Ol Elda We Oli Goraon Long Ol Kongregesen, Oli Wok Wetem Ol Narafala Long Trutok
Long Kristin kongregesen long faswan handred yia, i gat sam elda we oli goraon long ol kongregesen blong leftemap tingting blong olgeta. Olgeta oli givim taem mo paoa blong olgeta. Oli no winim sam samting long olgeta wanwan, be oli givhan long ol kongregesen blong gohed long fasin we i leftemap nem blong Jeova.—Ol Wok 11:23,24; 14:21, 22; 15:32; 20:2, 31-35; Filipae 2:20-22, 29; 1 Tesalonaeka 2:5-12.
Tede tu, ol kongregesen blong ol Wetnes blong Jeova oli kasem bigfala blesing from wok blong ol elda we oli goraon blong visitim olgeta. Ol elda ya oli gat plante ekspiryens long wok blong prij mo wok blong ol elda. Olgeta oli livim wok blong olgeta we oli winim mane from, mo haos blong olgeta, blong yusum laef blong olgeta long fultaem minista wok. Sipos oli mared, waef blong olgeta i stap long fultaem minista wok tu.
Seket elda i lukaot long wan seket. Seket ya i gat samwe long 18 kasem 25 kongregesen long hem. Seket elda i visitim ol kongregesen ya wanwan samwe long 2 taem long wan yia. From fasin ya, ol kongregesen oli save kasem plante blesing from defren kaen ekspiryens mo ol defren kaen fasin blong ol elda ya.
Seket elda i jekemap kongregesen mo wok blong hem long saed blong speret. Hem i givim plante tok long kongregesen, mo hem i mekem miting wetem ol elda mo ol man blong givhan blong tokbaot olsem wanem oli save go moa long wok blong olgeta long kongregesen.
Long wik ya, hem mo waef blong hem, tufala i joen wetem ol lokol Wetnes long wok blong prij, mo tufala i givhan long olgeta blong kam moa gud long wok ya. Mo tu, tufala i visitim olgeta man we oli jes stat blong intres long trutok blong pulum olgeta oli gohed. Yu yu save askem tufala blong visitim yu sipos yu wantem.
Distrik elda i gat semkaen gudfala fasin long saed blong speret, mo semkaen ekspiryens tu. Hem i visitim ol seket. Evri wik, hem i givhan long saed blong seket asembli. Hem mo waef blong hem, tufala i joen long wok blong prij wetem olgeta long wan kongregesen long seket we hem i stap visitim. Hem i lukaot long ol wok blong mekem rere program blong seket asembli, mo hem i givim plante tok long asembli ya. Hem i givim pablik tok tu.
Taem ol elda ya oli finis long wan kongregesen no seket, oli wokbaot blong visitim narawan. Oli folem sem program long nekis kongregesen, gogo oli visitim evri kongregesen long seket. Samting ya i tekem samwe long sikis manis blong mekem, nao oli stat bakegen.
Long plante kantri long wol, ol elda ya we oli goraon long ol kongregesen, oli yusum trak no wan narafala pablik transpot blong wokbaot. Long sam narafala kantri, oli wokbaot long baskel no long leg nomo. Sosaete i pem rod blong brata ya, mo oli givim mane long hem mo waef blong hem blong kavremap praes blong ol smosmol samting we tufala i mas pem. Olgeta long kongregesen oli givim kakae mo ples blong slip long tufala, taem we tufala i visitim olgeta.
Ol elda we oli mekem wok ya oli rere blong livim sam samting we olgeta nomo oli wantem. Olgeta wetem waef blong olgeta, oli gat strong tingting blong givhan long ol kongregesen. Taswe, oli neva putum wan bigfala baden long kongregesen.—1 Tesalonaeka 2:9.
• ?From wanem i gat ol elda we oli goraon long Kristin kongregesen long faswan handred yia?
• ?Olsem wanem ol elda we oli goraon long ol kongregesen tede, oli naf mo oli rere blong mekem wok ya?
• ?Eksplenem wok mo laef blong ol seket mo distrik elda?
[Tok Blong Pija Long Pej 20]
Distrik elda i givim tok longseket asembli
[Tok Blong Pija Long Pej 21]
Ol seket elda oli tijim olgeta long wok blong prij, oli toktok wetem ol elda long kongregesen, oli go long ol nyufala Baebol-stadi, oli givim tok long kongregesen.