Baebol i Talem Wanem

?Bambae God i Satem Ae Long Ol Slak Fasin Blong Yumi?

‘!Mi mi no wan rabis man! !Mi bin traehad blong lego ol nogud fasin blong mi, be mi mi no naf!’

?HEMIA filing blong yu no blong wan we yu save hem? Plante man oli talem se oli no naf blong winim ol nogud fasin we i stap longtaem finis wetem olgeta. Samfala oli kam slef blong strong dring, sigaret no drag. Plante narafala oli letem griri fasin i bos long laef blong olgeta. Mo samfala oli foldaon long rabis fasin blong seks, oli talem se oli no save ronwe long ol fasin ya.

Long Matiu 26:41, ol tok we Jisas i talem long kaen fasin i soemaot se hem i kasem save long filing we ol man oli gat from ol slak fasin blong olgeta.a Yes, fulwan Baebol i talem klia se Jeova God mo Jisas, tufala tugeta oli gat sore long ol man. (Ol Sam 103:8, 9) ?Be i stret blong ting se God bambae i satem ae long ol nogud poen blong yumi?

Moses Mo Deved

Tingbaot stori blong Moses. Baebol i talem se “i no gat wan narafala man long wol we tingting blong hem i stap daon olsem hem.” Mo Moses i traehad blong holemtaet gudfala fasin ya. (Namba 12:3) Taem ol man Isrel oli stap wokbaot long draeples, plante taem oli mekem samting we i no stret, mo oli no soem respek long God mo long ol man blong hem. Long olgeta yia ya, tingting blong Moses i stap daon, mo hem i lukluk i go long God blong lidim hem.—Namba 16:12-14, 28-30.

Be long en blong longfala trip ya we i mekem ol man oli taed, Moses i faerap long kros long fored blong ol man Isrel, mo hem i no mekem samting we God i talem. I tru se God i fogivim hem. ?Be God i satem ae blong hem long samting we Moses i mekem? Nogat. Hem i talem long Moses se: ‘!Bilif blong yu i no strong nating! . . . From samting ya, bambae yu yu no save lidim olgeta oli gotru long ples ya we mi mi promes blong givim long yufala.’ Yes, Moses i no go insaed long Promes Lan. Afta we hem i traehad blong 40 yia blong kasem nambawan blesing ya, hem i no kasem from we hem i foldaon long wan bigfala slak fasin blong hem.—Namba 20:7-12.

King Deved i wan narafala gudfala man blong God we i gat wan slak fasin. Wan taem, hem i letem ol filing blong hem oli pulum hem blong slip wetem woman blong narafala man. Biaen, hem i mekem plan se narafala bambae i kilim man ya i ded. Olsem nao, hem i traem blong kavremap sin blong hem. (2 Samuel 11:2-27) Afta, hem i harem nogud tumas from ol bigfala sin blong hem, mo God i fogivim hem. Be, Deved i spolem wan famle, mo Jeova i no blokem hem long ol bigfala trabol we hem i kasem biaen. Pikinini boe blong Deved i sik tumas, mo Jeova i no blokem samting ya, nating se Deved i prea from pikinini ya. Boe ya i ded, mo afta long taem ya, plante nogud samting i hapen long famle blong Deved. (2 Samuel 12:13-18; 18:33) Deved i kasem nogud frut from we hem i foldaon long slak fasin blong hem.

Ol stori ya oli soem se ol man oli gat fol long fes blong God from ol nogud fasin we oli mekem. Olgeta we oli wantem mekem wok blong God oli mas traem kamgud moa long saed blong spirit blong oli save winim ol slak fasin blong olgeta mo kam ol gudfala Kristin. Long faswan handred yia, plante man oli mekem samting ya.

Traehad Blong Sakemaot Sin

I stret nomo we yumi tingbaot aposol Pol olsem eksampol blong wan gudfala Kristin. ?Be yu yu save se hem i stap faet oltaem agens long ol slak fasin blong hem? Ol vas blong Rom 7:18-25 oli soemaot klia se hem i faet olsem blong traem winim ol samting we vas 23 i talem se oli “agens” long hem. Pol i faet strong, i no stop, from we hem i save se sin i no save lego hem.—1 Korin 9:26, 27.

Samfala long Kristin kongregesen long Korin oli bin mekem ol nogud fasin bifo. Baebol i talem se oli bin ‘ronem woman, slip wetem woman blong narafala man, man i slip wetem man, man i stil mo i wantem plante samting tumas, mo man i dring we i lusum hed.’ Be Baebol i talem tu se ‘God i wasemaot ol sin blong olgeta blong mekem oli klin.’ (1 Korin 6:9-11) ?Olsem wanem hem i mekem olsemia? Taem ol man ya oli kasem stret save, oli kampani wetem ol Kristin, mo tabu spirit blong God i givhan long olgeta, oli naf blong finis long rabis fasin blong olgeta. Sloslo, God i mekem olgeta oli kam stret man tru long nem blong Kraes. Yes, God i fogivim olgeta, olsem nao, hem i mekem we oli gat klin tingting long fes blong hem.—Ol Wok 2:38; 3:19.

Pol mo ol Kristin long Korin oli no ting nating long ol slak fasin blong olgeta we oli kamaot from sin. Long defren fasin, oli faet agens long olgeta, mo God i givhan long olgeta blong oli win. Ol man ya blong God long faswan handred yia oli kam naes long fes blong God, nating se ol rabis fasin oli stap raonabaot long olgeta mo nating se oli sinman. ?Olsem wanem long yumi?

God i Wantem Se Yumi Faet Agens Long Ol Slak Fasin

Taem yumi faet agens long wan slak fasin, maet yumi no winim fasin ya fulwan. I tru, yumi no nid blong letem sin i lidim yumi, be yumi no save tekemaot sin long bodi blong yumi tu. Sin i stamba blong ol slak fasin we i had blong winim. Nating se i olsem, yumi no mas letem ol slak fasin ya oli bos long yumi. (Ol Sam 119:11) ?From wanem samting ya i impoten?

From we God i no save agri long yumi sipos yumi yusum sin oltaem olsem wan eskius blong ol nogud fasin we yumi mekem. (Jud 4) Jeova i wantem se ol man oli kam klin long fes blong hem, mo we oli folem ol gudfala fasin long laef blong olgeta. Baebol i talem se: “Oltaem yufala i mas agens long ol rabis fasin.” (Rom 12:9) ?From wanem God i strong long poen ya?

Wan risen, hemia se, sipos yumi letem ol slak fasin oli winim yumi, samting ya i save spolem laef blong yumi. Baebol i talem long Galesia 6:7 se: “Wanem sid we man i planem fastaem long garen blong hem, be frut blong hem nomo, man ya bambae i mas kakae.” Ol man we oli letem sam nogud fasin oli kam bos long laef blong olgeta, no oli griri, no oli slip olbaot, olgeta ya oli kasem ol rabis frut long laef blong olgeta. Be i gat wan moa risen we i impoten.

Taem yumi mekem wan sin, yumi mekem wan samting agens long God. Sin i mekem se yumi go “longwe” long Jeova. (Aesea 59:2) God i no save glad long olgeta we oli mekem sin oltaem, taswe hem i talem long olgeta se: “Yufala i mas wasem yufala, blong yufala i kam klin. . . . Yufala i mas lego ol fasin ya we oli no stret.”—Aesea 1:16.

Man ya we i Wokem yumi, hem i gat lav mo sore. “Hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Sipos oltaem yumi letem slak fasin i winim yumi, bambae yumi mekem we God i no save glad long yumi. God i no save satem ae long ol slak fasin blong yumi, taswe yumi tu, yumi no mas satem ae long olgeta.

[Futnot]