Japta 3

Olsem Wanem Mi Save Pulum Papa Mama Blong Letem Mi Mi Fri Moa?

MAET yu yu gat tingting se yu bigwan naf blong kambak let long naet long wiken, be tufala i talem se yu mas kambak eli. Yu yu wantem go long sinema blong luk wan niufala film we evriwan i stap tokbaot, be tufala i talem se bambae yu no save go. Yu yu wantem goaot wetem sam gudfala yangfala we yu jes mitim olgeta, be tufala i talem se tufala i mas save ol fren blong yu fastaem.

Taem we yu yangfala, samtaem yu save harem se papa mama blong yu, tufala i stap bos tumas long laef blong yu. I luk olsem se evritaem yu askem wan samting, tufala i talem ‘no.’ Nomata wanem samting yu mekem no yu talem, be ‘ae’ blong tufala i stap wajemgud yu. Debbie we i gat 15 yia, i talem se: “Oltaem, papa blong mi i wantem save se mi mi stap go wea, mo wanem taem bambae mi kambak long haos. Plante papa mama oli mekem olsem. ?Oli nidim blong save evri samting? I gud sipos tufala i letem mi mi fri moa.”

Antap long samting ya, plante yangfala oli talem se papa mama blong olgeta i no gat respek long olgeta. Oli talem se tufala i neva trastem olgeta, ale, taem i gat trabol, kwiktaem nomo tufala i jajem olgeta. Oli no moa save jusum samting we oli wantem from we papa mama blong olgeta i putum rul long evri samting.

‘Harem Nogud Tumas Long Tingting’

?Papa mama blong yu, tufala i mekem long yu olsem we yu wan pikinini nomo? Sipos i olsem, yu no mas fogetem se sam yia nomo bifo, yu yu stap olsem wan pikinini. Papa mama blong yu, tufala i rimemba gud taem ya we yu yu smol, mo yu yu no naf blong mekem samting blong yu wan. I no isi long tufala blong luksave se yu yu no moa olsemia. Tufala i tingbaot yet olgeta mastik we yu bin mekem taem yu yu pikinini. From samting ya, tufala i wantem lukaotgud long yu—nating se yu wantem no yu no wantem olsem.

Olgeta papa mama oli gat strong tingting ya blong wantem protektem pikinini blong olgeta. Papa mama blong yu, tufala i stap wok strong blong givim ples blong slip, klos, mo kakae long yu. Taem tufala i no bisi long ol wok ya, tufala i stap traehad blong tijimgud yu, stretem yu, mo tu, protektem yu. Papa mama blong yu i no tingbaot ol wok ya olsem wan samting nating nomo. Tufala i stap mekem wok ya long fes blong God. (Efesas 6:4) Taswe, taem tufala i luk se bambae trabol i kasem yu, tufala i wari.

Tingbaot papa mama blong Jisas Kraes. Tufala i wokbaot i go long Jerusalem wetem Jisas, nao biaen, tufala i aot blong wokbaot i gohom, be tufala i fogetem Jisas. !Taem tufala i luksave se hem i no stap biaen long tufala, tufala i wari tumas, ale tufala i go lukaot hem olbaot long taon ya! Taem tufala i faenem hem “insaed long haos blong God,” mama blong Jisas i tok long hem se: “Pikinini blong mi. ?From wanem yu mekem long mitufala olsem? Mi wetem papa blong yu, mitufala i stap lukaot yu we mitufala i stap harem nogud tumas.” (Luk 2:41-48) Yes, nating se Jisas i wan pikinini we i stret olgeta, be hem i mekem papa mama blong hem i wari tumas. Taswe, yu tu, samtaem ating yu mekem papa mama blong yu i wari bigwan.

Wan eksampol. Tingbaot rao we i stap kamaot oltaem long saed blong stret taem we yu mas kambak long haos. Maet yu yu ting se i no gat nid blong putum wan rul olsemia. ?Be, yu bin traem blong tingbaot bisnes ya olsem papa mama blong yu i stap tingbaot? Ol yangfala we oli raetem buk ya The Kids’ Book About Parents, oli traem blong mekem olsem. Oli raetemdaon “olgeta samting we i save stap long tingting blong ol papa mama taem yangfala blong olgeta i no kambak long haos long stret taem we oli makem.” Long ol samting ya, i gat tingting ya se yangfala ‘i stap tekem drag, i aksiden long trak, i stap wokbaot olbaot blong nating nomo, ating polis i holem hem, hem i stap luk ol rabis sinema long saed blong seks, i stap salem drag, wan man i repem hem no i stilim olting blong hem, mo maet hem i stap long kalabus we i mekem sem long famle.’

Ating i no olgeta papa mama evriwan we oli hareap blong tingbaot ol samting ya we oli nogud tumas. Be, i tru se plante yangfala tede oli rili stap kasem ol trabol olsem. ?Taswe, i stret we yu agensem papa mama blong yu taem tufala i talem se yu save kasem trabol sipos yu kambak let oltaem mo sipos yu joen wetem ol rabis fren? !Papa mama blong Jisas tu i wantem save wanem samting Jisas i stap mekem!

?From Wanem Tufala i Stap Lukaotgud Long Yu Bitim Mak?

!Sam yangfala oli talem se papa mama blong olgeta oli bitim mak long fasin blong wari long olgeta! Be, yu no mas fogetem se papa mama blong yu, tufala i bin lusum fulap taem blong givim lav mo kea long yu. Maet tufala i harem nogud blong tingbaot se yu yu stap kam bigwan mo se wan dei bambae yu mas livim tufala. Wan papa i talem olsem se: “Mi mi gat wan pikinini nomo, wan boe we naoia i gat 19 yia blong hem. Mi harem nogud tumas blong tingbaot se wan dei bambae hem i livim mi.”

Taswe, samfala papa mama oli bitim mak long fasin blong lukaot long pikinini blong olgeta. Be sipos papa mama blong yu i mekem olsem, yu no mas mekem bigfala mastik ya blong agensem tufala from. Wan yangfala woman i tingtingbak se: “Kam kasem taem we mi mi gat 18 yia, mi frengud wetem mama blong mi. . . . [Be] biaen, trabol i kamaot. Mi mi wantem kam fri moa, be ating mama i tingting se samting ya bambae i spolem fasin fren blong mitufala. Nao hem i traem blokem mi moa. Be mi mi harem nogud, mi traem blong kamaot long paoa blong hem.”

I gud blong fri lelebet, be i nogud blong spolem fasin joengud long famle, jes blong kam fri moa. ?Taswe, olsem wanem yu save mekem we yu fren wetem papa mama blong yu, olsem wan bigman, i no wan pikinini? ?Olsem wanem yufala i save kasem save long yufala, we yufala i respektem tingting blong yufala, mo yufala i ona long yufala? Wan samting blong tingbaot, hemia se, taem wan man i ona long narafala, bambae narafala i ona long hem tu. Aposol Pol i bin talem se: “Long fasin blong yumi man, oltaem ol papa blong yumi oli stap stretem yumi, mo yumi stap ona long olgeta from.” (Hibrus 12:9) Ol papa mama blong ol faswan Kristin ya, olgeta tu oli mestem samtaem. Taswe, (long vas 10) aposol Pol i gohed blong talem se: “Ol papa blong yumi . . . oli mekem bes blong olgeta blong tijim yumi.”—The Jerusalem Bible.

Samtaem ol papa mama ya bifo, oli mestem. Nating se i olsem, i stret nomo we ol pikinini blong olgeta oli ona long olgeta. Samting ya i sem mak long papa mama blong yu. Sipos tufala i bitim mak samtaem long fasin blong lukaot long yu, samting ya i no givim raet long yu blong mekem stronghed. Yu mas ona long tufala olsem we yu wantem se tufala i ona long yu.

Taem Tufala i No Kasem Save Long Tingting Blong Yu

Maet wan dei yu bin kambak let long haos. Maet wan samting i blokem yu we i no fol blong yu. Nao ating papa mama blong yu i bin tok strong long yu. Taem i gat trabol olsem, hemia wan janis blong yu yu pulum tufala blong respektem yu. Tingbaot samting we Jisas i mekem, taem papa mama blong hem i faenem hem long haos prea, we hem i stap storian long Tok blong God wetem ol tija blong Loa. Tufala i tok long hem. ?Nao Jisas i mekem wanem? ?Hem i sakem ol tok kros long tufala, i krae, i toktok smol se tufala i stap gat nogud tingting long hem oltaem? Nogat. Makemgud ansa we Jisas i givim long kwaet fasin, i se: “?From wanem yutufala i stap lukaot mi? ?Yutufala i no save se mi mi mas stap long haos blong Papa blong mi?” (Luk 2:49) Yumi save se papa mama blong Jisas i mas tinghae long hem from gudfala fasin ya we hem i soemaot. Yes, “sipos yu toktok gud long man we i kros, bambae yu save mekem tingting blong hem i kam kwaet.” Mo long fasin ya, yu save pulum papa mama blong yu blong respektem yu tu.—Ol Proveb 15:1.

Ol Rul

Sipos yu lesin long papa mama blong yu, samting ya i save pulum tufala blong mekem i gud long yu. Be sipos yu no wantem harem tok blong tufala, ating bambae tufala i mekem i strong moa long yu. Sam yangfala oli no wantem toktok, oli giaman, mo oli no lesin nating long papa mama blong olgeta. Traem soemaot se yu yu gruap finis long tingting blong yu. Sipos yu wantem kambak let long haos, yu no mas mekem fasin blong pikinini mo taltalem se: “Papa mama blong ol narafala yangfala oli letem olgeta oli kambak let.” Wan woman blong raetem buk, nem blong hem Andrea Eagan, i givim advaes ya se: “[Talemaot] long tufala evri samting we yu wantem mekem. Nao bambae tufala i kasem save gud. . . . Sipos yu talem weples bambae yu go long hem, mo wetem hu, mo from wanem yu wantem kambak let, . . . ating tufala i save letem yu yu fri blong go.”

Sipos papa mama blong yu i wantem jekemap olgeta fren blong yu, hemia raet blong tufala, yu no mas toktok smol olsem wan pikinini. Buk ya Seventeen i givim advaes ya se: “Sam samtaem i gud blong pulum ol fren blong yu oli kam long haos. Nao sipos wan dei yu wantem go long sinema wetem fren blong yu Bill, papa blong yu i no save askem se, ‘?Bill? ?Hu ya Bill?’”

“Bambae Hem i Save Kasem Sam Moa Samting Bakegen”

Jim i stap laf taem hem i tokbaot smol brata blong hem Ron. Hem i se: “Mi mi bon 11 manis nomo bifo long hem, be papa mama blong mitufala i no mekem i sem mak long mitufala. Tufala i letem mi mi mekem plante samting. Mi save yusum trak blong tufala. Wan taem, tufala i letem mi mi karem narafala smol brata blong mi i go kasem New York.”

Jim i gohed se: “Be tufala i mekem i defren long Ron. Tufala i no letem hem i mekem plante samting. Taem Ron i kam bigwan, papa blong mi i no tijim hem blong draevem trak. Mo taem Ron i ting se hem i naf blong fren wetem wan gel, papa mama blong mi i no wantem.”

?Olsem wanem? ?Papa mama blong tufala i laekem Jim moa long Ron? Nogat. Jim i eksplenem se: “Ron i no stap tinghevi long ol wok we tufala i givim long hem. Hem i no naf blong luksave stret samting blong mekem. Plante taem, hem i no mekem samting we papa mama i askem long hem blong mekem. Wan narafala samting, mi mi neva tokbak long papa mama blong mi. Be Ron i rao wetem tufala taem hem i no agri. Samting ya i mekem se tufala i no trastem gud hem.” Long Matiu 25:29 Jisas i talem se: “Man we i gat samting finis, bambae hem i save kasem sam moa samting bakegen, gogo bambae hem i gat plante. Be man we i no gat samting, wanem smol samting nomo we hem i gat, be bambae hem i mas lusum.”

?Yu yu wantem se papa mama blong yu i letem yu yu fri moa, mo tufala i letem yu yu jusum wanem samting we yu save mekem? Ale, soemaot long tufala se yu yu naf blong mekem olsem. Yu mas mekemgud olgeta wok we tufala i givim long yu. Yu no mas mekem olsem yangfala man ya we Jisas i tokbaot long wan pijatok blong hem. Papa blong yangfala ya i talem long hem se: “Ei, tede bambae yu go wok long garen blong yumi.” Nao boe ya i ansa long hem se: “Oraet, papa, bambae mi go,” be biaen, “hem i no go.” (Matiu 21:28, 29) Soemaot long papa mama blong yu se nomata wanem wok we tufala i givim long yu, be bambae yu yu glad blong mekem.

Jim i talem se: “Mi mi soemaot long papa mama blong mi se mi mi naf blong mekemgud olgeta wok we tufala i givim long mi. Taswe, tufala i sanem mi mi go long bang, mi go pem ol kaon blong mifala, mo mi pem ol samting we mifala i nidim long stoa. Taem mama i faenem wan wok, mi mi kukum kakae blong mifala tu.”

Yu No Wet We Tufala i Talem Samting Long Yu

?Olsem wanem sipos papa mama blong yu i no stap givim wok long yu? Yu no mas wet blong tufala i talem long yu. Buk ya Seventeen i talem se: “Traem askem long papa mama blong yu sipos yu save kukum wan kakae blong yufala. Talem long tufala se yu wantem mekem evri samting long saed ya: jusum kakae blong kukum, raetemdaon ol samting we yu nidim, jekem praes blong ol samting ya, go pem long stoa, kukum kakae mo wasem ol plet biaen.” Sipos yu no laekem blong kuk, traem faenem wan narafala wok blong mekem. Yu no nid blong wet long papa mama blong talem long yu blong wasem plet mo brum. Sipos yu luk we haos i doti, yu wan yu save girap mo klinim.

Plante yangfala oli mekem wan smol wok blong winim mane long taem blong ol holide no wiken. ?Sipos yu yu mekem olsem, yu yu soem long papa mama blong yu se yu naf blong putumgud mo yusumgud mane ya we yu winim? ?Yu yu stap askem long tufala sipos yu save givhan blong pem sam samting long haos? Maet yu save halpem tufala blong pem ren blong haos we yufala i stap long hem. (Sipos yu yu jekem praes blong rentem wan rum long ples blong yu, ating bambae yu sapraes tumas.) I tru se, sipos yu givhan long tufala olsem, bambae yu no save gat plante mane i stap blong yu wan nomo. Be nating, bambae tufala i letem yu yu fri moa, taem tufala i luk se yu stap yusumgud mane blong yu.

Papa Mama i Slakem Rop

Papa mama blong yumi oli mas stap olsem ol gudfala fren we yumi save talem evri samting long olgeta, mo we oli save givim ol gudfala advaes long yumi. (Skelem wetem Jeremaea 3:4.) Be hemia i no minim se evritaem we yu gat wan smol disisen blong mekem, ale, yu resis i go long tufala. Yu mas traehad blong yusum tingting blong yu “blong jusumaot wanem fasin i gud mo wanem fasin i nogud,” nao sloslou, bambae yu kam gud long fasin blong mekem ol disisen.—Hibrus 5:14.

Taswe, taem tingting blong yu i trabol from wan smol samting nomo, traem tingting yu wan fastaem, olsem wanem blong stretem trabol ya. I nogud yu resis nomo blong askem papa mama blong yu blong halpem yu. Yu no mas gat “sotmaen,” no hareap tumas blong traem stretem trabol ya. Folem advaes blong Baebol blong ‘tingtinggud’ fastaem. (Aesea 32:4) Traem stadi dip blong faenem rod blong stretem trabol blong yu. Samting ya i tru moa sipos sam rul blong Baebol oli stret long trabol ya. Wetem kwaet tingting, skelemgud ol save ya, nao biaen yu save toktok wetem papa mama blong yu. Be, i nogud yu askem nomo se: ‘?Papa mi mi mas mekem wanem?’ no ‘?Mama sipos yu yu kasem semfala trabol ya, bambae yu yu mekem wanem?’ I moa gud blong eksplenem ol samting. Talemaot long tufala ol samting we yu yu skelem finis. Nao, askem long tufala blong talemaot tingting blong tufala.

Sipos yu yu mekem olsemia, papa mama blong yu bambae i luksave se yu yu no moa toktok olsem wan pikinini, be yu yu stap kam wan bigman long tingting blong yu. Olsem nao, yu yu mekem wan bigfala samting finis blong soemaot long tufala se yu yu stap gruap, mo se i stret we tufala i letem yu yu fri moa. Ating bambae tufala i stat mekem long yu olsem we yu bigman finis.

Ol Kwestin Blong Tokbaot

◻ ?From wanem ol papa mama oli save protektem tumas ol pikinini blong olgeta, mo from wanem oli wantem save oltaem ol samting we ol pikinini oli stap mekem?

◻ ?From wanem yu yu mas ona long papa mama blong yu?

◻ ?Olsem wanem blong stretem trabol we i kamaot taem papa mama blong yu i no kasem save long tingting blong yu?

◻ ?Olsem wanem yu save obei long ol rul we papa mama blong yu i putumap, mo long semtaem yu stap fri lelebet?

◻ ?Olsem wanem yu save soemaot long papa mama blong yu se yu yu naf blong tingting gud long ol samting we yu mekem?

[Tok blong makem poen long pej 29]

“Oltaem, papa blong mi i wantem save se mi mi stap go wea, mo wanem taem bambae mi kambak long haos. . . . ?Oli nidim blong save evri samting?”

[Tok blong pija long pej 27]

?Yu ting se papa mama blong yu i stap pulum wan fenis raon long yu?

[Tok blong pija long pej 30]

Sipos yu no kam kros taem tufala i tok long yu from wan samting we i no fol blong yu, yu save pulum tufala blong respektem yu