Japta 4
Wan Hasban We i Winim Bigfala Respek
1, 2. ?Olsem wanem yu yu save kasem respek? ?Olsem wanem Jisas Kraes i soemaot rod long yumi long saed ya?
YU NO save fosem wan narafala man blong hem i respektem yu. Yu mas winim respek from ol toktok blong yu, from ol samting we yu yu mekem, mo from gudfala fasin blong yu.
2 Jisas Kraes i soemaot rod long yumi. Hem i kasem respek blong ol man from fasin blong hem taem hem i tijim olgeta. Taem hem i finisim tok blong hem antap long bigfala hil, “ol man oli sapraes long tok blong hem.” ?Olsem wanem hem i winim respek blong ol man ya? Ol tok blong hem oli no stanap long tok blong man nomo, be oli stanap long Tok blong God, Baebol. Jeova God nomo i stampa blong ol tok blong hem, taswe tok blong hem i tru. Jisas i winim respek blong ol fren blong hem mo blong ol enemi blong hem tu, from hadwok blong hem.—Matyu 7:28, 29; 15:1-9; Jon 7:32, 45, 46.
3. ?Efesas 5:33 i talem wanem rul long ol waef? ?Hasban i mas mekem wanem blong mekem i isi long waef blong hem blong obei long rul ya?
3 Efesas 5:33 (NW) i givim wan rul, i se: “Woman i mas gat bigfala respek long hasban blong hem.” Be hasban i mas traehad blong winim respek ya. Sipos no, i hadwok long waef blong obei long rul ya. ?Olsem wanem wan hasban i save mekem ol samting we Baebol i talem blong kasem respek?
HED BLONG WOMAN BLONG HEM LONG PRAPA FASIN
4. ?Baebol i makemaot wanem wok blong hasban long famle?
4 Baebol i talem se hasban i mas hed blong waef blong hem, i se: “Yufala woman we i mared yufala i mas ona long man blong yufala, olsem we yufala i stap ona long Masta blong yumi. From we man i hed blong woman blong hem, olsem we Kraes i hed blong jyos. Kraes i sevem jyos ya finis, we jyos ya i bodi blong hem. From samting ya, ol woman oli mas ona long man blong olgeta, long evri samting, olsem we jyos ya i stap ona long Kraes.” (Efesas 5:22-24) ?Sipos tufala i obei long rul ya, yu ting se mared blong tufala bambae i hapi moa? Sam woman oli tok agens long fasin blong sam man we oli stap daonem ol woman, oli mekem flas, mo oli wantem bos oltaem nomo long ol woman. Baebol i no agri long ol fasin ya.
5. ?Hasban i mas luksave wanem long saed blong wok blong hem, we hem i olsem hed blong waef? ?Hu i soemaot rod long hem?
5 Baebol i talem klia se i no ol woman nomo we oli mas ona long hed blong olgeta. Ol man tu, oli mas obei long hed blong olgeta. Long Baebol, long 1 Korin japta 11 vas 3, aposol Pol i talem se: “Be mi wantem yufala i savegud long tok ya. Kraes i olsem hed blong olgeta man mo man i olsem hed blong woman blong hem, mo God i olsem hed blong Kraes.” Hed blong man i Kraes nomo, mo from rod we hem i soemaot, hasban, yu yu save lanem olsem wanem blong hed long waef blong yu long prapa fasin.
6. ?From we oli hed blong woman, ol hasban oli save lanem wanem from fasin blong Jeova God mo Jisas Kraes?
6 Jeova i hed blong Jisas long fasin we i kaengud mo long fasin lav. From samting ya, Jisas i talem long Jeova se: “God blong mi, mi mi wantem tumas blong mekem ol samting we yu yu wantem.” (Ol Sam 40:8; Hibrus 10:7) Jisas Kraes tu i soemaot lav long olgeta we hem i olsem hed blong olgeta. Hem i talem long ol man we oli kam disaepol blong hem, se: “Mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel.” (Matyu 11:29) Baebol i talem se ol man blong kongregesen [no jyos] blong Jisas oli olsem waef blong hem. Mo i tru tumas we tingting blong olgeta insaed long kampani ya i gat spel from we oli stap aninit long hed blong olgeta, Jisas. Hem i no jes yusum olgeta blong mekem evri samting we hem nomo i wantem. Lav blong hem i stanap long fasin blong givim. Hemia nao semkaen lav we hasban i mas gat blong hem i rul gud long waef blong hem. Aposol Pol i talem se: “Mo yufala man we i mared, yufala i mas laekem woman blong yufala tumas, olsem we Kraes i laekem jyos ya tumas. Taswe hem i letem laef blong hem, blong sevem jyos ya. . . . Long sem fasin, man i mas laekem woman blong hem, i mas lukaotgud long hem, olsem we i stap lukaotgud long bodi blong hem nomo. Taem man i stap lukaotgud long woman blong hem, i olsem we hem i stap lukaotgud long bodi blong hem nomo. Nao i no gat man we i stap lukluk nogud long bodi blong hem, i stap spolem bodi blong hem, no gat. Ol man oli stap kakae gud blong mekem bodi blong olgeta i strong. Mo oli stap lukaotgud long bodi blong olgeta, olsem we Kraes i stap lukaotgud long jyos. . . . Man i mas laekem woman blong hem, i mas lukaotgud long hem olsem we i stap lukaotgud long bodi blong hem nomo. Mo woman i mas onagud long man blong hem.” (Efesas 5:25-29, 33) Sipos yu yu glad blong stap aninit long hed blong yu, Kraes, bambae i no hadwok tumas long woman blong ona long yu olsem hed blong hem. Yes, bambae hem i glad nomo from.
7, 8. Talem sam rod we samfala hasban oli mestem long prapa wok blong olgeta, we oli hed blong waef blong olgeta.
7 Yumi evriwan i sinman, mo taem yumi bon, yumi gat fasin blong tingbaot yumi wan fastaem. Taswe, samtaem hasban i sot long sam gudfala fasin. Hem i wantem we waef i respektem hem from we hem i hed blong famle, be maet hem i no soemaot lav mo i no keagud long waef blong hem olsem we waef i nidim. Plante taem ol waef oli talem se hasban blong olgeta i no rili laekem olgeta, hem i jes tingbaot olsem wanem hem nomo i save harem gud. Sam waef oli talem se hasban blong olgeta i stap mekem bigfala bos nomo long olgeta. Samtaem, samting ya i kamaot sipos waef i traem tekem ples blong hasban olsem we hem i wantem bos long famle. Nao hasban i mekem i strong long woman blong hem blong blokem fasin ya. No maet hasban i gat fasin ya from we hem i gruap long wan ples we fulap man oli mekem flas, oli mekem bigfala bos long waef blong olgeta. Nating we i olsem ya, be sipos hasban i mekem bigfala bos, hem i no save kasem respek.
8 Sam hasban oli no mekem flas, be oli mekem wan trabol we i defren. Oli no mekem wok blong olgeta insaed long mared. Ale, waef blong hem i mekem olgeta disisin long famle. No maet hem i talem long waef blong hem se: “Yu no mekem mi mi hareap long disisin ya,” nao maet hem i slou tumas mo hem i mekem famle i harem nogud. Maet man ya i no rili les long saed blong wok, be sipos hem i les blong yusum tingting blong hem, bambae i gat trabol, olsem Proveb 24:33, 34 i talem, se: “Slip lelebet, les lelebet, letem han blong yu i slak lelebet, mo bambae i olsem we wan man i stil long haos blong yu. Yu sek nomo we yu yu puaman finis, mo yu sot long evri samting.”—Revised Standard Version.
9, 10. ?Taem hasban i mekem ol disisin long famle, hem i mas tingbaot hu bakegen?
9 Sipos yu yu stap soemaot fasin we yu tingtinggud fastaem, we yu keaful blong mekem ol gudfala disisin, mo yu stanap strong long ol wok blong yu, bambae waef blong yu i save respektem yu. Be samting ya i no min se yu mas folem tingting blong yu nomo long olgeta disisin ya. Maet waef blong yu i gat defren tingting long yu long saed blong wan bisnes. Be i gud sipos yu storeyan wetem hem fastaem mo yu lesin long tingting blong hem long saed blong bisnes ya. Baebol i storeyan long wan bigfala trabol we i kamaot long taem bifo long famle blong Ebraham mo Sera, long saed blong boe blong tufala, Aesak, mo boe blong Egar, haos gel blong tufala. Sera i talemaot tingting blong hem olsem wanem tufala i save stretem trabol ya, be Ebraham i no wantem harem tok blong hem. Be God i talem long Ebraham se: “Yu yu lesin long toktok blong hem.”—Jenesis 21:9-12.
10 From store ya, yumi no mas ting se hasban i mas folem tingting blong waef blong hem evritaem. Be i gud sipos tufala i storeyan long ol disisin long saed blong famle. Mo i gud sipos hasban i letem waef i talemaot ol tingting mo filing blong hem tu. Hasban, yu mas pulum waef blong yu blong tokbaot evri samting. Yu mas soemaot long hem se yu yu rere blong lesin. Mo taem yu yu mekem ol disisin long famle, yu mas tingting long olgeta tok blong hem mo ol samting we hem i wantem. Yu no mas mekem olsem bigfala bos. Yu no mas fosem hem blong mekem evri samting we yu yu wantem. Long defren fasin, yu mas soemaot we tingting blong yu i stap daon. Yu yu no stret gud olgeta, samtaem yu save mestem. Mo long taem ya, yu yu wantem we waef blong yu i fogivim yu. Sipos oltaem hasban i gat tingting daon, i no strong long waef blong fogivim mo respektem hem. Be i strong blong soemaot respek long wan man we tingting blong hem i antap tumas.
HEM I MAS LUKAOTGUD LONG FAMLE BLONG HEM
11, 12. (a) ?Hasban i mas mekem wanem blong lukaotgud long famle blong hem long saed blong bodi? (b) ?From wanem yumi save talem se tufala tugeta i stap mekem wok ya?
11 Wok blong hasban i blong givim ol samting long famle blong hem we oli nidim long saed blong bodi. 1 Timote 5:8 i soemaot samting ya, i se: “Be man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” Tede, long fulap ples long wol, yumi nidim bigfala mane blong stap laef. Hasban, yu nao yu mas lukaot rod blong winim naf mane blong pem ol samting we famle blong yu i nidim. Taem yu karem pei blong yu i kam long haos, i gud sipos yutufala tugeta i tokbaot olsem wanem blong seraot mo yusum mane ya. Samting ya bambae i givhan long yutufala blong spenem mane long waes fasin, mo blong holem haf blong hem i stap blong yusum go kasem nekiswan pei. Mo tu, fasin ya bambae i givhan long yutufala blong no pem ol samting we oli sas tumas, we oli save mekem kaon blong yutufala i bigwan tumas. Waes fasin ya bambae i blokem ol rao we oli save kamaot taem mane i finis, be yu no kasem nekiswan pei yet.
12 Nating we long bighaf blong ol mared hasban nomo i wok blong givhan long famle blong hem, be yumi mas rimemba se rili tufala tugeta i mekem samting ya. Samtaem hasban i ting se hem nomo i stap wok. Be hem i mas traem tingbaot hamas mane hem i mas winim sipos hem i mas pem wan woman blong kukum kakae, go long stoa, wasem plet, klinim haos, wokem garen, lukaot long ol pikinini, mo plante narafala samting bakegen. Waef blong yu i sevem mane blong yu from we hem i stap mekem ol wok ya. I stret nomo we hem i mekem olsem, from we hemia prapa wok blong hem insaed long mared. Tok blong Proveb 18:22 i tru tumas: “?Yu yu faenem wan gudfala waef? Oraet, yu faenem wan gudfala samting.”
13. ?Hasban mo waef, tufala i no mas kasem wanem tingting long saed blong ol sas samting blong wol? ?Olsem wanem stret tingting long saed ya i save givhan long tufala?
13 !Be lukaot! Taem yu wok blong pem ol samting we famle blong yu i nidim, i isi blong foldaon long wan trap. Yu save bitim mak long saed blong wok, nao yu stat blong ronem ol sas samting we yu no rili nidim. Hemia i wan bigfala trap ya. Sloslou, hem i save ‘kakae’ strong faondesen blong wan hapi famle. Pol i raetemdaon tok ya: “Taem yumi kam long wol ya, yumi no karem wan samting, mo taem yumi goaot bakegen bambae yumi no karem wan samting bakegen. Oraet, be sipos yumi gat kakae blong yumi mo klos blong yumi, hemia i naf, yumi save harem gud nao. Ol man ya we oli wantem kam rijman, be oltaem ol samting blong traem yumi oli stap mekem olgeta oli folfoldaon. Ol samting we oli wantem, we oli krangke, mo we oli stap spolem olgeta, oli olsem trap blong kasem olgeta. Nao fasin ya blong wantem evri samting, hem i save pulum olgeta oli kamdaon olgeta, we laef blong olgeta i kam nogud olgeta. Fasin blong laekem mane tumas, hem i stampa blong olgeta fasin nogud. Mo i gat sam man we oli strong blong folem fasin ya, we oli gowe finis long fasin blong bilif. Nao oli stap mekem ol samting we olgeta tu oli harem nogud tumas from.” Nating we yu save pem plante sas samting sipos yu wok moa, be ol samting ya oli no save fiksimap trabol ya we i kamaot taem famle i brokdaon from. Ol samting we yu lusum long saed blong speret mo filing oli bigwan moa i bitim bigfala mane we yu save winim.—1 Timote 6:7-10.
14. ?Wanem samting i soemaot se wan man i stap tingting tumas long saed blong ol sas samting?
14 Fasin blong laekem tumas mane mo ol ting blong wol, hem i stampa blong fasin we man i wantem ol sas samting long laef. Samting ya i no kamaot long ol rijman nomo. Wan puaman i save laekem tumas ol sas samting. Mo wan rijman i save tinghae moa long ol samting long saed blong speret. Samting ya i dipen long wanem i stap long hat blong ol. Jisas i talem se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya i gat kakros oli save kam kakae, mo rosta tu i save spolem ol samting. Mo i gat man blong stil we oli save brekem haos, blong oli stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting. Mo ol man blong stil oli no save kam brekem haos, blong oli stil. From we long ples ya we ol gudgudfala samting blong yu i stap, be tingting blong yu tu bambae i stap oltaem long ples ya.”—Matyu 6:19-21.
15, 16. Hasban i mas lukaot gud long famle long saed blong bodi, ?be hem i mas mekem wanem moa blong mekem famle i hapi?
15 Wan hasban we hem i lukaotgud long famle blong hem i mas tingtinggud long advaes ya blong Baebol. Tru, hem i mas pem ol samting we famle i nidim long saed blong bodi, be antap long samting ya, hem i mas lukaotgud long famle blong hem long saed blong speret tu. I nogud sipos yu wok oltaem blong kasem evri samting long saed blong bodi, be yu no moa gat naf taem mo paoa i stap blong leftemap tingting blong famle blong yu long saed blong speret. Blong kasem waes we yu yu nidim blong winim ol trabol long laef, yu mas tekem taem blong wokem strong tingting long famle blong yu, blong oli ona long ol stret fasin blong God. Sipos yu putum wan prapa taem blong ridim Baebol tugeta, mo blong storebaot Tok blong God, mo blong prea tugeta, bambae yu kasem gudfala frut from. Hasban, yu yu hed blong famle, taswe, yu nao yu mas lidim olgeta long samting ya. Taem yu yu tingbaot bigfala blesing we i save kamaot from, i nating nomo we yu mas yusum taem mo paoa blong yu blong mekem ol samting ya. Promes blong God i no save lus: “Long olgeta samting we yu yu mekem, lesin long hem, mo hem bambae i stretem rod blong yu.”—Proveb 3:6.
16 Wan hasban we hem i letem God i soemaot rod long hem, hem i glad blong folem advaes ya blong Eklesiastis 7:12, se: “Save i blong lukaotgud long yumi olsem we mane i blong lukaotgud long yumi. Be save i moa gud i winim mane, from we hem i save sevem laef blong man.” Wan man we hem i lukaotgud long famle blong hem i mas hadwok blong kasem ol samting we famle i nidim long saed blong bodi. Be hem i no mas putum tingting blong hem i stap strong long “ol mane blong hem, from we mane i no wan samting blong stap longtaem.” Hem i mas putum tingting blong hem “i stap long God nomo.” Hem i mas soemaot long famle blong hem se ol samting long saed long speret oli bigfala samting. Sipos hem i mekem olsem, hem mo waef blong hem, tufala bambae i save “kasem laef ya we i prapa wan.” (1 Timote 6:17-19) Wan hasban we hem i lukaot gud long famle blong hem long saed blong bodi mo speret, bambae hem i pulum waef blong hem we i fraetgud long God, blong soemaot respek long hem.
HEM I ONA LONG WAEF BLONG HEM
17-19. ?Olsem wanem hasban i save ‘ona’ long waef taem tufala i slip tugeta?
17 Tok blong aposol Pita i go stret long ol hasban taem hem i talem se: “Yufala i mas ona long olgeta, from we bodi blong ol woman i no strong tumas.” (1 Pita 3:7, NW) Long faswan haf blong vas ya, Pita i talem se hasban i mas ona long waef blong hem mo “kasem gudfala save” long hem.
18 Samting ya i tru long fasin blong slip tugeta. Sam waef oli no wantem slip wetem man blong olgeta. Maet samting ya i kamaot from we hasban i no soemaot se hem i savegud ol fasin blong bodi mo filing blong waef blong hem. Tok blong God i talem se: “Hasban i mas stap mekem ol samting long woman blong hem we i stret long rod blong mared.” (1 Korin 7:3) Be hem i mas ‘kasem gudfala save. Hem i mas ona long hem, from we bodi blong woman i no strong tumas.’ Sipos yu ‘ona long hem’ tru, bambae yu no strong tumas long hem, bambae yu no pulum hem blong slip wetem yu taem yu yu wantem nomo, nating we maet hem i taed tumas no we hem i gat sik blong hem. (Lukluk long Levitikas 20:18) Mo taem yutufala i slip tugeta, yu no mas tingbaot olsem wanem bambae yu nomo yu save harem gud. Yu no mas fogetem ol nid blong waef blong yu. Plante taem woman i no rere kwik, hem i slou moa bitim man. Hem i rili nidim we yu yu isi long hem, yu yu soemaot se yu yu keagud long hem mo yu yu laekem hem. Taem Baebol i talem se hasban i mas “stap mekem ol samting long woman blong hem we i stret long rod blong mared,” hem i minim se: Bigfala samting i blong mekem fasin blong givim, i no blong mekem fasin blong kasem nomo.
19 Fasin blong givim ya, yu mas soemaot long waef blong yu nomo. I tru we plante man tede oli slip olbaot wetem plante narafala woman. ?Be olgeta oli winim wanem samting from? Olgeta oli spolem famle blong olgeta nomo. Olgeta oli no ‘ona’ long waef blong olgeta. Ale waef i no save gat respek long hasban. Antap moa, wan hasban we i mekem fasin ya i no soemaot se hem i ona long fasin we God i stanemap fastaem, se mared. Taem yumi tingbaot bigfala soa we i stap long hat blong plante man from nogud fasin long saed blong seks, yumi kasem save long tok blong Hibrus 13:4 we i talem se: “Mared i wan fasin we yufala evriwan i mas tinghae long hem. Man i mas stap tru long woman blong hem, mo woman i mas stap tru long man blong hem. God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.”
20. ?Olsem Efesas 5:28 i talem, wanem sam narafala rod bakegen we hasban i save yusum blong ona long waef blong hem?
20 I no long saed blong seks nomo we man i mas ona long waef blong hem. Wan hasban we i wantem kasem bigfala respek i mas tinghae long waef blong hem long plante narafala samting tu. Hem i no wosipim waef blong hem no hem i no kam olsem slef blong waef blong hem. No gat. Be olsem tok ya we yumi ridim finis long Efesas 5:28 i talem, se: “Long sem fasin, man i mas laekem woman blong hem, i mas lukaotgud long hem olsem we i stap lukaotgud long bodi blong hem nomo. Taem man i stap lukaotgud long woman blong hem, i olsem we hem i stap lukaotgud long bodi blong hem nomo.” Wan man we i mekem olsemia, hem i no save daonem waef blong hem olsem we woman ya i nating nomo. Long taem blong kakae, hem i no save tekem beswan kakae mo livim smosmol haf kakae nomo long waef blong hem. Hem i no save mekem olsemia sipos hem i laekem woman blong hem “olsem we hem i laekem hem wan.” (NW) Hem i no save tingbaot ol klos we i save flasem bodi blong hem nomo. Be hem i mas tingbaot moa olsem wanem blong flasem woman blong hem. Ale, hem i wantem we woman blong hem i werem ol klos we hem i laekem. Wan man i no save kilim hem wan taem hem i mestem long wan samting. Olsemia nao, wan Kristin hasban i no save kilim waef blong hem taem hem i mestem. Long defren fasin olgeta, sipos wan narafala man i daonem waef blong hem, hasban i mas girap, i mas stanap long saed blong waef blong hem mo sapotem hem. Hem i laekem waef blong hem olsem we hem i laekem hem wan.
21, 22. ?Olsem wanem hasban i save givhan long waef blong hem blong waef i harem gud long ol wok blong hem?
21 Oraet, yu yu luksave finis se ol nid blong yutufala i defren lelebet. Be sipos yu wantem ‘ona’ long waef blong yu, yu mas luksave wan narafala samting tu: Taem Jeova God i mekem man mo woman, hem i givim defren tingting long tufala. Sipos hasban i no bitim mak, hem i save stanemap sam rul long famle blong hem. Ale, bambae woman blong hem i glad blong folem olgeta. Jeova God i wokem woman olsemia, mo tu hem i wokem woman blong frengud wetem man blong hem, ‘blong givhan long hem.’ (Jenesis 2:18) Be sipos man i strong bitim mak, we hem i no letem waef blong hem i yusum tingting mo waes blong hem nating, maet woman i harem olsem we hem i stap kalabus. Mo bambae, maet hem i no moa hapi, maet hem i no moa laekem hasban blong hem.
22 Wan narafala bigfala samting we yu mas tingbaot, se woman i wantem we man blong hem i nidim hem. Taem hem i mekem wan wok, hem i glad sipos hasban blong hem i givhan long hem. Be sipos hasban i tekemaot wok ya long han blong hem olgeta, nao hasban nomo i gohed blong mekem wok ya, i olsem we hem i talem long woman blong hem se: ‘Mi mi no nidim yu.’ Olsemia, hem i save spolem filing blong waef blong hem. Sipos yu wantem winim respek blong waef blong yu, yu mas soemaot tangkyu mo fasin kaengud long hem, mo yu mas talem long hem se yu nidim hem. Soemaot se yu ona long hem. Wok tugeta olsem we yutufala i wan tim nomo. Yusum tok olsem “yumi” mo “blong yumi,” be no yusum tumas “mi,” “blong mi” no “blong yu.” ?Yu yu talem oltaem long waef blong yu se yu tinghae long hem mo yu nidim hem? Sipos yu karem pei blong yu nomo i kam long hem evritaem, hemia i no naf. Yu mas yusum plante defren rod blong soemaot long hem se yu tinghae long hem.
TINGHAE LONG OL GUDFALA FASIN BLONG WOMAN
23. ?Olsem wanem man mo woman tufala i defren long saed blong filing?
23 Wan woman we hem i stadi long saed blong tingting blong ol man, hem i talem se: “Ol woman, oli strong long saed blong filing, be ol man oli strong long saed blong tingting.” Tok ya i no minim se wan i moa gud bitim narawan, be tufala i defren nomo. Yumi no laekem ol man we oli no gat filing. Mo tu, yumi no laekem ol man we oli no tingtinggud. Ol man mo ol woman oli naf blong mekem tufala samting ya. Be taem wan samting i hapen, ol filing blong ol woman oli kam antap moa. Be ol man oli holembak filing blong olgeta, oli letem tingting blong olgeta i wok fastaem. Hemia wan narafala samting we i soemaot se tufala i defren, mo tufala i nidim tufala. From we woman i strong long saed blong filing, hem i intres long ol narafala man mo woman, taswe plante taem hem i toktok moa i winim man blong hem. Mo hem i nidim we samfala oli glad blong toktok wetem hem tu. Hemia wan samting we plante hasban oli no mekem.
24. ?From wanem i impoten we hasban i storeyan wetem waef blong hem mo we hem i lesingud long ol tok blong hem?
24 ?Yu yu toktok wetem waef blong yu? ?Yu yu storebaot wok blong yu nomo, no yu tokbaot wok blong hem tu? ?Yu yu rili soemaot long hem se yu intres long wok blong hem? ?Yu yu askem long hem sipos evri samting i rongud insaed long famle tede? ?Olsem wanem long ol pikinini? I nogud blong kambak long haos mo askem nomo se: ‘?Yu kukum wanem blong kakae?’ Mo taem yu finisim kakae ya, nao hem i wantem storeyan, i nogud sipos yu livim hem i stap long haos nao yu yu go storeyan wetem ol narafala man raonabaot. Yu mas soemaot long waef blong yu se yu yu intres long hem, long tingting blong hem, long wok blong hem, mo long filing blong hem. Leftemap tingting blong hem long ol wok mo plan blong hem, mo talem tangkyu long hem taem hem i mekem wan gudfala wok. Sipos yu mekem olsem, samting ya i save pulum hem blong mekem sam wok we bifo hem i slak blong mekem. Fasin blong daonem man i olsem posen, mo hem i save mekem tingting blong man i foldaon. Be sipos yu leftemap tingting blong hem taem hem i wokgud, samting ya i olsem meresin blong sikman, we bambae i mekem hem i harem gud.—Proveb 12:18; 16:24.
25, 26. (a) ?Taem yu yu givim wan presen long waef blong yu, i olsem we yu talem wanem long hem? (b) ?Long tingting blong ol woman, i moa impoten we yu givim wanem long olgeta?
25 ?Samtaem yu yu karem wan presen i kam long waef blong yu? Yu no nidim blong pem wan sas presen. Wan smol samting nomo i save talem long hem se: ‘Mi mi stap tingbaot yu.’ ?Yu yu wet long wan spesel taem blong mekem samting ya, no yu mekem enitaem, from we yu wantem mekem nomo? Wan gudfala sapraes i save mekem hem i hapi tumas. ?Olsem wanem? ?Yu yu harem glad taem waef blong yu i kukum wan spesel kakae blong givim sapraes long yu? Oraet, yu nao yu mas givimbak wan sapraes long hem mo mekem hem i hapi. Nating we hem i wan smol samting nomo, be sipos yu givim from lav blong yu, hem i gud moa i winim fasin blong pem wan sas presen we yu givim nomo, be i olsem we hem i fosem yu blong givim. Aposol Pol i talem se: “God i laekem tumas man we i save givim long gladhat blong hem.” (2 Korin 9:7) Ol waef tu oli laekem wan man olsem. I nating we hem i no kukum spesel kakae evritaem. Be rimemba, “i moa gud yu kakae wan plet kabis nomo wetem man we i laekem yu, i bitim we yu kakae buluk we i fatfat wetem man we i no laekem yu nating.”—Proveb 15:17.
26 Long saed blong fasin blong givim, hem i gud tumas blong givim taem blong yu, paoa blong yu, mo tingting blong yu. Impoten moa, talemaot ol filing we oli stap long hat blong yu. I hadwok long plante man blong mekem samting ya. Samfala oli ting se i krangke nomo mo i no stret sipos man i tok swit mo i soemaot filing blong hem long waef blong hem. Be sipos yu laekem waef blong yu, yu save se wan lukluk blong yu nomo, wan tok blong yu nomo, no wan taj blong yu nomo, i gat bigfala mining long tingting blong hem. Sipos yu neva mekem olsem, bambae woman blong yu i save kam kros, les, mo lusum glad blong hem. Traem folem ol advaes blong Baebol long Sing Blong Solomon. Wan man we hem i soemaot se hem i keagud long ol narafala man mo hem i gat filing long olgeta, hem i harem gud. Ol narafala man oli wantem stap kolosap long man ya. Hem i rere blong soemaot trufala filing blong hem long olgeta we hem i laekem. Ol narafala man we oli kampani wetem yu, oli save kasem gudfala fasin blong yu tu. Mo ol man ya bambae oli givimbak semkaen gudfala fasin long yu.—Sing blong Solomon 1:2, 15; Luk 6:38.
27, 28. (a) ?Hasban i save tingbaot wanem kwestin blong faenemaot sipos hem i hed blong waef blong hem long prapa fasin? (b) ?Blong wanem i gud blong tingting strong long ol samting ya?
27 Hasban, traem askem long yu wan: ?Mi mi hed long waef blong mi olsem wanem? ?I isi long hem blong ona long mi? ?Mi mi laekem hem olsem we mi mi laekem mi wan? no ?mi mi tingbaot ol samting we mi nomo mi wantem mo ol samting we mi nomo mi save harem gud from? ?Mi mi tingbaot ol samting we hem i nidim? ?Taem mi mas mekem wan disisin long famle, mi mi lesin long ol tok blong hem mo ol samting we hem i wantem? ?Mi mi tingbaot ol samting we i gud long hem? ?Mi mi rimemba se hem i no strong olsem mi? ?Mi mi toktok wetem hem, mo talemaot ol filing we i stap long hat blong mi?
28 Yu yu no stret gud olgeta, taswe samtaem bambae yu sot long sam fasin ya. Be sipos yu traehad oltaem mo tingting blong yu i stap daon, samting ya bambae i givhan long yu blong kasem bigfala respek blong waef blong yu. Mo tu, God bambae i glad long yu.
[Tok blong pija long pej 27]
Ol smosmol samting oli gat bigfala mining.