Japta 3
Holemfas Long Tok Blong God
1. (a) ?Olsem wanem Isrel blong bifo i luksave se Tok blong God i tru? (b) ?From wanem yumi intres long samting ya tu?
“YUFALA i save gud long olgeta hat blong yufala mo long olgeta sol blong yufala, we i no gat wan tok long ol gudfala tok we Jeova, God blong yufala i talem, we i mestem. Olgeta oli kamtru blong yufala.” Hemia nao ol tok we Josua i talem long ol olfala man blong Isrel, blong oli rimemba long olgeta, taem oli kasem finis Promes Ples. Be long ol yia we oli kam biaen, oli no gohed oltaem blong tinghae long Tok blong God, mo oli no ona long hem. ?Wanem samting i kamaot from? Baebol i soemaot klia we sem mak nomo we ol promes blong Jeova blong blesem ol man oli tru, hem i mekem tu we ol nogud samting we hem i talemaot, oli kam long olgeta from we oli no obei. (Jos. 23:14-16) Store ya, wetem olgeta haf blong Baebol tu, oli stap kam kasem tede blong tijim yumi—blong “yumi save gat hop” mo blong yumi no gat wan kaen fasin we i mekem yumi lusum hop ya.—Rom 15:4.
2. (a) ?Weswe Baebol “i kamaot long God”? (b) ?From we yumi save samting ya, yumi mas mekem wanem?
2 Nomata we i gat samwe long 40 man we oli wok olsem “sekretari” blong raetem Baebol, Jeova hem wan i stampa blong hem. ?Samting ya i minim we hem wan i lidim fasin ya blong raetem olgeta samting insaed long hem? Yes. Olsem aposol Pol i talem tru, se “Olgeta hanraet oli kamaot long God ya.” From we yumi bilivim samting ya, yumi pulum ol man, nomata wanem ples oli stap long hem, blong oli tingtinggud long Baebol. Yes, oli mas mekem laef blong olgeta i stanap long ol tok blong Baebol, olsem we yumi traem mekem.—2 Tim. 3:16; 1 Tes. 2:13.
?Wanem Samting i Halpem Ol Man Blong Laekem Baebol?
3. ?Wanem ya i nambawan rod blong halpem plante man we oli ting se Baebol i no Tok blong God?
3 I tru we plante man we yumi toktok wetem olgeta, oli no bilif se Baebol i Tok blong God. ?Olsem wanem yumi save halpem olgeta? Plante taem, i gat nambawan rod ya we i blong openem Baebol mo soem sam tok blong hem long ol man ya. “Tok blong God i laef i stap mo paoa blong hem i wok, mo hem i sap moa i bitim wan naef blong faet we i sap long tu saed . . . mo hem i naf blong luksave ol tingting mo ol filing blong hat.” (Hib. 4:12) “Tok blong God” ya i tok blong promes, we i stap long Baebol. Hemia i no wan store we i ded, be hem i laef i stap mo hem i gohed gogo kasem we hem i kamtru. Taem samting ya i kamaot olsem, ol trufala filing we oli stap insaed long hat blong ol man we oli kasem save long Baebol, oli kamaot klia, taem oli karem ol fasin ya we God i wantem. Paoa blong Baebol i bitim enikaen tok we yumi wan wan i save talem.
4. ?Wanem stampa trutok blong Baebol oli mekem sam man oli jenisim tingting blong olgeta long saed blong hem? ?From wanem?
4 Blong plante man, taem oli lukluk nem blong God long Baebol, samting ya i jenisim tingting blong olgeta. Sam narafala oli mekemap maen blong olgeta blong stadi Baebol, from we oli kasem save long ol tok blong hem long saed blong plan blong laef, no from we oli kasem save from wanem God i letem rabis fasin i stap, ol mining blong ol samting we oli stap kamaot tede, no tru hop ya we i stanap long Kingdom blong God. Long ol kantri we ol fasin blong jyos oli mekem ol man oli kasem plante trabol from ol rabis speret, ol tok blong Baebol we oli soemaot stampa blong samting ya mo olsem wanem oli save kam fri from, oli mekem ol man oli intres long hem. ?From wanem oli sek tumas long ol tok ya blong Baebol? From we Baebol nomo i trufala stampa we yumi save trastem, blong faenem ol save ya long saed blong bigfala poen ya.—Sam 119:130.
5. ?Taem wan man i talem se hem i no bilif long Baebol, ating hem i gat wanem risen from? ?Weswe yumi save givhan long hem?
5 ?Be yumi save mekem wanem sipos wan man i talem long yumi se hem i no bilif long Baebol? ?Yumi mas gohed blong toktok wetem hem? Yes, sipos hem i rere blong tingtingud. Yumi mas luksave se yumi gat bigfala wok ya we i blong toktok from Tok blong God. Ating man ya i tingbaot Baebol, se hem i wan buk blong ol jyos ya we oli talem se oli Kristin. From we hem i luk we ol jyos ya oli gat tu fes, oli meksap long politik, mo oltaem oli stap askem mane, maet samting ya i mekem we hem i ting nogud long Baebol. ?Maet yumi save askem long hem sipos i olsem? Ol tokpanis blong Baebol we oli agensem ol rod blong ol jyos we oli talem se oli Kristin, wetem ol poen ya blong soemaot weswe Krisendom i defren tumas long Kristin rod, oli save mekem hem i intres.—Lukluk Matyu 15:7-9; Jemes 4:4; Maeka 3:11, 12.
6. (a) ?Wanem samting i mekem yu yu bilif se Baebol i Tok blong God? (b) ?Yumi save yusum wanem narafala pruf bakegen blong givhan long wan man, blong hem i luksave se Baebol i rili Tok blong God?
6 Blong sam narafala man, i gud blong toktok klia, blong soemaot ol pruf we Baebol i kamaot long God. ?Wanem samting i soemaot klia long yu we Baebol i kamaot long God? ?Ol tok blong Baebol hem wan long saed blong stampa blong hem? (2 Tim. 3:16, 17; Rev. 1:1) ?Maet i gat tu ol profet tok ya blong Baebol we oli soemaot gud save ya we hem i gat long fyuja, from we ol profet tok ya oli save kamaot nomo from wan stampa we i hae moa long man? (2 Pita 1:20, 21; Aesa. 42:9) ?Ating yu sapraes long fasin blong Baebol we i stret gud long ol buk blong hem, nomata we oli raetem ol buk ya long wan taem we i olsem 1610 yia? ?No maet fasin blong Baebol we i stret nomo long sayens, we fasin ya i defren tumas long ol narafala buk bifo blong ol semkaen taem ya? ?No maet fasin blong ol man we oli raetem hem we oli tok tru nomo? ?Ating tu i gat fasin ya blong hem we hem i stanap yet kam kasem tede, nating we oli traehad tumas blong spolem hem long wan rabis fasin? Nomata ol pruf ya we yu yu ting se oli bigwan moa, yu yu mas yusum olgeta blong givhan long ol narafala man.
Prapa Baebol Riding Blong Yumi
7, 8. (a) ?Yumi wan wan i mas mekem wanem wetem Baebol? (b) ?Antap long fasin blong ridim Baebol, yumi nidim wanem? ?Olsem wanem Baebol hem wan i soemaot samting ya? (c) ?Olsem wanem yumi wan wan i kasem klia save long ol plan blong Jeova?
7 Yumi mas givhan long ol narafala blong oli bilif long Baebol, be yumi wan wan tu i mas tekem taem blong ridim Baebol evri dei. ?Yu yu stap mekem olsem? Long olgeta buk we man i wokem, Baebol i buk ya we i impoten moa. I tru we samting ya i no minim se sipos yumi ridim Baebol, yumi no nidim sam narafala samting. Baebol hem wan i wekemap tingting blong yumi agens long fasin ya we i blong stap wan wan nomo, mo blong ting se yumi save kasem mining blong olgeta samting from prapa rod blong yumi blong lukaot ol mining ya. Yumi nidim fasin blong stadi wan wan mo fasin blong kam oltaem long ol miting, sipos yumi wantem kam wan Kristin we i skelem gud olgeta samting.—Prov. 18:1; Hib. 10:24, 25.
8 Blong yumi save kasem sam gud samting from, Baebol i storebaot wan haeman blong Itiopia. Wan enjel i lidim Kristin man ya Filip, wan man blong talemaot gud nyus, taem haeman ya blong Itiopia i stap ridim profet tok blong Aesea. Filip i askem long man ya, se: “?Yu yu save mining blong tok ya we yu stap ridim, no yu no save?” Tingting blong man Itiopia ya i stap daon, hem i ansa se: “?Bambae mi mi save olsem wanem, sipos i no gat man blong talemaot mining blong hem long mi?” Hem i pulum Filip blong hem i talem klia mining blong tok ya. Be, Filip i no wan man blong ridim Baebol hem wan nomo. Hem i no wan man we i givim prapa tingting blong hem long saed blong ol tok ya. Nogat. Store ya i soemaot long yumi we hem i joengud wetem ol aposol blong kongregesen blong Jerusalem, mo hem i wan memba blong ogenaesesen blong Jeova long wol. Taswe hem i save givhan long man Itiopia ya, blong hem i kasem ol tijing we Jeova i givim from ogenaesesen ya. (Wok 6:5, 6; 8:5, 14, 15, 26-35, NTB) Tede i sem mak yet. ?Hu ya long medel blong yumi i kasem klia save long ol plan blong Jeova from ol prapa tingting blong hem? I no gat. Be defren nao, yumi nidim, mo yumi nidim oltaem, rod ya blong givhan we Jeova i givim long yumi from ogenaesesen blong hem long wol.
9. ?Wanem program blong ridim Baebol oli save givhangud long yumi?
9 Ogenaesesen blong Jeova i halpem yumi blong yusum mo kasem save long Baebol. Blong mekem olsem hem i givim sam nambawan tok blong storebaot Baebol long Wajtaoa mo sam narafala buk. Antap bakegen, i gat wan program blong Baebol riding we i laenap long Tiokratik Skul blong kongregesen blong ol Wetnes blong Jeova. Samfala Wetnes blong Jeova oli folem prapa fasin blong olgeta blong ridim Baebol, mo oli folem program ya tu. Yumi save kasem plante gud samting from yumi spenem taem long fasin blong ridim tabu Baebol. (Sam 1:1-3; 19:7, 8) ?Yu yu ridim olgeta tok blong Baebol? Sipos yu yu no mekem yet, yu yu mas traehad from. Nating sipos yu no kasem save long olgeta samting blong Baebol, be bambae yu yu gat wan fasin blong lukluk olgeta store blong hem, long fulhaf blong hem. Hemia wan fasin we i givhangud long man. Sipos yu yu ridim fo no faef pej long wan dei, bambae long wan yia nomo yu save ridim olgeta tok blong Baebol.
10. (a) ?Wetaem yu yu ridim Baebol? (b) ?Blong wanem i impoten blong mekem riding ya oltaem?
10 ?Wetaem yu yu save mekem riding ya? !Sipos yu yu save holem 10 no 15 menet wan dei, samting ya i save givim gudfala blesing long yu! Sipos i no gat rod, be yu mas mekem wan program blong holem sam taem evri wik, mo yu mas ona long program ya. Fasin blong ridim Baebol i mas kam wan kastom blong laef blong yu, olsem we yu gat kastom ya blong kakae evri dei. Yu yu save samting ya finis, se sipos wan man i kakae nogud, bambae hem i harem nogud. I sem mak nomo long saed blong fasin blong speret blong yumi. Laef blong yumi i stanap long fasin blong kasem kakae from “evri tok we oli kamaot long maot blong Jeova.”—Mat. 4:4.
11. ?Yumi mas gat wanem plan taem yumi ridim Baebol?
11 ?Yumi mas gat wanem plan taem yumi ridim Baebol? Sipos wan man i ridim Baebol blong kavremap sam namba blong ol pej nomo, no blong kasem itenel laef, hemia wan mastik nomo. Blong kasem sam blesing foreva, yumi mas gat sam tingting we oli hae moa—lav blong God, fasin blong wantem kasem moa save long hem, mo fasin blong kasem save long wil blong hem mo blong mekem wosip long hem long fasin we i stret. (Jon 5:39-42) Yumi mas gat sem fasin ya blong man ya we i raetem Sam, hem i talem se: “Yu yu mas mekem mi mi save ol prapa rod blong yu, O Jeova; yu yu mas tijim mi long ol rod blong yu.”—Sam 25:4.
12. (a) ?From wanem i impoten blong kasem “stret save”? ?Yumi mas traehad olsem wanem blong kasem “stret save” ya? (b) ?Olsem pej 23 i soemaot, wanem poen oli save givhan long yumi blong tingtinggud, taem yumi ridim Baebol? (c) Yu yu save soemaot weswe ol faef poen ya oli wok, yu tekem wan poen wan taem, mo yu ansa long ol kwestin we oli stap long en blong haf ya. Yu yu mas yusum Baebol blong yu.
12 Taem yumi kasem tijing ya, yumi mas wantem kasem “stret save.” ?Sipos yumi no gat save ya, weswe yumi save ona stret long Tok blong God long prapa laef blong yumi, no yumi save talem mining blong hem long ol narafala? (Kol. 3:10; 2 Tim 2:15) Blong kasem stret save, yumi mas ridim gud. Sipos haf ya we yumi ridim i dip, maet yumi mas ridim sam taem moa, blong kasem mining blong hem. I gud tu blong yumi tekem taem blong tingtinggud long ol samting we yumi ridim, blong tingbaot ol haf ya long ol defren kaen fasin blong hem. Long pej 23, yumi faenem faef rod blong tingtinggud long ol samting we yumi ridim. Yumi save luklukgud long plante haf blong Baebol mo yumi save yusum wan no olgeta blong ol faef rod ya. Taem yu yu ansa long ol kwestin ya biaen, bambae yu luk olsem wanem rod ya i wok.
(1) Plante taem haf ya blong Baebol we yumi ridim, i givim sam save long yumi long saed blong ol gudgudfala fasin blong Jeova.
?Taem yumi tingtinggud long ol tok blong Baebol long saed blong ol wok we Jeova i mekem, samting ya i gat paoa long yumi olsem wanem? (Sam 139:13, 14; long Job japta 38-42, yu yu save makem 38:1, 2 mo 40:2, 8, mo 42:1-6.)
?Stret long ol tok ya blong Jisas long Jon 14:9, 10, yumi lanem wanem long saed blong Jeova, from ol store ya olsem we yumi ridim long Luk 5:12, 13?
(2) Tingbaot olsem wanem store ya i laenap long stampa tok blong Baebol, se: Mekem nem blong Jeova i stret from Kingdom blong Jisas Kraes, we i Promes Laen.
?Olsem wanem ol trabol we Ijip i kasem oli joen long stampa tok ya? (Lukluk Eksodas 5:2; 9:16; 12:12.)
?Weswe nao long saed blong gudfala store ya blong Rut, wan woman Moab? (Rut 4:13-17; Matyu 1:1, 5)
?Olsem wanem ol tok blong Gabriel long Meri, taem hem i talem se bambae Jisas i bon, oli laenap long stampa tok ya tu? (Luk 1:26-33)
?From wanem fasin ya we tabu speret i makemaot ol disaepol blong Jisas long Pentekos, i gat bigfala mining? (Wok 2:1-4; 1 Pita 2:4, 5, 9; 2 Pita 1:10, 11)
(3) Ol vas raonabaot long wan tok oli givim mining blong hem.
?Ol tok blong Rom 5:1 mo 8:16 oli go stret long hu? (Lukluk Rom 1:7.)
?Ol vas raonabaot long 1 Korin 2:9, oli soemaot we hem i stap tokbaot laef long wol long nyu fasin blong God? ?Olsem ol vas 6-8 oli soemaot, ol ae ya mo ol sora ya we oli no kasem save long ol samting ya we Pol i raetem, oli blong hu?
(4) Yu yu mas askem long yu olsem wanem yu wan yu save ona long ol samting ya we yu ridim.
?Store ya blong fasin we Ken i kilim Ebel i ded, i wan store blong histri nomo, no i stap givim advaes long yumi? (Jenesis 4:3-12; 1 Jon 3:10-15; Hibrus 11:4)
?Taem yumi ridim (long Eksodas kasem Duteronome) ol store blong Isrel long draeples, yumi save kasem wanem gud samting blong yumi wan wan? (1 Korin 10:6-11)
?Ol advaes we ol Kristin ya we speret i makemaot olgeta, oli kasem, oli stret tu long ol man ya we oli gat hop blong kasem itenel laef long wol? (Lukluk Namba 15:16; Jon 10:16.)
?Nating sipos yumi gat wan gud ples long Kristin kongregesen yumi mas tingtinggud long fasin blong yumi we yumi save gohed moa blong ona long ol advaes we yumi save finis? (2 Korin 13:5; 1 Tes 4:1)
(5) Yu yu mas tingtinggud long fasin ya we bambae yu yu save yusum ol samting ya we yu ridim, blong givhan long ol narafala.
?Yumi save givhan long hu ya from store blong gel blong Jaeras we hem i laef bakegen? (Luk 8:41, 42, 49-56)
13. ?Yumi save kasem wanem gud frut, sipos yumi gohed nomo long program blong ridim Baebol, mo blong stadi wetem ogenaesesen blong Jeova?
13 !Fasin blong ridim Baebol i gat tumas praes taem yumi folem rod ya! Tru ya, Baebol riding i wan had wok—hemia wan plan ya we yumi save wok long hem blong kasem frut long ful laef blong yumi. Be taem yumi mekem olsem, bambae yumi gru long speret. Bambae hemia i pulum yumi, blong yumi stap kolosap moa long Papa blong yumi, Jeova, mo long ol Kristin brata blong yumi. Bambae samting ya i givhan long yumi blong ona long advaes ya we i blong “holemfas long tok blong laef.”—Filipae 2:16.
Tingtingbak
● ?From wanem oli raetem Baebol? ?From wanem Baebol i stap kam kasem yumi?
● ?Olsem wanem yumi save givhan long ol narafala blong oli laekem Baebol?
● ?From wanem yumi kasem gud samting sipos yumi ridim Baebol evri dei? ?Wanem faef rod we yumi save yusum blong kasem gud samting from riding ya?
[Bokis blong pija long pej 24]
Taem Yu Yu Ridim Baebol Yu Mas Tingbaot—
Haf ya we yu yu ridim i lanem wanem long yu long ol gudgudfala fasin blong Jeova
Olsem wanem hem i laenap long stampa tok blong Baebol
Olsem wanem ol vas raonaboat long hem oli givim mining blong hem
Olsem wanem riding ya i gat paoa long prapa laef blong yu
Olsem wanem yu yu save yusum haf ya blong givhan long ol narafala