LAEF STORI
“!Naoia Mi Laekem Wok Blong Prij!”
Mi gruap long Balclutha long Saot blong Niusilan. Taem mi pikinini, mi stap klosap long Jehova mo mi laekem blong stap long trutok. Oltaem mi laekem miting mo taem mi stap long kongregesen, mi harem se mi sefgud mo mi hapi. Nating se mi stap sem, mi laekem blong go oltaem long wok blong prij evri wik. Mi mi no fraet blong prij long ol fren blong mi long skul mo long ol narafala. Mi mi praod blong stap olsem wan Witnes, mo taem mi gat 11 yia, mi givim laef blong mi long God.
MI NO MOA GLAD
Sori tumas, taem mi yangfala, mi no moa fren wetem Jehova. Mi luk olsem se ol skulmet blong mi oli gat gudtaem, be mi no. Mi harem se ol rul blong papa mama, mo kongregesen, oli strong tumas mo wok blong prij i kam had. Mi bilif se Jehova i stap, be mi harem se mi stap longwe long hem.
Nating se i olsem, mi stap prij wanwan taem blong mi no kam inaktif. Mi neva rerem gud wok blong prij, mo taem mi go prij, i had blong statem mo gohed long storian. From samting ya, mi no karem gudfala frut long wok blong prij, mi no glad, mo mi no laekem. Nao mi stap askem mi wan se: ‘?Olsem wanem olgeta oli save gohed olsem evri wik mo evri manis?’
Taem mi gat 17 yia, mi wantem tumas blong kam independen. So mi pakem olting blong mi, mi aot long haos, mo mi go long Ostrelia. Ol perens blong mi oli harem nogud taem mi aot. Oli wari long mi, be oli hop se bae mi gohed long spirit.
Taem mi stap long Ostrelia, mi kam slak moa. Mo mi no moa go oltaem long ol miting. Mi glad blong joen moa wetem ol yangfala we oli olsem mi, oli glad blong go long miting mo long nekis naet oli go dring mo danis long naetklab. Taem mi tingtingbak, mi kasemsave se mi stap mekem olsem se wan leg blong mi i stap long trutok mo narafala leg i stap long wol, be mi no harem se mi blong wol o blong trutok.
MI SAPRAES LONG WAN IMPOTEN LESEN
Tu yia afta, mi mitim wan sista we hem i no save, be i mekem mi tingting long ol fasin blong mi. Mi stap long wan haos wetem faef singel sista, mo mifala i invaetem eria elda mo waef blong hem, Tamara, blong oli kam stap wan wik wetem mifala. Taem hasban blong hem i bisi wetem ol wok blong kongregesen, Tamara i spenem taem wetem mifala ol gel mo i stap laflaf wetem mifala. Mi mi laekem wan we fasin blong hem i olsem mo i isi blong toktok long hem. Mi sapraes se hem i strong long spirit be mifala i save gat gudtaem tugeta.
Mi luk se Tamara i glad we i glad. Hem i save pulum ol narafala blong lavem trutok mo wok blong prij olsem hem. Hem i glad blong givim bes blong hem long Jehova, be mi mi no glad mo mi no givim bes blong mi. Gudfala tingting blong hem mo glad blong hem i gat bigfala paoa long mi. Eksampol blong hem i pulum mi blong tingbaot trutok long wan vas we i se: Jehova i wantem se yumi evriwan i mekem wok blong hem wetem “glad” mo yumi “singsingaot from glad.”—Sam 100:2.
MI LAEKEM WOK BLONG PRIJ BAKEGEN
Mi wantem glad olsem Tamara, be blong kasem glad ya, mi mas mekem sam bigfala jenis long laef. I tekem taem, be sloslo mi mekem sam jenis. Mi stat blong rerem wok blong prij, mo wanwan taem mi stap mekem haftaem paenia. Samting ya i halpem mi blong mi no moa fraet. Moa we mi yusum Baebol long wok blong prij, moa we mi glad long wok ya. I no longtaem, mi stap mekem haftaem paenia evri manis.
Mi mi fren wetem ol yangfala mo ol olfala we oli gohed gud long trutok, mo we oli glad blong mekem wok blong Jehova. Gudfala eksampol blong olgeta i halpem mi blong tingbaot ol samting we i moa impoten, mo blong gat wan gudfala program long spirit. Nao mi laekem moa wok blong prij, mo biaen mi kam fultaem paenia. Hemia faswan taem long plante yia, we mi harem se mi hapi mo se kongregesen i hom blong mi.
MI FAENEM WAN PAENIA PATNA BLONG MI
Wan yia afta, mi miting Alex we i wan gudfala man, hem i kaen mo i lavem Jehova mo wok blong prij. Hem i wan man blong givhan mo i paenia sikis yia finis. Alex i bin go long Malawi tu blong smoltaem, blong prij long ples we i gat nid. Hem i joen wetem ol misinari we oli soem gudfala eksampol long hem, mo oli leftemap tingting blong hem blong gohed blong putum Kingdom fasples.
Long 2003, mitufala i mared, mo stat long taem ya mitufala i gohed blong mekem minista wok fultaem. Mitufala i lanem plante gudfala lesen, mo Jehova i blesem mitufala long plante rod.
DOA I OPEN LONG SAM MOA BLESING
Prij long Gleno, Is Timo
Long 2009, oli invaetem mitufala blong mekem wok blong misinari long Is Timo, wan smol kantri long Indonesia. Long taem ya mitufala i sapraes, glad, mo fraet long semtaem. Faef manis afta, mitufala i kamtru long kapital ya Dili.
Mitufala i mas mekem plante jenis long laef blong mitufala. Mitufala i mas lanem niufala kalja, lanwis, kakae, mo laef long ples ya. Long wok blong prij, mifala i luk ol man oli pua, oli no skulgud, mo ol narafala oli spolem olgeta. Mo mifala i luk plante man we wo mo raf fasin i spolem bodi blong olgeta mo filing blong olgeta.a
!Wok blong prij i nambawan tumas! Wan dei mi mitim wan gel we i no hapi nating, nem blong hem Maria mo hem i gat 13 yia.b Mama blong hem i ded sam yia i pas, mo hem i no stap luk papa blong hem. Olsem ol narafala pikinini, i no gat man i tijim Maria. Mi rimemba wan dei, hem i stap krae taem i stap talemaot ol filing blong hem. Be mi no save wanem hem i stap talem from we mi no save gud lanwis ya yet. Mi prea long Jehova, mo askem hem blong givhan long mi blong leftemap tingting blong Maria, mo biaen mi ridim ol gudfala vas blong leftemap tingting blong hem. Sam yia i pas, mi luk trutok i jenisim fasin, bodi, mo laef blong Maria. Hem i baptaes finis, mo naoia hem i gat prapa Baebol stadi blong hem. Tede, Maria i gat wan bigfala famle long spirit mo hem i harem se oli lavem hem.
Jehova i blesem wok blong prij long Is Timo. Nating se plante pablisa oli jes baptaes long laswan ten yia, plante oli kam paenia, man blong givhan, mo elda. Ol narafala oli wok long RTO mo oli givhan blong transletem ol buk mo video i go long ol lokol lanwis. Mi glad tumas blong harem oli singsing long ol miting, luk ol smael blong olgeta, mo luk se oli stap gohed long spirit.
Mi mo Alex i go long wan teritori farawe, blong givimaot invetesen blong Memoriol
MI NO SAVE TINGBAOT WAN LAEF WE I GUD MOA
Asaenmen blong mifala long Is Timo i defren olgeta long Ostrelia, be mi no save tingbaot wan laef we i gud moa. Samtaem, mifala i stap long ol smol bas we i fulap long ol man, wetem ol fis mo ol kakae blong maket. Samtaem, mifala i mekem Baebol stadi insaed long ol haos we i hot mo floa hem i graon nomo, mo ol faol oli stap ronron olbaot. Nating se i olsem, plante taem mi stap tingting se: ‘!Hemia i gud tumas!’
Mitufala i go long teritori
Taem mi tingtingbak, mi talem tangkiu long ol perens blong mi we oli traem bes blong tijim mi long ol rod blong Jehova mo sapotem mi oltaem, nating se mi fesem hadtaem, taem mi yangfala. Mi luk se Ol Proveb 22:6 i tru nomo long saed blong mi. Papa mo mama blong mi oli praod long mi mo Alex, oli glad blong luk se Jehova i stap yusum mitufala. Stat long 2016, mitufala i mekem wok blong eria elda long Ostrelesia branj teritori.
Mi soem video blong Keleb mo Sofia long sam pikinini
Mi no save bilivim se mi no bin laekem wok blong prij. !Naoia mi laekem tumas wok blong prij! Mi kasemsave se nomata wanem i hapen long laef, trufala glad i kam nomo taem man i mekem wok blong God long fulhat blong hem. Yes, ol beswan yia long laef blong mi, hemia 18 yia we mi mo Alex i mekem wok blong Jehova. Naoia mi kasemsave trutok we Deved i talem long Jehova, i se: “Olgeta we oli go haed long yu, bambae oli harem gud, bambae oltaem oli singaot from oli glad. . . . Mo olgeta we oli lavem nem blong yu, bambae oli harem gud from yu.”—Sam 5:11.
!Mi glad blong stadi Baebol wetem ol man ya we oli gat tingting daon!
a Stat long 1975, faet i gohed long Is Timo bitim 20 yia from independen.
b Mifala i jenisim nem ya.