Baebol i Talem Wanem
?Olsem Wanem Blong No Moa Wantem Ol Nogud Samting?
“Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta.”—Rom 7:21.
LONG olgeta aposol, ating Pol nao i wok strong moa blong pulum ol man blong folem ol rul blong Kristin skul long saed blong klin fasin. (1 Korin 15:9, 10) Nating se i olsem, long vas antap, hem i talem se i no isi long hem tu blong folem ol rul ya. I gat wan faet we i stap gohed oltaem long bodi blong hem, bitwin ol gudfala tingting mo ol nogud tingting. ?Sam samtaem yu yu gat sem tingting olsem aposol Pol? From we yumi sinman, ating yumi evriwan i bin harem samtaem se i gat wan faet i stap gohed long bodi blong yumi.
Be samfala oli faenem i strong we i strong blong winim ol tingting ya we oli no stret. Sam man oli wantem tumas ol nogud fasin blong seks. Sam narafala oli olsem slef blong wan nogud fasin, maet plei laki, sigaret, ol drag, no strong dring. ?Olsem wanem yumi save blokem filing ya blong wantem tumas ol samting we oli no stret mo oli no klin? ?Wanem i save givhan long yumi? ?Samtaem bambae yumi kam fri long ol tingting we oli pulum yumi blong mekem samting we i no stret?
Lav—Bigfala Samting We Yumi Nidim
Jisas i tokbaot tu loa we tufala i hae moa long ol narafala Loa we God i givim long Moses. Faswan hemia: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) Sipos yumi lavem God long fasin we Jisas i talem, samting we bambae yumi wantem moa, hemia blong mekem hem i glad. !Gudfala tingting ya nao i save givhan long yumi blong no moa wantem ol nogud samting, nating se ol tingting ya oli strong tumas mo oli stap longtaem finis i kam! Hemia i no wan drim nomo. Plante milian Kristin oli stap blokem ol nogud tingting evri dei. ?Olsem wanem yu save frengud wetem God olsem olgeta ya? Yu mas tingting dip long gudfala fasin blong Jeova we yu luk long ol samting we hem i wokem, mo long Baebol, mo long ol samting we hem i mekem long yu wan, nao biaen yu save gat tangkiu from.—Ol Sam 116:12, 14; 119:7, 9; Rom 1:20.
Namba tu loa we Jisas i talem, hemia: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22:39) Aposol Pol i talem se man we i gat lav, hem i no save mekem “fasin we man i sek nogud long hem,” mo “i no save tingbaot hem nomo.” Lav ya we i joen wetem fasin blong no tingbaot yumi nomo, i save givhan long yumi blong blokem ol fasin we oli mekem narafala i harem nogud. (1 Korin 13:4-8, NW ) ?Olsem wanem blong wokem lav ya? Yu mas traem kasem save long filing blong ol narafala, yu mas rili tingbaot olgeta mo traem mekem i gud long olgeta.—Filipae 2:4.
?Wanem i Save Givhan Long Yu?
God i save se i no isi nating long yumi blong mekem i stret oltaem. Taswe, hem i givim plante samting blong halpem yumi. Long Tok blong hem, Baebol, hem i tijim yumi blong no laekem nating ol rabis fasin, mo blong fraet blong mekem samting we hem i no laekem. (Ol Sam 86:11; 97:10) I gat plante stori long Baebol blong ol man longtaem bifo we oli kasem trabol taem oli folem ol tingting we oli no stret. Mo tu, Jisas i talem se sipos yumi askem long God blong i givim tabu spirit long yumi, bambae hem i givim. I no gat wan paoa long heven mo wol we i strong moa long tabu spirit ya. (Luk 11:13) Tabu spirit i save givim strong tingting long yumi blong mekem samting we i stret. Wan narafala samting we i save leftemap tingting blong yu, hemia kampani mo lav blong ol narafala Kristin we olgeta ya tu oli stap traehad blong no moa wantem ol nogud samting. (Hibrus 10:24, 25) Taem ol gudfala samting ya oli gat paoa long yu, bambae i no moa gat ples blong ol nogud tingting mo filing, nao yu save winim faet we i stap gohed long bodi blong yu. (Filipae 4:8) ?Samting ya i rili tru?
Tingbaot man ya Fidel, we ol man raonabaot long hem oli savegud se hem i wan man blong drong fastaem. Taem hem i dring, hem i save smok sigaret, i save westem mane long plei laki, mo i save faetem narafala man tu. Be taem hem i stadi Baebol wetem ol Witnes blong Jeova mo i kampani wetem olgeta, hem i winim ol nogud fasin ya. Naoia, hem i gat wan gudfala laef wetem woman blong hem mo tufala pikinini blong hem.
Maet yu askem se, ‘?Be olsem wanem sipos mi foldaon bakegen long wan nogud fasin we mi lego finis long hem?’ Aposol Jon i tokbaot samting ya. Hem i raetem se: “Ol pikinini blong mi. Mi mi stap raetem ol tok ya i kam long yufala blong blokem yufala, blong yufala i no mekem sin. Be sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.” (1 Jon 2:1, 2) Yes, sakrefaes blong Jisas i save tekemaot sin blong man we i tanem tingting blong hem from rong we hem i mekem, mo we i rili traehad blong jenisim ol fasin blong hem blong mekem God i glad. Taem yu tingbaot nambawan sakrefaes blong Jisas, i no gat wan samting we i save mekem yu yu lego faet ya.
Ol Nogud Tingting Bambae Oli Finis
Sipos yu lanem blong lavem God mo ol man raonabaot long yu, mo yu yusum evri samting we God i givim blong halpem yu, naoia nomo yu save winim faet ya blong no moa wantem ol nogud samting. Antap moa, Tok blong God i promes se faet ya bambae i no save gohed olwe. Klosap nao, olgeta we oli yusum ol samting we God i givim blong halpem olgeta, bambae oli kamgud fulwan long bodi mo tingting. (Revelesen 21:3-5; 22:1, 2) Bambae oli kamfri long bigfala baden ya blong sin mo frut blong hem, ded. (Rom 6:23) Be olgeta we oli gohed nomo blong mekem nogud fasin mo fasin we i no klin, bambae oli no save kasem ol blesing ya.—Revelesen 22:15.
I gud tumas blong save se faet ya blong no moa wantem ol nogud samting bambae i no save gohed olwe. Ol samting ya bambae oli finis blong olwe. !Long taem ya, bambae yumi haremgud bitim mak!