Step 3

Soem Se Yu Yu Bos Long Pikinini

?From wanem yu mas tekem step ya? Wan buk (Parents) i tokbaot ol stadi we sam man oli mekem long saed ya, nao oli faenemaot se “taem papa mama i lavem pikinini mo tufala i strong blong mekem hem i obei long tufala—i min se, taem papa mama i soem se tufala i kea long pikinini be tufala i putum sam rul tu we pikinini i mas folem—ale, pikinini i kasem ol gudfala mak long skul, hem i no fraet blong toktok wetem ol man, hem i glad long hem wan bakegen, mo hem i hapi moa i bitim ol pikinini we papa mama blong olgeta oli no strong nating no oli strong tumas.”

?From wanem i hadwok?: Stat taem pikinini i bebi go kasem we hem i kam bigman, bambae hem i no wantem we yu yu bos long hem. Long wan buk we John Rosemond i raetem (Parent Power!) hem i talem se: “Ol pikinini oli luksave hareap sipos papa mama blong olgeta i fraet blong bos long olgeta mo sipos oli save pulum tufala blong jenisim tingting blong tufala. Long saed blong kwestin ya ‘?Hu i bos?’ sipos papa mama i no soem se tufala i bos, be pikinini nao bambae i bos.”

?Wanem i save givhan long yu?: Yu no mas ting se sipos yu soem se yu yu bos long pikinini blong yu, bambae hem i no wantem yu no bambae yu mekem hem i harem nogud. Nogat. Jeova God i Stamba blong famle, mo hem i no talem long ol pikinini se oli gat raet blong talem long papa mama wanem we tufala i mas mekem long famle. Defren olgeta, hem i putumap ol papa mama blong oli bos long ol pikinini, mo hem i givim oda long ol pikinini se: “Yufala i mas obei long papa mo mama blong yufala.”—Efesas 3:14, 15; 6:1-4.

I gat rod blong bos long pikinini long gudfala fasin we i no strong tumas. ?Olsem wanem yu save mekem olsem? Yu mas folem eksampol blong Jeova. Hem i gat paoa blong fosem ol pikinini blong hem long wol ya blong mekem samting we hem i wantem. Be hem i no mekem olsem. Long defren fasin, hem i askem yumi blong mekem gudfala fasin mo obei long hem. Tok blong hem i talem se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron.” (Aesea 48:18) Jeova i wantem se yumi obei long hem from we yumi lavem hem, i no from we yumi fraet nogud long hem. (1 Jon 5:3) Samting we hem i askem yumi blong mekem i no strong tumas, mo hem i save se bambae yumi kasem ol gudfala frut long laef blong yumi sipos yumi obei long ol stret fasin blong hem.—Ol Sam 19:7-11.

?Olsem wanem ol papa mama oli save mekem tingting blong olgeta i strong blong bos long pikinini blong olgeta long fasin we i stret, i no strong tumas mo i no slak tumas? Fastaem, yu mas bilif strong se God i wantem we yu mekem olsem. Namba tu samting se yu mas suagud se beswan rod we yu mo ol pikinini blong yu i save folem, hemia blong mekem ol stret fasin blong God.—Rom 12:2.

?Wanem samting stret we yu mas mekem blong soem se yu yu bos long pikinini blong yu?

[Tok blong makem poen long pej 5]

“Sipos yu stap tijimgud pikinini blong yu blong stretem hem, . . . bambae hem i mekem yu yu glad.”—Ol Proveb 29:17