Ol Yangfala Oli Askem . . .

?From Wanem Besfren Blong Mi i Muf i Go Long Narafala Ples?

‘YU LUK olsem we yu bin lusum besfren blong yu.’ Ol man oli save talem tok ya taem wan man i luk olsem se i harem nogud no tingting blong hem i foldaon. Be taem yu rili lusum besfren blong yu, tok ya i gat bigfala mining.

Yes, trufala fasin fren i wan samting we i spesel mo i sas. Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Proveb 17:17) Ol gudfala fren oli joengud wetem yumi mo oli sapotem yumi. Oli givhan long yumi blong gru long saed blong filing mo speret. Nating se yumi save plante man, ol wanwan man we yumi save rili trastem mo talemaot ol filing blong yumi long olgeta, oli no plante.

Sipos besfren blong yu i muf i go long wan narafala ples, i stret se yu harem nogud tumas. Wan yangfala we nem blong hem Bryan, i tingbaot ol filing blong hem taem besfren blong hem i muf. Hem i talem se: “Mi fraet, mi harem olsem se mi stap mi wan nomo, mo mi trabol long tingting blong mi.” Maet ol filing blong yu oli sem mak.

Fesem Ol Trufala Samting

Sipos yu tingbaot from wanem fren blong yu i muf, samting ya i save givhan long yu. I sua se risen ya i no from we hem i no glad long fasin fren blong yu. Long taem blong yumi, plante man oli stap muf i go long ol narafala ples. !Long Yunaeted Stet nomo, bitim 36 milyan man oli muf evri yia! Folem tok blong Ofis blong Sensas long Yunaeted Stet, wan man Amerika bambae i muf i go long narafala ples 12 taem long ful laef blong hem.

?From wanem ol man oli muf olbaot olsemia? I gat plante risen. Plante famle oli muf i go long narafala ples blong faenem wan wok no wan haos we i moagud. Long ol pua kantri, faet mo fasin pua i fosem plante milyan famle blong muvaot. Taem ol yangfala oli kam ol bigman, plante oli jusum blong muvaot long famle blong olgeta mo stap olgeta nomo. Samfala oli aot blong oli mared. (Jenesis 2:24) Maet sam narafala oli muf blong mekem moa wok long saed blong speret. (Matyu 19:29) Plante Wetnes blong Jeova oli aot long ples blong olgeta, oli go wok long ol narafala ples—maet long narafala kantri—we i nidim moa Kristin man blong talemaot gud nyus. Samfala oli muf i go long narafala ples insaed long kantri blong olgeta, maet blong wok long hedkwota blong ol Wetnes blong Jeova we oli kolem Betel. Yes, yumi laekem ol fren blong yumi tumas, be yumi mas save se ating samtaem long laef blong olgeta bambae oli muf i go long narafala ples.

Nomata wanem samting i pusum fren blong yu blong muf, maet yu no save olsem wanem blong winim filing blong yu. I tru se i stret blong harem nogud blong smoltaem from we yu no gat fren mo from tingting blong yu i foldaon smol, be ating yu luksave se sipos yu stap olsem nomo, bambae ol samting oli no save kamgud. (Proveb 18:1) Ale, bambae yumi tokbaot sam samting we oli save givhan long yu.

Gohed Blong Toktok Tugeta

Yangfala Bryan i givim advaes ya se: “Luksave se fasin fren blong yutufala i no finis.” I tru se sipos besfren blong yu i muf i go long narafala ples, fasin fren blong yutufala bambae i jenis. Be samting ya i no min se fasin fren blong yutufala i mas finis. Dokta Rosemarie White, wan woman blong givim advaes long ol yangfala, i talem se: “Long eni taem blong laef, i had tumas blong lusum wan fren. Rod blong winim filing ya, i blong tingbaot se hemia i wan jenis nomo, i no olsem we doa i sat.”

?Yu save mekem wanem blong holem doa blong fasin fren i stap open? Tingbaot store long Baebol long saed blong Deved mo Jonatan. Nating se wan i gat plante yia moa bitim narawan, tufala i laekem tufala tumas. Taem ol samting oli kamaot long laef blong Deved blong fosem hem blong ronwe i go long narafala ples blong haed, tufala i toktokgud tugeta bifo we tufala i seraot. Tufala i talem bakegen long tufala se fasin fren blong tufala bambae i no save finis, mo tufala i mekem wan kontrak, no tufala i agri blong gohed blong frengud tugeta.—1 Samuel 20:42.

Sem mak nao, yu save toktok wetem fren blong yu bifo we hem i aot. Yu mas mekem fren blong yu i save se fasin fren blong yutufala i wan samting we i sas tumas long tingting blong yu, mo se yu wantem gohed blong toktok wetem hem oltaem. Patty mo Melina we tufala i besfren, tufala i mekem olsem taem wan i muf i go 8,000 kilomita longwe, mo i gat plante graon mo solwora i seraotem tufala. Patty i eksplenem se: “Mitufala i mekem plan blong holem fasin blong toktok tugeta oltaem.” Be, ol plan olsem oli save foldaon sipos yu no toktok tugeta long klia fasin.—Lukluk Emos 3:3.

Baebol i talem se taem aposol Jon i no gat rod blong luk fren blong hem Gaeas, ‘hem i raetemdaon tok long pepa.’ Olsem nao, tufala i save gohed blong toktokgud tugeta. (3 Jon 13) Yutufala tu i save sanem wan leta no kad i go long yutufala, maet wan taem long wan wik no wan taem long wan manis. Mo sipos papa mama blong yutufala i glad blong pem kaon blong telefon, maet sam samtaem yutufala i save telefon i go long yutufala mo talem ol samting we i stap kamaot long laef blong yutufala. Narafala rod se, yutufala i save sanem toktok i go long yutufala long wan kaset no video kaset. Long fyuja, maet yutufala i save mekem plan blong luk yutufala long wan wiken, no tekem spel tugeta. Long rod ya, fasin fren i save stap strong.

Fulumap Laef Blong Yu

Nating se yu mekem ol samting ya, taem wan besfren i muf i go long narafala ples, i olsem se i gat wan hol long laef blong yu. From samting ya, maet yu faenem se yu gat moa fri taem. Yu no mas westem taem ya. (Efesas 5:16) Yu mas yusum taem ya blong mekem sam gudfala samting—maet yu save lanem blong plei myusek, lanem wan nyufala lanwis, no mekem wan narafala wok we yu laekem tumas. Wan narafala rod blong yusumgud taem ya, hemia blong mekem ol smosmol wok blong olgeta we oli nidim help. Sipos yu yu wan Wetnes blong Jeova, yu save mekem moa long wok blong prij. (Matyu 24:14) Maet yu save folem wan spesel plan blong stadi Baebol.

Mo tu, aposol Pol i talem long ol Kristin long Korin blong “mekem moa fren.” (2 Korin 6:13, NW) Maet yu bin spenem plante taem wetem wan fren nomo, mo yu no bin tingbaot ol narafala we yu save frengud wetem olgeta. Ol yangfala Wetnes blong Jeova oli luk se i gat plante long prapa kongregesena blong olgeta we oli save fren wetem olgeta. Go eli long ol miting blong kongregesen, mo stap smoltaem afta we miting i finis. Olsem nao, bambae yu gat moa taem blong save ol man. Long ol Kristin asembli, mo taem yumi evriwan i joen wanples, hemia ol narafala jans we yumi gat blong mekem ol nyufala fren.

Be i stret blong givim wan woning se: Yu no mas hareap tumas blong mekem ol nyufala fren, from we fasin ya i save lidim yu blong frengud wetem ol yangfala we oli no gat sem tingting olsem yu long ol mak we yu wantem kasem long saed blong speret, mo ol rul we yu stap folem. Ol yangfala olsem oli save daonem ol gudfala fasin blong yu, mo oli save spolem yu bitim we oli givhan long yu. (Proveb 13:20; 1 Korin 15:33) Joen wetem ol yangfala we oli tinghevi long ol samting long saed blong speret, mo we oli gat gudnem from gudfala fasin blong olgeta.

Sipos yu faenem wan yangfala olsem, yu save plan blong mekem wan samting tugeta, blong wokem wan fasin fren wetem hem. Kakae tugeta. Go luk wan musium. Go wokbaot samples. Mekem plan blong spenem wan dei tugeta long Kristin wok blong prij, we yutufala i go talemaot gud nyus blong Kingdom blong God long ol man. Wetem taem mo fasin traehad, nyufala fasin fren ya i save kam strong. Kristin lav i save gru i kam bigwan moa, hemia i minim se yu save “mekem moa fren.” Taswe, taem yu mekem ol nyufala fren, yu no nidim blong harem se yu no stap tru long fren blong yu we i muf i go long narafala ples.

Mo tu, yu save tekem jans blong frengud moa wetem tufala ya we oli laekem yu moa—hemia papa mama blong yu. Tufala i save halpem yu bigwan, nating se fastaem maet yu harem se i narakaen blong kampani wetem tufala. Wan yangfala we nem blong hem Josh, i talem se: “Kolosap se mi mas fosem mi blong spenem taem wetem papa mama blong mi, from we mi no stap frengud wetem tufala long taem ya. !Be naoia tufala i besfren blong mi!”

Rimemba tu se yu gat wan fren yet long heven. Dan we i gat 13 yia, i talem se: “Yu no stap yu wan nomo from we yu gat Jeova yet.” Oltaem Papa blong yumi long heven i rere blong lesin taem yumi toktok wetem hem long prea. Sipos yu trastem hem, bambae hem i givhan long yu blong winim hadtaem ya.—Ol Sam 55:22.

Holemtaet Wan Gudfala Tingting

Waes King Solomon i givim advaes ya se: “Yu no mas talem se: ‘?From wanem ol samting we oli pas finis oli moa gud long ol samting we oli stap hapen naoia?’ ” (Eklesiastis 7:10) Long ol narafala tok, yu no mas tingting nomo long ol samting we oli hapen bifo. Yu mas yusumgud ol jans we yu gat naoia. Bill, we i gat bitim 20 yia naoia, i mekem samting ya taem hem i lusum besfren blong hem. Hem i tingtingbak i se: “Afta we smoltaem i pas, mi stat mekem ol nyufala fren mo mi no stap tingbaot bifo tumas. Mi traem blong tingrere long fyuja mo tingbaot ol samting long laef blong mi naoia.”

Nating se ol advaes ya i save givhan long yu, be yu save harem nogud yet taem besfren blong yu i muf i go long narafala ples. Maet longtaem lelebet i mas pas bifo we ol memori blong ol gudfala taem we yutufala i bin gat, oli no moa mekem yu yu harem nogud. Tingbaot se fasin ya we ol samting oli jenis i wan haf blong laef, mo samting ya i givim jans long yu blong kam wan bigman long tingting blong yu, mo blong lanem plante nyufala samting. Maet i no gat wan narafala i save tekem ples fulwan blong spesel fren blong yu, be yu save wokem ol fasin we bambae oli mekem se ‘Jeova i laekem yu mo ol narafala man tu oli laekem yu.’ (1 Samuel 2:26) !Taem yu mekem olsem, bambae yu gat fren oltaem!

[Futnot]

[Tok Blong Pija Long Pej 15]

Taem yu talem tata long besfren blong yu, yu save harem nogud tumas