Japta 26

Faet Ya Blong Mekem Ol Stret Fasin

1. ?Wanem tufala samting ya we ol Kristin oli mas faet agens long hem?

WOL BLONG Setan i stap yet, taswe ol Kristin oli mas faet blong ol rabis fasin blong hem i no save pulum olgeta. Aposol Pol i raetem se: “Yufala i mas putum ol klos blong faet, we God i givim long yufala. Nao taem Setan i stap wokem ol gyaman trik blong hem, be bambae yufala i save stanap strong.” (Efesas 6:​11-18) Be faet blong yumi, i no agens long Setan mo wol blong hem nomo; hem i agens long ol rabis tingting blong yumi tu, we i traem pulum yumi blong mekem ol nogud samting. Baebol i talem se: “Taem man i yangfala yet, be hat blong hem i wantem mekem ol nogud samting finis.”​—Jenesis 8:21; Rom 5:12.

2. (a) ?Blong wanem plante taem yumi wantem mekem ol nogud samting? (b) ?Blong wanem yumi mas faetem rabis tingting ya we i wantem pulum yumi?

² From sin ya we yumi kasem long fas man Adam, taswe hat blong yumi i wantem mekem ol nogud samting. Nao sipos yumi letem nogud samting ya we yumi wantem mekem, i pulum yumi, bambae yumi no save kasem itenel laef long nyufala wol blong God. Taswe yumi mas faet blong mekem ol samting we i stret. Aposol Pol tu, i mekem wan faet olsem. Hem i eksplenem, i se: “Taem mi wantem mekem ol samting we i gud, be oltaem ol samting we i nogud i stap long mi.” (Rom 7:​21-23) Ating yu tu bambae yu harem we faet ya i hadwok tumas. Samtaem tingting blong yu i faet i wantem tumas folem tufala rod ya wantaem. ?Bambae yu mekem wanem nao?

3. (a) ?Wanem trabol ya blong hat we plante man oli kasem? (b) ?Plante man oli wantem mekem ol stret samting, be oli stap mekem ol nogud samting. ?Fasin ya i soemaot wanem trutok blong Baebol?

³ Naoia yu yu save finis long gudfala promes ya blong God, se man bambae i save laef foreva long wol ya, long fasin we i stret gud olgeta. Yu yu bilivim ol promes ya, mo yu wantem we bambae yu kasem ol gudfala samting ya. Ale, taswe naoia yu save we yu mas wok long saed blong God, blong kasem ol itenel blesing ya. Be maet hat blong yu i wantem ol samting we i nogud. Maet samtaem yu wantem mekem fonikesen,a no yu wantem stilim wan samting, no maet yu wantem mekem sam narafala nogud samting. Sam man we oli stap stadi long buk ya, maet oli stap mekem ol nogud samting ya yet, be oli save finis se God i no laekem ol samting ya nating. Oli wantem mekem ol stret samting, be oli stap mekem ol nogud samting. Hemia i soemaot we Baebol i tru taem i talem se: “Hat i fulap long ol gyaman fasin, i bitim ol narafala samting, mo hem i nogud nating.”​—Jeremaea 17:9.

YUMI SAVE WINIM FAET YA

4. (a) ?I dipen long hu, blong winim no lusum faet ya? (b) ?Blong winim faet ya blong mekem ol stret samting, yu yu mas mekem wanem?

⁴ Hemia i no min se man i no save kontrolem ol rabis tingting ya blong hem, we oli wantem pulum hem. Sipos yu yu rili wantem, yu save givim paoa long hat blong yu, blong bambae i save lidim yu yu go long stret rod. Be samting ya i stap long yu nomo blong mekem. (Sam 26:​1, 11) I no gat wan narafala man we i save tekem ples blong yu long faet ya, blong winim. Taswe yu yu mas gohed nomo blong kasem save long Baebol, we hemia i blong halpem yu blong kasem laef. (Jon 17:3) Be i no naf sipos save ya i go insaed long hed blong yu nomo. I mas kasem hat blong yu tu. Yu mas glad tumas from ol samting ya we yu stap lanem, blong bambae yu wantem mekem we fasin blong yu i laenap gud long hem.

5. ?Olsem wanem yu yu save mekem hat blong yu i glad long ol loa blong God?

⁵ ?Be olsem wanem yu yu save mekem hat blong yu i glad long ol loa blong God? Yu yu mas tingtinggud long olgeta. Maet yu askem long yu wan se: ?Sipos mi mi obei long God, be olsem wanem samting ya i save halpem mi? Oraet, afta i gud sipos yu yu lukluk long laef blong samfala man we oli bin brekem loa blong God. Wan gel we i gat 19 yia, i raetem se: “Mi mi kasem vidi tri taem finis. Naoia mi mi no moa save karem pikinini, from we dokta i katem bel blong mi, from sik ya.” Yumi harem nogud taem yumi lukluk ol trabol ya we i kamaot from we ol man oli no obei long ol loa blong God. (2 Samuel 13:​1-19) Wan woman we i mekem fonikesen, i sore tumas, nao i talem se: “Yumi no save win taem yumi brekem ol loa. Yumi kasem soasore, mo ol tingting blong yumi i no moa save wok gud, i olbaot nomo. Yes, naoia mi trabol tumas from.”

6. (a) Gladtaem ya we i kamaot long ol rabis fasin, ?blong wanem bambae frut blong hem i nogud? (b) ?Wanem kaen laef ya we Moses i save kasem long Ijip bifo, sipos i wantem?

⁶ Be yu save harem samfala man oli talem, se fonikesen, mo fasin blong drong, mo fasin blong yusum drag, i gud blong mekem man i glad. Be fasin blong glad ya, i no save stap longtaem. Olgeta fasin ya blong trikim yu, oli save blokem yu blong kasem gladtaem ya we i prapawan, we neva i save finis samtaem. Tingbaot Moses we oli tekem hem olsem wan “pikinini blong gel blong Fero.” Hem i stap long rij famle blong Fero ya, long Ijip bifo. Be Baebol i talem we Moses “i wantem stap wetem ol man blong God blong harem nogud wetem olgeta, i no wantem we i harem gud blong smoltaem nomo long sin.” (Hibrus 11:​24, 25) Hemia i soemaot we olgeta long famle blong Fero oli harem gud from ol nogud fasin blong olgeta. Oli glad long hem. ?Be blong wanem Moses i no wantem ol samting ya?

7. ?Blong wanem Moses i no wantem “harem gud blong smoltaem nomo long sin,” long famle blong Fero?

⁷ Moses i no wantem ol samting ya from we i bilif long God Jeova. Mo hem i save long samting ya we i moa gud, i bitim gladtaem ya blong sin long famle blong Fero, we i no save stap longtaem. Baebol i talem se: “Hem . . . i stap luk oltaem long pei we bambae God i givim long hem.” Moses i tingtinggud long ol samting ya we i stap long promes blong God. Hem i bilif we God bambae i mekem wan stret nyufala wol. Hat blong hem i glad tumas from bigfala lav ya we Jeova i soemaot long olgeta man. Moses i harem mo ridim ol nyus blong Jeova. Be hem i go moa ya. Baebol i talem we Moses “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:​26, 27, NTB) Moses i bilif we Jeova i tru i stap. Mo tu, i bilif long ol promes ya blong hem long itenel laef.

8. (a) ?Yumi mas mekem wanem, blong winim faet ya blong mekem ol stret fasin? (b) ?Wanem tingting ya blong wan yangfala man, we i gud blong yumi holem?

⁸ ?Yu tu yu olsem? ,Yu yu bilif we Jeova i tru i stap? ?Mo we hem i wan Papa we i lavem yu? Promes blong hem i talem we hem bambae i givim itenel laef long ol stret man, long Paradaes long wol. ?Taem yu ridim promes ya blong hem, yu tingbaot we yu tu bambae yu kasem ol blesing ya long Paradaes? (Lukluk long pej 156 i kasem pej 162) Blong winim faet ya agens long ol rabis fasin we oli stap traem pulum yumi, yumi mas fren gud long Jeova. Mo yumi mas “stap luk oltaem long pei we God bambae i givim” long yumi, olsem Moses i stap luk oltaem bifo. Wan yangfala man we i gat 20 yia, we i no wantem mekem fonikesen, hem i holem sem tingting blong Moses. Hem i talem se: “Hop ya blong mi long itenel laef i gud tumas. Mi no wantem lusum hop ya from sin we i wantem pulum mi blong smol taem nomo.” Tingting olsem i gud ya.

YUMI SAVE LAN LONG MASTIK BLONG OL NARAFALA MAN

9. ?Olsem wanem King Deved i lusum faet ya blong mekem ol stret fasin?

⁹ Yu no save slak long faet ya, olsem King Deved i mekem wan taem bifo. Wan dei hem i stap antap long ruf blong hem, nao i luk we longwe lelebet i gat naes woman ya Batsiba i stap swim. Hem i no tanem fes blong hem, be i stap lukluk i go, nao i letem ol nogud tingting i stat kamaot long hat blong hem. Hem i wantem tumas blong slip wetem Batsiba ya. Taswe hem i singaot Batsiba, blong i kam long haos blong hem. Ale, woman ya i gat bel. Nao from we Deved i no moa save haedem we hem i mekem nogud wetem woman ya, taswe i mekem rod blong hasban blong Batsiba bambae i ded long faet.​—2 Samuel 11:​1-17.

10. (a) ?Wanem panis ya we Deved i kasem from sin blong hem? (b) ?Wanem i save blokem Deved blong i no mekem sin ya blong hem?

¹⁰ Hemia i wan sin we i nogud nating. Afta, Deved i kasem tumas trabol from. Tingting blong hem i nogud from samting ya we hem i mekem. Mo Jeova i givim panis long Deved, i mekem plante trabol i stat kamaot long famle blong hem, gogo i finis nomo taem Deved i ded. (Sam 51:​3, 4; 2 Samuel 12:​10-12) Deved i no save we hat blong hem i nogud olsem; ol nogud fasin oli stap pulum hem, oli winim hem. Afta, hem i talem, i se: “Mi mi nogud finis taem mama blong mi i harem nogud blong bonem mi. Mo taem mi stap yet long bel blong hem, be mi mi gat sin finis.” (Sam 51:5) Be nogud samting ya we Deved i mekem wetem Batsiba, i no wan samting we i mas kamaot. I fol blong Deved nomo ya, from we hem i stap lukluk i go; hem i no ronwe long samting ya we i stap mekem hem i wantem stilim woman ya.

11. (a) ?Eksampel blong Deved i save tijim wanem long yumi? (b) ?Wanem ol samting ya we i save mekem “ol man oli stap wantem woman tumas, ol woman oli stap wantem man tumas‘? (c) ?Olgeta we oli waes, oli mas mekem wanem, olsem wan yangfala i talem?

¹¹ Yumi save lan long mastik ya blong Deved. Yumi tu, yumi mas lukaot we bambae i no gat samfala samting we i save mekem tingting, mo bodi blong yumi, i wantem mekem fasin nogud long saed blong seks. Wan eksampel: ?Bambae olsem wanem sipos yu stap ridim samfala buk, mo yu stap lukluk televison, be oli stap leftemap olgeta fasin long saed blong seks? Ating bambae yu yu wantem tumas ol samting ya. Olsem ya nao, i gud blong ronwe long olgeta samting we oli save mekem “ol man oli stap wantem woman tumas, ol woman oli stap wantem man tumas.” (Kolosi 3:​5, NTB; 1 Tesalonaeka 4:​3-5; Efesas 5:​3-5) Yu no mas letem enikaen samting i hapen we i save mekem rod blong fonikesen. Wan yangfala we i gat 17 yia, hem i waes i se: “Eniwan i save talem se, ‘mifala i save stret taem blong stop,’ maet oli save stret taem blong hem, ?be hamas boe no gel oli naf blong stop? I moa gud blong ronwe long enikaen fasin we i save mekem rod blong fonikesen.”

12. ?Wanem eksampel ya blong Josef we yumi no mas fogetem?

¹² Sipos Deved i tingbaot eksampel blong Josef, hem bambae i no save mekem bigfala sin ya agens long God. Taem Josef i stap long Ijip bifo, masta blong hem, Potifa, i putumap hem i bos blong ol narafala man blong hem. Taem Potifa i no stap long haos, woman blong hem i wantem Josef tumas. Oltaem woman ya i stap tingbaot seks. Nao i talem long Josef ya we i gat naes fes, i se: “Yu kam yu slip wetem mi.” Be Josef i no wantem. Ale, wan dei woman ya i holem Josef, i traem mekem hem i slip wetem hem. Be Josef i strong, i pulum hem wan i aot long han blong woman ya, i ronwe. Hem i stap lukaot long hat blong hem, blong i stap strong, from we hem i stap tingbaot ol samting we i stret long ae blong God. Hem i no stap tingbaot fasin blong slip wetem wan woman. Hem i talem se: “Mi mi no save mekem rabis fasin ya, nao mi sin agens long God.”​—Jenesis 39:​7-12.

SAMTING BLONG HALPEM YU BLONG WIN

13, 14. (a) ?Blong winim faet ya, yumi nidim wanem? (b) ?Olgeta ya long Korin we oli kam Kristin, oli jenis olsem wanem? ?Hu i halpem olgeta? (c) ?Pol mo Taetas tufala i wanem kaen man bifo?

¹³ Blong winim faet ya yu mas letem save blong Baebol i kasem hat blong yu, blong bambae yu wantem mekem ol samting we Baebol i talem. Be tu, yu mas joen wetem ol man blong God, blong bambae yu tu yu haf blong ogenaesesen ya we God i gat long wol ya. Nating we yu yu nogud man nating, be ogenaesesen ya i save halpem yu, blong bambae yu save jenis. Pol i tokbaot samfala man blong Korin bifo, we olgeta tu oli jenis, i se: “Yufala i no mastik long samting ya. Man mo woman we tufala i stap slip tugeta be tufala i no mared, mo ol man we oli stap prea long ol narafala god, mo ol man we oli stap slip wetem woman blong narafala man, mo ol woman we oli stap slip wetem man blong narafala woman, mo ol man we oli gat fasin blong woman, mo ol man we oli stap slip wetem man, mo ol stil man, mo olgeta we oli griri, mo ol man blong drong, mo ol man we oli stap spolem nem blong narafala man, mo ol man we oli stap mekem ol bisnes blong stilim mane, bambae oli no save kasem Kingdom blong God. Bifo, sam blong yufala i olsem nomo. Be naoia [God] i wasem yufala finis, blong yufala i klin.”​—1 Korin 6:​9-11.

¹⁴ !Yu tingbaot samting ya! Sam blong ol Kristin bifo, taem oli no Kristin yet, oli stap mekem fonikesen, oli stap stilim woman, sam man oli stap go wetem man, sam woman oli stap go wetem woman, mo oli stil man, oli man blong drong. Be from we Kristin ogenaesesen i halpem olgeta ya, oli jenis oli sakem olgeta rabis fasin ya. Aposol Pol tu i bin mekem ol nogud samting bifo we hem i kam Kristin. (1 Timote 1:15) Hem i raetem leta i go long Kristin brata blong hem, Taetas i se: “From we bifo, yumi tu i stap mekem i krangke. Yumi no save obei, mo yumi lusum stret rod olgeta. Bifo, yumi stap mekem ol samting we yumi nomo i wantem, mo we yumi stap harem gud long hem. Long taem ya, yumi fas long ol fasin ya olsem we yumi kalabus nomo, yumi no save kam fri bakegen.”​—Taetas 3:​3, NTB.

15. (a) ?Wanem i soemaot se i no isi long Pol blong i mekem ol stret samting? (b) ?Olsem wanem eksampel blong Pol i save halpem yumi?

¹⁵ ?Taem Pol i kam Kristin finis, i moa isi long hem blong mekem ol samting we i stret? No gat. Long olgeta laef blong hem, Pol i stap mekem bigfala faet agens long ol nogud samting we hat blong hem i wantem. Hem i raetem se: “Mi stap faetem bodi blong mi, mo mi stap lidim bodi blong mi olsem we i wan slef, from i nogud sipos bambae mi prij finis long plante narafala man, be afta, mi nao bambae mi lus.” (1 Korin 9:27) Pol i strong long hem wan. Hem i fosem hem wan blong mekem ol samting we i stret, nating sipos bodi blong hem i wantem mekem ol nogud samting. Ale, sipos yu tu yu mekem olsem Pol, yu tu bambae yu save winim faet ya.

16. ?Wanem eksampel blong tede we i save halpem yu, blong winim faet ya blong mekem ol samting we i stret?

¹⁶ Sipos i strong tumas long yu blong sakem samfala fasin nogud, i gud blong bambae yu yu kam long nekis bigfala asembli blong Ol Wetnes blong Jeova. Olgeta oli stap mekem ol klin fasin, mo oli hapi. Taem bambae yu yu luk samting ya, ating i kasem yu gud ya. Be bifo, plante blong ol man ya oli blong wol ya. Mo plante blong olgeta ya oli bin mekem fonikesen, oli stilim woman, oli mekem krangke long man blong olgeta, oli drong, sam we oli man oli slip wetem man, sam we oli woman oli slip wetem woman, oli smok, oli yusum drag, oli stil man, oli mekem trik blong stilim mane, oli gyaman, oli plelaki. Olgeta fasin ya oli plante tumas long wol ya. (1 Pita 4:​3, 4) Mo i gud blong yu yu no wet blong joen wetem Ol Wetnes blong Jeova, long ol miting long kongregesen blong olgeta. Olgeta ya tu oli bin mekem faet agens long olgeta rabis fasin, mo agens long ol nogud samting we hat blong olgeta i wantem. Maet yu tu yu stap mekem sem kaen faet naoia. !Ol samting ya i save enkarajem yu, from we olgeta oli stap winim faet ya blong mekem ol stret samting! From God i givhan long yu, yu tu yu save winim faet ya.

17. (a) ?Yumi mas joen wetem hu, blong bambae yumi save winim faet ya? (b) ?Hu i save halpem yu sipos yu gat trabol?

¹⁷ Sipos yu yu stap stadi longtaem lelebet finis wetem Ol Wetnes blong Jeova, ating yu bin kam long samfala miting long Haos Kingdom. I gud sipos yu stap kam oltaem long ol miting ya. Ol Kristin long ol miting ya, oli enkarajem yumi long saed blong ol samting blong speret. Yumi evriwan i nidim samting ya. (Hibrus 10:​24, 25) I gud blong bambae yumi savegud ol “olfala man,” no ol elda, blong kongregesen. Wok blong olgeta i blong “lukaotgud ol sipsip blong God.” (1 Pita 5:​1-3; Wok 20:28) Olsem ya nao, yu no mas slou blong go luk olgeta ya, sipos yu gat nid blong oli halpem yu blong winim wan fasin we i agens long ol loa blong God. Bambae yu luk we olgeta ya oli gat lav, mo oli kaen gud.​—1 Tesalonaeka 2:​7, 8.

18. ?Wanem samting ya long fyuja we i save givim paoa long yumi blong gohed long faet ya?

¹⁸ Wol blong Setan i stap traem pulum yumi blong mekem ol nogud samting. Mo from we yumi sinman, taswe hat blong yumi tu i stap wantem pulum yumi olsem. Olsem ya nao, evri dei yumi mas faet, blong bambae yumi no save lego saed blong God. !Be faet ya bambae i finis! Kolosap nao God bambae i tekemaot Setan, mo olgeta rabis wol blong hem bambae i lus olgeta. Long nyufala wol blong God we kolosap bambae i kamaot, i gat ol stret fasin nomo. Hemia bambae i mekem laef blong yumi i moa isi. Olgeta mak blong sin bambae i finis. Mo bambae i no moa gat strong faet ya blong mekem ol samting we i stret.

19. ?Blong wanem yu mas wantem hadwok blong mekem Jeova i glad long yu?

¹⁹ Yu mas stap tingbaot ol blesing blong nyufala wol ya wetem ol nyufala fasin blong hem. Yes, yu mas putum “hat blong faet, we i olsem hop ya blong yumi se bambae yumi sef.” (1 Tesalonaeka 5:8) I gud sipos tingting blong yu i sem mak nomo long wan yangfala woman ya we i talem se: “Mi mi stap tingbaot olgeta samting we Jeova i mekem finis long mi, mo long olgeta promes we hem i mekem long mi. Hem i no lego mi. Hem i blesem mi tumas. Mi save we hem i wantem mi mi kasem ol gudfala samting nomo, mo mi wantem mekem hem i glad long mi. Nating wanem hadwok mi mas mekem blong kasem itenel laef, be i oraet nomo.” Sipos oltaem nomo yumi traehad blong mekem ol samting we i stret, ale ‘olgeta gudfala promes we Jeova i mekem finis’ long olgeta ya we oli lavem hem, bambae oli mas kamtru.​—Josua 21:45.

[Futnot]

[Tok blong pija long pej 219]

?Blong wanem Moses i no wantem kasem gladtaem wetem ol man Ijip bifo?

[Tok blong pija long pej 220]

Deved i stap lukluk i go; i no ronwe long samting ya we i stap mekem rod blong wan rabis fasin

[Tok blong pija long pej 222]

Josef i ronwe long rabis fasin blong woman ya blong Potifa