Yumi Wokbaot Long Delaet Mo Yumi Laekem Ol Narafala

Ol Stampa Poen Blong Fas Jon

JEOVA i olsem Stampa blong delaet mo hem i gat lav. Taswe, yumi mas lukluk i go long God blong wokbaot oltaem long delaet long saed blong speret. (Ol Sam 43:⁠3) Mo lav i wan frut blong tabu speret blong hem.​—⁠Galesia 5:​22, 23.

Aposol Jon i tokbaot laet, fasin lav mo sam narafala poen bakegen, long faswan leta we maet hem i raetem long Efesas no long wan ples kolosap, raonabaot long 98 K.T.a Wan long ol bigfala samting we i pusum aposol Jon blong raetem leta ya, se hem i wantem givhan long ol Kristin blong ol gyaman tija oli no spolem olgeta, mo blong oli wokbaot long delaet nomo. Tede, i no isi blong gat fasin lav. Yumi mas hadwok blong stanap strong long bilif mo blong holem trutok. Taswe leta ya i save halpem yumi.

‘Yumi Wokbaot Long Delaet’

Jon i mekem poen ya i klia nomo: Ol Kristin we oli fasgud long God oli mas wokbaot long delaet long saed blong speret. (1:1 kasem 2:29) Hem i talem se: “God hem i olsem delaet, i no gat tudak nating i stap long hem. [Fasin we i nogud, i rabis, i gyaman no i no tabu, ol rabis fasin ya oli no gat long God.]” From we ol Kristin we tabu speret i makemaot oli ‘wokbaot long delaet,’ olgeta oli “joen long wan kampani nomo” wetem God, Kraes, mo ol narafala Kristin. Mo blad blong Jisas i stap mekem olgeta oli klin from olgeta sin blong olgeta.

Maet tabu speret i makemaot yumi blong go long heven, no yumi gat hop blong stap laef blong olwe long wol ya. Be sipos yumi wantem kasem gudfala frut from sakrafaes blong Jisas, yumi mas laekem ol brata blong yumi, be i no wol ya. Yumi no mas joen nating wetem ol gyaman tija from we olgeta oli olsem “Enemi blong Kraes [Antikraes]” mo oli agensem tufala tugeta, Papa mo Pikinini blong hem. Mo yumi no mas foget long samting ya, olgeta we oli folem trutok mo oli mekem stret fasin oltaem, God bambae i givim laef we i no save finis long olgeta.

Ol Pikinini Blong God Oli Gat Lav

Afta, Jon i talem se ol stret pikinini blong God oli hu. (3:1 kasem 4:21) Olgeta oli pikinini blong God from wan samting nomo, oli mekem stret fasin long laef blong olgeta. Mo tu, oli obei long loa blong Jeova God, ale ‘oli bilif long nem blong Pikinini blong hem Jisas Kraes mo oli laeklaekem olgeta.’

Man we i “save God” i kasem save long ol plan blong hem mo hem i save gud long fasin we Jeova i laekem ol man long hem. Yes, “man we i no laekem ol man, hem i no save God, from we God i stampa blong fasin ya blong laekem tumas ol man.” God i laekem tumas ol man, taswe hem i “sanem Pikinini blong hem blong i ded blong mekem rod blong God i tekemaot ol sin blong yumi.” Jeova i laekem yumi tumas. From samting ya, yumi mas laeklaekem yumi. Yes, sipos wan long yumi i talem se hem i laekem God, hem i mas laekem ol Kristin brata blong hem tu.

Fasin Blong Bilif Long Jisas Hem i Rod Blong Winim Wol

Lav i pusum ol pikinini blong God blong oli folem ol loa blong hem. Be ‘oli stap winim wol from we oli bilif long Jisas.’ (5:​1-21) Fasin blong putum bilif blong yumi long God, long Tok blong hem, mo long Pikinini blong hem, i givhan long yumi blong “winim wol.” Mekem se yumi naf blong sakemaot ol rong tingting, ol rabis rod blong wol, mo yumi stap folem ol loa blong Jeova. God i givim hop blong kasem laef we i no save finis long ol man we oli “winim wol,” mo hem i ansa long ol prea we oli stret long ol samting we hem nomo i wantem. Man we i “bon long God, i pikinini blong hem,” i no mekem sin, taswe Setan i no gat tumas paoa long wan man olsem. Be nating we tabu speret i makemaot olgeta blong go long heven no oli gat hop blong stap long wol nomo, ol man blong Jeova oli mas rimemba se “olgeta man blong wol oli stap long paoa blong Setan.”

[Futnot]

[Bokis blong pija long pej 30]

Wan Sakrafaes We i Pemaot Yumi: Jisas, “hem i man we i ded blong mekem rod blong God i tekemaot ol sin blong yumi [ol disaepol we tabu speret i makemaot]. Mo i no blong yumi nomo, i blong olgeta man long wol,” ol narafala man long wol. (1 Jon 2:⁠2) Ded blong Jisas i “tekemaot ol sin.” (Tok ya i kamaot long Grik tok hi·la·smosʹ, we i min se “rod blong kwaetem strong filing,” “wei blong stretem wan rong”) Be Jisas i no ded blong kwaetem kros blong God long saed blong ol man, no gat. God i wantem stret fasin nomo. Mo sakrafaes blong Jisas i mekem hem i glad, no i kwaet, long saed ya. ?Olsem wanem hem i mekem? Sakrafaes ya i stret nomo, taswe God i save fogivim ol man. Ale, God “i stap mekem olgeta man [ol sinman] we oli bilif long Jisas, oli stret man long fes blong hem.” (Rom 3:​23-26; 5:12) Jisas i givim evri samting blong ol man oli save gofri long sin blong olgeta. Taswe God i agri long sakrafaes blong Jisas we i pemaot olgeta, mo samting ya i givim jans long ol man blong fren gud bakegen wetem Jeova. (Efesas 1:7; Hibrus 2:17) !Yes, rili, yumi mas gat bigfala tangkyu from samting ya!