Yusum Ol Prapa Tok Blong Yu

ATING yu wok had finis blong rerem tok blong yu. Yu gat ol gudfala save blong tokbaot. Yu putum ol save ya oli stap long stret ples blong olgeta mo oli klia. Yu mekem tok blong yu i rongud. Be sipos ol man oli lesin long sam haf nomo from we tingting blong olgeta i stap flae olbaot, ?yu ting se tok blong yu bambae i givhan long olgeta? Sipos i had blong oli putum tingting blong olgeta i stap oltaem long tok blong yu, ?yu ting se tok ya bambae i kasem hat blong olgeta?

?Wanem nao stamba blong trabol ya? Maet i gat plante samting. Be ating bigfala samting, hemia se yu no yusum ol prapa tok blong yu. Ating yu stap lukluk pepa blong yu oltaem, no maet yu lukaot blong talem evri wod i stret gud olsem we yu toktok long wan haeman. Ol trabol ya i kamaot from fasin blong yu blong rerem tok blong yu.

Maet fastaem yu raetem tok blong yu fulwan, nao biaen yu traem mekem i kam wan sot plan nomo. Sipos yu mekem olsem, ating bambae i had blong yu toktok long prapa fasin blong yu. ?From wanem? From we yu jusum finis ol wod we yu wantem talem. Nating se yu yusum wan plan taem yu givim tok ya, be oltaem bambae yu stap traehad blong tingbaot ol wod we yu raetem fastaem finis. Taem yumi raetemdaon samting, yumi raetem long fasin we i no prapa fasin blong yumi blong toktok. Mo tu, yumi raetem i longfala mo i fasfas moa i bitim prapa fasin blong yumi blong toktok. Taem yumi givim tok ya, ol man bambae oli luksave samting ya.

I moa gud yu no raetem evri wod blong tok blong yu, be yu traem mekem olsem: (1) Yu jusum nem blong tok blong yu mo ol bigfala poen we bambae yu yusum. Sipos hem i wan sot tok, ating tu bigfala poen nomo i naf. Sipos tok ya i longfala moa, ating i mas gat fo no faef bigfala poen. (2) Aninit long ol bigfala poen wanwan, yu raetem ol vas we bambae yu yusum blong soemaot poen ya. Mo yu raetem tu, ol pijatok mo pruf we yu wantem yusum. (3) Yu tingbaot fastok blong yu. Maet yu raetem wan no tu ful toktok. Mo maet yu raetem lastok blong yu tu.

I impoten tumas blong mekemrere gud tok blong yu. Be yu no mas traem lanem ol wod baehat. Sipos yu wantem yusum ol prapa tok blong yu, yu no rerem ol wod, be yu rerem ol tingting. Yu mas tingting bakegen mo bakegen long ol save we yu wantem tokbaot, gogo ol tingting oli joen isi nomo long maen blong yu. Hemia bambae i no had tumas sipos yu bin putum ol save i stap long stret ples blong hem, mo yu mekem wan gudfala plan blong tok blong yu. Bambae i isi blong tingbaot ol save ya, olsem we yu stap storian nomo.

?From Wanem Fasin Ya i Gud? Sipos yu yusum ol prapa tok blong yu, ol man bambae oli laekem isi fasin blong yu blong toktok, nao bambae oli lesin gud. Bambae tok blong yu i laef, mo bambae i pulum gud tingting blong ol man.

Taem yu yusum ol prapa tok blong yu, i isi blong lukluk ol man we yu stap toktok long olgeta. Hemia bambae i givhan long yu blong yu serem ol tingting blong yu wetem olgeta. Bambae yu no stap fas long pepa blong yu, blong folem evri wod we yu raetem finis. Nao ol man bambae oli harem se yu save gud long samting we yu stap tokbaot, mo yu bilivim samting we yu stap talem. From samting ya, ol tok blong yu bambae i kamaot long hat blong yu, bambae i olsem we yu storian nomo, mo bambae ol tok ya i kasem hat blong olgeta we oli lesin.

Taem yu yusum ol prapa tok blong yu, i no hadwok tumas blong jenisim sam tok. From we yu no raetemdaon evri wod, yu save jenisim sam wod sipos i gat nid. Maet long dei we yu mas givim tok ya, yu harem wan bigfala nius long radio we i stret gud long tok blong yu. Ating yu luk se i stret blong joenem nius ya i go long tok blong yu. Sipos no, maet yu stap toktok, nao yu luk se i gat plante pikinini i stap. I gud tumas sipos yu save jenisim sam pijatok mo sam tok we yu talem, blong mekem ol poen oli laenap wetem laef blong olgeta. Olsem nao, ol pikinini tu bambae oli luksave se tok ya i stret long olgeta.

Narafala risen from wanem i gud blong yusum prapa tok blong yu, se fasin ya i mekem we yu tu yu tingting. Taem ol man oli lesin gud mo oli laekem tok blong yu, yu tu yu glad moa blong toktok. Nao yu toktok moa long sam tingting i bitim ol narawan, mo yu talem bakegen sam poen blong mekem oli kamaot klia. Sipos yu luk se ol man oli no moa lesin gud long tok blong yu, yu save mekem sam samting blong winim trabol ya, i bitim we yu gohed nomo blong toktok long ol man we oli stap tingbaot wan narafala samting.

Yu Lukaot Long Ol Trap. Taem yu yusum ol prapa tok blong yu, yu mas save se i gat sam trap. Wan trap, hemia se i isi blong bitim taem blong yu. Sipos yu joenem plante tingting tumas i go long tok blong yu, ating tok ya bambae i longfala tumas. Yu save blokem trabol ya sipos yu raetem long plan blong yu, hamas minit yu save toktok long evri haf blong tok blong yu. Nao yu mas folem gud ol minit ya.

Wan narafala trap, hemia se yu trastem yu wan tumas. Samting ya i hapen moa long ol brata we oli givim ol tok longtaem finis i kam. Sam long olgeta oli naf blong joenem ol tingting hareap, mo blong mekem ol tok blong olgeta i stret long ol minit we oli gat. Be yumi mas gat tingting daon, mo yumi mas tingbaot se yumi stap joen long wan program blong edukesen we Jehova nao i Bigfala Tija blong yumi. Olsemia, bambae yumi prea from evri tok we yumi givim, mo yumi rere gud.—Aes. 30:20; Rom 12:6-8.

Plante we oli no lan blong yusum ol prapa tok blong olgeta, oli fraet se bambae oli fogetem ol tok we oli mas talem. Yu no mas letem tingting ya i blokem yu, blong yu no traem tekem step ya we bambae i givhan long yu blong kam gud moa blong givim ol tok. Yu mas rere gud, mo yu mas askem long Jehova, blong hem i givim spirit blong hem blong givhan long yu.—Jon 14:26.

Sam we oli givim ol tok oli wari tumas long ol wod, nao oli no traem yusum ol prapa tok blong olgeta. I tru, taem yu yusum ol prapa tok blong yu, ating bambae yu no jusum ol wod we oli beswan. Mo maet yu no folem ol rul blong lanwis blong yu long fasin we i stret gud, olsem taem yu mekem wan tok we yu ridim long pepa. Be ol man oli no tingbaot ol samting ya, taem oli laekem tumas tok blong yu from we i olsem se yu storian nomo. Ol man oli laekem moa ol wod we oli mekem se oli kasem ol tingting long tok ya isi nomo, i bitim we yu yusum ol bigfala wod we i had blong oli kasem save long olgeta. Sipos yu rere gud, bambae yu joenem ol stret wod, i no from we yu lanem olgeta, be from we yu tingting bakegen mo bakegen long ol save we yu wantem tokbaot. Mo tu, sipos yu toktok gud evri dei, bambae i isi blong toktok gud taem yu givim wan tok long miting.

?Bambae Yu Mekem Wanem Kaen Plan Blong Tok? Taem yu gohed blong givim ol tok mo yu lan blong yusum wan plan, bambae yu kam naf blong mekem wan plan we i sot nomo. Ating bambae yu raetem sam wod nomo aninit long evri poen long tok blong yu. Ol wod ya wetem sam vas we bambae yu yusum, yu save raetem long wan kad no wan pepa, blong yu lukluk kwiktaem long olgeta. Long wok blong prij, klosap oltaem yu gat wan smol plan long tingting blong yu. Taem yu lukaot moa save blong go luk wan man bakegen, maet yu raetem smol save long wan pepa mo yu putum i stap long Baebol blong yu. Sipos no, yu save mekem wan smol plan folem ol save long “Bible Topics for Discussion,” Reasoning From the Scriptures, no Statem Wan Storian Long Baebol Mo Gohed Long Hem.

Be sipos yu gat plante defren tok blong mekem long ol miting wetem sam pablik tok tu, mo ol tok ya oli kloklosap, maet yu luk se yu mas raetemdaon plante moa save long pepa blong yu. ?From wanem? Hemia bambae i givhan long yu blong yu mekem ol save ya i kambak long tingting blong yu bifo we yu givim ol tok ya. Be taem yu stap givim tok blong yu, yu no mas lukluk pepa blong yu tumas mo ridim ol wod. Sipos yu lukluk pepa blong yu klosap oltaem, bambae yu no moa yusum ol prapa tok blong yu we i save pulum ol man blong oli lesin gud. Sipos yu raetem plante tok long pepa blong yu, yu save putum mak aninit long sam wod nomo wetem ol vas. Olsemia, yu save luk kwiktaem ol poen ya we oli olsem plan blong tok blong yu.

Wan brata we i givim ol tok longtaem finis i kam, klosap oltaem hem i yusum ol prapa tok blong hem. Be ol narafala fasin blong givim tok oli save givhan tu. Long fastok mo lastok, oltaem i impoten we yu lukluk ol man, mo yu talem ol tok we yu jusum gud mo we oli save gat paoa long tingting blong man. Long taem ya, ating i gud yu lanem sam toktok baehat. Sipos yu wantem talem sam pruf, sam namba, toktok blong wan man, no vas, i stret blong ridim olgeta, mo fasin ya i save givim paoa long tok we yu talem.

Taem Man i Askem Kwestin Long Yu. Samtaem, man i askem kwestin blong save bilif blong yu, mo yu no rere from. Maet yu mitim wan man long wok blong prij we hem i no agri long bilif blong yu. Maet samting ya i hapen taem yu storian wetem sam famle blong yu, no long ples blong wok, no long skul. Maet sam haeman blong gavman oli askem kwestin blong save bilif blong yu no fasin blong laef blong yu. Baebol i talem se: “Sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta. Be yufala i mas toktok gud long olgeta we yufala i ona long olgeta.”—1 Pita 3:15, 16.

Yu traem luk ansa we Pita mo Jon tufala i talem long hae kot blong ol man Jiu, we nem blong hem Sanhedrin. Stori ya i stap long Ol Wok 4:19, 20. Tufala i talem sot tok nomo blong eksplenem gud desisen blong tufala. Tufala i mekem samting ya long fasin we i stret long ol man we oli lesin long kot ya. Tufala i soemaot se kot tu i mas mekem prapa desisen blong hem long samting ya. Biaen, ol man oli putum ol giaman poen agens long Steven, mo oli pulum hem i go long sem kot ya. Yu save ridim ol tok blong hem long Ol Wok 7:2-53. Ol tok ya i gat paoa, nating se Steven i no gat taem blong mekemrere olgeta. ?Hem i yusum wanem rod blong putum ol save long stret ples blong hem? Hem i tokbaot ol samting we oli hapen folem ol yia. Nao taem hem i luk se i stret, hem i tokbaot stronghed fasin blong neson blong Isrel. Long lastok blong hem, hem i soemaot se kot ya Sanhedrin i gat sem fasin stronghed ya tu, from we hem i panisim Pikinini blong God se hem i mas ded.

Sipos yu mas ansa long kwestin we wan man i askem be yu no gat taem blong rerem toktok blong yu, ?wanem i save givhan long yu blong yu givim wan gudfala ansa? Yu save folem fasin blong Nehemaea. Hem i prea long tingting blong hem bifo we hem i ansa long kwestin blong King Ataksekses. (Neh. 2:4) Afta, yu save mekem wan plan kwiktaem long tingting blong yu. Ol step blong mekem wan plan, hemia: (1) Yu tingbaot wan no tu poen we yu mas eksplenem (maet yu jusum ol poen long buk ya Reasoning From the Scriptures no Statem Wan Storian Long Baebol Mo Gohed Long Hem). (2) Yu jusum ol vas blong sapotem ol poen ya. (3) Yu tingbaot ol tok we yu save talem long kaen fasin blong statem wan storian we man i glad blong lesin long hem. Nao yu stat blong toktok.

Maet yu wari se sipos yu fraet mo yu seksek smol, bambae yu fogetem samting we yu mas mekem. Be Jisas i talem long ol man blong hem se: “Yufala i no tingting tumas se, ‘?Bambae mi mi tok olsem wanem? ?Bambae mi talem wanem tok long olgeta?’ Bambae yufala i save talemaot tok we Tabu Spirit bambae i givim long yufala, stret long taem blong tok, from we bambae i no yufala nomo i tok. Spirit blong Papa blong yufala bambae i givim tok long yufala blong yufala i talemaot.” (Mat. 10:19, 20) Hemia i no min se bambae i gat wan merikel, nao yu kasem “tok blong waes” olsem ol Kristin long taem bifo, nogat. (1 Kor. 12:8) Be sipos yu stap oltaem wetem Kristin kongregesen blong kasem tijing we Jehova i givim long ol man blong hem, ale tabu spirit bambae i mekem se yu tingbaot ol save we yu nidim.—Aes. 50:4.

Tru ya, i gud tumas blong yusum ol prapa tok blong yu. Sipos yu mekem samting ya taem yu givim ol tok long kongregesen, bambae i no had blong ansa long man we i askem kwestin, nating se yu no gat taem blong rerem sam save. Long tufala taem ya, yu save yusum sem fasin blong mekem plan blong tok blong yu. Yu no mas fraet blong traem yusum ol prapa tok blong yu. Sipos yu kam gud long samting ya, bambae yu luk se yu save toktok gud long ol man long wok blong prij. Mo sipos yu gat janis blong givim sam tok long miting, ating ol man bambae oli lesin moa long yu, mo bambae ol tok blong yu i tajem hat blong olgeta.