“Plis Jeova, Yu Letem Mi Mi Mekem Wok Blong Yu”

Danielle Hall i talem stori ya

Taem mi mi smol gel yet, mi laekem blong go luk bubu woman blong mi we i stap long haos klosap long mifala nomo. Evri aftenun, hem i stap spel. Sipos mi go visitim hem long taem olsem, bambae mitufala i sidaon long bed mo hem i ridim ol stori blong Baebol long mi. Plante taem hem i stap talem long mi se: “Yu neva mas fogetem se Jeova i lavem yu. Mo sipos yu lavem hem, oltaem bambae hem i lukaot long yu.” Ol tok ya blong hem oli tajem gud tingting mo hat blong mi.

BUBU woman blong mi i ded long 1977 mo long taem ya mi mi gat fo yia nomo. Bubu i wan Witnes blong Jeova. Mifala i stap long taon ya Moe long Ostrelia mo long ples ya, olgeta famle blong Papa blong mi oli Witnes blong Jeova tu. Papa mo mama blong mi tufala i no Witnes blong Jeova. Biaen famle blong mi i muf i go long Tintenbar, hemia wan smol taon klosap long solwota long New South Wales. Long ples ya, samtaem mi mo bigfala brata blong mi Jamie, mitufala i stap folem Papa i go long ol miting blong ol Witnes.

Taem mi mi gat eit yia, papa mo mama blong mi tufala i seraot. Papa i gobak blong stap long Moe mo mi mo Jamie i stap wetem mama. Mama i no intres long Baebol mo hem i no wantem se mi mo Jamie i go long ol miting blong ol Witnes. Samting ya i mekem mi mi harem nogud tumas. Mi stap tingbaot ol tok we bubu woman i bin talem long mi. !Mi save gud se mi laekem Jeova! Mo mi wantem blong mekem wok blong hem. Ale, mi prea long Jeova mo mi talem long hem se mi tu mi wan long ol Witnes blong hem. Jamie i gat semfala tingting olsem mi.

Ol Traem Long Skul

Smoltaem biaen, wan tija long skul i askem wanwan long mifala long klasrum blong talemaot se mifala i wanem skul, blong biaen hem i save raetem long lis blong ol nem blong mifala. Taem hem i askem long Jamie, Jamie i talem wetem wan strong mo klia voes se “Witnes blong Jeova.” Tija i stop smoltaem mo i askem Jamie blong i talem bakegen ansa blong hem, ale, Jamie i mekem olsem. Tija i talem se: “Mi no ting se yu yu wan Witnes, be bambae mi kambak long yu biaen.” Biaen, taem tija i askem long mi, mi talem wetem strong voes se, “Witnes blong Jeova.” I klia we tija i kros tumas from hem i singaot hedmasta i kam luk mitufala long klasrum.

Hedmasta i talem stret long mitufala se: “Hemia lis blong ol nem blong yufala mo long lis ya, papa mo mama blong yutufala i no talem se yutufala i Witnes blong Jeova.” Mitufala i ansa wetem respek se: “Be hemia nao skul we mitufala i stap go long hem.” Hedmasta mo tija i no moa askem kwestin olsem bakegen.

Long skul, mi traem blong serem smol save we mi mi gat long saed blong Baebol long ol fren blong mi. Mi karem Buk Blong Ol Baebol Stori i go long skul, nao wanwan taem mi ridim stori long wan gel we i bilif se i gat wan God i stap.a Be from we mi traem blong mekem laef blong mi i laenap wetem ol rul blong Baebol, ol fren blong mi oli no laekem mi mo plante taem mi harem olsem se mi no gat fren.

Oltaem mi prea long Jeova wetem fulhat blong mi, gogo mi harem se hem i bes fren blong mi. Evri dei, afta long skul, mi sidaon long bed blong mi mo mi prea long Jeova, mi tokbaot evri smosmol samting we i hapen long dei ya. Plante taem mi krae. Mi krae long Jeova mo mi askem strong long Hem se, “Plis Jeova, yu letem mi mi mekem wok blong yu wetem ol man blong yu.” Oltaem afta we mi prea, mi harem gud.

Wan Leta We i Givim Paoa Long Mi

Taem mi gat ten yia, Jamie i gobak blong stap wetem Papa long Moe. Ale, mi harem moa nogud from we i no gat wan we mi save we i gat sem bilif olsem mi. Biaen, taem mi go long haos we i stap klosap long haos blong mifala, mi faenem sam magasin blong ol Witnes blong Jeova. Mi traem blong rimemba gud adres blong branj ofis we i stap long magasin mo mi spid i gobak long haos blong raetem daon adres ya. Mi raetem wan leta i go long branj ofis blong eksplenem long olgeta sam samting long saed blong mi mo askem olgeta blong oli halpem mi long saed blong spirit. Oli raetem wan leta blong tu pej i kambak long mi we i tajemgud hat blong mi, mekem se wota blong ae blong mi i ron. !Hemia i wan pruf se mi mi sas long ae blong Jeova!

Leta ya i pulum mi blong mi folem fasin blong bilif blong smol gel Isrel we Baebol i tokbaot. Hem i wok long haos blong Neman we i haeman blong ami blong ol man Siria. Nating se oli holem smol gel ya mo oli tekem hem i go longwe long ples blong hem, be hem i stap klosap long God blong hem, Jeova. Hem i no fraet blong talemaot bilif blong hem, mo samting ya i pruvum se hem i wan trufala Witnes blong Jeova.—2 King 5:1-4.

Leta blong branj ofis i talem tu se: “Olsem wan smol gel, yu save mekem wok blong Jeova taem yu obei long papa mo mama blong yu mo yu wokhad long skul. Mo tu, yu mas stap klosap long Jeova tru long prea mo stadi.” En blong leta ya i se: “Danielle, rimemba se nomata weples yumi stap, oltaem Jeova i stap klosap long yumi. Mifala i save se yu yu bilif long samting ya.” (Rom 8:35-39) Nating se naoia leta ya i olfala finis, be i stap yet long faswan pej long Baebol blong mi. Mi stap ridim leta ya bakegen blong plante yia mo evritaem we mi ridim leta ya, mi krae.

Smoltaem biaen, mi kasem wan narafala leta. Leta ya i talem se papa blong mi i mekem rod blong mi save kasem ol Wajtaoa mo Wekap! tru long pos ofis. !Taem mi kasem nius ya, mi glad we mi glad! Naoia mi save kasem ol save blong Baebol oltaem. Taem mi kasem wan niufala magasin, mi ridim evri samting we i stap insaed. Mi holem yet faswan kopi blong ol naesfala magasin ya. Long taem ya, wan Kristin elda i stat blong visitim mi. Ol toktok we hem i talem taem hem i kam visitim mi oli leftemap tingting blong mi bigwan.

Mekem Sam Jenis

Nating se mi stap kam strong moa long saed blong spirit be mi wantem tumas blong mi fri blong wosip long Jeova wetem kongregesen. Ale, taem mi gat 13 yia, mi askem long mama blong mi sipos mi save go stap wetem Papa. Mi laekem Mama tumas olsem we hem tu i laekem mi tumas, be mi wantem tumas blong mekem wok blong God. Taem mama i agri blong mi go stap wetem papa, ale, mi gobak long Moe mo long ples ya mi stat stadi Baebol. Papa i agri se mi mo Jamie i save go long ol miting. Ol Witnes we oli stap long ples ya oli kam givhan long mitufala. Mi mo Jamie i gohed gud mo smoltaem biaen, mitufala i baptaes, wan afta narawan. Yes Jeova i ansa long prea we mi bin mekem taem mi wan smol pikinini nomo. !Mi mekem wok blong Jeova wetem ol man blong hem!

Smoltaem biaen, mi gat wan gudfala fasin fren wetem angkel Philip mo anti Lorraine Taylor. Tufala tu i stap long kongregesen blong Moe. Tufala i mekem gud long mi olsem se mi gel blong tufala stret. Taem tufala i go long aelan ya Bougainville, hemia long Papua Niu Gini, blong prij long ples we i nidim plante moa man blong talemaot Kingdom, mi talem se mi wantem go wetem tufala. Long taem ya mi mi gat 15 yia nomo, be papa mo mama blong mi tufala i letem mi mi go.

Long Bougainville mi gohed blong skul tru long leta nomo. Be plante taem mi goaot long wok blong prij. Mi glad we mi glad blong wok wetem ol misinari mo ol paenia long wok blong prij. Mi neva faenem ol man olsem ol man long ples ya we oli rili gat tingting daon mo plante long olgeta oli glad blong stadi Baebol.

Smoltaem biaen, long semfala yia ya, i gat faet i kamaot long saed blong politik we i mekem se ples ya i kam wan ples we i denja. Mi harem nogud tumas taem mi aot blong gobak long ples blong mi. Mi sore long ol gudfala man blong aelan ya. Taem plen i flae, mi luk angkel Philip i stap stanap blong talem tata long mi. Mi stap krae, mo mi prea slo nomo long Jeova blong i letem mi mi mekem wok blong hem wan dei olsem wan misinari long wan kantri we i farawe.

Jeova i Ansa Long Plante Prea Blong Mi

Long Ostrelia, mi finisim hae skul mo biaen mi wok long wan ofis blong loea we oli trenem mi long wok ya. Long taem ya, papa blong mi i mared bakegen mo hem i mas lukaot long plante pikinini we niufala woman blong hem i gat. Jamie i go stap wetem Mama bakegen. Mi mi go stap smol wetem Mama mo biaen mi kambak stap smol wetem Papa. Be from mi stap mekem olsem, mi luk olsem we laef blong mi i fasfas tumas. Mi nidim blong mekem laef blong i no fasfas tumas mo mi mas putum sam mak blong mi kasem long saed blong spirit. Ale, long 1994, mi joen long fultaem wok olsem wan paenia long Moe.

Mi mi glad bakegen. Ol fren blong mi oli ol yangfala long kongregesen we oli strong long saed blong spirit, mo olgeta ya oli givhan long mi bigwan. Ale, long 1996, mi maredem wan long ol yangfala ya we nem blong hem Will. Will i no wan man we i bigmaot, be hem i kaen, hem i gat tingting daon. Hem i rili wan blesing we i kam long Jeova.

Mitufala i haremgud long mared laef blong mitufala. Wan dei, Will i kambak long wok blong prij. Hem i bin prij wetem seket elda we i stap visitim ol kongregesen long eria blong mifala. Will i talem long mi blong sidaon mo biaen hem i se: “?Bambae yu yu glad blong muv i go long wan narafala kongregesen blong givhan?” Long hat blong mi, mi talem finis se yes. Be, mi mekem fani lelebet, mi askem se: “?Weples, long Vanuatu, Fiji?” Will i ansa se: “Long Morwell.” Mi talem kwiktaem nomo se: “!Be hemia long ples ya nomo!” Mitufala tugeta i laf mo biaen mitufala i glad tumas blong muv i go long kongregesen klosap, blong wok olsem paenia.

Mitufala i hapi tumas long ol trifala yia we mitufala i stap long Morwell mo long taem ya i gat plante gudfala frut i kamaot. Biaen mitufala i kasem wan sapraes bakegen. Branj ofis blong ol Witnes blong Jeova long Ostrelia i askem long mitufala blong go mekem wok blong spesel paenia long Is Timor. Hemia wan smol kantri long is saed blong Indonesia.b Mi glad tumas nao wota blong ae blong mi i ron. Mi tangkiu bigwan long Jeova blong ansa long ol prea blong mi. I no jes from we hem i akseptem mi olsem man blong wok blong hem, be from we naoia mi mo hasban blong mi mitufala i save go wok long wan narafala kantri.

Wok Long Wan Narafala Kantri

Long Julae 2003, mitufala i kamtru long Dili we i kapital blong Is Timor. I gat wan kongregesen nomo long fulwan kantri, hemia nao kongregesen blong Dili. Long kongregesen ya i gat 13 spesel paenia blong Ostrelia mo sam brata mo sista we oli man ples. Ol brata mo sista blong ples ya oli pua tumas. Plante long olgeta oli lusum ol samting blong olgeta mo sam famle blong olgeta long faet we i stap gohed long kantri ya blong 24 yia mo we i finis long 1999. Plante long ol brata mo sista, ol famle blong olgeta oli agensem olgeta strong from niufala bilif blong olgeta. Nating se oli kasem trabol mo oli pua be oli rij long saed blong spirit mo oli glad tumas.—Revelesen 2:8, 9.

Mitufala i makem we plante man ples oli onagud long God mo oli gat respek long Baebol. Kwiktaem nomo mitufala i gat plante Baebol stadi i bitim wanem we mitufala i naf blong mekem. Biaen, sam long ol faswan stadi blong mitufala oli tekem baptaes mo oli wok wetem mitufala olsem ol Kristin brata mo sista blong mitufala. Taem mitufala i luk we olgeta ya oli gohed gud, samting ya i mekem mitufala i glad bigwan.

Long 2006, faet i stat long taon blong Dili from trabol we i stap bitwin ol defren laen. Ol man oli stil long ol haos mo oli bonem plante haos. Ol brata mo sista blong ples ya oli go haed long ol haos blong ol spesel paenia. Haos mo yad blong mifala i kam olsem wan kamp blong ol refuji, mo wan taem i gat klosap wan handred man oli kam stap long haos blong mifala. Ples blong putum trak blong mifala i kam olsem wan kijin, wan ples blong kakae mo wan smol Haos Kingdom.

Nating se ol masket mo hanbom oli stap faefaerap olbaot, be haos blong mifala i stap olsem wan sefples we i gat pis. Mifala evriwan i harem save we Jeova i protektem mifala long taem ya. Evri moning mifala evriwan i joen tugeta blong mekem vas blong dei. Mifala i mekem ol miting blong mifala olsem oltaem. Mifala i mekem stadi wetem olgeta ya tu we oli intres long trutok.

Taem ol wik oli stap pas, mifala i luksave se i no sef blong ol brata we oli blong is saed blong kantri blong stap long Dili. Ale, ol elda oli tekem desisen blong stanemap wan niufala grup long Baucau, hemia i nambatu bigfala taon long kantri ya. I tekem 3 aoa long trak blong kasem taon ya. Mo hemia nao from wanem oli askem long mi mo Will blong mitufala i go long Baucau.

Mitufala i go long Baucau long 2006, hemia tri yia afta we mitufala i kam long Is Timor. Long niufala grup we mitufala i joen long hem, i gat 4 spesel paenia mo 6 Witnes we oli manples. Ol brata mo sista ya oli lego olgeta samting we oli gat long Dili, be nating se i olsem, oli no lusum bigfala smael long fes blong olgeta. Mitufala i laekem tumas fasin blong olgeta blong stap tru long Jeova mo blong lego samting we olgeta nomo i wantem.

Mitufala i stap yet long Baucau. Mitufala i laekem tumas ples ya we mitufala i wok long hem mo mitufala i luk we hemia i wan narafala blesing blong Jeova. Taem mi tingtingbak long laef blong mi bifo, mi save talem se bubu woman blong mi i talem tru nomo. Jeova i keagud long mi long olgeta yia we oli pas. Oltaem mi talem tangkiu long Jeova from we hem i letem mi mi mekem wok blong hem wetem ol man blong hem. Mo tu mi wantem tumas blong luk bubu taem bambae hem i laef bakegen. Ale, bambae mi save talem tangkiu long hem from we hem i openem rod blong mi save gat wan hapi laef.

[Ol Futnot]

[Tok blong pija long pej 26]

Mi wetem bubu woman blong mi

[Tok blong pija long pej 29]

Mi wetem man blong mi, Will