Stadi 12
Tok We Man i No Raetemdaon Evri Wod Blong Hem Mo Tok We Man i No Rere Nating Long Hem
1, 2. ?Olsem wanem Jeova i givhan long yumi blong toktok?
1 “Bambae yufala i no tingting tumas se ‘?Bambae mi mi tok olsem wanem? ?Bambae mi mi talem wanem tok long olgeta?’ Bambae yufala i save talemaot tok we Tabu Speret bambae i givim long yufala, stret long taem blong tok. From we bambae i no yufala nomo i tok. Speret blong Papa blong yufala bambae i tok long maot blong yufala.” (Mat. 10:19, 20) Ating ol tok ya oli mekem ol disaepol blong Jisas bifo oli haremgud. Mo ol tok ya oli givim paoa long ol minista blong gud nyus blong God tede taem oli go long fored blong ol man blong gavman blong givim wetnes. Samting ya i no minim God i mekem wan merikel nao i givim “tok blong waes” mo “tok blong save,” long ol Kristin Wetnes blong Jeova tede olsem ol Kristin wetnes long faswan handred yia. (1 Kor. 12:8) Be, yumi haremgud long jans blong tren long wan gudfala tiokratik skul mo, olsem God i promes, speret blong hem bambae i givimbak ol ansa long tingting blong yumi taem yumi nidim.
2 From trening we yu kasem long ol Baebol stadi, Tiokratik Skul mo ol narafala miting blong kongregesen, yu yu hivimap plante save long Baebol. Yu lanem ol stampa rul blong stret fasin mo yu lanem olsem wanem blong mekem i wok long prapa laef blong yu long ol defren samting. Mo taem yu mekem wok blong prij yu kasem ekspiryens blong toktok long ol narafala man, yu givimaot save we yu bin kasem. Fasin ya blong toktok, yu no raetemdaon evri wod blong hem no yu mekemrere long hem fastaem.
3. Eksplenem fasin blong givim tok we oli no raetemdaon evri wod long pepa mo fasin blong toktok we yu no tingrere long hem.
3 Tufala fasin ya blong toktok kolosap oli sem mak, be oli defren lelebet. Wan pijatok bambae i mekem tufala i klia moa. Sipos yu kam long wan man blong haos mo yu stat blong givim wan tok we yu tingrere long ol stampa poen blong hem finis. Be yu no tingrere long ol stret toktok we bambae yu yusum blong talemaot tok blong yu. Yu yu talem tok we yu no raetemdaon evri wod blong hem. Nao man blong haos i askem sam kwestin we yu no rere long hem. Be, from trening we yu kasem long Haos Kingdom yu yu naf blong toktok no givim ansa, yu yusum ol save we yu gat finis long Baebol. Taem olsem yumi save talem se yu no tingrere long toktok blong yu, yu mekem mo yu talem tok blong yu long smoltaem ya nomo.
4. ?Wanem samting yu nidim blong yu mas mekemrere fastaem long wan tok we oli no raetemdaon evri wod blong hem?
4 Ol tok we yu no raetemdaon evri wod blong hem. Fasin blong reregud fastaem hem i impoten blong givim wan tok we yu no raetemdaon evri wod blong hem long pepa, nating se yu toktok long ol haos wanwan no yu givim wan tok long platfom. Sipos bambae yu givim wan tok we yu no raetemdaon evri wod blong hem, mekemrere wan gudfala plan mo sam bigfala poen blong tokbaot. Aninit long ol bigfala poen ya yu save makemdaon sam tingting, sam pruf, sam vas long Baebol mo sam pijatok we oli sapotem ol stampa poen ya, blong bambae yu save rere blong givim wan tok we i rili tijim ol man. Tingrere long evri samting be ol toktok we bambae yu yusum yu save jusum long taem we yu stap givim tok.
5-7. Talem ol gudfala samting long saed blong tok we oli no raetemdaon evri wod blong hem long pepa.
5 Fasin blong givim wan tok we oli no raetemdaon evri wod long pepa hem i gat sam gudfala poen long hem. Wan se, i isi blong jenisim tok. Tok i no strong tumas blong yu save jenisim, olsem tok we yu ridim no ol tok we yu stap tingbaot blong talem we i hadwok blong jenisim. Sam samting i save hapen long las menet we oli mekem se yu nidim blong jenisim plan blong tok blong yu. Bifo yu go long platfom, sipos yu faenemaot se plante long ol man we oli kam blong lesin oli nyu long trutok. Nao fasin ya blong no raetemdaon evri wod blong tok fastaem i mekem se yu save jenisim tok blong yu blong givhan long ol man ya blong kasem ol poen long tok blong yu. No maet yu luksave se i gat plante yangfala blong skul oli kam blong lesin. Yu save jenisim pijatok blong yu no ol mining blong tok blong yu blong givhan long ol man olsem blong oli luksave olsem wanem tok blong yu i stret long olgeta.
6 Namba tu samting we i gud long saed blong fasin blong givim tok we yu no raetemdaon evri wod blong hem se, hem i save wekemap tingting blong yu. Hem i letem yu yu fri smol blong wokem ol nyufala tingting. Samtaem, taem yu faenemaot se ol man oli laekem tok blong yu, oli lesingud, yu yu haremgud mo ol nyufala tingting oli stap kam insaed long maen blong yu, ol tingting we i isi blong talem taem yu yu mekem wan tok we yu no raetemdaon evri wod blong hem long pepa.
7 Namba tri samting we i gud long fasin ya blong givim tok se, yu yu gat jans blong lukluk ol man we oli stap lesin long yu. Samting ya i mekem se fasin blong yu blong toktok wetem olgeta i kamgud moa. From samting ya bambae olgeta ya oli lesingud long ol samting we yu stap talem. Mo ol man we oli stap lesin long yu bambae oli harem se yu yu savegud tok blong yu, from we yu no stap lukluk oltaem long sam pepa we yu raetem tok blong yu long hem. Mo tu, yu save luksave tingting blong ol man we oli stap lesin. Sipos yu luk se sloslou oli no moa soem intres, yu save traem winim trabol ya. Yes fasin ya blong givim tok i mekem se i gat filing long tok, tok i olsem storeyan, tok i kasem hat blong olgeta.
8-10. ?Olsem wanem blong no foldaon long sam trap long saed blong tok we oli no raetemdaon evri wod blong hem?
8 I gat sam denja long fasin blong givim tok olsem; be man i save winim olgeta. Eksampel, maet man we i givim tok i putum plante tingting tumas long tok blong hem mekem se hem i save bitim taem. Mo tu, from we hem i fri blong givim ol defren tingting we hem i tingbaot long tok blong hem, maet hem i save spenem tumas taem long sam poen bitim we hem i putum long plan blong hem. Blong blokem trabol ya yu save makemdaon taem we yu yu wantem yusum long evri haf blong tok long plan blong yu. Nao traehad blong folem plan ya blong yu.
9 Mo tu i gat denja ya se yu save mestem sam poen, maet yu save givim sam tok we i no fulwan no i no stretgud olgeta, no yu talem sam tok we i no gat pruf blong hem. Sipos yu stap lukluk samting we yu raetemdaon, yu no hareap, bambae yu save folem plan blong yu mo yu no save mestem sam samting no talem sam tok we i no stretgud. Sipos yu wokem wan gudfala plan, wetem sam bigfala poen long hem blong yu save tokbaot wetem sam pruf mo sam vas long Baebol, yu no save mekem sam tok we oli no gat ol pruf long hem.
10 Yu no nid blong tingbaot ol tok we yu save talem, be i stret blong yu lanem smol sam toktok long hem, mo sipos bigfala tingting blong tok i stap klia long maen blong yu, samting ya i save givhan long yu. Long rod ya yu no save yusum ol tok we oli no stret mo ol tok we oli no klia. Mo sipos long evri dei taem yu storeyan yu stap traehad blong yusumgud tok, bambae hem i isi moa long yu taem yu givim wan tok. Tru ya, long taem ya tu maet yu no save jusum ol stret tok no ol stret rul blong toktok olsem long wan tok we oli raetem finis, be fasin blong yu blong storeyan gud long tok blong yu i save kavremap ol poen ya. Mo tu, traehad blong tingtingbak plante taem long tok blong yu bifo yu givim tok ya. Sam man oli faenem se i gud blong mekem olsem long tingting blong olgeta nomo. Be plante man oli faenemaot se i gud blong talemaot taem oli stap lanem, samting ya i tru moa long saed blong taem.
11, 12. ?From wanem i gud blong wan man we i givim tok blong gat wan plan?
11 Taem yu stap lanem bambae i no longtaem yu save mekem plan blong yu i kam sot moa taem yu makem ol poen long tok blong yu. Ol poen ya, wetem ol vas blong Baebol we bambae yu yusum, maet yu save raetem long wan kad no wan pis pepa we yu save lukluk long hem. Long sam tok we i sot moa, olsem ol tok long Tiokratik Skul, maet i gud blong tingbaot plan blong tok blong yu, i gud se yu save gat plan blong tok blong yu blong yu save lukluk long hem from maet i gat sam samting we i pulum tingting blong yu no yu fogetem sam samting. Blong givim wan tok we i longwan moa, olsem wan pablik tok, hem i waes blong gat plan blong tok blong yu wetem yu blong yu save lukluk long hem taem yu stap toktok.
12 Fasin blong givim tok we yu no raetemdaon evri wod long pepa i impoten tumas long minista wok long ol haos wanwan. From we taem man blong haos i askem wan kwestin no i talem sam samting we i defren, yu save jenisim tok blong yu lelebet long ol poen blong stampa tok we yu wantem tokbaot, givim ansa long kwestin blong hem mo yu save gohed blong talem samting we yu bin mekemrere finis blong tokbaot. Sipos yu traem rimemba evri toktok long tok blong yu, i hadwok taem man i blokem tok blong yu, nao yu mas ansa long hem mo traem gohed wetem tok blong yu.
13-15. ?Wetaem yumi givim tok we yumi no rere nating long hem, mo olsem wanem yumi save mekemrere from?
13 Tok we yu no tingrere nating long hem. Tok ya “no rere” i gat mining olsem se “givim wan tok we yu no tingrere long hem, yu mekem tok ya long las menet nomo.” ?Be olsem wanem, i minim se yu no rere nating long sam samting no long sam poen we bambae yu tokbaot? No gat, from we man i mas rere fastaem blong hem i rili tijim man. Be, samtaem yu no save se bambae yu givim wan tok long wan samting, taswe yu no rere blong tokbaot samting ya. Samting olsem i save kamaot long wok blong prij long ol haos wanwan taem wan man blong haos i askem wan kwestin. No maet taem yu mekem ol visit, no taem yu stap mekem ol stadi, no taem yu tekem jans blong prij long man, no taem yu stap fored long wan kot no wan kampani blong ol man we bambae yu toktok long olgeta. Long taem olsem, fasin blong mekem plan blong tok mo fasin blong talemaot, yu no stap tingrere long hem fastaem, be save we yu kasem long ol tiokratik stadi bambae oli givim ol stampa samting we yu save tokbaot. Taswe maet tok we yu talem yu no bin tingrere long hem be hem tu i stanap long fasin blong reregud finis, nating se i no plan blong givim wan tok olsem long wan prapa taem.—Aes. 50:4.
14 Sipos yu save long sam menet bifo se bambae oli askem yu blong toktok, i gat sam gudfala rod we bambae yu yusum blong yu rere. Fas samting, tingbaot wan no tu bigfala poen we yu wantem tokbaot. Tingbaot sam tok blong sapotem bigfala poen blong yu, wetem sam vas long Baebol we i stret. Nao tingbaot smoltaem long fastok we bambae yu givim. Nao, sipos yu mas givim, yu rere nao blong givim tok ya. Eksampel, yu nidim samting ya taem bambae yu tekem ples blong wan studen we hem i no stap long Tiokratik Skul.
15 I gat ol eksampel blong ol man long Baebol olsem ol minista blong Jeova we ol man oli askem olgeta long sot taem nomo blong oli givim wetnes long trutok. Wan long olgeta ya hem i Steven, we oli fosem hem blong stanap long fored blong ol memba blong kaonsel ya Sanedrin mo long fes blong ol man we oli talem gyaman toktok long saed blong hem. Yumi save ridim tok ya blong hem we i gat paoa taem hem i no rere nating long buk blong Ol Wok japta 7. Ol man Atens oli tekem aposol Pol i go long Ereopagas mo oli askem kwestin long saed blong bilif blong hem. Gudfala tok blong hem we hem i no tingrere long hem i stap long Ol Wok japta 17.
16-18. ?From wanem ol studen oli mas lan blong givim tok we oli no raetemdaon evri wod blong hem, bitim we oli ridim ol tok we oli raetemdaon long pepa no oli rimemba tok blong olgeta?
16 Nambawan rod. Samtaem ol man we oli stat joen long Tiokratik Skul oli wantem ridim tok blong olgeta long pepa. Hemia i no wan gudfala rod blong yusum, mo oli mas traehad kwik blong finis long fasin ya blong ridim tok blong olgeta, from fasin ya i no pulum man blong i lukluk ol man we oli stap lesin mo toktok blong hem i no olsem wan storeyan. Samtaem yu save ridim ol tok, be yu save lanem samting ya taem yu gat wan tok we yu mas ridim. Long ol narafala tok i gud we yu fri blong toktok yu raetem smol samting nomo long pepa.
17 Sam studen oli traem blong rimemba tok blong olgeta, blong oli no nidim pepa blong raetem sam samting long hem. Be fasin blong rimemba ol tok i gat ol nogud poen i save kamaot from, yu no save jenisim tok blong yu smol, hem i no olsem fasin blong yu blong toktok mo yu save fogetem wan impoten haf blong tok. Maet i gud blong tingbaot ol impoten fultoktok, olsem ol fastok mo ol lastok, be i no stret blong tingbaot olgeta tok.
18 Nambawan rod blong givim tok hemia fasin blong talem tok folem plan we i stap long tingting blong yu. Hemia fasin we yumi yusum long wok blong prij, yumi stap lanem blong talem tok we i kam long tingting blong yumi. Sem mak long ol miting blong kongregesen fasin blong givim tok we yumi gat plan long tingting blong yumi hem i wan long ol rod we ol man oli save yusum oltaem, hem i mekem se yumi givim wan tok we i kamaot long hat blong yumi, we hem i stret mesej we bambae i karem gudfala frut. Taswe oltaem yumi mas lanem blong givim tok olsem. Mo nating se samtaem maet oli askem yumi blong givim wan tok we yumi no rere nating long hem, bambae yumi rere blong givim, from we Jeova i wantem se bambae yumi gat gudhan blong givim ol tok we oli no raetem evri wod blong hem mo ol tok we yumi no rere nating blong talem. Tufala fasin ya blong toktok oli gat ples blong tufala long minista wok blong yumi.