli kam long asembli ya, sora blong olgeta i fas mo oli blaen tu. ?Olsem wanem olgeta ya oli save kasem ol gudfala samting blong asembli ya? I gud tumas blong luk se i gat bitim wan handred brata mo sista we oli rere blong talemaot ol tok blong asembli ya long olgeta, long wan fasin blong toktok we oli stap tajem han blong hemia we i blaen mo sora i fas tu.

Long tufala asembli ya, i gat 36 man we oli soemaot se oli givim laef blong olgeta long Jeova God, taem oli tekem baptaes. Wan narafala bigfala samting long taem ya hemia drama ya, Ona Long Ol Gudfala Brata Mo Sista Taem Oli Kam Olfala. !I naes tumas blong luk se oli mekem fulwan drama ya long saen lanwis, mo bighaf blong olgeta we oli plei long drama ya, sora blong olgeta i fas!

Biaen, oli soemaot nyufala buk ya Save Blong Lidim Yu Long Laef we i No Save Finis. Ol man long asembli ya oli glad tumas blong save se i gat wan video kaset blong tokbaot olgeta haf blong buk ya wetem saen lanwis. Faswan kaset, we i kamaot long asembli ya, i tokbaot japta wan kasem tri blong buk ya. I gat faef moa kaset we bambae oli mas kamaot yet. Wan brata we i kam long Ohaio i talem se: “Mifala i talem tangkyu tumas from nyufala video kaset ya. Bambae hem i halpem mifala blong kasem plante moa man long wok blong prij, we sora blong olgeta i fas.”

Ol 2,621 man we oli stap long tufala asembli ya, oli gobak long haos we oli haremgud tumas long saed blong speret. Naoia oli strong moa i bitim bifo, blong go talemaot tok blong man blong raetem Ol Sam, i se: “Olgeta samting we i gat laef​—oli mas presem Ja. !Yufala i presem Ja!”​—Ol Sam 150:​6, NW.

[Futnot]