Japta 22

Yu Yu No Fraet Blong Gohed Blong Talemaot Tok Blong God

1. (a) ?I stat long dei blong Pentekos 33 K.T., ol disaepol blong Jisas oli talemaot wanem gud nyus? ?Be ol haeman blong ol man Jyu oli mekem wanem? (b) ?Yumi mas tingbaot wanem kwestin nao?

LONG taem blong ol aposol sam bigfala samting oli kamaot, i winim olgeta samting we oli bin kamaot long 4,000 yia bifo. God i makemaot prapa Pikinini blong hem, Jisas Kraes, blong i kam King we i rulum olgeta ples blong wol. Sam man blong jyos oli enemi blong Jisas mo oli pulum sam narafala man oli kilim hem i ded. Be Jeova i mekem Pikinini blong hem i laef bakegen. Long rod blong Kraes, God i sevem ol man blong oli save kasem laef we i no save finis. Be taem ol disaepol blong Jisas oli talemaot gud nyus long ol open ples, sam man oli mekem tumas trabol long olgeta. Fastaem, oli putum tu aposol long kalabus mo biaen oli holem olgeta aposol. Oli wipim olgeta mo oli tok strong blong blokem olgeta oli no moa talemaot gud nyus long nem blong Jisas. (Wok 4:1-3, 17; 5:17, 18, 40) ?Oraet nao, ol aposol oli mekem wanem? ?Sipos yu yu stap wetem olgeta, yu yu mekem wanem? ?Yu yu no fraet blong gohed blong talemaot Tok blong God?

2. (a) ?Yumi mas talemaot wanem nyus we oli gudfala moa? (b) ?Hu ya i gat wok blong talemaot ol tok ya?

² Long yia 1914 K.T., wan bigfala samting i kamaot. Kingdom blong God we i stap long han blong Jisas Kraes i stanap long heven. Nao oli sakem Setan mo ol devel blong hem oli kamdaon long wol. (Rev. 12:1-5, 7-12) “Ol lasdei” blong rabis fasin blong wol ya oli stat long yia ya. Ol man we oli lukluk ol samting blong 1914, bambae oli no ded evriwan taem God i finisim rabis fasin blong wol blong Setan. (Mat. 24:34) Bambae ol man we oli laef yet long taem ya, oli save kasem laef we i no save finis. Bambae olgeta ples blong wol i kam wan Paradaes, i stret nomo long plan blong God fastaem. Sipos yu yu bilif finis long samting ya, yu yu gat wan wok blong mekem: Yu yu mas talemaot gud nyus ya long ol narafala man. (Mat. 24:14) ?Be bambae ol man oli lesin olsem wanem?

3. (a) ?Taem yumi talemaot gud nyus blong Kingdom, sam man oli mekem wanem? (b) ?Yumi mas tingbaot wanem kwestin nao?

³ Maet sam man oli save mekem welkam long yu from we yu yu man blong talemaot Kingdom. Be plante oli no wantem harem. (Mat. 24:37-39) Sam narafala oli save jikim yu no maet oli save agensem yu bigwan. Jisas i talem finis we sam prapa famle blong yu oli save kam badfren blong yu. (Luk 21:16-19) Maet bambae samfala oli mekem trabol long yu long ples blong wok no long skul blong yu. Long plante kantri blong wol, sam gavman oli blokem wok blong ol Wetnes blong Jeova. Hemia i no stret. Taem samkaen trabol olsem oli kamaot, no sipos olgeta evriwan oli kasem yu wantaem, ?bambae yu yu no fraet blong gohed blong talemaot Tok blong God?

4. ?I naf we yumi stanap strong naoia blong bambae yumi gohed blong mekem wok blong God?

⁴ Tru ya, yu yu wantem mekem wok blong God. Yu yu no wantem fraet long wok ya. Be sam brata we oli ting se i no gat wan samting nating we i save blokem olgeta, oli lego wok blong talemaot Kingdom. Nao sam narafala, nomata we oli man we oli sem lelebet, oli gohed yet blong wok strong olsem man blong God, oli no lego. ?Yu yu save “stanap strong long bilif” olsem wanem?—1 Kor. 16:13.

No Stanap Long Prapa Strong Blong Yu Wan Nomo

5. (a) ?Wanem nambawan samting yumi mas mekem blong yumi gohed gud long wok blong God? (b) ?From wanem ol miting oli bigfala samting?

⁵ Ol man blong God oli mas mekem plante samting blong holemstrong long wok blong Jeova. Be hemia nao stampa samting long bisnes ya: Oli mas trastem Jeova mo ol samting we hem i mekem blong givhan long olgeta. ?Olsem wanem yu yu save trastem ol samting ya? Hemia nao wan rod: Yu yu mas kam long olgeta miting blong kongregesen. Baebol i talem long yumi se yumi no mas lego ol miting ya. (Hib. 10:23-25) Plante wetnes blong Jeova oli gohed nomo blong talemaot gud nyus, nating we sam man oli les blong harem tok blong Kingdom no maet oli mekem trabol long olgeta. Yes, oli gohed nomo from we oli strong blong kam oltaem long ol miting. Oli wantem joen wanples wetem ol brata blong olgeta. Taem yumi go long miting, yumi kasem moa save long Baebol. Be yumi no mas ting nomo se bambae yumi kasem ol nyufala samting oltaem. Nogat. (Lukluk Wok 17:21.) Long ol miting ya, yumi save laekem moa ol trutok we yumi lanem finis mo oli wekemap tingting blong luksave olsem wanem yumi save yusum ol trutok ya long laef blong yumi. Hat mo tingting blong yumi i save haremgud moa long gudfala rod ya we Jisas i soemaot long yumi. (Efes. 4:20-24) Long ol miting ya, yumi stap kolosap moa long ol brata blong yumi mo yumi joen tugeta long wosip blong Trufala God. Oli save mekem yumi wanwan i kam strong moa blong gohed long ol samting we God i wantem. Speret blong Jeova i lidim yumi from kongregesen. Taem yumi mekem miting long nem blong Jisas, i olsem we hem nomo i stap wetem yumi.—Rev. 3:6; Mat. 18:20.

6. ?Long ol kantri we oli blokem wok blong ol Wetnes blong Jeova, oli mekem ol miting olsem wanem?

⁶ ?Olsem wanem? Yu yu kam long olgeta miting? ?Yu yu ona long ol tok we yu yu harem long ol miting ya? Samtaem gavman i blokem wok blong yumi, mo ol brata oli mas mekem miting long haos blong sam narafala brata, mo oli mekem miting long ol smolsmol grup nomo. Oli save jenjenisim oltaem haoa mo ples blong miting, mo samtaem i hadwok long olgeta from we oli mas mekem miting let long naet. Be nating we oli hadwok, no oli save kasem trabol from, ol brata mo sista blong yumi oli holemstrong long Jeova mo oli traehad blong kam long evri miting.

7. (a) ?Yumi save mekem wanem blong soemaot we yumi trastem Jeova? (b) ?Olsem wanem samting ya i save givhan long yumi blong yumi no fraet blong talemaot gud nyus?

⁷ Sipos yumi trastem Jeova, oltaem bambae yumi prea long hem. Yumi no save mekem prea olbaot; be yumi mas bilif tru we Hem i save halpem yumi. ?Yu yu stap mekem olsem? Taem Jisas i stap mekem wok blong hem long wol, oltaem hem i mekem prea. (Luk 3:21; 6:12, 13; 9:18, 28; 11:1; 22:39-44) Long sava ya bifo oli holem hem blong kilim hem i ded, hem i talem long ol disaepol blong hem, se: “Yufala i mas lukaotgud, yufala i mas prea, blong bambae ol samting blong traem yufala, oli no mekem yufala i foldaon.” (Mak 14:38, NTB) Sipos ol man oli no wantem harem gud nyus, ating yumi save kam slak lelebet long wok ya. Sipos ol man oli jikim yumi, no oli mekem nogud long yumi, ating yumi save ting se i moa gud yumi satap blong no kasem trabol. Be sipos yumi preagud long God blong kasem speret blong hem, bambae yumi no foldaon. Bambae speret ya i givhan long yumi blong gohed nomo blong talemaot Tok blong God.—Luk 11:13; Efes. 6:18, 20.

Oli No Fraet Blong Talemaot Gud Nyus

8. (a) ?From wanem i gud blong tingbaot store blong Ol Wok Blong Ol Aposol? (b) Ansa long ol kwestin we oli stap long haf ya mo soemaot olsem wanem ol tok ya oli save givhan long yumi.

⁸ Store blong “Ol Wok Blong Ol Aposol” i save halpem yumi evriwan. Hem i storebaot ol aposol mo sam narafala Kristin blong faswan handred yia. Hemia sam man we oli gat semkaen filing olsem yumi. Buk ya i soemaot olsem wanem oli winim sam trabol mo oli no fraet. Oli stret Wetnes blong Jeova. I gud nao we yu yu ridim wan haf blong store ya. Nao yu yu save yusum ol kwestin mo ol vas we oli stap biaen. Taem yu yu mekem olsem, yu yu mas tingtinggud olsem wanem ol tok ya we yu yu stap ridim oli save givhan long yu.

?Ol aposol ya oli go long ol haeskul no nogat? ?Wanem fasin blong olgeta? ?Oli man we oli no fraet, nomata wanem samting i save hapen? (Wok 4:13; Jon 18:17, 25-27; 20:19)

?Taem Pita i stap long fes blong sem kot ya we i bin panisim Jisas i ded sam dei bifo, olsem wanem hem i no fraet blong talemaot ol tok ya long fes blong olgeta? (Wok 4:8; Mat. 10:19, 20)

?Long ol wik fastaem we oli pas long kot blong Sanhedrin [hae kot blong ol man Jyu], ol aposol oli bin mekem wanem? (Wok 1:14; 2:1-42)

?Taem ol haeman ya oli blokem Pita mo Jon blong oli no moa talemaot nem blong Jisas, tufala i ansa olsem wanem long olgeta? (Wok 4:19, 20)

?Taem oli livim kot ya, oli tingbaot hu bakegen we i save givhan long olgeta? ?Oli singaot i go long hem blong finisim ol trabol ya, no olsem wanem? (Wok 4:24-31)

?Taem ol enemi blong olgeta oli wantem blokem wok blong talemaot gud nyus, Jeova i givhan long ol aposol olsem wanem? (Wok 5:17, 20, 33-40)

?Olsem wanem ol aposol oli soemaot we oli kasem save from wanem Jeova i letem olgeta oli go fri? (Wok 5:21, 41, 42)

?Taem ol enemi oli mekem tumas trabol long ol Kristin, mo olgeta ya oli mas ronwe olbaot, oli gohed nomo blong mekem wanem? (Wok 8:3, 4; 11:19-21)

9. (a) ?Ol disaepol blong faswan handred yia oli kasem wanem frut long wok blong talemaot gud nyus? (b) ?Olsem wanem long yumi long saed blong wok ya?

⁹ Taem oli talemaot gud nyus, oli no wok blong nating. I gat samwe long 3,000 disaepol we oli baptaes long dei blong Pentekos 33 K.T. “Mo oltaem, Hae God i stap joenem plante man moa long kampani blong olgeta, ol man mo woman we oli stap bilif long Jisas.” (Wok 2:41; 4:4; 5:14, NTB) Fastaem Sol blong Tasas i enemi blong ol Kristin, be biaen hem i kam Kristin. Nao hem wan i no fraet blong talemaot ol trutok. Biaen oli kolem hem aposol Pol. (Gal. 1:22-24) Wok ya we i stat long taem blong ol aposol i gohed yet. Nao long “ol lasdei,” wok ya i kam bigfala i kasem olgeta ples blong wol. Yumi save joen long wok ya, mo yumi save folem gudfala rod blong ol stret wetnes ya bifo.

10. (a) ?Pol i talemaot gud nyus long wanem rod? (b) ?Yu tu yu save yusum wanem rod blong talemaot gud nyus?

¹⁰ Taem Pol i lanem ol trutok long saed blong Jisas Kraes, hem i no westem taem blong hem. “Mo semtaem nomo, hem i stap go insaed long ol haos blong prea blong ol man Isrel, i stap prij, i se ‘Jisas ya, hem i Pikinini blong God.’ ” (Wok 9:20, NTB) Hem i tangkyu tumas long God we i gat gladhat long hem, mo hem i luksave se ol narafala man tu oli nidim gud nyus ya we hem i kasem finis. Pol i wan man Jyu, mo ol man Jyu long taem ya oli gat kastom ya blong mekem pablik miting long haos prea blong olgeta. Olsem nao, Pol tu i go long haos prea blong talemaot gud nyus. Hem i go prij long evri haos wanwan, mo hem i toktokgud wetem ol man long ol ples blong maket. Hem i rere blong go long ol nyufala ples blong talemaot gud nyus long ol man.—Wok 17:17; 20:20; Rom 15:23, 24.

11. (a) ?Olsem wanem Pol i soemaot we hem i gat waes blong luksave ol samting, nating we hem i no fraet blong talemaot gud nyus? (b) ?Olsem wanem yumi save folem fasin blong Pol taem yumi talemaot gud nyus long ol famle blong yumi, ol fren long wok no skul blong yumi?

¹¹ Pol i no fraet blong talemaot gud nyus, be hem i gat waes blong luksave ol samting raonabaot long hem. Yumi tu i mas mekem olsem. Taem Pol i talemaot gud nyus long ol man Jyu, hem i tokbaot ol promes we God i bin mekem long ol bubu blong olgeta bifo. Taem hem i talemaot gud nyus long ol man Gris, hem i tokbaot ol samting we ol man Gris oli gat save long hem. Samtaem hem i storebaot fasin blong hem blong kasem save long trutok, from we hem i ting se hemia wan gudfala rod blong givim wetnes. Hem i talem se: “Mi mi mekem olgeta samting from gud nyus, blong mi mi kasem haf blong gud nyus ya wetem ol narafala man.”—1 Kor. 9:20, 23; Wok 22:3-21.

12. (a) ?Nating we Pol i no fraet blong talemaot gud nyus, hem i mekem wanem blong no gat rao oltaem long ol man we oli no laekem trutok? (b) ?Wetaem yumi save waes blong folem rod blong hem? ?Olsem wanem yumi save mekem? (c) ?Paoa blong halpem yumi blong talemaot gud nyus, paoa ya i kam wea?

¹² Taem sam man ples oli agensem gud nyus, Pol i livim ples ya mo i go talemaot gud nyus long wan narafala ples. Hem i no wantem rao oltaem wetem ol enemi blong trutok. (Wok 14:5-7; 18:5-7; Rom 12:18) Be hem i no sem long gud nyus. (Rom 1:16) Taem ol man oli jikim hem no sipos oli wantem mekem tumas trabol long hem, Pol i no glad nating long samting ya, be hem i no lego long wok blong talemaot gud nyus. Hem i talem se: “God blong yumi i mekem tingting blong mifala i strong blong kam talemaot gud nyus blong hem long yufala, long fes blong plante man we oli agens long tok ya tumas.” Nating wanem trabol i save kasem, hem i talem se: “Be Masta blong yumi, hem i stap wetem mi, mo i givim paoa long mi blong mi talemaotgud olgeta tok long hem long fes blong ol hiten man blong oli harem.” (1 Tes. 2:2; 2 Tim. 4:17, NTB) Hed blong Kristin kongregesen, Masta blong yumi, Kraes Jisas, i gohed blong givhan strong long ol man blong hem, blong bambae oli save mekem wok ya we oli mas mekem long taem blong yumi naoia.—Mak. 13:10.

13. ?Wanem samting i soemaot we ol Kristin oli no fraet blong talemaot gud nyus? ?Wanem samting i stampa blong fasin blong no fraet blong talemaot gud nyus?

¹³ Olsem nao, i gat plante stampa samting, blong yumi no fraet long wok blong talemaot Tok blong God. Yumi save stanap strong olsem Jisas mo ol narafala man blong God we oli holemstrong long Jeova long faswan handred yia. Be yumi no wantem bitim mak mo yumi no wantem mekem stronghed long ol man. Yumi no wantem fosem ol man oli harem gud nyus. Nogat. Be yumi mas tingtinggud long ol narafala man. Taem oli no wantem harem, yumi no mas lego long wok ya, mo taem oli mekem trabol long yumi, yumi no fraet mo yumi no satem maot. Olsem Jisas i bin mekem, yumi tu i talemaot Kingdom blong God we i stret gavman ya blong rulum olgeta ples blong wol. Yumi no fraet blong talemaot samting ya, from we yumi man blong karem Tok blong Jeova, we i Hae Rula blong heven mo wol. Nao mesej ya we yumi talemaot i no tok blong yumi; be hemia i Tok blong God.—Fil. 1:27, 28;1 Thes. 2:13.

Tingtingbak

● ?From wanem yumi mas talemaot gud nyus blong Kingdom long olgeta man? ?Yumi save se bambae sam man oli mekem wanem?

● ?Yumi save mekem wanem blong soemaot we yumi no mekem wok blong Jeova from prapa strong blong yumi?

● ?Yumi lanem wanem long Ol Wok Blong Ol Aposol?