Baebol i Talem Wanem
?Ol Skul Oli Jes Ol Defdefren Rod Blong Lidim Man i Go Long God?
WAN man blong raetem buk, Marcus Borg, i talem se: “Mi no bilivim se God blong heven mo wol i agri long wan skul nomo.” Desmond Tutu we i winim Nobel Pis Praes, i talem se: “I no gat wan skul we i save talem se hem nomo i save trutok blong tok haed ya,” bilif. Plante Hindu oli talem “Jotto moth, totto poth,” we i minim se olgeta skul oli stap folem sem rod nomo. Ol Budis tu oli bilif olsemia. Yes, plante milian man oli ting se ol skul oli jes ol defdefren rod blong lidim man i go long God.
Geoffrey Parrinder we i stap stadi long histri i se: “Sam man oli talem se olgeta skul oli stap lidim man i go long sem ples nomo, se olgeta evriwan oli tru, mo se olgeta evriwan oli tijim ol semfala samting.” I tru, long plante skul, ol tijing, kastom, mo god blong olgeta oli klosap sem mak nomo. Plante skul oli tokbaot lav mo oli tijim se man i no mas kilim narafala i ded, i no mas stil, mo i no mas giaman. Mo i gat sam man long klosap evri skul we oli traehad blong halpem ol narafala man. ?Taswe, sipos wan man i bilif tru long skul blong hem mo i traehad blong mekem laef blong hem i stret, ating i no impoten wanem skul man ya i stap long hem? ?Olsem wanem? ?Olgeta skul, oli jes ol defdefren rod blong lidim man i go long God?
?Bilif Tru i Naf?
Tingbaot man Jiu ya, Sol, we i laef long faswan handred yia. Biaen, hem i kam Kristin aposol Pol. Hem i strong long skul blong ol man Jiu. Hem i traem blong kilimaot ol man blong Kraes, from hem i ting se wosip blong olgeta i nogud. (Ol Wok 8:1-3; 9:1, 2) Be God i sore long Sol. Hem i mekem Sol i luksave se maet hem wetem plante narafala man blong skul oli strong blong wosip long God, be oli rong, from we oli no save trutok. (Rom 10:2) Taem Sol i kasem save moa long wok blong God mo samting we God i wantem hem blong mekem, hem i jenisim bilif blong hem mo i joen wetem ol man blong Jisas Kraes, we fastaem hem i ronem olgeta.—1 Timoti 1:12-16.
?Olsem wanem? ?Baebol i talem se yumi save jusum eniwan long ol handred skul we oli stap? ?Nomata wanem skul we yumi jusum, bambae God i glad long hem? Afta we Jisas Kraes i laef bakegen long ded, hem i givim tok long aposol Pol we i soemaot wan defren tingting. Jisas i sanem Pol i go long ol hiten man, blong “openem ae blong olgeta blong oli tanem tingting blong olgeta, oli aot long tudak, oli kam long delaet, mo blong oli aot long paoa blong Setan, oli kam long paoa blong God.” (Ol Wok 26:17, 18) Ale, i klia se, skul we yumi jusum, hem i wan impoten samting. Plante man we Jisas i sanem Pol i go long olgeta, oli gat skul finis. Be oli stap long “tudak.” Sipos olgeta skul oli jes ol defdefren rod blong kasem laef mo blong mekem God i glad, bambae Jisas i no nidim blong lanem ol man blong hem blong oli pulum ol narafala oli kam disaepol blong hem.—Matiu 28:19, 20.
Long bigfala toktok blong Jisas antap long hil, hem i se: “Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.” (Matiu 7:13, 14) Baebol i talem klia se i gat “wan tok nomo we yumi bilif long hem.” (Efesas 4:5) I klia se, plante we oli stap long ‘bigfala rod,’ oli gat wan skul. Be oli no gat ‘wan tok nomo we oli bilif long hem.’ Yes, i gat wan trufala fasin blong wosip nomo. Taswe, olgeta we oli wantem faenem trufala bilif ya oli mas lukaotem.
Lukaot Trufala God
Long stat olgeta, God i talemaot wanem we hem i wantem man blong mekem. (Jenesis 1:28; 2:15-17; 4:3-5) Tede, Baebol i talemaot klia ol samting we hem i wantem yumi blong mekem. Taswe, yumi gat rod blong luksave wanem wosip we God i glad long hem mo wanem wosip we God i no glad long hem. (Matiu 15:3-9) Samfala oli tekem skul blong mama papa blong olgeta. Samfala oli joen long skul we bighaf blong ol man long vilej blong olgeta oli folem. Samfala oli kasem skul blong olgeta from taem mo ples we oli bon long hem. ?Be i stret blong letem narafala i jusum skul blong yumi no letem i kamaot olsem nomo?
Blong jusum wan skul, yu mas stadigud long Baebol fastaem blong kasem plante save. Long faswan handred yia, sam man we oli gat hed, oli lesin long tok blong Pol. Be oli no bilif wantaem nomo long tok ya. Oli ‘ridimgud ol tok blong Baebol, blong faenemaot se ol tok blong hem i tru no i no tru.’ (Ol Wok 17:11; 1 Jon 4:1) I gud we yu tu yu mekem olsem.
Baebol i tokbaot God blong heven mo wol, se hem i stap lukaot ol man blong oli mekem trufala wosip long hem. Jon 4:23, 24 (NW ) i talem tok blong Jisas se: “Aoa i stap kam, yes, hem i naoia, we ol man blong mekem trufala wosip, bambae oli wosip long Papa long spirit mo long trutok, from we, tru, Papa i stap lukaot ol man olsemia, blong oli mekem wosip long hem. God hem i wan Spirit, mo olgeta we oli stap mekem wosip long hem, oli mas wosip long spirit mo long trutok.” “God i Papa blong yumi,” mo i gat wan fasin blong wosip nomo we God i glad long hem, hemia “prapa fasin blong ona long hem, we hem i luk se i klin gud mo i stret gud.” (Jemes 1:27) God i blesem plante milian man finis we oli lukaotem smol rod blong kasem laef. Bambae hem i no save givim laef blong olwe long olgeta we oli no traehad, no gat. Bambae hem i givim laef long olgeta we oli traehad blong faenem smol rod we hem i makemaot, mo oli traehad blong folem.—Malakae 3:18.