Haremgud Long Famle
?Ol famle oli save haremgud?
?Olsem wanem oli save kasem?
?Yu save sam famle we oli joengud mo oli hapi olsem we yu luk long traket ya? Ol famle long evri ples oli stap seraot nomo. Divos, no gat wok, trabol blong papa no mama we i lukaot pikinini hem wan, ol wari—olgeta samting ya oli haf blong ol trabol ya. Wan man we i savegud long laef blong famle i talem se: “Naoia, ol man oli stap harem finis ol tok se bambae fasin blong laef olsem famle bambae i finis.”
?From wanem tede ol famle oli kasem plante bigfala trabol olsem? ?Olsem wanem yumi save haremgud long famle?
Olsem Wanem Famle i Stat
Blong ansa long ol kwestin ya, yumi mas save stat blong mared mo famle. From we sipos i gat Man we i Statem ol samting ya—Man we i Wokem man—ol memba blong famle oli mas lukluk i go long hem blong hem i lidim olgeta, from we hem i mas savegud moa olsem wanem yumi save haremgud fulwan long famle.
Be, plante man oli bilif se i no gat Man i Statem laef blong famle. Buk ya The Encyclopedia Americana i talem se: “Sam man blong stadi oli talem se mared i stat taem ol anamol we oli daon moa long man oli stap wokbaot tugeta.” Be, Jisas Kraes i talem se i gat Man we i wokem man mo woman. Hem i tokbaot store we Baebol i bin talem mo hem i se: “From we God i joenem tufala olsem, man i mas no brekemaot tufala bakegen.”—Matyu 19:4-6.
Jisas Kraes i talem tru. Wan God we i waes i wokem faswan man mo woman mo hem i mekem se tufala i save haremgud long famle. God i joenem tufala faswan man tugeta long mared mo i talem se, man i mas “go joen wetem woman blong hem, nao tufala i kam olsem wan bodi nomo.” (Jenesis 2:22-24) ?Nao olsem wanem tede, yu ting se ol trabol blong famle oli kamaot from man i stap ronem ol fasin we oli agensem ol rul we Man blong Wokem man i givim long Tok blong hem, Baebol?
?Wanem Rod i Gud?
Maet yu luksave se wol tede i stap sapotem intres blong wanwan man nomo mo ol samting we wanwan man i save kasem blong hem nomo. Wan man blong bisnes i talem long ol studen we oli finisim skul blong olgeta long wan kolej long Amerika i se: “Fasin griri i oraet nomo. Yu save griri mo yu save haremgud yet long laef blong yu.” Be fasin blong ronem ol samting blong wol i no save mekem man i haremgud. Tingting blong gat plante samting, i wan long ol bigfala trabol we i save spolem famle from we hem i mekem ol man oli no frengud mo i spolem taem mo mane blong ol man. Be defren nao, tingbaot olsem wanem tufala proveb long Baebol tufala i givhan long yumi blong luksave wanem i impoten blong mekem man i haremgud.
“I gud blong kakae ol ligim wetem ol man we yu laekem bitim we yu kakae wan gudfala mit long ples we man i no laekem man.”
“I gud moa blong kakae drae bred wetem pis long tingting bitim wan lafet long wan haos we i fulap long ol trabol.”
Proveb 15:17; 17:1, “Today’s English Version.”
?Ol tok ya oli gat paoa, a? !Traem tingbaot, laef long wol ya bambae i defren sipos evri famle oli folem ol rul ya! Baebol tu i givim ol gudfala advaes blong soemaot olsem wanem ol memba blong famle oli mas tingbaot olgeta wanwan. Tingbaot sam long olgeta advaes we Baebol i givim.
Ol hasban: ‘Yufala i mas laekem woman blong yufala, yufala i mas lukaotgud long olgeta, olsem we yufala i stap lukaotgud long bodi blong yufala nomo.’—Efesas 5:28-30.
!Tok ya i sot, be hem i save wok! Baebol tu i talem long wan hasban blong ‘tingtinggud long woman blong hem.’ (1 Pita 3:7) Hasban i save mekem olsem sipos hem i tingbaot woman blong hem long fasin we i spesel, hem i kaen long hem, hem i savegud hem, i stap talem mo soem se hem i laekem woman blong hem oltaem. Mo tu hem i tinghae long ol tingting blong woman blong hem mo i save lesin long hem. (Lukluk Jenesis 21:12.) ?Yu ting wan famle bambae i haremgud sipos hasban i stap keagud long woman blong hem, olsem we hem i wantem woman blong hem i mekem long hem?—Matyu 7:12.
Ol waef: ‘Yufala i mas onagud long man blong yufala.’—Efesas 5:33.
Wan waef i save mekem famle i haremgud sipos hem i givhan long hasban, blong hem i mekem ol bigfala responsabiliti blong hem. Hemia plan blong God fastaem from God i mekem wan waef, blong hem i “wan fren blong [hasban], blong i givhan long hem.” (Jenesis 2:18) ?Yu luksave blesing long laef blong famle sipos wan waef i ona long hasban blong hem taem hem i sapotem ol disisin blong hasban blong hem mo taem hem i wok wetem hem blong kasem ol mak long famle?
Olgeta We Oli Mared: “Ol hasban mo ol waef oli mas stap tru long olgeta wanwan.”—Hibrus 13:4, TEV.
Taem oli mekem olsem, famle i save haremgud from. Fasin blong slip wetem narafala man no woman i stap seraotem famle. (Proveb 6:27-29, 32) Taswe Baebol i talem waes advaes ya se: “Stap glad wetem woman blong yu mo haremgud wetem gel we yu mared long hem . . . ?From wanem yu mas laekem narafala woman?”—Proveb 5:18-20, TEV.
Ol papa mama: “Tijim [ol pikinini] blong yu long rod ya we i stret blong [olgeta.]”—Proveb 22:6.
Taem ol papa mama oli spenem taem wetem ol pikinini blong olgeta, laef blong famle bambae i kamgud moa. Taswe, Baebol i askem ol papa mama blong oli tijim ol stret rul long ol pikinini blong olgeta ‘taem oli stap long haos blong olgeta mo taem oli wokbaot long rod mo taem oli slip mo taem oli girap.’ (Dutronome 11:19) Baebol i talem tu long ol papa mama blong oli mas soem lav long ol pikinini blong olgeta taem oli stretem olgeta.—Efesas 6:4.
Ol pikinini: “Yufala pikinini, from we yufala i joen long Masta blong yumi, yufala i mas obei long papa mo mama blong yufala.”—Efesas 6:1.
Yes, long wol ya we i fulap long fasin blong brekem loa, oltaem i no isi blong obei long ol papa mama blong yufala. ?Be, yu ting se i waes blong mekem olsem Stampa blong famle i talem long yumi? Hem i save wanem i gud blong mekem famle blong yumi i glad moa. Taswe yufala i mas traehad blong obei long ol papa mama blong yufala. Yu mas gat strong tingting blong ronwe long plante samting blong wol we oli pulum ol man blong oli mekem rabis fasin.—Proveb 1:10-19.
Taem ol memba blong famle wanwan oli traehad blong mekem ol advaes long Baebol i wok long laef blong olgeta, famle bambae i kasem blesing from. I no se famle bambae i haremgud long wan gudfala laef naoia nomo, be famle bambae i save kasem wan gudfala laef long fyuja long nyufala wol we God i promes long hem. (2 Pita 3:13; Revelesen 21:3, 4) !Taswe i gud blong mekem Baebol stadi tugeta i kam olsem prapa fasin blong yufala! Plante milyan famle long olgeta ples long wol oli faenemaot se ol advaes we oli stap long nambawan kala buk ya Yu Save Laef Foreva Long Paradaes Long Wol i save givhan bigwan.
Oli yusum Baebol long Bislama mo New World Translation of the Holy Scriptures.