Orchid—?Wan Flaoa We Klosap i Lus?
Flaoa ya orchid i save stretem hem wan folem ples we hem i gru long hem. Ol flaoa ya oli gru long graon, long tri, mo long ol ston tu. Be IUCN (International Union for Conservation of Nature and Natural Resources), i givim woning se plante long ol defren kaen flaoa ya bambae oli no moa save laef long ol ples olbaot, sipos man i gohed blong stap katem mo spolem bus. Wendi Strahm, we i wok blong IUCN, i talem se: “Sipos ol jenis ya oli kamaot, i minim se ol smosmol bebet we oli impoten tumas blong maredem ol flaoa, bambae oli lus tu, no bambae oli muf i go long ol narafala ples. Taem samting ya i hapen, ol orchid oli no moa save mekem sid blong narafala flaoa i gru.”
Klosap 20 pesen blong ol faef milyan orchid we man i salem evri yia long olgeta ples blong wol, oli kamaot from ol ples long bus. IUCN i talem se, fasin ya i spolem naesfala flaoa ya mo i mekem se hem i no save kam plante moa. Taswe, IUCN i talem se sipos ol man oli wantem pem ol orchid, i gud blong tekem long ol garen we man i planem, i bitim we oli go pulumaot ol flaoa ya long ples blong olgeta olbaot long bus.
Man i faenemaot samwe 20,000 defdefren kaen flaoa ya orchid. Sam oli smol nomo olsem 0.6 sentimita; sam narafala oli olsem ol rop we oli save gru go kasem i longfala olsem 30 mita. Bighaf blong ol flaoa ya oli laef long ol ples we i hot, i wetwet, mo we i ren plante. Oli dipen bigwan long weta we i stap raonabaot long ol bus, blong stap laef.
From we ol man oli no tinghevi mo oli no kea long ol laef samting, oli gohed blong stap spolem ol laef samting raonabaot long olgeta. Samting ya i mekem bigfala denja long plante defdefren flaoa, olsem flaoa ya orchid. Be, fasin ya i no save gohed olwe. Long niufala wol we God i promes long hem, bambae man i laef gud tugeta wetem ol narafala laef samting raonabaot long hem. Long taem ya, tok blong man blong raetem Ol Sam, bambae i kamtru, se: ‘!Ol garen wetem evri samting we i stap long olgeta bambae oli glad! Olgeta tri long bus bambae oli glad, oli stap singsingaot blong presem God.’—Ol Sam 96:12.
[Foto Credit Line blong pija long pej 31]
Jardinería Juan Bourguignon
[Foto Credit Line blong pija long pej 31]
Jardinería Juan Bourguignon