‘Bambae Yufala i Talemaot Mi’
‘Jisas i talem long olgeta se: “Bambae yufala i mas go talemaot mi [“witnes long mi,” NW] long olgeta ples long wol.”’—Wok 1:7, 8.
1, 2. (1) ?Hu ya “tru witnes”? (2) ?Nem ya Jisas i minim wanem, mo Jisas i wok folem mining blong nem blong hem olsem wanem?
TAEM Jisas i stap stanap long fes blong Paelat, man Rom we i hed gavman long Judia, hem i no fraet blong talem se: “Mi mi bon, mi kam long wol ya blong wan samting nomo, blong mi talemaot ol tok we i tru.” (Ridim Jon 18:33-37.) Sam yia biaen, aposol Pol i talem se Jisas “i witnes . . . mo i mekem gudfala wok blong talemaot hem long open ples long fes blong Ponjes Paelat.” (1 Tim. 6:13, NW) Yumi laef long wan wol we Setan i bos long hem, mo fulap man oli agensem ol narafala man. Taswe, blong yumi save gohed blong prij yumi mas gat strong tingting olsem Jisas, we hem i “tru witnes.”—Rev. 3:14, NW.
2 Bifo, neson blong Isrel i blong Jehova. Ol pikinini we oli bon long neson ya oli witnes blong Jehova. Taswe, taem Jisas i bon, hem tu i wan witnes blong Jehova. (Aes. 43:10) Bifo we Jisas i bon long wol ya, wan enjel i kamtru long Josef, mo i talem long hem se: “Yu mas putum nem blong hem se Jisas, we i min se Sevia, from we hem bambae i sevem ol man blong hem, i tekemaot ol sin blong olgeta.” (Mat. 1:20, 21) Long lanwis Hibru, nem ya Jisas i minim “Jehova i Sevem Man.” Jehova bambae i yusum Jisas blong sevem ol man long sin mo ded. Jisas i wok folem mining blong nem blong hem, taem hem i talem long ol man Isrel se oli mas tanem tingting blong olgeta from ol sin blong olgeta, nao Jehova i save glad long olgeta. (Mat. 10:6; 15:24; Luk 19:10) Jisas i talemaot Kingdom blong God. Mak i raetem se: ‘Jisas i kam long distrik ya Galili, i stap talemaot gud nius blong God. Hem i talem se: “Taem blong God i kam King blong olgeta man long wol i kam klosap finis. Yufala i mas tanem tingting blong yufala from ol sin blong yufala, yufala i mas bilif long gud nius ya.”’ (Mak 1:14, 15) Jisas i wok strong mo hem i no fraet blong tok agensem ol lida blong skul long taem blong hem. !Hemia wan risen from wanem ol lida ya oli kilim hem i ded!—Mak 11:17, 18; 15:1-15.
“OL BIGBIGFALA WOK YA WE GOD I MEKEM”
3. ?Wanem i hapen long namba tri dei afta we Jisas i ded?
3 Long namba tri dei, Jehova i mekem Jisas i laef bakegen long wan laef we i blong heven. (1 Pita 3:18) Jisas i kamtru long ol disaepol blong hem blong pruvum se hem i laef bakegen. Long dei afta we hem i laef bakegen, hem i kamtru faef taem long ol defdefren disaepol blong hem.—Mat. 28:8-10; Luk 24:13-16, 30-36; Jon 20:11-18.
4. ?Taem Jisas i kamtru namba faef taem, ol disaepol oli stap mekem wanem? ?Long en blong miting ya, hem i talem wanem long olgeta?
4 Long namba faef taem ya, hem i luk we ol aposol blong hem wetem ol narafala man blong hem, oli stap mekem miting long Jerusalem. Ale, hem i givhan long olgeta blong oli kasem save se ol profet tok oli bin talemaot finis se bambae hem i ded mo biaen bambae hem i laef bakegen. Long en blong miting ya, Jisas i talem samting we ol disaepol blong hem oli mas mekem, i se: “Long nem blong [hem], bambae ol man oli mas talemaot tok ya, se man i mas tanem tingting blong hem from sin blong hem, nao bambae God i fogivim hem. Tok ya i mas go long olgeta man, i stat long Jerusalem ya, gogo i finisim wol.” Mo hem i gohed i talem se: “Yufala i luk ol samting ya, mo yufala i save talemaot stret tok blong hem.”—Luk 24:44-48.
5, 6. (1) ?From wanem Jisas i talem se bambae oli ‘witnes long hem’? (2) ?Ol disaepol oli mas talemaot wanem niufala rod?
5 Laswan taem we Jisas i kamtru long ol man blong hem, hemia 40 dei afta we hem i laef bakegen. Long taem ya, ol aposol oli jes kasem save long tok we Jisas i talem long olgeta, se: “Bambae yufala i mas go talemaot mi [“witnes long mi,” NW] long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Wok 1:8) ?From wanem Jisas i talem se bambae oli ‘witnes long hem,’ be i no long Jehova? Hemia from we ol disaepol ya oli ol man Isrel mo oli witnes blong Jehova finis.
Yumi ol man blong Jisas, yumi gohed blong talemaot stamba tingting blong Jehova (Yu luk haf 5, 6)
6 Naoia oli mas talemaot wan niufala rod we Jehova i yusum blong sevem ol man, we i bigwan moa i bitim hemia we hem i yusum bifo blong sevem ol man Isrel. Niufala rod ya hemia sakrefaes blong Jisas. Taem Jisas i ded mo i laef bakegen, hem i givim janis long ol man blong oli fri long sin mo ded. Taem tabu spirit i makemaot ol disaepol long dei blong Pentekos long yia 33 K.T.,a oli stat blong talemaot “ol bigbigfala wok ya we God i mekem.” Plante man we oli lesin long tok blong olgeta, oli tanem tingting blong olgeta mo oli bilif long sakrefaes blong Jisas. Long taem ya, Jisas i stap sidaon long raet saed blong papa blong hem long heven, mo i luk we plante taosen man oli bilif long hem olsem sevia blong olgeta.—Wok 2:5, 11, 37-41.
“JISAS I PEMAOT PLANTE MAN”
7. ?Samting we i hapen long dei blong Pentekos i pruvum wanem?
7 Samting we i hapen long dei blong Pentekos long yia 33, i pruvum se Jehova i agri se sakrefaes blong Jisas we i stret gud olgeta, i save tekemaot sin blong olgeta man mo i mekem oli fri. (Hib. 9:11, 12, 24) Jisas i talem se hem i kam blong ‘givim laef blong hem blong pem rod blong plante man oli go fri.’ (Mat. 20:28) ?Olsem wanem? ?Ol man Isrel nomo bambae oli kasem blesing ya? Nogat. Sakrefaes blong Jisas i “tekemaot sin blong olgeta man long wol.” God i wantem “sevem olgeta man.”—1 Tim. 2:4-6; Jon 1:29.
8. ?Olsem wanem ol disaepol oli save gohed blong witnes long Jisas? ?Wanem i kamaot from?
8 Ol disaepol oli wok strong mo oli gohed blong witnes long saed blong Jisas. ?Olsem wanem oli save mekem wok ya? Oli askem long Jehova blong i givim tabu spirit long olgeta, blong oli save gat strong tingting blong gohed long wok ya. (Ridim Ol Wok 5:31, 32.) Samwe long 27 yia biaen, ol disaepol oli talemaot “trutok blong gud nius blong Kraes” long ol man Isrel, mo long ol man we oli no laen blong Isrel. Oli talemaot gud nius ya “long olgeta man long wol.”—Kol. 1:5, 23.
9. ?Jisas i bin talem se wanem bambae i kamaot long kongregesen?
9 Sore tumas, be taem ol yia oli pas, sam Kristin oli tijim sam tijing we oli no tru. (Wok 20:29, 30; 2 Pita 2:2, 3; Jud 3, 4) Ale sloslo, oli spolem kongregesen fulwan. Jisas i bin talem se ol man ya blong apostasi bambae oli gohed olsem gogo kasem “en blong wol ya.” (Mat. 13:37-43) Long Oktoba 1914, Jehova i putumap Jisas olsem King. Long taem ya, ol las dei blong wol blong Setan i stat.—2 Tim. 3:1.
10. (1) ?Longtaem bifo, ol tabu Kristin oli stap tokbaot wanem yia se hem i impoten? (2) ?Wanem i hapen long 1914, mo yumi save samting ya olsem wanem?
10 Longtaem bifo, ol tabu Kristin oli stap tokbaot Oktoba 1914, se hem i wan impoten yia. Oli kaontem taem ya folem profet tok blong Daniel we i tokbaot wan bigfala tri we oli katemdaon, mo i gru bakegen afta long “seven yia.” (Dan. 4:16) Mo Jisas tu i bin talemaot saen we bambae i soemaot se hem i kam King, mo ol las dei oli stat. Ol samting we oli hapen long wol stat long 1914, oli pruvum klia se Jisas i King. (Mat. 24:3, 7, 14; Luk 21:24) Stat long taem ya kam kasem tede, yumi stap talemaot long ol man se long 1914, Jehova i putumap Jisas i King long Kingdom blong hem. Hemia wan long “ol bigbigfala wok ya we God i mekem.”
11, 12. (1) ?Wanem i hapen long 1919? (2) ?Wanem i hapen long 1935? (Yu luk pija long stat blong stadi.)
11 Taem Jisas Kraes i kam King, hem i stat blong tekemaot ol tabu Kristin long Bigfala Babilon, we hemia olgeta giaman skul. (Rev. 18:2, 4) Smoltaem afta long Wol Wo Wan long yia 1919, ol tabu Kristin oli fri blong talemaot gud nius long olgeta ples long wol. Oli talemaot gud nius blong Kingdom blong God, mo oli talemaot se sakrefaes blong Jisas i save sevem man. From samting ya, plante man oli save trutok mo tabu spirit i makemaot olgeta blong oli go long heven, blong rul wetem Jisas.
12 Long 1935, Jisas i stat blong hivimap ol “narafala sipsip” blong hem. Olgeta ya bambae oli mekemap wan “bigfala hip” no wan bigfala kampani blong ol man. Yumi luksave samting ya from we plante taosen long olgeta oli stap long ol defdefren ples long wol. Oli wok wetem ol tabu Kristin blong folem eksampol blong Jisas, we hem i no fraet blong talemaot trutok long ol man. Oli talemaot se sakrefaes blong Jisas, hem i rod ya nomo blong God i sevem olgeta. Oli save se sipos oli gohed blong wok strong mo oli mekem ol samting we Jehova i wantem, bambae oli save laef long taem blong “bigfala trabol,” we bambae i finisim wol blong Setan.—Jon 10:16; Rev. 7:9, 10, 14.
YUMI ‘MEKEM TINGTING BLONG YUMI I STRONG BLONG PRIJ’
13. ?Yumi Witnes blong Jehova, yumi gat strong tingting blong mekem wanem? ?Yumi save folem eksampol blong ol fas Kristin olsem wanem?
13 Yumi glad tumas blong talemaot “ol bigbigfala wok ya” we Jehova i mekem finis, mo ol promes we bambae oli kamtru long fiuja. !Hemia wan bigfala blesing! I tru, i no isi blong gohed blong mekem wok ya. Maet ol man oli no wantem lesin long yumi, no maet oli ronem yumi blong kilim yumi. Sipos i olsem, i gud yumi folem eksampol blong aposol Pol mo ol fren blong hem. Pol i talem se: “God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” (1 Tes. 2:2) Yumi Witnes blong Jehova, yumi gat strong tingting blong holem promes we yumi mekem taem yumi baptaes. Yumi wantem stap olsem Witnes blong Jehova gogo kasem we Jehova i spolem rabis wol ya blong Setan. (Aes. 6:11) Be yumi no save mekem olsem long prapa paoa blong yumi. Olsem ol fas Kristin, yumi mas askem long Jehova blong i givim tabu spirit long yumi, blong yumi save gat “paoa ya we i bigwan tumas” i bitim paoa blong yumi.—Ridim 2 Korin 4:1, 7; Luk 11:13.
14, 15. (1) ?Long fas handred yia, ol man oli mekem wanem long ol Kristin? ?Pita i talem wanem blong leftemap tingting blong ol Kristin? (2) ?Taem ol man oli agensem yu from we yu Witnes blong Jehova, yu mas tingbaot wanem?
14 Plante man tede oli talem se oli Kristin, be oli mekem ol fasin we God i no laekem nating, mo God i no glad long olgeta. (Taet. 1:16) Long fas handred yia, plante man oli no wosipim God long fasin we hem i wantem. Mo tu, plante man oli agensem ol tru Kristin. From samting ya, aposol Pita i leftemap tingting blong ol Kristin, taem hem i talem se: “Sipos ol man oli tok nogud long yufala from we yufala i man blong Kraes, yufala i save harem gud.” ?From wanem oli save harem gud? From we ‘spirit blong God’ i stap long olgeta mo hemia i soemaot se God i glad long olgeta.—1 Pita 4:14.
15 ?Olsem wanem? ?Ol Witnes blong Jehova tu oli kasem trabol from nem blong Kraes? Yes. Yumi kasem trabol from we yumi stap witnes long saed blong Jehova, be i no hemia nomo. Yumi kasem trabol tu from we yumi stap witnes long saed blong Jisas mo Kingdom blong God. Bifo, ol man oli agensem Jisas from we hem i stap talemaot Jehova long ol man. Jisas i talem long ol man we oli agensem hem se: “Mi mi kam long nem blong Papa blong mi, be yufala i no glad long mi.” (Jon 5:43) Taswe, taem ol man oli agensem yu from we yu Witnes blong Jehova, yu mas tingbaot se trabol ya i pruvum we Jehova i glad long yu, mo se ‘spirit blong hem’ i stap long yu.
16, 17. (1) ?Long plante ples long wol, ol man oli stap mekem wanem? (2) ?Wanem samting we yu wantem gohed blong mekem?
16 Yumi mas tingbaot tu se long plante ples long wol, i gat ol man we oli stap kam long trutok. Nating se yumi prij plante taem long wan teritori, be yumi faenem yet ol man we oli intres long trutok. Taswe, taem yumi faenem wan man olsem, yumi mas meksua se yumi gobak luk hem mo yumi traehad blong stadi Baebol wetem hem. Olsem nao, yumi save givhan long hem blong i save Jehova, nao hem i save givim laef blong hem long Jehova mo i baptaes. ?Yu yu harem olsem wanem taem yu mekem wok ya? Sarie i wan Witnes blong Jehova bitim 60 yia finis, mo hem i stap long Saot Afrika. Hem i talem se: “Mi mi talem bigfala tangkiu from we sakrefaes blong Jisas i mekem se mi mi save fren gud wetem Jehova, Hae King blong heven mo wol. Mi mi glad se mi save talemaot nem blong hem.” Sarie mo man blong hem Martinus, tufala i givhan long trifala pikinini blong tufala mo plante narafala man, blong oli kam ol Witnes blong Jehova. Sarie i talem se: “I no gat wan narafala wok we i save givim glad olsem wok ya, mo from we Jehova i givim tabu spirit, yumi evriwan i gat paoa we yumi nidim blong gohed long wok ya we i save sevem laef blong ol man.”
17 Nating sipos yumi baptaes finis no nogat, be yumi mas glad mo talem tangkiu from we yumi save joen wetem ol Witnes blong Jehova. Taswe, i gud yumi gohed blong talemaot gud nius blong Kingdom long ol man. Mo i gud yumi sakemaot ol fasin blong wol blong Setan we oli save mekem yumi kam doti. Yes, sipos yumi mekem olsem, bambae yumi gohed blong karem nem blong God blong yumi, Jehova, mo blong pulum ol man oli ona long hem.
a K.T. i minim Kristin Taem.