Japta 24
Mesej We i Swit Mo i Konkon
Stampa Tok: Vison blong smol buk. Samting we i hapen long haos blong God. Namba seven enjel i blou pupu blong hem
Taem we i kamtru: I stat taem Jisas i kam king long 1914 gogo taem blong bigfala trabol i kamtru long wol
1, 2. (a) ?Wanem i kamaot from namba tu trabol? ?Wetaem trabol ya bambae i finis? (b) ?Nao Jon i luk hu i aot long heven i kamdaon?
NAMBA tu trabol i spolem plante man. Hem i givim trabol long Krisendom mo ol lida blong hem, hemia “wan haf blong ol man.” Trabol ya i soemaot klia se Krisendom i ded long saed blong speret. (Revelesen 9:15) Taem Jon i luk namba tu trabol ya, ating hem i mas ting se namba tri trabol i no save bigwan moa. !Be wet! Namba tu trabol i no finis yet. Hem i mas gohed gogo i kasem mak we Revelesen 11:14 i talem, nao i save finis. Be fastaem, Jon i mas luk samting we i narakaen olgeta. Mo hem wan i mas joen long bisnes ya. Fastaem Jon i luk samting we hem i fraet from:
2 “Nao mi luk wan narafala enjel we i gat paoa, we i aot long heven i kamdaon. Hem i werem klaod olsem klos blong hem, mo i gat wan renbo i raon long hed blong hem. Fes blong hem i stap saen olsem san, mo leg blong hem i olsem bigfala pos be i faea nomo.”—Revelesen 10:1.
3. (a) ?Hu ya “enjel we i gat paoa”? (b) ?Wanem mining blong renbo we i raon long hed blong hem?
3 ?Hu ya “narafala enjel we i gat paoa”? I klia se hemia Jisas Kraes taem hem i gobak long heven finis, be hem i mekem wan narafala wok. Hem i werem klaod olsem klos, hemia i soemaot se man i no save luk hem. Samting ya i mekem yumi tingbaot tok we Jon i talem finis long saed blong Jisas, i se: “Yufala i luk. Naoia nomo, bambae Jisas i kam long klaod. Olgeta man bambae oli luk hem, stret long ae blong olgeta. Ol man ya we bifo oli sperem hem bambae oli luk hem.” (Revelesen 1:7; skelem wetem Matyu 17:2-5.) Renbo we i raon long hed blong hem i mekem yumi tingbaot vison we Jon i luk finis long saed blong jea blong Jeova long heven, we “i gat wan renbo . . . mo laet blong hem i saen olsem gudfala ston ya emral, we i grin.” (Revelesen 4:3; skelem wetem Esikel 1:28.) Renbo ya i minim pis mo kwaet taem raon long jea blong God. Long sem fasin, renbo we i raon long hed blong enjel i soemaot se hem i spesel man blong karem mesej blong pis, hemia nao “Prins blong Pis” blong Jeova, we ol profet oli talemaot.—Aesea 9:6, 7.
4. ?Wanem mining blong (a) fes blong enjel ya we i gat paoa, i stap saen “olsem san”? (b) leg blong enjel ya i olsem “bigfala pos be i faea nomo”?
4 Fes blong enjel ya we i gat paoa i stap saen “olsem san.” Bifo finis Jon i luk wan vison blong Jisas long haos blong God. Hem i talem se fes blong hem “i saen olsem san long medel dei.” (Revelesen 1:16) Jisas hem i “san blong stret fasin.” Ale hem i saenaot, mo laet blong hem i mekem man i haremgud. Hem i mekem i gud long ol man we oli fraet long nem blong Jeova. (Malakae 4:2) I no fes blong enjel ya nomo we i saen be leg blong hem tu i olsem “bigfala pos be i faea nomo.” Hem i stanap strong from we hem nao i Man ya we Jeova i givim “olgeta paoa long heven mo long wol” long hem.—Matyu 28:18, NW; Revelesen 1:14, 15.
5. ?Jon i luk wanem i stap long han blong enjel ya we i gat paoa?
5 Jon i go moa i se: “Mo i gat wan smol buk we i open finis, i stap long han blong hem. Hem i putum raet leg blong hem i stap long solwora mo lef leg blong hem i stap long drae graon.” (Revelesen 10:2) ?Wan narafala buk bakegen? Yes, be buk ya oli no lokem. Hem i open i stap. I no longtaem, yumi save luk wetem Jon sam moa gudfala samting i kamaot. Be fastaem, Baebol i talem sam samting blong yumi tingbaot wanem we i kamaot biaen.
6. (a) ?From wanem i stret nomo we wan leg blong Jisas i stap long solwora mo narafala leg i stap long drae graon? (b) ?Wetaem Ol Sam 8:5-8 i kamtru olgeta?
6 Nao yumi tingtingbak long Jisas long vison ya. Leg blong hem we i olsem faea, wan i stap long solwora mo wan i stap long drae graon. Naoia Jisas i stap rul wetem ful paoa blong hem long tufala samting ya. I olsem profet tok long Ol Sam i talem: “Yu [Jeova] yu mekem hem [Jisas], yu leftemap hem i hae we i hae, we yu nomo yu hae moa long hem. Yu mekem hem i olsem king, yu givim paoa mo ol gudgudfala samting long hem. Yu putumap hem blong i rul long olgeta samting we yu yu mekem, yu mekem hem i bos long olgeta samting ya. Ol sipsip mo ol buluk mo ol wael anamol, ol pijin mo ol fis mo olgeta samting insaed long solwora, be [hem] i bos long olgeta evriwan.” (Ol Sam 8:5-8; mo lukluk tu long Hibrus 2:5-9.) Vas ya i kamtru olgeta long 1914, taem Jisas i kam King blong Kingdom blong God mo taem blong en i stat. Taswe, ol samting we Jon i luk long vison ya oli kamtru biaen long 1914.—Ol Sam 110:1-6; Ol Wok 2:34-36; Daniel 12:4.
Tanda i Faerap Seven Taem
7. ?Enjel ya we i gat paoa i singaot olsem wanem? ?Mo wanem mining blong bigfala voes blong hem?
7 Jon i stap tingbaot enjel ya we i gat paoa, nao wantaem nomo hem i sek long samting we enjel ya hem wan i mekem: “Nao hem [enjel ya] i singaot bigfala, we mi harem voes blong hem i olsem laeon we i stap singaot bigfala. Taem hem i singaot olsem, tanda i faerap seven taem, blong ansa long hem bakegen.” (Revelesen 10:3) Wan bigfala voes olsem i mas pulum Jon blong lesingud. Mo voes ya i pruvum se Jisas i trufala “Laeon blong Juda.” (Revelesen 5:5) Mo tu, Jon i save se samtaem Jeova tu i “singaot bigfala.” Sam profet tok we i talem se Jeova i singaot bigfala i min se hem i singaot ol man Isrel blong speret oli kam wanples, mo i makem bigfala “dei blong Jeova” blong spolem ol rabis fasin. (Hosea 11:10; Joel 3:14, 16; Emos 1:2; 3:7, 8) Taswe i klia se voes blong strong enjel ya we i olsem laeon i singaot bigfala, i talemaot sam bigfala samting we oli mas hapen long solwora mo long graon. Hem i singaot, nao tanda i faerap seven taem blong ansa long hem.
8. ?Wanem ya ‘tanda we i faerap seven taem’?
8 Bifo finis, Jon i harem noes blong tanda i kamaot long jea blong Jeova stret. (Revelesen 4:5) Long taem blong Deved bifo, plante taem oli tokbaot tanda olsem we hem i “voes blong Jeova.” (Ol Sam 29:3, NW ) Taem Jisas i stap mekem minista wok blong hem long wol, Jeova i talemaot long voes we ol man oli save harem se plan blong hem i blong leftemap nem blong hem. Plante man we oli harem voes ya, oli ting se tanda i stap faerap. (Jon 12:28, 29) From samting ya, i stret blong ting se ‘tanda we i faerap seven taem,’ hemia voes blong Jeova nomo we i talemaot ol plan blong hem. Jon i harem we tanda i faerap “seven taem.” Hemia i min se ol samting we Jon i harem, hem i kasem fulwan.
9. ?Voes we i kamaot long heven i givim wanem oda?
9 !Be lesin! Narafala voes i singaot. Hem i givim wan oda we ating i narakaen long tingting blong Jon: “Nao taem we tanda ya i faerap seven taem olsem, mi mi rere blong raetemdaon tok we i kamaot long hem. Be mi harem wan tok we i kamaot long heven, we i talem se ‘Yu mas haedem tok ya we i kamaot long tanda ya, yu no raetemdaon.’ ” (Revelesen 10:4) Ating Jon i wantem tumas blong harem mo raetemdaon ol mesej we oli kamaot long tanda ya. Sem mak long grup olsem Jon tede, oli wet long Jeova, oli wantem tumas we hem i talemaot ol plan blong hem blong oli save prentem. Samting ya i save hapen long stret taem blong Jeova nomo.—Luk 12:42; mo tu lukluk Daniel 12:8, 9.
Tabu Tok Haed i Kamtru
10. ?Enjel we i gat paoa i talem nem blong hu blong mekem tok blong hem i strong? ?Wanem promes blong hem?
10 Long semtaem, Jeova i givim wan narafala wok long Jon. Tanda i faerap seven taem finis, nao enjel we i gat paoa i toktok bakegen. Jon i talem se: “Nao enjel ya we mi luk i stap stanap long solwora mo long drae graon, hem i leftemap raet han blong hem, i poen long heven. Nao blong mekem tok blong hem i strong, hem i talem nem blong God. Hem i talem God ya we i laef, we i no save ded samtaem, we i mekem skae wetem olgeta samting blong hem mo graon wetem olgeta samting blong hem mo solwora wetem olgeta samting blong hem. Nao i talem [strong promes ya, “NW”] se ‘I no moa gat wan samting blong blokem bakegen.’ ” (Revelesen 10:5, 6) ?Enjel ya we i gat paoa i talem nem blong hu blong mekem tok blong hem i strong? Jisas we i tekem paoa blong hem finis, i no mekem promes blong hem i stanap long hem wan nomo. No gat. Hem i mekem tok blong hem i stanap long man we i gat moa paoa i bitim ol narafala, hemia Jeova, Bigfala Man blong Wokem heven mo wol, we i no save ded samtaem. (Aesea 45:12, 18) Enjel ya i promes strong long Jon se i no moa gat wan samting bakegen i save blokem God.
11, 12. (a) ?Wanem mining blong tok ya se: “I no moa gat wan samting blong blokem bakegen”? (b) ?Wanem i kamtru olgeta?
11 Long vas ya, Grik tok we oli tanem i kam “blokem,” hemia khroʹnos. Prapa mining blong hem se “taem.” Taswe samfala oli ting se i moa stret blong tanem tok blong enjel ya olsem: “I no moa gat taem,” olsem we bambae yumi no moa kaontem taem. Be long ples ya oli yusum Grik tok ya khroʹnos long fasin we i no minim taem nomo, be i minim wan “stret taem” no “taem we oli makemaot finis.” Taswe i min se i no moa gat taem we Jeova i makemaot finis blong hem i wet [no blong blokem hem]. Long Hibrus 10:37, i gat wan Grik veb we i kamaot long tok ya khroʹnos. Long ples ya, Pol i talem bakegen profet tok blong Habakuk 2:3, 4, se: “Hemia we i stap kam, . . . Hem i no save tektaem tumas.”
12 “I no moa gat wan samting blong blokem bakegen.”—!Ol olfala blong grup ya we i olsem Jon oli laekem tumas tok ya! ?Olsem wanem i no moa gat wan samting blong blokem? Jon i talem ansa long yumi se: “Taem namba seven enjel bambae i blou pupu blong hem, hemia nao. Plan ya blong God we hem i talemaot finis long ol man blong hem we oli profet, be i stap haed yet [tabu tok haed, “NW”], plan ya bambae i kamtru nao.” (Revelesen 10:7) !Saye, stret taem blong Jeova i kam, blong hem i mekem tabu tok haed blong hem i kamtru, mo i win bigwan!
13. ?Wanem ya tabu tok haed blong God?
13 ?Wanem ya tabu tok haed ya? Hem i long saed blong laen we God i promes fastaem long Iden. Bigfala man long laen ya hemia Jisas Kraes. (Jenesis 3:15; 1 Timote 3:16) Mo tu, tabu tok haed ya i long saed blong woman we Laen ya i kamaot long hem. (Aesea 54:1; Galesia 4:26-28) Mo tu, insaed long tabu tok haed i gat ol narafala memba blong laen ya, wetem Kingdom we Laen ya i rul long hem. (Luk 8:10; Efesas 3:3-9; Kolosi 1:26, 27; 2:2; Revelesen 1:5, 6) Long taem blong en ya, ol man oli mas talemaot gud nyus blong spesel Kingdom ya long heven, long olgeta ples long wol.—Matyu 24:14.
14. ?From wanem vas i joenem namba tri trabol wetem Kingdom blong God?
14 Tru, nyus ya i moa gud i bitim ol narafala nyus. Be Revelesen 11:14, 15 i joenem namba tri trabol wetem Kingdom ya. ?From wanem? From we ol man we oli laekem moa wol blong Setan, oli no laekem nating gud nyus ya se tabu tok haed blong God i kamtru finis—Kingdom blong Mesaea blong God i stanap finis. (Skelem wetem 2 Korin 2:16.) Hemia i min se wol ya we oli laekem tumas, kolosap nao bambae i lus. Tanda we i faerap seven taem i talemaot ol strong woning long trabol ya we i kolosap. Mo ol woning ya oli kam klia mo strong moa, taem bigfala dei blong Jeova blong givimbak i kam kolosap moa.—Sefanaea 1:14-18.
Buk We i Open
15. ?Voes we i kamaot long heven mo enjel we i gat paoa tufala i talem wanem long Jon? ?Samting ya i mekem wanem long Jon?
15 Taem Jon i stap wet blong namba seven enjel i blou pupu blong hem mo blong tabu tok haed blong God i kamtru, hem i kasem wan narafala wok: “Nao tok ya we i kamaot long heven, we mi harem finis, hem i tok long mi bakegen, i se ‘Yu go tekem buk ya we i open finis, we i stap long han blong enjel ya we i stap stanap long solwora mo long drae graon.’ Nao mi go long enjel ya, mi askem long hem blong i givim smol buk ya long mi. Hem i talem long mi, i se ‘Yu tekem, yu kakae. Long maot blong yu bambae i swit olsem eg blong sugabag, be long bel blong yu bambae yu harem i nogud.’ Nao mi tekem smol buk ya we i stap long han blong hem, mi kakae. Mo long maot blong mi, i swit olsem eg blong sugabag. Be taem mi solemdaon finis, mi harem we bel blong mi i nogud long hem. Nao mi harem tok we i talem long mi, se ‘Wan taem bakegen yu yu mas talemaot tok we God i givim, we i stap tokbaot ol man blong plante narnarafala kantri mo kala mo lanwis mo king.’ ”—Revelesen 10:8-11.
16. (a) ?Olsem wanem samting we i hapen long profet Esikel i kolosap sem mak long ekspiryens blong Jon? (b) ?From wanem smol buk ya i swit long maot blong Jon? ?Be taem hem i solemdaon, from wanem hem i harem we bel blong hem i nogud long hem?
16 Samting ya we i kamaot long Jon i kolosap sem mak long samting we i hapen long profet Esikel, taem hem i stap kalabus long Babilon. Hem tu i kasem oda blong kakae wan buk we i swit long maot blong hem. Be taem hem i solemdaon, samting ya i pusum hem blong talemaot ol nogud samting we i mas kam long stronghed laen blong Isrel. (Esikel 2:8 kasem 3:15) Buk ya we i open we Jisas Kraes i givim long Jon, hem tu i wan mesej long God. Jon i mas prij, hem i mas tokbaot “ol man blong plante narnarafala kantri mo kala mo lanwis mo king.” Taem Jon i kakae buk ya, hem i harem i swit from we hem i kamaot long God nomo. (Skelem Ol Sam 119:103; Jeremaea 15:15, 16.) Be hem i harem we bel blong hem i nogud long hem. ?From wanem? Olsem Esikel bifo, mesej long smol buk ya i no wan gudfala mesej long ol man we oli stronghed.—Ol Sam 145:20.
17. (a) ?Hu ya olgeta we oli talem long Jon blong talem tok blong God “bakegen”? ?Hemia i minim wanem? (b) ?Samting we Jon i luk bambae i mas kamtru wetaem?
17 Tufala we i talem long Jon se hem i mas talem bakegen tok we God i givim, hemia Jeova God mo Jisas Kraes. Nating we Jon i kalabus long aelan ya Patmos, be hem i talemaot profet tok finis long saed blong ol pipol, ol nesen, ol lanwis, mo ol king, from ol samting we hem i raetemdaon finis long Revelesen. Tok ya “bakegen” i min se hem i mas raetemdaon mo talemaot ol narafala haf blong buk blong Revelesen. Be tingbaot, Jon hem wan i stap joen long vison ya. Samting we hem i raetemdaon, hem i wan profet tok we bambae i kamaot biaen long 1914, taem enjel we i gat paoa i stanap, wan leg long drae graon mo wan leg long solwora. ?Wanem mining blong samting ya long grup we i olsem Jon tede?
Smol Buk Ya Tede
18. ?Long stat blong dei blong Masta, grup we i olsem Jon oli intres olsem wanem long buk blong Revelesen?
18 Samting we Jon i luk long vison ya i stret pija blong samting we i kamaot long grup olsem Jon, long stat blong dei blong Masta. Long taem ya oli no kasem ful save long plan blong Jeova mo mining blong tanda we i faerap seven taem. Be oli intres tumas long Revelesen. Mo taem Charles Taze Russell i laef, hem i eksplenem plante haf blong Revelesen. Hem i ded long 1916, mo biaen oli hivimap ol raeting blong hem, mo oli prentem wan buk long olgeta, nem blong buk ya: The Finished Mystery. Be biaen oli luksave se buk ya i no eksplenem gud Revelesen. Smol haf blong ol brata blong Kraes we oli stap long wol yet, oli mas wet smol moa gogo ol vison oli stat kamtru. Nao bambae oli kasem stret save long tok ya we God i givim long Jon.
19. (a) ?Olsem wanem Jeova i yusum grup ya we i olsem Jon, bifo we oli prentem olgeta mesej blong tanda we i faerap seven taem? (b) ?Wetaem grup we i olsem Jon i kasem smol buk ya we i open? ?Samting ya i minim wanem long olgeta?
19 Olsem we Jeova i yusum Jon fastaem, hem i yusum ol brata blong Kraes tu, bifo we oli prentem fulwan ol mesej blong tanda we i faerap seven taem. Bifo 1914, oli prij strong gogo 40 yia i pas. Mo oli traehad blong gohed long wok ya long ol yia blong faswan bigfala faet long wol. Hemia nao olgeta we taem Masta i kamtru hem i faenemaot se oli stap givimaot kakae long ol man blong wok long stret taem. (Matyu 24:45-47) Taswe long 1919 olgeta ya nao oli kasem smol buk ya we i open finis. Hemia i minim wan mesej we i no haed we oli mas talemaot long ol man. Olsem Esikel, oli mas givim mesej long wan ogenaesesen we i no stap obei long God. Hemia Krisendom, we i stap talem se hem i wosip long God, be hem i no mekem olsem nating. Olsem Jon, oli mas prij moa yet long saed blong “plante narnarafala kantri mo kala mo lanwis mo king.”
20. ?Taem Jon i kakae smol buk ya, samting ya i pija blong wanem?
20 Jon i kakae smol buk ya. Hemia i min se ol brata blong Jisas oli agri long wok we God i givim. Hem i kam olsem haf blong laef blong olgeta from we haf ya blong Tok blong God i kamtru long olgeta, ale hem i olsem kakae blong olgeta. Be mesej we oli mas talemaot, hemia ol jajmen blong Jeova we fulap man oli no wantem harem. Yes, insaed long mesej ya oli mas talemaot ol panis blong Revelesen japta 8. Be mesej ya i swit long ol trufala Kristin. Oli wantem save ol jajmen mesej ya mo luksave we Jeova i stap yusum olgeta bakegen blong talemaot ol jajmen blong hem.—Ol Sam 19:9, 10.
21. (a) ?Olsem wanem mesej long smol buk ya i swit tu long bigfala kampani? (b) ?Olsem wanem gud nyus ya i nogud long ol man we oli olsem nani?
21 Biaen, mesej long smol buk ya i swit tu long “bigfala kampani blong man, we i . . . kamaot long olgeta nesen, mo long olgeta laen, mo long olgeta kantri, mo long olgeta lanwis.” Olgeta oli harem nogud from ol rabis samting we Krisendom i stap mekem. (Revelesen 7:9, NW; Esikel 9:4) Mo tu, olgeta ya oli strong blong talemaot gud nyus ya. Oli yusum ol gudfala, kaen toktok blong eksplenem ol gudfala samting we Jeova i mekem blong givhan long ol Kristin we oli olsem sipsip. (Ol Sam 37:11, 29; Kolosi 4:6) Be long tingting blong ol man we oli olsem nani, mesej ya i nogud. ?From wanem? From we hem i talem se wol ya we oli trastem—we ating oli stap haremgud long hem blong smoltaem—hem i mas lus. Taswe gud nyus ya i spolem olgeta.—Matyu 25:31-34, 41, 46; skelem wetem Dutronome 28:15; 2 Korin 2:15, 16.
[Tok Blong Pija Long Pej 160]
Grup we i olsem Jon bifo mo ol man we oli joen wetem olgeta oli talemaot wan mesej we i swit mo i konkon long ol man