Ol Taem Lukaot Kaen Gud Fasin
“Hemia we i lukaot stret fasin mo kaen gud fasin, bambae i faenem laef, stret fasin mo haenem.”—PROVEB 21:21.
1. ?From wanem i stret we olgeta we oli letem speret blong God i lidim olgeta, oli kaen?
JEOVA i kaen mo hem i gat sore. Hem i ‘gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap laekem man tumas [hem i fulap long kaen gud fasin, NW], mo oltaem hem i stap holemstrong promes blong hem.’ (Eksodas 34:6, 7) Hemia nao from wanem lav mo kaen fasin, tufala i frut blong tabu speret.—Galesia 5:22, 23.
2. ?Bambae yumi tingtinggud long wanem eksampel?
2 Olgeta we tabu speret no paoa blong Jeova i stap lidim olgeta, oli soemaot frut blong speret ya, oli kaen. Oli kaen gud long ol narafala man. Yes, oli folem eksampel blong aposol Pol, nao oli soemaot se oli man blong wok blong God taem oli “kaen” mo long sam narafala rod bakegen. (2 Korin 6:3-10, NW) Oli kaen, oli gat sore, oli fogivim man, nao ol fasin ya oli laenap wetem fasin blong Jeova we i “fulap long kaen gud fasin.” Mo Baebol i tokbaot plante man we oli kaen. (Ol Sam 86:15, NW; Efesas 4:32) ?Yumi save lanem wanem long eksampel blong olgeta?
Man We i Kaen i Tingbaot Narafala Mo i Glad Blong Tekem Ol Long Haos
3. ?Olsem wanem Ebraham i wan nambawan eksampel taem hem i soemaot kaen fasin? ?Pol i givim wanem advaes long saed ya?
3 Olfala Ebraham (Ebram)—we i “fren blong Jeova” mo i “papa blong olgeta we oli bilif”—i kaen, taswe hem i wan nambawan eksampel long yumi. (Jemes 2:23, NW; Rom 4:11, NW) Olsem God i talem, hem i aot long taon blong Ur we i stap long Kaldea, wetem famle blong hem mo Lot we i pikinini blong brata blong hem. Nao oli go stap long Kenan. I tru, Ebraham i olfala moa, i bitim ol narafala long famle, mo hem i jif blong famle ya. Be hem i kaen mo hem i no tingbaot hem wan. From samting ya, hem i letem Lot i jusum beswan graon blong stap long hem, mo Ebraham i go stap long narafala graon. (Jenesis 13:5-18) Sem mak nao, nating se yumi mas blokem sam samting we yumi nomo i wantem, be kaen fasin ya i mas pulum yumi blong mekem i gud long narafala man. Fasin kaen ya we i stap tingbaot narafala, i laenap wetem advaes blong aposol Pol, we i talem se: “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man we oli stap raonabaot long yumi.” Pol tu i talem se: “Oltaem mi stap traehad blong mekem olgeta man oli glad long olgeta samting we mi mekem. Mi mi no traem mekem ol samting we oli gud long mi nomo. Mi stap traem mekem ol samting we oli gud long ol narafala man, blong mekem rod blong God bambae i sevem olgeta.”—1 Korin 10:24, 33.
4. Ebraham mo Sera oli kaen, oli gat fasin blong tekem man long haos. ?Oli kasem wanem presen from?
4 Fasin kaen, samtaem i pulum man blong tekem narafala i kam long haos blong hem. Ebraham mo waef blong hem Sera, tufala i kaen mo i glad blong tekem man long haos blong tufala. Wan dei tri strenja oli kam. Ale, Ebraham i singaot trifala oli kam stap long haos blong hem, mo hem i hareap wetem Sera blong rerem wan nambawan kakae blong trifala. Be ol strenja ya oli enjel blong Jeova. Ale, wan long olgeta ya, i promes se Sera we i no gat pikinini yet mo i olfala, bambae i gat wan pikinini. (Jenesis 18:1-15) !Hemia i wan nambawan presen from kaen fasin blong olgeta blong tekem man i kam long haos blong ol!
5. ?Gaeas i kaen olsem wanem? ?Mo olsem wanem yumi save mekem sem mak?
5 Olgeta Kristin oli save tekem man i kam long haos blong ol. Taem oli mekem olsem long gladhat blong ol, oli kaen. (Rom 12:13; 1 Timote 3:1, 2) Olsem nao, ol man blong Jeova we oli kaen, oli tekem ol elda we oli goraon, oli kam long haos blong olgeta. Samting ya i mekem yumi tingbaot kaen fasin blong Kristin ya Gaeas, long faswan handred yia. Hem i “holem wok i strong,” taem hem i tekem ol brata oli kam long haos blong hem, nating se bifo hem i no save olgeta, oli “strenja” nomo. (3 Jon 5-8) Be plante taem, yumi save finis olgeta we yumi kaen long ol, nao yumi askem long olgeta blong oli kam smoltaem long haos blong yumi. Ating yumi luksave se wan sista long saed blong speret, i harem nogud. Ating man blong hem i no bilif, no kongregesen i sakemaot man ya. !Hemia i wan jans blong kaen long hem mo blong tekem hem i kam smol long haos blong yumi! !Bambae hem i harem gud blong joen wetem ol brata sista long saed blong speret, mo blong kakae wetem famle blong yumi samtaem! Ating bambae yumi no save mekem bigfala kakae, be i oraet nomo. Famle blong yumi bambae i hapi from we oli kaen long wan sista olsem. (Skelem wetem Proveb 15:17.) Biaen, ating sista ya i save talem tangkyu long famle ya, no i save raetem wan leta we i kaen long ol.
6. ?Lidia i kaen olsem wanem? ?From wanem yumi mas gat fasin tangkyu long ol man we oli kaen long yumi?
6 Wan woman, nem blong hem Lidia, i tekem baptaes. Biaen, Luk i talem se: “Hem i singaot mifala, i se ‘Sipos yufala [Pol mo ol man we oli joen wetem hem] i save se mi mi bilif tru long Masta ya blong yumi, i gud yufala i kam stap long haos blong mi.’ Nao hem i strong, i mekem mifala i go long haos blong hem.” I tru nomo se olgeta ya oli glad long kaen fasin blong Lidia. (Ol Wok 16:14, 15, 40) Be sipos yumi no gat fasin tangkyu, hemia i nogud tumas. Wan taem, wan olfala sista we i gat 80 yia blong hem, mo bodi blong hem i no strong, i wantem mekem i gud. Nao hem i askem long sam man blong oli kam kakae long haos blong hem. Hem i wok had blong rerem kakae ya. Be wan yangfala man i no talem long hem se bambae hem i no save kam. Taem olfala ya i luk we man ya i no kam, hem i harem nogud tumas. Wan narafala taem, wan yang woman i askem long tu sista blong kam kakae long haos blong hem. Woman ya i rerem wan spesel kakae blong tufala nomo. Be tufala i no kam. Woman ya i talem se: “Mi harem nogud tumas. Antap bakegen, tufala ya i no fogetem. . . . Mi laekem moa se oli bin fogetem blong kam kakae, be no gat. I no gat wan long tufala we i talem long mi se bambae oli no save kam. Oli no kaen mo oli no soem lav long mi.” ?Olsem wanem nao? Sipos sem samting i hapen, bambae kaen fasin we i frut blong tabu speret, i mas pulum yu blong gat fasin tangkyu mo blong tingbaot filing blong narawan.
Kaen Fasin i Mekem Yumi Kea Long Narawan
7. Ol pikinini blong Jekob oli traehad blong berem hem olsem we hem i wantem. ?Fasin ya i pulum yumi blong yumi kaen olsem wanem?
7 Kaen fasin i mas mekem yumi kea long narafala mo long ol samting we oli wantem. Hemia nao wan eksampel. Jekob (Israel) i askem long pikinini blong hem Josef, blong i kaen gud long hem. Hem i askem blong oli no berem hem long Ijip. Ale, nating se oli mas mekem wan longfala rod blong karem bodi blong Jekob, be Josef mo ol narafala pikinini blong Jekob oli “karem bodi blong hem i gobak long Kenan, long ples ya Makpela, long narasaed Mamre long is, nao oli putum long hol ya blong ston, long pis graon ya we fastaem i blong Efron ya we i kamaot biaen long olfala Het ya bifo, be Ebraham i pemaot long hem, nao i kam beregraon blong olgeta.” (Jenesis 47:29; 49:29-31; 50:12, 13) ?Olsem wanem nao? Sem mak long eksampel ya, maet wan Kristin famle blong yumi i wantem we yumi berem hem long wan spesel fasin we i oraet nomo long Baebol. ?Bambae yumi mekem wanem? Sipos yumi kaen gud, bambae yumi mekem olsem hem i talem.
8. ?Store blong Rehab i soemaot we yumi mas mekem wanem long olgeta we oli kaen long yumi?
8 ?Sipos ol narafala oli kaen gud long yumi, bambae yumi tangkyu long olgeta, mo bambae yumi kaen long olgeta bakegen? Yes. Rehab, wan woman blong rod, i kaen long tufala man Isrel we oli kam blong lukluk ples blong hem, taswe hem i haedem tufala. From samting ya, biaen ol man Isrel oli kaen gud long hem, nao oli lukaot gud long hem mo long famle blong hem taem oli spolem taon blong Jeriko. (Josua 2:1-21; 6:20-23) !Store ya i wan nambawan eksampel we i soemaot se taem man i kaen long yumi, yumi mas kea mo kaen long hem bakegen!
9. ?From wanem i stret nomo blong talem long ol man se oli mas kaen gud long yumi?
9 Olsem ya nao, i stret nomo we yumi askem long wan man blong i kaen gud long yumi. Jonatan we i pikinini blong faswan king blong Isrel, Sol, i mekem olsem. Jonatan i laekem yangfala fren blong hem, Deved. Nao hem i askem long hem blong i kaen gud long hem mo long famle blong hem. (1 Samuel 20:14, 15; 2 Samuel 9:3-7) Deved i rimemba samting ya taem hem i letem ol man Gibeon oli givimbak trabol we Sol i mekem long olgeta bifo. Long taem ya nao, hem i rimemba “promes blong Jeova” we hem i mekem wetem Jonatan. Nao, hem i kaen gud long pikinini blong hem, Mefiboset, i no letem ol man oli kilim hem i ded. (2 Samuel 21:7, 8) ?Olsem wanem nao? Long sem fasin, ‘sipos yu yu talem se “Yes,” yu mas talem se “Yes” nomo.’ (Jemes 5:12) Mo sipos yu yu elda, taem sam brata sista oli nidim we yu yu kaen gud long olgeta, yu mas soemaot sem kaen sore long olgeta tu.
Kaen Fasin i Mekem Yumi Fren Moa
10. ?Rut i kasem wanem blesing from we hem i kaen gud?
10 Kaen fasin i mekem ol memba blong famle oli fren, mo oli moa hapi. Store blong wan woman Moab, Rut, i soemaot samting ya. Man blong Rut i ded finis, mo woman ya i stap wetem wan olfala woman, nem blong hem Naomi, we i mama blong man blong hem. Tufala i stap kolosap long Betlehem mo Rut i wok had blong pikimap ol kakae we ol man oli mestem long garen blong wan olfala man, nem blong hem Boas. Ol kakae ya we hem i pikimap, oli blong hem mo blong Naomi. (Rut 2:14-18) Biaen, Boas i talem long Rut, i se: “Naoia, namba tu taem, yu stap mekem fasin we i kaen gud. Be fasin ya blong yu naoia i moa gud, i bitim fasin we yu mekem fastaem. From we yu yu no go biaenem ol yangfala man we oli puaman no oli rijman, blong maredem wan long olgeta.” (Rut 3:10, NW) “Fastaem,” Rut i bin kaen gud long Naomi. Mo “namba tu taem,” woman Moab ya i kaen gud from we hem i wantem mared wetem olfala Boas. Ale, hem i save gat pikinini we bambae oli karem nem blong hasban blong hem we i ded finis. Long fasin ya, laen blong man ya mo blong olfala Naomi, i no save lus. Biaen, Rut i mared wetem Boas, nao i kam mama blong Obed we i bubu blong Deved. Mo God i givim wan “nambawan pei” long hem from we hem i kam wan bubu blong Jisas Kraes. (Rut 2:12; 4:13-17; Matyu 1:3-6, 16; Luk 3:23, 31-33) !Tru ya, Rut i kaen gud! !Fasin ya i karem blesing long hem mo long famle blong hem! Tede, taem evriwan long wan Kristin famle oli kaen gud olsem, bambae oli save kasem blesing, oli moa hapi, mo oli fren moa.
11. ?Wanem frut i kamaot long kaen fasin blong Faelimon?
11 Insaed long kongregesen, ol man blong Jeova oli kaen, taswe oli save fren gud. Bifo, ol brata oli save gud Kristin man ya, Faelimon, from we hem i kaen gud long ol brata sista. Pol i talem long hem, i se: “Faelimon, taem mi mi prea, oltaem mi stap tingbaot yu. Mo mi stap talem tangkyu long God blong yumi, from we mi stap harem nyus blong fasin blong yu we yu laekem tumas ol man blong God, mo we yu bilif long Jisas, Masta blong yumi. . . . Brata. Fasin ya blong yu blong laekem tumas ol man, hem i stap mekem mi mi harem gud tumas, mo i stap mekem tingting blong mi i strong moa bakegen. Fasin ya blong yu i stap mekem olgeta man blong God oli harem gud bakegen long tingting blong olgeta.” (Faelimon 4-7) Baebol i no talem olsem wanem fasin blong Faelimon blong laekem tumas ol man blong God i mekem olgeta oli harem gud bakegen long tingting blong olgeta. Be hem i kaen gud long olgeta we God i makemaot long sam wei we yumi no save, mo samting ya i mekem olgeta oli harem gud bakegen mo oli fren moa tugeta. Tede tu, samting ya i hapen taem ol Kristin oli kaen gud.
12. ?Wanem frut i kamaot from we Onesiforas i kaen?
12 Fasin kaen blong Onesiforas i karem gudfala frut tu. Pol i talem se: “Hemia prea blong mi, we Masta blong yumi bambae i gat sore long famle blong Onesiforas, from we bifo, plante taem hem i stap mekem mi mi harem gud bakegen. Hem i no gat sem from we mi mi stap kalabus, no gat. Taem hem i kamtru long Rom, wantaem nomo hem i kam lukaot mi, gogo i faenem mi. Hemia prea blong mi we bambae Hae God i letem we long dei ya we Masta blong yumi i jajem olgeta man, hem bambae i gat sore long man ya. Yu yu save moa [olsem wanem, NW] hem i givhan tumas long mi long Efesas.” (2 Timote 1:16-18) Sipos yumi traehad blong soemaot kaen gud fasin long ol brata mo sista, bambae yumi glad moa, mo bambae yumi laeklaekem moa yumi insaed long Kristin kongregesen.
13, 14. ?Kongregesen blong Filipae i mekem wanem we i soemaot rod long yumi? ?Pol i mekem wanem blong talem tangkyu from kaen fasin blong olgeta?
13 Taem olgeta brata sista long kongregesen oli kaen gud long olgeta, fasin ya i mekem oli fren moa. Samting ya i hapen long Pol mo kongregesen blong taon blong Filipae. Olgeta oli kaen long Pol mo oli givhan long hem long ol samting we hem i nidim long saed blong bodi. Taswe, biaen hem i raetem wan leta i go long ol man Filipae blong talem tangkyu long olgeta. Hem i talem se: “Yufala man Filipae, yufala i savegud, we long taem ya we wok blong gud nyus i jes stat nomo long ol ples ya, taem mi aot long Masedonia, yufala nomo i givhan long mi. I no gat narafala jyos we i givim presen long mi blong givhan long mi long rod. Mo taem mi stap long Tesalonaeka, i no wan taem nomo we yufala i givhan long mi, taem mi trabol long mane. . . . Nao yufala i mekem antap bakegen. Naoia mi kasem presen ya long Epafrodaetas, we yufala i sanem i kam, mo mi mi no moa sot long wan samting. Presen ya we yufala i givim long mi, hem i olsem wan presen we yufala i givim i go long God, we i gat gudfala smel blong hem, mo we God i glad blong kasem.”—Filipae 4:15-18
14 !Yumi no sapraes we Pol i prea blong ol man Filipae we oli kaen. Hem i talem se: “Oltaem, taem mi mi tingbaot yufala evriwan, mi talem tangkyu long God from yufala. Mo taem mi prea from yufala, oltaem mi stap prea, be tingting blong mi i glad tumas, from we mi stap tingbaot fasin blong yufala, we yufala i stap givhan long mi long ol wok blong gud nyus blong Kraes, i stat long stat blong hem fastaem, i kam kasem tede.” (Filipae 1:3-5) Taem wan kongregesen i kaen gud olsemia mo i sapotem wok blong talemaot Kingdom wetem gladhat, samting ya i no mekem hem i kam pua. Afta we ol man Filipae oli mekem olsemia, Pol i talem long olgeta, i se: “Mo God blong mi we i rij tumas, mo i gat olgeta paoa long heven, hem bambae i lukaot long yufala we i joen long Jisas Kraes, i givim olgeta samting long yufala we yufala i sot long hem.” (Filipae 4:19) Yes, taem man i kaen mo i gat gladhat, God bambae i givim pei long hem. Tok blong hem i talem se: “Sipos man i mekem gudfala wok blong hem, Masta blong yumi bambae i save givim pei long hem, we i stret long wok ya blong hem.”—Efesas 6:8.
Taem Ol Woman Oli Kaen
15, 16. (a) ?Olsem wanem ol brata sista oli rimemba kaen fasin blong Dokas? ?Mo wanem i hapen taem hem i ded? (b) ?Long taem blong yumi, olsem wanem ol Kristin woman we oli kaen oli stap mekem plante gudfala wok?
15 Kaen gud fasin blong disaepol ya, Dokas (Tabita) blong Jopa, i karem frut blong hem. “Woman ya, oltaem hem i stap mekem ol gudfala wok, mo i stap givhan long ol puaman.” Mo taem hem i “sik, nao i ded,” ol disaepol oli sanem sam man i go long Pita we i stap long Lida. Taem hem i kam, “oli tekem hem i go long rum ya antap. Nao olgeta wido oli kam, oli stanap raon long hem, oli stap krae. Mo oli stap soem long Pita, ol klos we Dokas i somap taem hem i stap laef yet.” Traem tingbaot wanem i stap hapen: Ol wido oli harem nogud, oli krae nao oli talem long aposol se bifo, Dokas i kaen gud long olgeta. Mo blong talemaot lav mo kaen fasin blong Dokas, oli soemaot long Pita olgeta klos we Dokas i bin somap long olgeta. Pita i talem long evriwan se oli mas go afsaed, mo afta hem i nildaon i prea. Biaen, hem i tanraon, i luk long bodi. !Lesin! Hem i talem se: “!Tabita, yu girap!” !Mo luk! “Woman ya i openem ae blong hem, nao taem hem i luk Pita, i girap, i sidaon. Nao Pita i givhan long hem blong i stanap. Nao hem i singaot long olgeta we oli bilif long Jisas, mo long ol wido tu, nao i soemaot long olgeta we woman ya i laef bakegen.” (Ol Wok 9:36-41) !Nambawan blesing ya i kam long God!
16 Neva bifo wan aposol blong Jisas Kraes i mekem man i girap i laef bakegen. ?Mo wanem samting i stampa blong nambawan merikel ya? Hemia kaen fasin blong Dokas. Sipos Dokas i no bin mekem ol gudfala wok ya, bambae ol man oli no sore long hem olsem ya. Mo sipos hem i no bin kaen gud, ating bambae hem i no save laef bakegen long ded. I tru se Dokas mo ol wido ya, oli kasem blesing. Be i no gat samting ya nomo. Taem Dokas i laef bakegen, merikel ya i leftemap haenem blong God. Yes, “nyus ya i goraon long evri ples long Jopa, mo plante man oli bilif long Masta blong yumi.” (Ol Wok 9:42) Long taem blong yumi, ol Kristin woman oli mekem plante gudfala wok, nao ating oli somap klos blong sam brata sista, oli rerem kakae blong ol olfala we i stap long kongregesen, mo oli glad blong tekem ol narafala i kam long haos. (1 Timote 5:9, 10) !Fasin ya i save pulum ol man we oli lukluk olgeta! Tede, ol Kristin woman oli fasgud long God mo oli kaen gud. From samting ya nao, “ol woman we oli stap talemaot gud nyus oli olsem wan bigfala ami,” blong leftemap haenem blong God, Jeova. !Yumi glad tumas long samting ya!—Ol Sam 68:11, NW.
Gohed Blong Soemaot Kaen Gud Fasin
17. ?Proveb 21:21 i talem wanem? ?Olsem wanem ol tok ya oli stret long ol man we oli fasgud long God?
17 Olgeta we oli wantem se God i glad long ol, oli mas kaen gud. Wan waes proveb i talem se: “Man we i stap lukaot stret fasin mo kaen gud fasin, bambae i faenem laef, stret fasin mo haenem.” (Proveb 21:21) Man we i fasgud long God, i mas strong blong lukaot stret fasin blong God mo oltaem hem i mas letem loa blong God i lidim hem. (Matyu 6:33) Hem i mas gat lav we i stap tru oltaem, hemia kaen gud fasin, long saed blong bodi, be impoten moa long saed blong speret. Olsem nao, hem i faenem stret fasin, from we speret blong Jeova i halpem hem blong hem i laef long stret fasin. Tru ya, olsem Job we i fasgud long God bifo, hem i ‘putum klos blong stret fasin.’ (Job 29:14) Wan man olsem i no lukaot haenem blong hem. (Proveb 25:27) Be hem i kasem haenem, from we bambae Jeova nomo i letem samting ya i kamtru long hem. Ating bambae God i pulum ol man blong oli gat respek mo oli kaen long man ya, from we hem fastaem i kaen gud long olgeta. Antap bakegen, olgeta we oli stap obei long God oltaem, bambae oli faenem laef. Bambae oli no laef blong smoltaem nomo. Bambae oli laef gogo i no save finis.
18. ?From wanem oltaem yumi mas lukaot kaen gud fasin?
18 Olsem nao, olgeta we oli laekem Jeova God, oli mas gohed blong kaen gud long narafala. Sipos yumi wokem fasin ya, bambae God mo ol narafala man oli laekem yumi. Bambae fasin ya i pulum yumi blong tekem man i kam long haos blong yumi, mo blong tingbaot ol narafala. Insaed long famle mo long Kristin kongregesen, kaen fasin i mekem yumi fren moa. Ol woman we oli kaen gud, evriwan i laekem olgeta mo i tinghae long olgeta. Mo tu olgeta we oli soemaot nambawan fasin ya, oli leftemap haenem blong God Jeova we i kaen gud.
?Bambae Yu Yu Ansa Olsem Wanem?
◻ ?Olsem wanem Ebraham i wan nambawan eksampel blong kaen fasin?
◻ ?Store blong Rehab i soemaot we yumi mas mekem wanem long olgeta we oli kaen long yumi?
◻ ?Olsem wanem kongregesen blong Filipae i soemaot we hem i kaen?
◻ ?Long taem blong yumi, ol woman we oli kaen oli mekem wanem gudfala wok?
◻ ?From wanem oltaem yumi mas lukaot kaen gud fasin?