Ol Elda We Oli Wokbaot Blong Visitim Ol Kongregesen—Ol Presen We Oli Go Long Ol Man
“Taem hem i go antap long heven, hem i go olsem king we i winim ol enemi blong hem finis, mo i givim ol presen oli go nomo long ol man.”—EFESAS 4:8.
1. ?Wajtaoa blong 1894 i talemaot wanem nyufala wok?
BITIM wan handred yia i pas nao we Wajtaoa i bin talemaot wan nyufala samting. Hem i tokbaot samting ya olsem “Wan Narafala Haf Blong Wok Blong Prij.” ?Wanem ya nyufala wok ya? Hemia stat blong wan wok long taem blong yumi, we sam elda oli wokbaot blong visitim ol kongregesen.a Wajtaoa blong Septemba 1, 1894, i eksplenem se stat long taem ya, sam brata we oli nafgud, bambae oli wokbaot blong visitim ol wanwan grup blong ol Baebol Studen, ‘wetem tingting blong givhan long olgeta blong kam strong moa long trutok.’
2. ?Ol seket elda mo ol distrik elda oli gat wanem wok blong mekem?
2 Long faswan handred yia K.T.,b i gat sam elda olsem Pol mo Banabas we oli wokbaot blong visitim ol Kristin kongregesen. Ol man ya we oli strong long bilif oli gat wan stampa tingting, hemia blong mekem ol kongregesen oli kam ‘strong moa.’ (2 Korin 10:8) Tede, i gat plante taosen man we oli stap mekem wok ya oltaem, mo oli olsem wan blesing long yumi. Hed Kampani blong ol Wetnes blong Jeova i putumap olgeta olsem ol seket mo distrik elda. Wan seket elda i stap wokbaot i go long samwe 20 kongregesen. Hem i stap wan wik long ol wanwan kongregesen ya, mo i mekem samting ya tu taem long wan yia. Long wik ya, hem i jekem ol ripot blong kongregesen, hem i givim ol tok, mo i joen long wok blong prij wetem ol pablisa blong Kingdom long ples ya. Distrik elda hem i jeaman blong seket asembli we i kamaot wan taem wan yia, long ol defren seket. Long ful wik bifo long seket asembli, hem i joen long wok blong prij wetem kongregesen we asembli i stap long ples blong olgeta, mo hem i givim ol tok we oli stanap long Baebol, blong leftemap tingting blong olgeta.
Oli Lego Plante Samting We Olgeta Nomo Oli Wantem
3. ?From wanem ol elda we oli wokbaot blong visitim ol kongregesen oli mas rere blong lego plante samting we olgeta nomo oli wantem?
3 Ol elda ya oli stap wokbaot oltaem. Blong wokbaot olsem, samting ya nomo i nidim tingting we oli rere blong lego samting we olgeta nomo oli wantem. Plante taem i hadwok blong wokbaot long wan kongregesen i go long narawan. Be ol man ya wetem woman blong olgeta oli glad blong mekem olsem. Wan seket elda i talem se: “Waef blong mi i rili sapotem mi mo hem i neva toktok smol from . . . Mi presem hem from we hem i rere blong lego plante samting we hem i wantem, blong mekem wok ya.” Sam seket elda oli wokbaot bitim 1000 kilomita long wan kongregesen i go kasem narafala kongregesen. Plante oli gat trak, be samfala oli yusum taksi no bas sevis, baskel, hos, no leg blong olgeta nomo. Wan seket elda long Afrika i mas wokbaot tru long wan reva we i karem woman blong hem antap long solda blong hem, blong go kasem wan kongregesen. Long ol misinari trep blong aposol Pol, hem tu i wokbaot long ples we i hot tumas no i kolkol, plante taem hem i hanggri mo tosta, samtaem hem i no slip long naet, mo hem i fesem plante denja mo raf fasin we ol man oli mekem long hem. Antap long ol samting ya, hem i stap ‘tingting tumas long ol memba blong kongregesen long olgeta ples.’ Plante elda tede we oli wokbaot blong visitim ol kongregesen, oli mekem sem samting ya.—2 Korin 11:23-29.
4. ?Ol problem blong helt oli save mekem wanem long laef blong ol elda we oli visitim ol kongregesen mo waef blong olgeta?
4 Olsem Pol mo fren blong hem Timote, ol elda mo waef blong olgeta we oli wokbaot i go long ol kongregesen tede, oli save gat sam problem long saed blong helt. (1 Timote 5:23) Samting ya i mekem i hadwok moa long olgeta. Waef blong wan seket elda i talem se: “Taem mi mi sik, mi harem se i hadwok long mi blong stap oltaem wetem ol brata mo sista. Naoia we mi stap kam kolosap long taem we sikmun blong mi bambae i finis, mi faenem se i hadwok moa long mi. Taem mitufala i mas fulumap olting blong mitufala long ol bokis evri wik blong wokbaot i go long wan narafala ples bakegen, samting ya i rili had long mi. Plante taem, mi mas stop mo prea long Jeova, blong askem hem blong givim paoa long mi blong gohed.”
5. Nating se oli kasem sam hadtaem, ?ol elda ya mo waef blong olgeta oli soemaot wanem gudfala tingting?
5 Nating se ol elda we oli wokbaot blong visitim ol kongregesen mo ol waef blong olgeta oli kasem problem long saed blong helt mo sam narafala traem bakegen, oli glad long wok blong olgeta, mo oli soem lav we i stanap long fasin blong tingbaot narafala fastaem. Sam long olgeta, kolosap oli bin lusum laef blong olgeta, blong halpem sam narafala long saed blong speret, long ples we ol man oli stap mekem trabol long ol man blong Jeova, no ples we i gat faet. Taem oli visitim ol kongregesen, oli soemaot semfala fasin olsem Pol, we i talem long ol Kristin long Tesalonaeka se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.”—1 Tesalonaeka 2:7, 8.
6, 7. ?Hadwok blong ol elda we oli wokbaot blong visitim ol kongregesen i save pusum ol narafala blong mekem wanem?
6 Olsem ol narafala elda long Kristin kongregesen, ol elda we oli wokbaot blong visitim ol kongregesen oli ‘stap hadwok blong prij mo tij.’ Olgeta elda ya oli mas ‘kasem dabol ona.’ (1 Timote 5:17) Eksampel blong olgeta i save givhan long yumi, sipos ‘yumi tingbaot fasin blong olgeta, mo yumi biaen long olgeta long fasin blong bilif blong olgeta.’—Hibrus 13:7.
7 ?Sam elda we oli wokbaot i go long ol kongregesen, oli gat wanem paoa long laef blong narafala? Wan Wetnes blong Jeova i raetem se: “!Brata P—— i rili gat paoa long laef blong mi! Hem i wan elda we i stap wokbaot i go long plante kongregesen long kantri blong Meksiko, stat long yia 1960. Mi mi pikinini long taem ya, mo mi stap wet nomo long evri taem we hem bambae i visitim mifala, mo mi glad tumas taem hem i kam. Taem mi gat ten yia, hem i talem long mi se, ‘Yu bambae yu kam wan seket elda.’ Taem mi mi gat bitwin 13 mo 19 yia, hemia ol yia we oli had long ol yangfala, plante taem mi toktok wetem hem long sam problem we mi gat, mo oltaem hem i gat sam waes tok blong talem long mi. !Bigfala samting long laef blong hem i blong lukaot long ol sipsip blong God! Naoia we mi mi wan seket elda, oltaem mi traem spenem plante taem wetem ol yangfala, blong halpem olgeta blong traehad blong kasem sam tiokratik mak, long sem fasin we hem i bin halpem mi. Long ol laswan yia blong laef blong Brata P——, nating se hat blong hem i no moa strong, be hem i gohed blong talem ol tok we i leftemap tingting. Jes wan dei bifo we hem i ded long Febuwari 1995, hem i kam wetem mi long wan spesel dei asembli, mo hem i toktok wetem wan brata we i gat gudhan blong wokem ol plan blong haos. Hem i tokbaot ol mak we brata ya i save traem kasem. Kwiktaem nomo, brata ya i fulumap pepa blong wok long Betel.”
Ol Man Oli Gat Tangkyu From Olgeta
8. ?Hu ya ol ‘presen we oli go long ol man’ we Efesas japta 4 i tokbaot, mo olsem wanem olgeta ya oli givhan long ol kongregesen?
8 Ol elda we oli wokbaot blong visitim ol kongregesen, mo ol narafala elda we oli kasem spesel wok from kaen fasin blong God, oli olsem ol ‘presen we oli go long ol man.’ Jisas we Jeova i yusum hem, mo we hem i Hed blong kongregesen, i stanemap ol man ya we oli strong long saed blong speret, blong bambae oli mekem yumi wanwan i kam strong moa mo yumi kam ol bigman long saed blong speret. (Efesas 4:8-15) I stret nomo se wan man we i kasem presen i mas soemaot tangkyu from. Samting ya i tru moa, sipos presen ya i mekem hem i strong blong gohed long wok blong Jeova. Taswe, ?olsem wanem yumi save soemaot tangkyu from wok blong ol elda we oli wokbaot blong visitim ol kongregesen? ?Long wanem rod yumi save soemaot se yumi stap ‘onagud long ol man olsem’?—Filipae 2:29.
9. ?Long wanem rod yumi save soemaot tangkyu long ol elda we oli wokbaot blong visitim ol kongregesen?
9 Taem oli talemaot se bambae seket elda i visitim kongregesen blong yumi, ale, yumi save stat mekem plan blong joen fulwan long ol spesel wok we bambae kongregesen i mekem long wik ya. Ating yumi save putum sam moa taem i stap, blong sapotem wok blong prij long wik blong visit ya. Maet yumi save joen long wok blong haftaem paenia long manis ya we hem i mekem visit. I sua se bambae yumi wantem blong folemgud olgeta advaes blong seket elda, blong kamgud moa long wok blong prij. Wan tingting olsem we yumi glad blong harem advaes, bambae i karem blesing i kam long yumi, mo bambae i mekem elda ya i haremgud blong luk se visit blong hem i karem frut. Yes, ol elda we oli wokbaot blong visitim ol kongregesen, oli mekem olsem blong givhan long yumi blong kam strong moa. Be olgeta tu, oli nidim we yumi givhan long olgeta blong kam strong moa long saed blong speret. Sam samtaem, Pol i nidim narafala blong leftemap tingting blong hem, mo plante taem hem i askem ol narafala Kristin blong prea from hem. (Ol Wok 28:15; Rom 15:30-32; 2 Korin 1:11; Kolosi 4:2, 3; 1 Tesalonaeka 5:25) Ol elda tede tu, we oli stap wokbaot blong visitim ol kongregesen, oli nidim we yumi prea from olgeta mo yumi leftemap tingting blong olgeta.
10. ?Olsem wanem yumi save givhan blong mekem se ol elda ya oli glad blong mekem wok blong olgeta?
10 ?Yumi talem finis long seket elda mo waef blong hem se yumi laekem tumas wik ya we tufala i visitim yumi? ?Yumi talem tangkyu long hem from ol advaes we hem i givim blong halpem yumi? ?Taem ol advaes we hem i givim oli mekem se yumi faenem moa glad long wok blong prij, yumi talem samting ya long hem? Sipos yumi mekem olsem, bambae yumi halpem hem blong haremgud long wok we hem i stap mekem. (Hibrus 13:17) Wan seket elda long Spen i tokbaot olsem wanem hem mo waef blong hem tufala i laekem tumas ol smol leta we tufala i kasem blong talem tangkyu, afta we tufala i visitim ol kongregesen. Elda ya i talem se: “Mitufala i holem ol leta ya oli stap, mo mitufala i ridim olgeta bakegen taem tingting blong mitufala i foldaon smol. Oli rili leftemap tingting blong mitufala.”
11. ?From wanem yumi mas talem long waef blong ol seket mo distrik elda se yumi laekem olgeta mo yumi gat tangkyu long olgeta?
11 Samting we i rili givhan long waef blong ol elda we oli wokbaot blong visitim ol kongregesen, hemia ol tok we ol narafala oli talem long olgeta blong soemaot tangkyu from wok ya we oli stap mekem. Oli lego plante samting we oli wantem, blong givhan long hasban blong olgeta long wok ya. Ol sista ya we oli strong long bilif, oli blokem prapa filing blong olgeta we i stret nomo, blong wantem gat wan haos blong olgeta, mo plante taem tu, blong wantem gat pikinini. Gel blong Jepta i wan woman we i mekem wok blong Jeova, mo hem tu i rere blong lego jans blong gat wan hasban mo pikinini, from promes ya we papa blong hem i bin mekem. (Jajes 11:30-39) ?Olsem wanem ol narafala oli tingbaot nambawan fasin ya blong hem blong lego samting ya? Jajes 11:40 i talem se: “Evri yia ol gel blong Isrel oli stap go blong toktokgud long gel blong man Gilead ya, Jepta, blong fo dei long wan yia.” !I gud tumas taem yumi talemaot long waef blong ol seket mo distrik elda se yumi laekem olgeta tumas mo yumi gat tangkyu from wok blong olgeta!
“No Fogetem Fasin Ya Blong Tekem Man i Kam Long Haos”
12, 13. (a) ?Wanem vas blong Baebol i soem se yumi mas tekem ol elda we oli wokbaot blong visitim ol kongregesen mo waef blong olgeta oli kam long haos blong yumi? (b) Givim eksampel blong soemaot olsem wanem fasin ya blong tekem olgeta i kam long haos blong yumi i save givhan long yumi mo long olgeta tu.
12 Fasin blong tekem olgeta we oli stap wokbaot long Kristin wok blong visitim ol kongregesen oli kam long haos blong yumi, hemia wan narafala rod blong soemaot lav mo tangkyu long olgeta. (Hibrus 13:2) Aposol Jon i toktokgud long Gaeas from we hem i tekem ol misinari we oli stap wokbaot longwe blong visitim kongregesen, i kam long haos blong hem. Jon i raetem se: “Fren. Yu yu stap holem wok i strong. Ol brata ya blong yumi we oli kam long yu, nating we oli strenja long yu, be yu yu stap lukaotgud long olgeta. Oli talemaot finis long fes blong ol Kristin man blong ples ya we yu yu laekem olgeta tumas. Bambae taem oli livim ples blong yu, i gud yu givhan long olgeta long rod, long fasin we bambae God i glad long hem. From we oli stap wokbaot from wok blong Kraes nomo, mo oli no tekem sam samting long ol hiten man blong givhan long olgeta. I stret nomo blong yumi tekem ol man olsem oli kam long haos blong yumi, blong yumi save joen long ol wok blong olgeta blong talemaot trutok.” (3 Jon 5-8) Tede, yumi save givhan blong mekem wok blong talemaot Kingdom i go moa, taem yumi soemaot fasin ya blong tekem ol elda we oli wokbaot blong visitim ol kongregesen mo waef blong olgeta, oli kam long haos blong yumi. I tru se, ol elda blong ol wanwan kongregesen oli mas meksua se ol ples blong slip oli gud. Nating se i olsem, wan distrik elda i talem se: “Fasin joen blong mifala wetem ol brata i no mas dipen long tingting ya se hu long olgeta i naf blong givim gudfala samting long mifala. Mifala i no wantem nating blong mekem ol brata oli gat wan tingting olsem. Mifala i mas glad long olgeta kaengud fasin we ol brata oli soemaot long mifala taem oli singaot mifala i go long haos blong olgeta, nating se oli rij no oli pua.”
13 Fasin blong tekem olgeta oli kam long haos blong yumi i save karem blesing i kam long olgeta mo long yumi tu. Jorge, wan brata long Betel we bifo hem i wan seket elda, i tingtingbak se: “Long famle blong mi, mifala i gat kastom blong tekem ol elda we oli wokbaot blong visitim ol kongregesen oli kam stap long haos blong mifala. Mi ting se ol visit ya oli halpem mi bigwan, bitim we mi bin luksave long taem ya. Taem mi kam wan yangfala man, mi gat sam problem long saed blong speret. Mama blong mi i wari, be hem i no save olsem wanem blong halpem mi, taswe hem i askem seket elda blong toktok wetem mi. Fastaem mi mi stap longwe long hem, from we mi fraet se bambae hem i daonem mi. Be, fasin fren we hem i soemaot i pulum mi blong storeyan wetem hem. Hem i askem mi blong go kakae wetem hem long wan Mande, mo mi talemaot olgeta samting we i stap long hat blong mi, from we mi harem se bambae hem i kasem save long filing blong mi. Hem i lesingud. Ol gudfala advaes blong hem oli rili wokgud, mo mi stat blong kamgud long saed blong speret.”
14. ?From wanem yumi mas gat tangkyu i bitim we yumi tok agensem ol elda we oli wokbaot blong visitim ol kongregesen?
14 Wan elda we i visitim ol kongregesen i stap traehad blong givhan long evriwan long saed blong speret, nating se oli yangfala no olfala. Taswe, yumi mas soemaot tangkyu from ol traehad blong hem. Be, ?olsem wanem sipos yumi tok agens long hem from sam slak fasin blong hem, no sipos yumi skelem hem wetem sam narafala elda we oli bin visitim kongregesen bifo, nao yumi talem se hem i no nambawan olsem olgeta ya? Ating samting ya bambae i mekem elda ya i harem nogud tumas. Taem ol brata oli daonem Pol from wok blong hem, samting ya i mekem hem i harem nogud. I luk olsem we sam Kristin long Korin oli tok agensem hem from lukluk blong hem mo fasin blong toktok blong hem. Hem i tokbaot sam long ol nogud tok ya we oli talem, i se: “Ol tok blong Pol long ol leta ya blong hem oli strong tumas, oli hevi tumas. Be taem hem i stanap long fes blong yumi, hem i no wan strong man, mo ol tok blong hem i nating nomo.” (2 Korin 10:10) I gud se kolosap oltaem ol elda we oli wokbaot blong visitim ol kongregesen oli kasem ol gudfala tok we i soemaot lav mo fasin tangkyu blong ol brata.
15, 16. ?Olsem wanem lav mo strong tingting blong wok we ol Kristin brata mo sista oli soemaot i save gat paoa long ol elda we oli wokbaot blong visitim ol kongregesen mo waef blong olgeta?
15 Wan seket elda long Latin Amerika i mas wokbaot wan ful dei long rod we i sofmad nomo, blong visitim ol Kristin brata mo sista blong hem we oli stap long wan ples we ol raskal man blong faet oli bos long hem. Hem i raetem se: “Fasin tangkyu we ol brata oli soemaot from visit blong mi, i rili gat paoa long ol filing blong mi. Nating se mi mas traehad bigwan blong go kasem ples blong olgeta, we mi fesem denja mo hadtaem, be samting ya i karem pei taem mi luk lav mo strong tingting blong wok we ol brata ya oli soemaot.”
16 Wan seket elda long Afrika i raetem se: “!From lav we ol brata oli soemaot long mitufala, mitufala i laekem teritori blong Tansania tumas! Ol brata oli wantem we mitufala i lanem olgeta long plante samting, mo oli glad blong tekem mitufala i go long haos blong olgeta.” Long faswan handred yia, aposol Pol mo Kristin man ya Akwila wetem woman blong hem Prisila, oli gat wan gudfala fasin fren tugeta we i hapi mo i gat lav. Yes, Pol i tokbaot tufala ya, i se: ‘Talem halo long Akwila, wetem woman blong hem Prisila, we tufala i kampani wetem mi finis long wok blong Jisas Kraes. Tufala i rere blong lusum laef blong tufala from mi. Mi mi wantem tumas blong talem tangkyu long tufala. Be i no mi nomo, ol kongregesen long olgeta ples blong ol hiten man tu oli harem olsem.’ (Rom 16:3, 4) Tede, ol elda mo waef blong olgeta we oli wokbaot blong visitim ol kongregesen, oli gat bigfala tangkyu long ol fren blong olgeta we oli olsem Akwila mo Prisila, from we oli rili hadwok blong tekem olgeta oli go long haos blong olgeta, mo blong kampani wetem olgeta.
Mekem Ol Kongregesen Oli Strong Moa
17. ?From wanem yumi save talem se plan ya i waes we ol elda ya oli visitim ol kongregesen, mo ol elda ya oli kasem tijing long weples?
17 Jisas i talem se: “Frut blong waes blong God i stap soemaot we waes ya i tru.” (Matyu 11:19) Plan ya we ol elda oli wokbaot blong visitim ol kongregesen, i givhan long ol kongregesen blong ol man blong God blong kam strong moa. Samting ya i soemaot klia se plan ya i waes. Long namba tu misinari trep blong Pol, taem hem wetem Saelas tufala i gotru long ‘Siria mo Silisia, tufala i stap mekem ol kongregesen oli strong.’ Buk blong Ol Wok i talem se: ‘Taem oli gotru long ol taon, oli stap talemaot long ol man blong Jisas, ol rul ya we ol aposol mo elda long Jerusalem oli putum. Mo oli stap tijim olgeta, se oli mas holem ol rul ya. Nao long fasin ya, ol kongregesen oli stap kam strong moa bakegen long fasin blong bilif. Mo evri dei, namba blong ol man i stap kam antap moa.’ (Ol Wok 15:40, 41; 16:4, 5) Ol elda we oli wokbaot blong visitim ol kongregesen tede, oli kasem advaes long saed blong speret, tru long Baebol mo tru long ol buk blong ‘slef we i stret mo waes,’ long sem fasin we ol narafala Kristin tu oli stap kasem.—Matyu 24:45.
18. ?Olsem wanem ol elda we oli wokbaot blong visitim ol kongregesen oli mekem ol kongregesen oli kam strong moa?
18 Yes, ol elda we oli stap wokbaot blong visitim ol kongregesen oli mas gohed blong kakae long tebel blong Jeova long saed blong speret. Olgeta ya oli mas savegud olgeta plan mo rul we ogenaesesen blong God i stap folem. Olsem nao, ol man ya oli save karem bigfala blesing i go long ol narafala man. Tru long gudfala eksampel blong olgeta blong wok strong long wok blong prij, oli save halpem ol Kristin brata blong olgeta blong kamgud moa long wok ya. Ol tok we ol elda ya oli givim oli stanap long Baebol, mo oli mekem ol man we oli lesin oli strong long saed blong speret. Taem ol elda ya oli halpem ol narafala blong folem ol advaes long Tok blong God, blong gat wan tingting wetem ol man blong Jeova long olgeta ples blong wol, mo blong yusumgud olgeta kakae blong speret we God i stap givim tru long ‘slef we i stret,’ oli mekem ol kongregesen we oli visitim oli kam strong moa.
19. ?Wanem sam kwestin we yumi mas tokbaot yet?
19 Kolosap wan handred yia bifo, taem ogenaesesen blong Jeova i stanemap wok ya we sam elda bambae oli wokbaot blong visitim ol kongregesen blong ol Baebol Studen, Wajtaoa i talem se: “Bambae yumi traem luk wanem samting i kamaot from wok ya, mo olsem wanem bambae Masta i gohed blong lidim yumi.” I klia nomo se Jeova i stap lidim wok ya. From blesing blong hem mo from Hed Kampani we i lukaot long wok ya, long ol yia we oli pas wok ya i kam bigwan moa mo i kam moagud. From samting ya, ol kongregesen blong ol Wetnes blong Jeova long wol, oli kam strong moa long bilif mo namba blong olgeta i stap kam antap evri dei. I klia se, Jeova i stap blesem wok blong ol man ya we oli olsem presen long yumi, mo we oli rere blong lego plante samting we olgeta nomo oli wantem. ?Be, olsem wanem ol elda ya we oli wokbaot blong visitim ol kongregesen oli save mekemgud wok blong olgeta? ?Wanem sam mak we oli traehad blong kasem? ?Olsem wanem oli save givhan moa long ol kongregesen?
[Ol futnot]
a Wan grup blong man we oli joen wanples blong wosip.
b K.T. i minim Kristin Taem.
?Bambae Yu Yu Ansa Olsem Wanem?
◻ ?Wanem sam long ol wok blong seket mo distrik elda?
◻ ?From wanem ol elda we oli wokbaot blong visitim ol kongregesen oli mas rere blong lego plante samting we oli wantem?
◻ ?Olsem wanem yumi save soemaot tangkyu long wok blong ol elda we oli wokbaot blong visitim ol kongregesen mo waef blong olgeta?
◻ ?Ol elda we oli wokbaot blong visitim ol kongregesen oli save mekem wanem blong givhan long ol kongregesen blong kam strong moa long bilif?
[Tok blong pija long pej 10]
Blong gohed, oli mas rere blong lego sam samting we oli wantem tumas
[Tok blong pija long pej 13]
?Samtaem yu tekem ol elda mo waef blong olgeta we oli visitim kongregesen, oli kam long haos blong yu?