Toktok Tugeta Insaed Long Famle Mo Long Kongregesen

“Yufala i mas tok gud wetem olgeta, long ol tok ya nomo we olgeta oli harem i gud.”​—KOLOSI 4:6.

1. ?Adam i talem wanem taem God i tekem Iv i kam long hem?

BIFO long sam handred yia finis, wan man blong raetem buk i talem se, “I no gat wan man we i save stap hem wan olsem wan aelan . . . Evri man hem i olsem wan pis graon we i joen long ol narafala pis graon raonabaot.” Tok ya blong hem i laenap wetem tok blong God taem hem i tokbaot Adam, i se: “I nogud we man ya i stap hem wan.” Adam i save toktok mo hem i gat lanwis blong hem from we hem i givim nem long olgeta anamol. Be i no gat narafala man we Adam i save toktok wetem hem. Taswe taem God i tekem Iv i kam long Adam, Adam i sapraes mo i talem se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi.” Long taem ya, olsem faswan famle i stat mo Adam i stat blong toktok wetem narafala man.​—Jenesis 2:​18, 23.

2. ?Wanem samting i save kamaot from fasin blong lukluk video oltaem?

² Gudfala ples blong toktok gud tugeta hemia insaed long famle. Wan gudfala famle hem i dipen long fasin ya. Taswe ol famle oli mas tekem taem blong toktok tugeta, mo hadwok long fasin ya. Be tede video i stilim plante taem. Mo tu, hem i save spolem famle long tu rod. Faswan samting, hem i save switim ol memba blong famle oli kalabus long hem. Ale bambae i no moa gat plante taem blong famle i toktok gud tugeta. Narafala samting se sam man oli lukluk video blong traem fogetem ol trabol blong olgeta. Nao sipos trabol i kamaot long famle, hasban no waef we i no wantem toktok long trabol ya i go luk video. Taswe video i save daonem fasin blong toktok gud tugeta. Fasin blong no toktok gud tugeta i stampa blong ol mared we i brok. Olgeta we oli no save kontrolem fasin blong lukluk video, i gud oli stap tingbaot blong salemaot video blong olgeta.​—Matyu 5:29; 18:9.

3. ?Sam man oli kasem wanem blesing taem oli no moa lukluk video oltaem?

³ Ol ripot we mifala i kasem oli tokbaot ol blesing we ol famle oli kasem from we oli no moa yusum tumas video, no oli salemaot ol video blong olgeta finis. Wan famle i raetem olsem: “Mifala i toktok moa tugeta . . . , mifala i stadi moa long Baebol . . . Mifala i pleplei tugeta . . . Mifala i mekem moa long wok blong prij.” Narafala famle i salemaot video finis, nao oli talem se: “I tru we mifala i sevem mane, be tu mifala i kam kolosap moa olsem wan famle mo faenem plante gudfala samting blong mekem. Mifala i neva stap les.”

Lukluk, Toktok, Mo Lesin

4. ?Olsem wanem hasban mo waef tufala i save talemaot ol dip filing blong tufala?

⁴ I gat defren kaen fasin blong toktok tugeta insaed long famle. Samtaem, tu man i wantem talemaot tingting blong tufala, be tufala i no no nid blong toktok long maot blong ol. Ating i naf blong tufala i stap lukluk tufala nomo, nao tufala i kasem. Mo taem tufala man i stap laef wanples, hemia i olsem we tufala i stap talem long tufala se ‘mi mi stap keagud long yu.’ Samtaem hasban no waef i rili nidim blong go hem wan samples. Be tufala i no mas stap seraot olsem longtaem tumas. Taem wan long tufala i soemaot we hem i glad blong stap wetem narafala insaed long mared, narafala ya tu bambae i glad. Lav mo respek we tufala i stap soemaot long tufala, long fored blong plante man no taem tufala tu nomo i stap, i olsem we i stap talemaot ol dip filing blong tufala. I sem mak tu taem oli no bitim mak long klos mo ol gudfala fasin blong olgeta. Waes King Solomon i tokbaot fasin ya olsem: “Letem maot blong wota blong yu i kasem blesing, mo stap glad wetem waef blong yu we i mared long yu taem yu yang yet.”​—Proveb 5:18.

5, 6. ?From wanem i impoten blong ol hasban oli toktok wetem ol waef blong olgeta?

⁵ Insaed long famle, fasin blong toktok tugeta i minim se storeyan​—toktok tugeta i no blong wan i toktok long narafala nomo. Sam woman oli gud long fasin ya blong talemaot filing blong olgeta bitim ol man. Be samting ya i no min se ol hasban oli save stap kwaet nomo taem woman blong olgeta i toktok long olgeta. Ol Kristin hasban oli mas save se fasin blong no toktok tugeta hem i bigfala trabol long plante mared. Taswe oli mas traehad blong rere oltaem blong toktok tugeta. Ol hasban mo ol waef oli save mekem olsem sipos oli lesin long advaes we aposol Pol i givim long Efesas 5:​25-33. Man i mas laekem woman blong hem olsem we hem i stap laekem prapa bodi blong hem, hem i mas tingbaot blong mekem woman blong hem i harem gud. I nogud man i stap tingbaot hem wan nomo. Taswe fasin blong toktok tugeta hem i impoten tumas.

⁶ Waef i nidim blong save gud sipos man blong hem i laekem hem. I nogud hasban i ting se waef i save, i no gat nid blong talem long hem. I gat plante rod we hasban i save soem se hem i laekem waef blong hem. Hem i save talemaot long woman blong se hem i laekem hem, no hem i save givim sam presen long hem, mo tu hem i save toktok wetem waef blong hem long ol samting we i gud blong hem i save. Hasban i mas traehad blong soemaot tangkyu blong hem long ol hadwok blong woman blong hem. Taem hasban i luk se woman blong hem i jenis gud mo hem i luk naes, i gud hem i talemaot long hem. Hasban i mas talemaot se hem i laekem waef blong hem from we hem i wok had long saed blong famle mo tu from we hem i glad blong givhan long ol wok long saed blong speret. Mo antap bakegen, ol hasban oli mas folem advaes we aposol Pita i givim long 1 Pita 3:​7, (NW) se oli ‘mas stap wetem waef blong olgeta, mo oli mas gat save.’ Man i mas kasem save long filing blong woman blong hem, ale hem i save soemaot taem hem i toktok wetem waef blong hem long olgeta samting we i stret blong hem tu i save. Hasban i mas tingbaot tu se woman blong hem i no strong olsem hem.​—Proveb 31:​28, 29.

7. ?Waef i mas mekem wanem blong toktok tugeta wetem hasban blong hem?

⁷ Waef tu i mas folem advaes long Efesas 5:​22-24, long saed blong fasin ona. Hem i mas rere oltaem blong toktok tugeta wetem hasban blong hem. Waef i mas givim “dip respek” long hasban blong hem, from ol toktok mo fasin blong hem wan. Waef i no mas mekem ol samting we hem nomo i wantem, hem i mas tingbaot ol samting we hasban blong hem i wantem. (Efesas 5:33) Oltaem tufala i mas toktok gud tugeta.​—Ridim Proveb 15:22.

8. ?Blong gat fasin blong toktok gud tugeta insaed long famle, waef i mas mekem wanem?

⁸ Mo bakegen, sipos wan waef i harem nogud, i nogud hem i no moa wantem toktok blong soem se hem i sore long hem wan. Sipos tufala i no agri long sam samting, i gud we waef i luk wan stret taem blong hem i save tokbaot samting ya bakegen wetem hasban blong hem. Traem lanem samting from fasin blong Kwin Esta. Kwin Esta hem i gat wan impoten samting blong talem long hasban blong hem. Sipos hem i no mekem, plante man oli save ded. Kwin Esta hem i kwik mo wetem fasin waes hem i sevem ol man Jyu. Oraet, sipos yumi harem nogud long tingting blong yumi, yumi mas toktok tugeta. Fasin ya i mekem i gud long yumi mo long hasban no waef blong yumi tu. Sipos yumi keful long toktok, mo sipos yumi save laf smol long ol smol mastik we oli kamaot, hemia i save mekem i isi long yumi blong toktok tugeta.​—Esta 4:15 kasem 5:8.

9. ?Olsem wanem fasin blong lesingud i givhan long tufala blong toktok tugeta?

⁹ Blong tufala i save toktok gud tugeta, wan i mas lesin gud long narawan, blong traem luksave wanem samting hem i talem mo wanem samting hem i no talem. Hemia i min se hem i mas tingtinggud long samting we narafala i stap tokbaot. I no blong kasem save long storeyan nomo, be blong kasem save tu long ol filing blong narafala we i stap storeyan, mo harem olsem wanem hem i stap toktok. Plante taem hasban i no stap mekem olsem. Ol waef oli save harem nogud taem ol hasban oli no stap lesingud long olgeta. Ol waef tu oli mas lesingud long hasban blong olgeta, i nogud oli stap katem ol toktok. “Man we i waes, bambae hem i lesin long ol tok we oli save tijim hem, mo i holem gud olgeta.”​—Proveb 1:5.

Ol Papa Mama Mo Ol Pikinini Oli Toktok Tugeta

10. ?Ol papa mama oli mas mekem wanem blong toktok tugeta wetem ol pikinini?

¹⁰ Samtaem tu, ol papa mama mo ol pikinini oli faenem i had blong toktok tugeta. Blong “tijim pikinini boe blong yu long rod ya we i stret blong hem” i min se yumi mas gat fasin blong toktok tugeta. Taem yumi mekem olsem, yumi save se “taem bambae hem i kam olfala, be hem i no save lego rod ya samtaem.” (Proveb 22:6) Sam papa mama oli lusum ol pikinini blong olgeta from we wol i pulum olgeta. Samtaem trabol olsem i kamaot from we i no gat fasin blong toktok tugeta taem pikinini i stap gruap. Ol papa mama oli mas toktok oltaem wetem pikinini blong olgeta olsem Dutronome 6:​6, 7 i soemaot klia, se: “Ol tok ya we mi mi stap talem long yu tede, bambae yu mas fasem olgeta long hat blong yu. Mo bambae yu mas tijim pikinini blong yu long hem, mo yu mas tokbaot olgeta taem yu yu stap sidaon long haos blong yu, mo taem yu yu wokbaot long rod, mo taem yu yu go slip, mo taem yu yu girap.” !I tru, ol papa mama oli mas spenem taem wetem ol pikinini blong olgeta! Oli mas glad blong traehad mo lego sam samting we olgeta nomo oli laekem, blong givhan long pikinini blong olgeta.

11. ?Wanem sam samting we ol papa mama oli mas talemaot long pikinini blong olgeta?

¹¹ Ol papa mama, talemaot long ol pikinini blong yufala se Jeova i laekem olgeta mo yufala tu i laekem olgeta. (Proveb 4:​1-4) Yufala i mas rere blong givhan long ol pikinini blong yufala blong oli harem gud long tingting, filing mo bodi blong olgeta, mo tu blong gru moa long saed blong speret. Soemaot long olgeta we yufala i rere blong lego sam kwaet taem no sam gud taem blong yufala, blong mekem olsem. I impoten we ol papa mama oli haremsave ol filing blong pikinini. I min se papa mama i mas waes blong lukluk ol samting olsem ol pikinini blong olgeta i stap lukluk. Taem yufala i soemaot trufala lav long ol pikinini blong yufala, i olsem we yufala i stap kam kolosap moa long olgeta. Fasin ya i pulum ol pikinini blong trastem yufala bitim we oli stap trastem ol fren blong olgeta.​—Kolosi 3:14.

12. ?Blong wanem ol yangfala boe no gel oli mas toktokgud wetem papa mama blong olgeta?

¹² Ol yangfala boe no gel, yufala i mas toktok wetem papa mama blong yufala. Sipos yufala i gat tangkyu long papa mama from ol samting we oli stap mekem blong givhan long yufala, bambae yufala i save trastem olgeta moa. Yufala i nidim papa mama blong givhan long yufala. Sipos yufala i stap toktokgud wetem olgeta, bambae i isi nomo blong olgeta i givhan. I nogud blong stap folem advaes blong ol fren blong yufala. Ol fren ya oli no mekem plante samting blong givhan long yufala, be papa mama blong yufala oli mekem plante samting finis. Ol fren blong yufala ya oli olsem yufala nomo, oli no gat plante ekspiryens long laef. Mo sipos ol fren ya oli no stap insaed long kongregesen, oli no save kea nating sipos bambae yufala i kasem laef blong olwe no no gat.

Toktok Tugeta Insaed Long Kongregesen

13, 14. ?Baebol i givim wanem rul blong pulum yumi blong toktok wetem narafala Kristin?

¹³ Narafala samting blong wok long hem, hemia fasin blong toktok tugeta wetem brata sista insaed long kongregesen. Wan advaes i olsem se, yumi no mas ‘lego ol miting blong kongregesen.’ ?Blong wanem? “Blong mekem yumi strong moa long lav mo long ol gudfala wok.” Hemia i min se yumi mas gat fasin blong toktok tugeta. (Hibrus 10:​24, 25) Sipos wan man i mekem i rong long yu, i no stret blong lego ol miting. Yumi mas gohed blong toktok tugeta, blong folem rul we Jisas i givim long Matyu 18:​15-17. Yu save go toktok wetem man we i mekem yu yu harem nogud.

¹⁴ Sipos yu gat sam trabol wetem wan long ol brata blong yu, folem advaes blong Baebol we i stap long Kolosi 3:13 (NW): “Yufala i no mas kros long yufala, mo taem wan long yufala i faenem poen agens long narawan long yufala, be oltaem nomo tufala ya i mas fofogivim tufala. Jeova i glad blong fogivim yufala finis, nao long sem fasin, yufala tu i mas glad blong fogivim yufala.” Blong mekem olsem, i nogud blong no moa wantem toktok long narafala. Yumi mas toktok tugeta. Mo sipos yu luk we fes blong wan brata i strong long yu, folem advaes we i stap long Matyu 5:​23, 24. Toktok wetem hem, mo traem mekem pis wetem brata ya blong yu. Blong mekem olsem, yu mas gat lav mo fasin daon. Nao sipos yu folem advaes ya blong Jisas, bambae yu mekem i gud long yu wan mo tu long narafala brata ya blong yu.

Givim Advaes Mo Leftemap Tingting

15. ?From wanem wan elda i mas givim advaes?

¹⁵ Fasin blong toktok tugeta i stap tu long advaes we aposol Pol i givim long Galesia 6:​1, se: “Ol brata mo sista. Sipos wan long yufala i foldaon, i mekem samting we i no stret, yufala we Speret blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin. Mo yufala tu i mas lukaotgud long yufala, blong sam samting bambae i no kam traem yufala.” Taem wan brata i talemaot long yumi wan mastik we yumi mekem long toktok no long fasin blong yumi, fasin daon i save givhan long yumi blong harem tok blong hem. Yumi evriwan i mas gat fasin olsem man blong raetem Sam. Hem i talem se: “Sipos wan stret man i kilim mi, fasin ya i kaen gud long mi. Mo sipos hem i tok strong blong stretem mi, fasin ya i gud tumas olsem oel long hed, we bambae hed blong mi i no save blokem.” (Ol Sam 141:5, NW) Ol elda nao oli mas soemaot rod blong tingting daon. Oli no mas oltaem pusum ol narafala man blong folem tingting blong olgeta nomo. Oli mas rere blong jenisim tingting blong olgeta, oli mas tingbaot se ‘ol kil we oli kasem from fren we i laekem olgeta, oli tru.’​—Proveb 27:6.

16. ?Wanem kaen toktok ol yangfala we oli givim tok oli mas wantem?

¹⁶ Fasin waes mo tingting daon i save pusum ol yangfala blong askem advaes long ol Kristin we oli bigman long saed blong speret. From we advaes we oli givim i save bildimap ol yangfala. Rod ya tu i gud long ol elda. Hemia wan eksampel. Long tok blong hem, wan elda i yusum ol tok blong Revelesen 7:​16, 17, se bambae i no moa gat hanggri mo tosta. Nao hem i talem se ol blesing ya, ol narafala sipsip oli save kasem long nyufala wol nomo. Be bigfala mining blong vas ya i stap kamtru long taem blong yumi. (Lukluk Revelation​—Its Grand Climax At Hand!, pej 126-8.) Wan narafala elda we i lesin long taem ya hem i wantem tokbaot samting ya, be bifo we hem i gat jans blong mekem, brata we i givim tok ya hem i ring long hem mo i askem sipos hem i gat sam samting blong mekem tok blong hem i kam gud moa. Brata ya i mekem i isi moa long narafala we i wantem givim advaes long hem. I gud yumi tu yumi mekem olsem. Yumi save askem advaes long olgeta we bambae oli glad blong givim long yumi. Yumi no mas kam kros no harem nogud from we oli stretem yumi.

17. ?Wanem kaen toktok i save leftemap tingting blong ol brata blong yumi?

¹⁷ King Solomon i tokbaot wan rul we i save givhan long yumi long fasin ya. Hem i talem se: “Yu no holembak samting we i gud long olgeta we oli nidim, taem han blong yu i gat paoa blong mekem olsem.” (Proveb 3:27) Kaon we yumi gat long ol brata blong yumi hemia lav. Pol i talem se: “I nogud yufala i gat kaon long sam man. Be i gat wan samting i stap we yufala i mas mekem, we i olsem kaon blong yufala. Hemia we yufala i mas laeklaekem yufala. Sipos wan man i stap laekem tumas ol man we oli stap raonabaot long hem, man ya, hem i folem evriwan blong Loa ya we God i givim.” (Rom 13:8) So yufala i mas kaen wetem toktok blong yufala blong leftemap tingting blong narafala man. Sipos wan man blong givhan we i yangfala i givim fas tok blong hem, talem long hem se i gud. Sipos wan sista i traehad mo i mekem i gud long Tiokratik Skul, talem long hem se yu yu laekem tok blong hem. Plante taem, ol brata mo sista blong yumi oli stap traehad blong mekem i gud, taswe i gud yumi leftemap tingting blong olgeta wetem ol gudfala toktok we oli save harem gud from.

18. ?Olsem wanem blong givhan long man we i flas lelebet long fasin blong hem?

¹⁸ Bakegen sipos wan yangfala i givim tok mo hem i gat gudhan blong mekem tok, be maet hem i flas lelebet long fasin blong toktok blong hem. ?Wanem kaen toktok yumi mas givim long hem? Ating i stret wan elda we i strong long saed blong speret hem i toktok wetem hem long ol gudfala poen we hem i givimaot. Be long semtaem i gud blong hem i toktok wetem hem long ol fasin blong hem, blong bambae hem i no flas tumas. Fasin blong toktok olsem, i soemaot se hem i laekem yangfala brata ya blong hem. Long rod olsem, yangfala ya i save sakemaot ol rabis fasin bifo we oli kam strong long laef blong hem.

19. ?From wanem ol elda mo ol hed blong famle oli mas man blong toktok long narafala?

¹⁹ Ol elda oli mas toktok tugeta, mo tu oli mas toktok wetem kongregesen long ol samting we kongregesen i nidim. Taswe oli no talemaot ol samting we i blong olgeta nomo, olsem kot-komiti. Be sipos oli bitim mak long fasin ya blong haedem ol samting, mo oli no stap talemaot ol samting we ol narafala oli gat raet blong save, bambae ol man oli no trastem olgeta. Fasin olsem i save spolem tingting blong olgeta insaed long kongregesen​—no insaed long famle. Ol man oli laekem blong harem ripot we i blong leftemap tingting blong olgeta. Ol elda oli mas mekem olsem aposol Pol, we i wantem tumas blong tokbaot ol samting long saed blong speret. Oli mas tingbaot blong givim ol tok we i save leftemap tingting blong ol narafala​—Proveb 15:30; 25:25; Rom 1:​11, 12.

20. ?Nekis stadi bambae i tokbaot wanem?

²⁰ I tru we fasin blong toktok tugeta i impoten tumas insaed long kongregesen mo insaed long Kristin famle. Mo tu i gat wan ples bakegen we fasin ya blong toktok tugeta i impoten. ?Weples? Long wok blong prij. Long nekis stadi blong yumi, yumi save lukluk ol rod we i save givhan long yumi blong kam gudfala man blong toktok long narafala. From wok ya i impoten tumas.

?Yu Yu Ansa Olsem Wanem?

◻ ?Wanem samting i stap traem blokem fasin blong toktok insaed long famle? ?Olsem wanem oli save winim?

◻ ?Wanem samting ol hasban mo waef oli mas mekem blong toktok tugeta?

◻ ?Olsem wanem papa mama mo ol pikinini oli save gat fasin blong toktok tugeta?

◻ ?Olsem wanem fasin blong toktok tugeta insaed long kongregesen mo long famle hem i save leftemap tingting?

[Tok Blong Pija Long Pej 18]

Gud fasin blong toktok hem i givhan long famle blong oli harem gud