?Hu Bambae i Protektem Ol Pikinini Blong Yumi?

YUMI glad blong save se naoia, ol man oli luksave se fasin blong mekem nogud long pikinini long saed blong seks i wan problem blong fulwol. Ol miting olsem hemia we ol man blong 130 kantri oli joen long hem long Stokhom, i pulum tingting blong ol man i go long problem ya.

Mo tu, naoia, sam kantri oli stap putumap ol loa we oli blokem ol bisnes blong salem bodi blong ol pikinini long ol turis mo ol rabis buk mo video we oli soem nogud fasin blong seks wetem pikinini. Sam man oli raetem buk blong talemaot ol man ya we oli stap mekem nogud long saed blong seks wetem pikinini. Ol buk ya oli givhan blong blokem ol man we oli wantem spolem pikinini.

Sam narafala man oli stap lukaot ol rod blong mekem laef blong ol pikinini i kam moagud, taswe oli stap putumap sam loa blong protektem ol pikinini. Mo tu, plante kantri mo plante man naoia, oli no wantem pem ol samting blong eni kampani we ol wokman blong hem oli ol pikinini.

Yes, yumi evriwan i sapotem ol traehad ya we ol man oli stap mekem blong blokem fasin ya blong mekem nogud long ol pikinini. Nating se i olsem, yumi mas tingbaot oltaem mo luksave se ol trabol ya oli gat bigfala paoa long laef blong ol man tede. Yumi no mas ting se wan loa nomo i naf blong protektem ol pikinini blong yumi fulwan. Ol kantri oli putumap plante loa finis long saed ya, be ol trabol ya oli stap gohed yet. Long wol tede, i nidim plante loa blong protektem fasin fri blong ol pikinini. Samting ya i soemaot klia se fasin blong ol man naoia, i rabis olgeta.

Ol loa nomo oli no naf blong protektem ol pikinini. Samting ya i klia taem yumi luk risal we i kamaot afta we Yunaeted Nesen i holem wan miting blong putumap ol strongfala loa blong protektem ol pikinini (UN Convention on the Rights of the Child). Plante gavman oli sapotem ol loa ya. Be, yumi savegud se plante long ol gavman ya, from we oli trabol long mane, oli no mekem plante samting blong blokem fasin ya blong mekem i nogud long ol pikinini. Yes, fasin blong mekem i nogud long pikinini i stap yet olsem wan bigfala problem blong wol.

Ol Papa Mama Oli Save Givhan Bigwan

Wok blong tijimgud pikinini i wan bigfala wok. From wok ya, ol papa mama oli mas lego plante samting. Be, ol papa mama we oli rili gat fasin kea bambae oli meksua se samting ya we oli lego, hem i no pikinini blong olgeta. Niuspepa ya Maclean’s i soem se plante taem “ol papa mama oli luk wok ya blong tijim pikinini olsem wan pleplei nomo.” Wan doli i save brok mo wan pleplei i save stop, be fasin blong tijimgud pikinini i wan wok we God i givim long papa mama blong mekem oltaem.

Beswan presen we yu save givim long pikinini blong yu hemia blong stap olsem wan gudfala papa no mama. Samting ya bambae i halpem pikinini blong yu blong gruap long wan laef we i hapi mo i sefgud. Fasin sefgud i no dipen long wanem kaen laef no hamas mane we famle blong yu i gat. Pikinini blong yu i nidim yu. Hem i nidim yu blong lavem hem, kea long hem long taem blong trabol, mo spenem taem wetem hem. Pikinini blong yu i wantem harem we yu talem ol stori long hem. Hem i wantem we yu soem eksampel long hem mo stretem hem wetem lav.

?Olsem wanem blong tijim pikinini long ol stret rul long saed blong seks? Ol papa mama, yufala i mas mekem famle i joen long fasin we i klin mo soem respek long tingting mo bodi blong ol pikinini. Ol pikinini oli luksave kwiktaem ol fasin we oli brekem ol stretfala rul we papa mama blong olgeta i bin putumap. Papa mama i mas tijim pikinini long ol fasin we oli mas mekem taem oli stap long haos no long narafala ples. Sipos yu no tijim olgeta long saed ya, bambae narafala man i mekem long ples blong yu, mo maet yu harem nogud from risal blong samting ya. Tijim ol pikinini long samting we oli mas mekem sipos narafala man i traem pulum olgeta blong lego ol stret rul. Eksplenem long olgeta se ol tabu haf long bodi blong olgeta oli gat prapa wok blong olgeta, mo i no stret blong pleplei wetem ol tabu haf ya. Talem long olgeta wanem we oli save mekem sipos wan man i wantem mekem samting we i no stret long olgeta.

Yu mas save oltaem se ol pikinini blong yu oli stap wea mo hu i stap wetem olgeta. ?Hu ya ol gudfala fren blong ol pikinini blong yu? ?Hu i stap lukaot long ol pikinini blong yu taem yu no stap? ?Yu trastem man ya? I tru, samting ya i no minim se yu no mas trastem wan man nating. No gat. Be, yu mas skelem gud fasin blong ol bigman we oli kampani oltaem wetem ol pikinini blong yu, mo i gud blong lukluk i go moa i bitim wanem we ae blong yumi nomo i luk.

Plante papa mama oli harem nogud tumas taem oli faenemaot se sam man we oli bin trastem, olsem ol lida blong skul, sam tija no sam memba blong prapa famle blong olgeta, oli mekem i nogud long pikinini blong olgeta long saed blong seks. I gud sipos papa no mama i askem long hem wan se, ‘?Jos blong mi i agri nomo no i traem kavremap fasin blong mekem i nogud wetem pikinini long saed blong seks? ?Skul blong mi i rili fasgud long ol rul long saed blong stret fasin?’ Ansa blong ol kwestin ya i save halpem yu blong mekem ol waes disisen blong protektem ol pikinini blong yu.

Be antap long olgeta samting ya, traem halpem ol pikinini blong yu blong savegud mo blong laekem ol rul blong Man ya we i Wokem Olgeta Samting. Hemia wan nambawan rod blong protektem olgeta long ol trabol. Taem ol pikinini oli luk se papa mama blong olgeta i soem respek long ol stret rul, olgeta tu bambae oli rere blong folem gudfala eksampel blong tufala.

Wan Trufala Rod Nomo Blong Stretem Problem Ya

Tru tumas, ol loa mo fasin blong putum rabis man long kalabus blong plante yia, bambae i no save protektem ol pikinini blong yumi fulwan. Man ya we i Wokem yumi, hem nomo i naf blong mekem ol man oli gat ol fasin we oli stret. Hem i yusum Tok blong Hem, Baebol, blong jenisim tingting blong ol man ya we oli olsem wael anamol, nao oli kam ol man we oli gat trufala lav mo we oli laekem ol stret fasin.

I gat plante eksampel we oli pruvum se Tok blong God i save jenisim tingting blong man. Plante man oli lego ol rabis fasin blong laef we oli bin folem bifo. Stori blong ol man ya i soemaot se Tok blong God i gat paoa mo i save lidim ol man long stret rod. Be, nating se i olsem, bighaf blong ol man we oli stap mekem ol rabis fasin ya bambae oli no jenis. Hemia nao risen from wanem Jeova God i mekem promes se i no longtaem, olgeta man we oli stap yusum pikinini blong mekem rabis fasin, bambae oli lus. Waes blong ol man blong wol, doti fasin blong olgeta, mo fasin griri blong olgeta, bambae i no moa gat long wol ya.—1 Jon 2:15-17.

Ale, long niufala wol blong God, taem i no moa gat fasin pua, olgeta pikinini bambae oli harem gud. Bambae oli glad long wan laef we i no moa gat man i mekem trabol long olgeta. Hemia nao raet we God i givim long olgeta. Fasin blong mekem trabol long pikinini bambae i lus olgeta, be tu, bambae ol man oli no moa tingbaot ol nogud trabol ya we oli bin spolem laef blong olgeta: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.”—Aesea 65:17.

Taswe, long niufala wol blong God, ol tok blong Jisas Kraes bambae oli kamtru fulwan se: “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta [we bambae i rul antap long wol, long Paradaes we man i stap long hem].”—Matiu 19:14.

[Tok blong pija long pej 9]

Long waes fasin, tijimgud ol pikinini blong yu wanem blong mekem sipos man i traem pulum olgeta blong mekem nogud long saed blong seks

[Tok blong pija long pej 9]

Wan nambawan presen we yu save givim long pikinini blong yu, hemia blong stap olsem wan gudfala papa no mama

[Tok blong pija long pej 9]

Halpem ol pikinini blong yu blong lanem ol stamba tingting mo rul blong Man Ya we i Wokem Yumi

[Tok blong pija long pej 10]

Long niufala wol blong God, olgeta pikinini bambae oli harem gud fulwan