PRAES I STAP GO ANTAP

Gat Stret Tingting

Samtaem i had blong luksave se praes blong ol samting i stap go antap, from we salari blong yumi tu i go antap. Be sipos praes blong ol samting i go antap mo salari blong yumi i stap sem mak, hemia i save mekem yumi wari bitim mak. Antap moa, sipos yumi gat wok ya blong lukaot long famle.

Yumi no save blokem praes blong ol samting blong oli no go antap. Be taem yumi akseptem jenis ya, hemia i save givhan long yumi.

?FROM WANEM I IMPOTEN?

Man we i gat stret tingting long saed blong praes blong ol samting we i go antap, bambae hem i . . .

no wari bitim mak. Taem yumi no wari bitim mak, yumi naf blong tingting gud mo mekem ol gudfala desisen.
blokem ol fasin we i no waes. Eksampol, i no waes blong spenem mane olbaot o ting nating long ol bil we yumi mas pem.
no agiu wetem famle long saed blong mane.
yusum gud mane. Hemia i min se yumi no spenem tumas mane, be yumi pem nomo ol samting we yumi rili nidim.

SAMTING WE YU SAVE MEKEM

Rere blong mekem sam jenis. Taem praes blong ol samting i go antap, i nogud blong spenem mane olbaot. Ol man we oli spenem moa mane i bitim wanem we oli gat, i olsem we oli stap swim agensem taed blong wan reva we i ron strong. Hemia i no givhan nating, be i mekem laef blong olgeta i kam had moa. I tru se yu wantem lukaot gud long famle blong yu mo givim samting we oli nidim. Be i gud blong tingbaot se: Samting we famle blong yu i nidim moa, hemia blong yu lavem olgeta mo spenem taem wetem olgeta.

“?Yufala i ting se taem man i stap tingting tumas from laef blong hem we i sotfala, bambae i save mekem laef blong hem i kam longfala moa long fasin ya? !Nogat!”—Luk 12:25, Baebol Long Bislama.

“Yufala i no mas wari tumas from ol samting blong tumoro. Ol wari blong tumoro oli blong tumoro. Trabol blong wan dei hem i naf finis blong dei ya.”—Matiu 6:34.

Man we i traem blong gat wan gudfala laef be i no gat naf mane, i olsem we hem i stap swim agensem wan reva we i ron strong