Japta 15

?Olsem Wanem Jeova i Stap Lidim Ogenaesesen Blong Hem?

1. ?Baebol i talem wanem long saed blong ogenaesesen blong Jeova? ?From wanem samting ya i impoten blong yumi?

LONG Baebol, Jeova i soemaot long yumi nambawan ogenaesesen blong hem long heven. (Aes. 6:2, 3; Esi 1:1, 4-28; Da. 7:9, 10, 13, 14) Nating we yumi no save luk ol speret man, hem i wekemap tingting blong yumi long ol defren rod we ol tabu enjel oli wok, mo olsem wanem wok ya i gat paoa long ol stret man we oli mekem wosip. (Jen. 28:12, 13; 2 King 6:15-17; Sam 34:7; Mat. 13:41, 42; 25:31, 32) Mo tu, Baebol i soemaot haf blong ogenaesesen blong Jeova we yumi save luk. Hem i halpem yumi blong kasem save olsem wanem God i stap lidim ogenaesesen ya. Sipos yumi rili luksave ol samting ya, bambae hemia i halpem yumi blong “wokbaot i stret nomo long fasin blong Jeova, blong mekem hem i glad tumas long yumi.”—Kol. 1:9, 10.

Yumi Makem Haf Blong Ogenaesesen We i Stap Long Wol

2. ?I stat long Pentekos blong 33 K.T., hu ya i kongregesen blong God?

² Long 1,545 yia, nesen blong Isrel i kongregesen blong God. Be oli no holemstrong long kontrak blong loa, mo oli sakemaot prapa Pikinini blong God. Taswe Jeova i mekem wan nyufala kongregesen i bon. Hem i wokem wan nyufala kontrak wetem hem. Baebol i soemaot we kongregesen ya i “woman” blong Kraes. Hem i gat 144,000 man we God i jusum blong oli joen wetem Pikinini blong hem long heven. (Efes. 5:22-32; Rev. 14:1; 21:9, 10) Long Pentekos blong yia 33 K.T., tabu speret i makemaot ol faswan memba blong kongregesen ya. From tabu speret blong hem, Jeova i givim klia pruf we hem i yusum kongregesen ya blong mekem plan blong hem i kamtru.—Hib. 2:2-4.

3. ?Hu ya i ogenaesesen blong Jeova we yumi save luk tede?

³ Tede i gat wan smol haf nomo blong ol 144,000 we i stap yet long wol. Be, olsem wan profet tok blong Baebol i talemaot finis, wan bigfala kampani blong “ol narafala sipsip” i joen wetem olgeta. Jisas Kraes, Gudfala Gad, i mekem “ol narafala sipsip” oli kam wanples wetem olgeta memba blong smol haf blong ol Kristin we tabu speret i makemaot. Taswe naoia oli olsem “wan kampani nomo” aninit long “wan gad nomo.” (Jon 10:11, 16; Rev. 7:9, 10) Hemia wan ogenaesesen we i gat yuniti. Tede, yumi save luk ogenaesesen ya blong Jeova.

Ol Tiokratik Rod

4. ?Hu ya i stap lidim ogenaesesen? ?Mo olsem wanem?

⁴ From we Baebol i kolem hem “kongregesen blong God we i laef i stap,” hemia i soemaot klia hu ya i stap lidim hem. Ogenaesesen ya i tiokratik, i min se God i rulum hem. Jeova i putumap wan man blong lidim kongregesen ya. Hemia man ya we i hed blong kongregesen we yumi no save luk, Masta Jisas Kraes. God i yusum prapa Tok blong hem tu, Baebol, blong lidim kongregesen ya.—1 Tim. 3:14, 15; Efes. 1:22, 23; 2 Tim. 3:16, 17.

5. (a) ?Olsem wanem i klia nomo long faswan handred yia, we i gat man long heven we i lidim kongregesen? (b) ?Wanem samting i soemaot we Jisas i hed yet blong kongregesen?

⁵ I klia nomo we tiokratik rod ya i lidim ol faswan memba blong kongregesen, from we tabu speret i wekemap olgeta long Pentekos blong yia 33 K.T. (Wok 2:1-4, 32, 33) Hemia i klia bakegen taem enjel blong Jeova i lidim ol samting oli hapen, blong mekem gud nyus i gohed i kasem Afrika. (Wok 8:26-39) Sem mak nao, samting ya i klia bakegen taem voes blong Jisas i lidim Sol blong Tasas i kam Kristin, mo taem misinari wok i stat long medel blong ol hiten man. (Wok 9:3-7, 10-17; 10:9-16, 19-23; 11:12) Be i no oltaem we ol tok blong lidim kongregesen oli kamtru long ol spesel fasin ya. Biaen, i no moa gat voes blong heven, i no moa gat enjel we oli kamtru long ol man, mo i no moa gat spesel paoa we i kamaot from speret. Be Jisas i mekem promes ya long ol stret man blong hem, se: “!Luk! Mi mi stap wetem yufala long olgeta dei, gogo kasem lastaem blong fasin ya blong wol.” Ol samting we oli hapen oli soemaot we hem i stap ya. (Mat. 28:20; 1 Kor. 13:8) Ol Wetnes blong Jeova oli agri we Jisas i hed blong kongregesen. Yes, i klia nomo we oli no save gohed blong talemaot Kingdom mesej long ol bigfala hadtaem ya, sipos Jisas i no givhan long olgeta.

6. (a) ?Hu ya “slef we i stret mo waes”? ?From wanem? (b) ?“Slef ya” i kasem wanem wok?

⁶ I no longtaem bifo hem i ded, Jisas i tokbaot “wan slef we i stret mo waes.” Hem i Masta ya we i mas putumap “slef” ya long sam spesel responsabiliti. Jisas i soemaot we “slef ya” i stanap finis taem Masta blong hem i go long heven. Mo hem i mas laef yet taem Kraes i kambak. I no gat man we i save mekem olsem. Be hemia i stret nomo long kongregesen blong Kraes we tabu speret i makemaot, we i olsem wan kampani nomo. Jisas i save se hem i mas pemaot olgeta wetem prapa blad blong hem, taswe i stret nomo we hem i tokbaot olgeta olsem oli wan “slef” blong hem. Hem i givim wok long olgeta. Hemia i wan oda blong oli mekem disaepol mo oli givim kakae long olgeta. Oli mas givim “kakae ya long prapa taem blong hem.” Tabu speret we i kamdaon long olgeta long Pentekos long yia 33 K.T., i soemaot gud we Jisas i putumap olgeta long wok ya.—Mat. 24:45-47; 28:19, 20; 1 Kor. 6:19, 20; lukluk Aesea 43:10.

7. (a) ?“Slef ya” i kasem wanem bigfala wok bakegen? (b) ?Olsem wanem long yumi, taem yumi kasem ol tijing ya from slef ya?

⁷ Taem Masta i kambak, sipos “slef ya” i stap mekem gud wok blong hem, hem i save kasem sam narafala bigfala wok. Ol yia we oli kamaot biaen, oli stret blong talemaot Kingdom long olgeta ples blong wol. Nao wan “bigfala kampani” blong ol man blong wosip long Jeova i mas hivap, blong bambae hem i sef long “bigfala trabol.” (Mat. 24:14; Rev. 7:9, 10) Olgeta ya tu oli nidim kakae blong speret. Taswe “slef ya,” ol man blong Kraes we tabu speret i makemaot, i mas givim kakae long olgeta. Sipos yumi wantem we Jeova i glad long yumi, yumi mas agri long ol tijing we hem i givim from rod ya, mo yumi mas ona long olgeta tu.

8, 9. (a) ?Long faswan handred yia, i gat wanem rod blong winim ol kaen kwestin long saed blong ol tijing mo ol advaes blong ogenaesesen blong talemaot gud nyus? (b) ?I gat wanem semkaen samting tede?

⁸ Samtaem, i gat kwestin long saed blong ol tijing no ol fasin blong ogenaesesen. ?Olsem wanem nao? Ol Wok Blong Ol Aposol japta 15 i talem long yumi olsem wanem oli winim wan kwestin long saed blong ol hiten man we oli jes kam Kristin. Bisnes ya i kam long fes blong ol aposol mo ol elda blong Jerusalem, we oli wok olsem wan hed kampani. Ol elda ya oli no man we i stretgud olgeta, oli man we oli save mekem mastik tu. (Lukluk Galesia 2:11-14.) Be God i yusum olgeta. Oli tingbaot ol samting we Baebol i talem long bisnes ya, mo ol pruf we tabu speret i openem wok blong prij long ol hiten man. Nao biaen oli mekem disisin. God i blesem rod ya. (Wok 15:1-29; 16:4, 5) Hed kampani ya i sanem sam man tu oli go talemaot gud nyus long naraples, i stret nomo long oda ya we Masta hem wan i givim raet long hem.—Wok 8:14; Gal. 2:9.

⁹ Tede, long Hed Kampani, i gat ol brata we tabu speret i makemaot. Oli kamaot long defren kantri. Hem i stap long hedkwota blong Ol Wetnes blong Jeova. Oli holemfas long stretfasin, mo oli lukaot long olting blong klin wosip we i stap aninit long Hed, Jisas Kraes. Ol brata ya oli gat semkaen tingting olsem aposol Pol. Taem hem i sanem sam advaes long ol Kristin brata blong hem, hem i talem se: “Yumi no masta long bilif blong yufala, be yumi man blong wok wetem yufala long glad blong yufala, from we yufala i stanap from bilif blong yufala.”—2 Kor. 1:24.

10. (a) ?Olsem wanem oli luksave hu ya i save kam elda no man blong givhan? (b) ?From wanem yumi mas wok gud tugeta wetem ol man we oli gat wok insaed long kongregesen?

¹⁰ Long olgeta ples blong wol, Ol Wetnes blong Jeova oli agri long tiokratik rod ya. Ol defren lokol kongregesen oli wokgud tugeta wetem rod ya. Oli letem Hed Kampani i putumap ol elda mo ol man blong givhan blong lukaot long wok blong ol kongregesen. ?Olsem wanem oli jusum ol man ya blong putumap olgeta long kongregesen? Oli mas gat ol gudgudfala fasin we Baebol i talem klia. Ol elda we oli talem se wan man i mas kasem wok, mo olgeta we oli gat paoa blong putumap man ya, oli gat wan bigfala responsabiliti long fes blong God. Oli mas holemstrong long ol fasin we Baebol i talem. (1 Tim. 3:1-10, 12, 13; 5:22; Taet.1:5-9) I no gat eleksen, i no gat vot long kongregesen. Be defren nao, stret nomo long ol samting we ol aposol oli mekem taem oli putumap sam man long faswan handred yia, fastaem, ol man blong lukaot long kongregesen mo biaen olgeta we oli putumap ol man ya, oli prea long God blong kasem tabu speret blong hem. Oli lukaot long God blong i lidim olgeta from Tok blong Hem. (Wok 6:2-4, 6; 14:23; lukluk Sam 75:6, 7.) Fasin blong yumi blong ona long ol tok we ol elda oli talem, i soemaot sipos yumi gat tangkyu long Kraes we i mekem “presen blong ol man ya.” Hemia i halpem yumi blong kasem “wan bilif nomo.”—Efes. 4:8, 11-16.

11. (a) ?Ol woman oli mekem wanem kaen wok insaed long tiokratik rod blong ogenaesesen? (b) ?Wetaem oli mas karem wan samting blong kavremap hed blong olgeta?

¹¹ Baebol i soemaot we ol man nomo oli save lukaot long kongregesen. Be samting ya i no blong daonem ol woman. I gat plante woman we oli kasem Kingdom long heven. From we oli gat fasin we i no bitim mak, i klingud, mo oli wok strong long ol famle blong olgeta, ol Kristin woman oli mekem kongregesen i gat gudnem. (Taet. 2:3-5) Plante taem oli mekem gud wok blong faenem ol nyuwan we oli intres long trutok, mo blong karem olgeta oli kam long ogenaesesen. (Sam 68:11) Be ol man nomo oli save gat wok blong tijim kongregesen. (1 Tim. 2:12, 13) Sipos i no gat man we i naf blong mekem wan miting long kongregesen, nao wan woman we i werem wan kaliko blong kavremap hed blong hem, i save kam jeaman blong miting ya mo hem i save mekem prea.a Olsem ya nao, hem i soemaot we hem i gat respek long rod blong Jeova, olsem Jisas we i soemaot rod long olgeta Kristin, from we hem i onagud long Papa blong hem.—1 Korin 11:3-16; Jon 8:28, 29.

12. (a) ?Olsem wanem Baebol i wekemap tingting blong ol elda long saed blong ples blong olgeta? (b) ? Yumi evriwan i joengud long wanem bigfala samting?

¹² Long wol tede, ol man oli tingting tumas long man we i gat haeples. Be long saed blong ogenaesesen blong Jeova, i gat rul ya: “Long medel blong yufala, hemia we i gat fasin blong wan smol wan, hem nao i bigwan.” (Luk 9:46-48; 22:24-26) From samting ya, Baebol i givim advaes long ol elda blong oli lukaotgud blong no kam olsem masta blong olgeta Kristin we oli blong God. Oli mas kam man we i soemaot rod long kampani blong ol brata. (1 Pita 5:2, 3) I no gat sam man nomo, be olgeta Wetnes blong Jeova, ol man mo ol woman, oli kasem bigfala presen blong karem nem blong Hae Rula blong heven mo wol. Tingting blong olgeta i stap daon blong tokbaot nem blong hem mo blong talemaot Kingdom long ol narafala man.

13. Yufala i save yusum ol vas ya, mo yufala i save tokbaot ol kwestin we oli stap long en blong haf ya.

¹³ Yumi save askem long yumi, se: “?Yumi rili luksave olsem wanem Jeova i stap lidim ogenaesesen blong hem long wol? ?Ol fasin blong yumi, ol toktok blong yumi, mo ol wok blong yumi oli soemaot samting ya?” Sipos yumi tingbaot ol poen ya biaen, hemia i save halpem yumi blong jekemap fasin blong yumi wanwan:

?Sipos yumi rili ona long Kraes we i hed blong kongregesen, ol vas ya oli soemaot we yumi mas mekem wanem? (Mat. 24:14; 28:19, 20, Luk 21:34-36; Jon 13:34, 35)

?Taem oli traehad blong karem ol Kristin frut, olsem wanem ol memba blong ogenaesesen oli mas stanap long God mo Kraes? (Jon 15:5; 1 Kor. 3:5-7)

?Taem ol elda oli traem stretem tingting blong sam man, blong oli gat semkaen lukluk blong ogenaesesen, yumi luksave se olgeta oli wari gud long yumi olsem wanem? (Efes. 4:7, 8, 11-13; 2 Kor. 13:11)

?Taem yumi glad blong kasem ol gud samting blong speret we “slef” mo Hed Kampani blong hem i stap givim, yumi stap gat respek long hu? ?Be olsem wanem nao sipos yumi toktok konkon long samting ya? (Luk 10:16; lukluk 3 Jon 9, 10.)

?From wanem yumi no mas tok strong agens long ol elda? (Wok 20:28; Rom 12:10)

14. (a) ?Fasin blong yumi long tiokratik rod i soemaot wanem? (b) ?Long saed blong samting ya, olsem wanem yumi gat jans blong soemaot we Setan i gyaman, mo yumi save mekem hat blong Jeova i glad?

¹⁴ Tede, Jeova i stap lukaotgud long yumi from ogenaesesen blong hem, we Kraes i hed blong hem. Taswe fasin blong yumi long ogenaesesen ya i soemaot we yumi stanap long wanem saed blong bigfala poen we i ripotem Hae Rul blong God. (Hib. 13:17) Setan i gyaman se yumi olgeta i folem prapa tingting blong yumi wanwan nomo. Be sipos yumi glad blong mekem enikaen wok, sipos yumi blokem ol tok mo ol wok we oli pulum ol man oli tingting tumas long yumi, yumi stap soemaot we Devel i gyaman nomo. Sipos yumi gat lav mo yumi gat respek long olgeta ‘we oli lidim’ yumi, sipos yumi folem rod blong bilif blong olgeta, from we yumi no wantem kam olsem man we “oli lukluk swit long sam bigman blong winim sam samting from,” bambae yumi mekem hat blong Jeova i glad. (Hib. 13:7; Jud 16) Taem yumi gat gudfala respek long ogenaesesen blong Jeova, mo yumi mekem wok blong hem long olgeta hat blong yumi, yumi soemaot we Jeova i rili God blong yumi mo yumi stap joen tugeta long wosip blong hem.—1 Kor. 15:58.

[Futnot]

Tingtingbak

● ?Wanem ogenaesesen blong Jeova, we yumi save luk tede long wol? ?Wanem plan blong hem?

● ?Hu ya i hed blong kongregesen? ?Hem i stap yusum wanem rod blong lukaotgud long yumi?

● ?Yumi mas gat wanem gudfala tingting long saed blong ol responsabiliti long ogenaesesen? ?Mo olsem wanem long fasin blong yumi long ol man we oli gat responsabiliti ya long kongregesen?