Japta 24

Plan Blong Jeova i Kamtru Long Nambawan Fasin

1, 2. (a) ?God i gat wanem plan long saed blong ol man mo ol enjel? (b) ?Hu ya i stap long famle blong God mo i joen wanples blong mekem wosip long hem? (c) ?Yumi evriwan i mas tingbaot wanem kwestin?

JEOVA i mekem plan blong ol enjel mo ol man oli joen tugeta blong mekem wosip blong Hem wan nomo. Hem i wantem we olgeta oli haremgud long nambawan fasin fri blong ol pikinini blong God. Hemia nao waes plan blong Jeova we i laekem tumas ol man. Nao olgeta man we oli laekem stretfasin, oli wantem tumas we plan ya i kamtru.

² Taem Jeova i stat wokem ol samting, hem i stat mekem plan blong hem i kamtru. Namba wan samting we hem i wokem, hemia Pikinini Boe blong hem, “i olsem wan stret pija blong God, we i stap soemaot prapa fasin blong hem.” (Hib. 1:1-3, NTB) Hem ya i narakaen, from we hem nomo i stret Pikinini ya we God hem wan nomo i bin wokem. Long rod blong hem, ol narafala pikinini blong God oli kamaot—ol enjel blong heven fastaem mo biaen ol man long wol. (Job 38:7; Luk 3:38) Olgeta pikinini ya blong heven mo wol oli olsem wan famle nomo. Jeova i God blong olgeta mo oli mas mekem wosip long hem wan nomo. Hem i Hae Rula blong heven mo wol, mo hem i Papa blong olgeta. Hem i laekem olgeta tumas. ?Olsem wanem? ?Hem i Papa blong yu tu? ?Yu yu wan pikinini blong hem? !Sipos i olsem, yu yu save frengud tumas wetem Hem!

3. (a) ?Taem yumi bon, from wanem yumi no pikinini blong God? (b) ?Be olsem wanem God i soemaot we i laekem yumi, nating we yumi pikinini blong Adam?

³ Be taem faswan papa mama blong yumi oli mekem stronghed, nao tufala i mekem sin, ale tufala i kasem panis blong ded. God i sakemaot tufala long Iden. Hem i no moa Papa blong tufala. From samting ya, tufala i no moa stap insaed long bigfala famle blong Jeova. (Jen. 3:22-24; lukluk tu Dutronome 32:4, 5.) Yumi evriwan i pikinini blong sinman Adam, taswe taem yumi bon yumi gat sin we i wok insaed long bodi blong yumi. From we yumi pikinini blong ol papa mama we God i sakemaot long famle blong hem, yumi no save talem se yumi pikinini blong God nating we yumi bon olsem man. Be Jeova i save se sam pikinini blong Adam oli save laekem tumas stretfasin. Nao long fasin sore blong hem, hem i wokem rod blong bambae yumi save kasem nambawan fasin fri blong ol pikinini blong God.—Rom 8:20, 21.

God i Gat Gladhat Long Isrel

4. (a) ?From wanem ol man Isrel oli “pikinini blong God”? (b) ?Be samting ya i no minim wanem?

⁴ 2,500 yia biaen we God i wokem Adam, hem i wokem rod bakegen blong samfala man oli save kam pikinini blong hem. Stret long kontrak blong hem wetem Ebraham, Jeova i jusum Isrel blong kam ol man blong hem. Hem i talem long Fero blong Ijip se Isrel “i pikinini blong mi.” (Eks. 4:22, 23; Jen. 12:1, 2) Biaen hem i givim loa blong hem long ol man Isrel long hil Sinae, mo i mekem ol man ya oli kam nesen blong hem we hem i save yusum i stret long plan blong hem. From we oli wan nesen we i olsem “wan spesel samting” blong Jeova, God i kolem olgeta “ol pikinini blong hem.” (Dut. 14:1, 2; Aes. 43:1) I gat wan samting bakegen: Jeova i givim samkaen wok long sam man Isrel, taswe hem i kolem olgeta pikinini blong hem. (1 Kron. 22:9, 10) God i kolem olgeta ol pikinini blong hem, from we hem i mekem wan kontrak wetem Isrel. Be yumi no save ting se oli gat nambawan fasin fri we Adam i bin gat fastaem olsem pikinini blong God. Nogat. Oli slef yet long sin mo ded.

5. ?Olsem wanem ol man Isrel oli no moa pikinini blong God?

⁵ Be oli pikinini blong God mo oli gat wan gudfala ples long lukluk blong hem. Taswe oli mas gat respek long Papa blong olgeta, mo oli mas wok blong mekem plan blong hem i kamtru. Jisas i talem se hemia wan bigfala samting we oli mas mekem—oli no mas talem nomo se God i Papa blong olgeta, be oli mas mekem ol samting blong soemaot klia we oli olsem “ol pikinini blong hem.” (Mat. 5:43-48; Mal. 1:6) Be nesen blong ol man Jyu i mestem blong mekem olsem. Long laswan yia we Jisas i mekem wok blong hem long wol, jes bifo we oli holem hem blong kilim hem i ded, ol man Jyu oli talem se: “Mifala i gat wan Papa nomo blong mifala. !Hemia God ya!” Be Jisas i talem long olgeta se tingting mo ol samting ya we oli mekem, i soemaot klia we God i no Papa blong ol. (Jon 8:41, 44, 47, NTB) Long yia 33 K.T., God i finisim kontrak blong Loa, mo from samting ya spesel fasin fren blong hem wetem Isrel i finis tu. Be i no olsem we God i no moa gat pikinini long wol. Nogat. Hem i agri long sam narafala man blong oli kam pikinini blong hem.

Jeova i Mekem Ol Man Blong Hem Oli Joen Wanples

6. ?Pol i tokbaot wanem long Efesas 1:9, 10? ?Wanem plan blong wok ya?

⁶ Aposol Pol i raetem wan leta i go long ol Kristin blong Efesas, mo i tokbaot plan blong God blong mekem ol man blong hem oli joen wanples—hemia rod blong God blong mekem ol man we oli bilif oli kam memba blong famle blong hem. Hem i talem se: “God i haremgud blong soemaot long yumi, plan blong hem we fastaem i samting blong haed. God i tingbaot finis we bambae hem i wokem olgeta samting [wan grik wod we i min se “lukaot long wan haos”] blong plan ya blong hem, long Kraes, mo we bambae i finisim plan ya, taem we stret taem blong hem bambae i kamtru. Plan blong God, hem i wantem olgeta samting we hem i mekem bambae oli kam joen wanples. Hem i wantem we olgeta samting long heven mo long wol bambae oli kam joen long Kraes, we hem i olsem hed blong olgeta samting.” (Efes. 1:9, 10, NTB) God bambae “i wokem olgeta samting” long rod blong Kraes. Long rod blong Kraes, ol man oli save kamgud long lukluk blong God—samfala blong kasem laef long heven, mo samfala blong kasem laef long wol—mo bambae oli save wokgud tugeta wetem ol pikinini blong God long heven, hemia ol enjel we oli holemstrong long Jeova.

7. ?Wanem ya “ol samting blong heven”? ?Blong wanem God i hivimap olgeta?

⁷ Fastaem God i stap hivimap “olgeta samting long heven.” Long Pentekos blong yia 33 K.T., hem i stap hivimap ol man we oli mas kasem ol samting wetem Kraes, we bambae oli rul wetem Kraes long Kingdom blong heven. From we oli bilif long sakrafaes blong Jisas, God i talem se olgeta oli stret. (Rom 5:1, 2) Biaen “oli bon bakegen,” from we tabu speret i mekem olgeta oli kam pikinini blong God we oli save kasem laef long heven. (Jon 3:3; 1:12, 13) God i wokem wan nyufala kontrak wetem nesen ya long saed blong speret. Sam man Jyu mo biaen sam hiten man, oli joen long nyufala nesen ya we namba blong hem i kasem 144,000.—Gal. 3:26-29; Rev. 14:1.

8. Skelem samting ya: ?Ol man blong kasem Kingdom oli stap olsem wanem wetem Papa long heven, mo ol man Jyu we oli stap aninit long Loa blong Moses oli stap olsem wanem wetem God?

⁸ Taem smol kampani ya blong ol man blong Kingdom i stap yet long wol, oli sinman yet long bodi blong olgeta, be oli pikinini blong God. Oli frengud tumas wetem Papa blong heven. Pol i tokbaot samting ya, i talem se: “Mo blong God i soemaot we yufala i pikinini blong hem, hem i sanem speret long pikinini blong hem, blong i stap long tinting blong yumi. Hemia speret ya we i stap singaot se ‘Papa, Papa.’ From samting ya, yufala i no moa olsem slef nomo, yufala i pikinini blong God. From we yufala i pikinini blong God, hem bambae i save givim long yufala, olgeta samting ya we hem i promes blong givim long pikinini blong hem.” (Gal. 4:6, 7, NTB) Sakrafaes blong Kraes i winim ol sakrafaes we ol man oli bin mekem aninit long loa. From sakrafaes ya mo gladhat blong God, ol Kristin we tabu speret i makemaot oli frengud tumas wetem God. Ol sinman we oli stap aninit long Loa oli no save frengud wetem God olsem bifo. Taswe ol samting we bambae ol Kristin ya oli kasem oli gudfala moa.

9. ?Taem oli rili kam pikinini blong God, oli kasem wanem?

⁹ Sipos oli holemstrong long God gogo kasem oli ded, bambae ol Kristin ya oli save kam ol tru pikinini blong God from we oli girap i laef bakegen long heven mo oli no moa save ded. Olsem nao, oli joen wanples mo oli mekem wok long fes blong Jeova hem wan. I gat wan smol haf nomo blong ol pikinini ya blong God we oli stap yet long wol.—Rom 8:14, 23; 1 Jon 3:1, 2.

Hivimap “Ol Samting Blong Wol”

10. (a) ?Wanem ya “ol samting blong wol”? ?I stat long wanem taem God i hivimap olgeta blong oli joen wanples blong mekem wosip long hem? (b) ?Olsem wanem oli fren wetem Jeova?

¹⁰ God i hivimap sam man oli kam insaed long haos blong hem blong kasem laef long heven, mo hem i hivimap tu “ol samting blong wol.” I stat long 1935 K.T., God i hivimap ol man we oli bilif long sakrafaes blong Kraes, blong oli kasem laef blong olwe long wol. Oli joen wetem smol haf blong ol Kristin we tabu speret i makemaot, blong leftemap nem blong Jeova mo blong mekem wosip long hem. (Sef. 3:9; Aes. 2:2, 3) Oli gat respek long Jeova mo oli kolem hem “Papa,” from we oli save se hem i Stampa blong laef. Oli traehad blong folem ol gudgudfala fasin blong God from we oli save se hem i wantem we ol pikinini blong hem oli mekem ol fasin ya. Oli stanap gud long fes blong hem mo hem i oraet long ol, from we oli bilif long blad blong Jisas we i ron blong pemaot olgeta. (Mat. 6:9; Rev. 7:9, 14) Be oli save se bambae oli save haremgud moa from we God bambae i agri we olgeta oli rili kam pikinini blong hem.

11. (a) ?Rom 8:19-21 i talem wanem promes long ol man? (b) ?Ol narafala man oli stap wet tumas we “God i soemaot ol pikinini blong hem” olsem wanem?

¹¹ Olsem Rom 8:19-21 i talem, “oli stap wet, we oli wantem tumas blong luk we God bambae i soemaot ol pikinini blong hem,” from we bambae long taem ya “oli fri olgeta long sin.” Bambae i klia nomo we God “i soemaot ol pikinini blong hem” taem ol man we oli stap long wol oli lukluk ol samting we oli soemaot we ol pikinini ya blong God we tabu speret i makemaot oli kasem finis pei blong olgeta long heven, mo oli stat mekem wok wetem Masta blong olgeta Jisas Kraes. Bambae samting ya i klia nomo taem bigfala trabol i stat kamaot blong finisim rabis fasin ya blong wol. Nao biaen rul blong wan taosen yia blong Jisas bambae i blesem ol man. Ol “pikinini ya blong God” bambae oli mekem wok blong pris mo king wetem Kraes long taem ya.—Rev. 2:26, 27; 20:6.

12. ?Biaen long bigfala trabol, ol pikinini blong God we tabu speret i makemaot oli joen blong mekem wanem singsing? ?Samting ya i minim wanem?

¹² Taem bigfala trabol i finis, ol pikinini blong God we oli stap wetem Kraes long heven, bambae oli joen blong singsing blong presem God. Oli glad we i glad blong talemaot: “Hae God, Masta blong mifala, yu yu gat olgeta paoa, ol wok blong yu oli bigfala tumas, oli hae tumas. Yu yu King blong olgeta kantri, mo ol fasin blong yu oli stretgud, oli tru. ?Hae God, hu man i no save ona long yu? ?Hu man i no save leftemap nem blong yu? Yu nomo yu tabu. Bambae ol man blong olgeta kantri oli save kam blong mekem wosip long yu, from we yu yu soemaot finis ol stretfasin blong yu.” (Rev. 15:3, 4, NTB) Yes, olgeta man we bifo oli seraot long ol defren kantri, bambae oli joen wanples blong mekem wosip long Trufala God. Olgeta man tu we oli stap long beregraon bambae oli girap i laef bakegen, mo oli gat jans blong joen long singsing ya we i presem Jeova.

13. ?Ol man we oli laef yet long bigfala trabol bambae oli haremgud long wanem nambawan fasin fri?

¹³ Bambae Setan i no moa save stap olsem “god blong fasin ya blong wol.” Bambae ol man blong Jeova long wol oli no moa hadwok blong faetem nogud man ya. (2 Kor. 4:4; Rev. 20:1-3) Ol gyaman jyos oli no moa save spolem nem blong God, mo oli no moa save mekem ol man oli seraot long plante defren grup. Bambae i no moa gat man mo gavman we i mekem trabol long ol man blong Trufala God. !Bambae olgeta man we oli no ded long bigfala trabol, oli haremgud from nambawan fasin fri!

14. ?Long wanem rod bambae oli no moa slef long sin mo ol frut blong hem?

¹⁴ Jisas Kraes, “Smol Sipsip blong God we i tekemaot sin long wol,” bambae i yusum praes blong sakrafaes blong hem blong tekemaot ol sin we ol man oli bin mekem. (Jon 1:29) Taem Jisas i stap long wol, hem i talem se God i save fogivim ol sin blong wan man mo hem i mekem ol man oli kamgud bakegen blong soemaot samting ya. (Mat. 9:1-7) Naoia hem i stap long heven mo bambae hem i save mekem sem mak nomo—bambae hem i mekem merikel, hem i openem ae blong man we i blaen, hem i openem sora we i fas, hem i save openem maot blong man we i no save tok. Bambae hem i save mekem leg blong man we i nogud no i kruket i kamgud bakegen, mo i save mekem ol man we oli gat sik long tingting blong olgeta oli kamgud bakegen. Bambae hem i save stretem ol defren kaen sik tu. Lelebet lelebet, bambae olgeta man we oli obei long stret rod blong God, mo oli wantem folem ol stret fasin blong hem, oli save haremgud from we “loa blong sin” bambae i no moa wok long bodi blong olgeta. From samting ya, olgeta samting we bambae oli mekem, ol tingting blong olgeta, mo ol samting we oli wantem, oli mekem God i glad long olgeta mo oli no moa gat sem from. (Rom 7:21-23; lukluk tu Aesea 25:7, 8 mo Revelesen 21:3, 4.) Taem 1,000 yia blong rul blong Kraes i no finis yet, bambae bodi mo tingting blong ol i kam stretgud olgeta. Bambae oli no moa slef blong sin. Bambae oli saenaot long “stret pija blong God,” long wan gudfala Paradaes we i kasem olgeta ples blong wol.—Jen. 1:26.

15. ?Taem wan taosen yia blong rul blong Kraes i finis, bambae Jisas i mekem wanem? ?Wanem plan blong hem?

¹⁵ Taem ol man oli kam stretgud olgeta bakegen, bambae Kraes i givimbak long Papa blong hem paoa ya we hem i bin kasem fastaem. Olsem 1 Korin 15:28 i talem: “Fastaem God bambae i putum olgeta samting oli stap aninit long paoa blong Kraes. Nao biaen, Kraes ya we i Pikinini blong God, hem nomo bambae i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem olgeta paoa long olgeta samting.” (NTB)

16. ?Taem ol man oli kam stretgud olgeta, bambae God i mekem wanem long olgeta? ?From wanem hem i mekem olsem?

¹⁶ Nao bambae God i givim jans long olgeta man ya we oli kam stretgud olgeta blong soemaot sipos oli wantem mekem wok long Trufala God ya nomo. Taswe bifo we God i tekem olgeta oli kam pikinini blong hem long rod blong Kraes, Jeova bambae i traem olgeta. Hemia i laswan samting we i traem olgeta. Bambae God i openem bigfala hol mo i letem Setan i go fri wetem ol devel blong hem. Samting ya bambae i no save spolem olwe olgeta man we oli laekem Jeova. Nogat. Be ol man we bambae oli letem Setan i pulum olgeta blong tanem baksaed long Jeova, bambae oli lus wantem nomo wetem Setan mo ol rabis devel blong hem.—Rev. 20:7-10.

17. ?Taem bambae plan blong God i kamtru olgeta, ol man mo ol enjel bambae oli stap olsem wanem?

¹⁷ Bambae Jeova i adoptem olgeta we oli win long laswan samting ya, oli kam pikinini blong hem. Bambae hem i mekem olsem long rod blong Kraes. Ale ol man ya blong God we oli stretgud olgeta, oli save haremgud long “nambawan fasin fri blong ol pikinini blong God.” (Rom 8:21) Long taem ya, oli rili stap insaed long famle blong God, mo bambae Jeova nomo i God mo King mo Papa blong olgeta blong olwe. Long taem ya, bambae olgeta man long heven mo wol oli joen wanples bakegen blong mekem wosip long Trufala God.

Tingtingbak

● ?Taem fasin stronghed i no kamaot yet long Iden, olsem wanem ol man we oli wosip long Jeova oli frengud wetem hem?

● ?Olgeta we oli pikinini blong God oli gat wanem wok?

● ?Hu ya i pikinini blong God naoia? ?Hu ya bambae i save kam pikinini blong God? ?Olsem wanem samting ya i laenap wetem plan blong God long saed blong fasin blong joen wanples blong mekem wosip long Hem?