Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w91 12/1 pp. 20-24
  • Toktokgud Wetem Ol Man Long Wok Blong Prij

I no gat video yet long haf ya.

Sori, i gat problem taem i stap lodem video ya.

  • Toktokgud Wetem Ol Man Long Wok Blong Prij
  • Wajtaoa—1991
  • Ol Sabtaetol
  • Sem Samting
  • Ol Mesej We i No Gat Toktok
  • I Impoten Blong Mekem Man i Tingtinggud
  • I Nidim Gudfala Fasin Blong Toktokgud
  • Lav i Pulum Yumi Blong Toktok Long Ol Man
  • Toktok Tugeta Insaed Long Famle Mo Long Kongregesen
    Wajtaoa—1991
  • Jeova Mo Kraes Oli Nambawan Man Blong Toktok Long Narafala
    Wajtaoa—1991
  • !Storian Wetem Narafala!
    Kingdom Wok Blong Yumi—2002
  • ?Yu Yu Stap Toktok Wetem God?
    Wajtaoa—2015
Luk Moa Samting
Wajtaoa—1991
w91 12/1 pp. 20-24

Toktokgud Wetem Ol Man Long Wok Blong Prij

“From samting ya, yufala i mas go long ol man long olgeta ples long wol, blong pulum olgeta oli kam man blong mi.”​—⁠MATYU 28:⁠19.

1. ?Jisas i talem wanem blong soemaot se yumi mas toktokgud long ol man?

TOK ya blong Jisas antap i soemaot se, yumi mas toktokgud wetem ol man taem yumi stap prij long ol haos wanwan, mo taem yumi mekem visit mo tu ol narafala samting we i joen wetem wok blong prij. Tok ya blong Jisas i min se yumi mas talemaot trutok long saed blong Jeova God, Jisas Kraes, mo Kingdom we Jisas Kraes i stap rul long hem naoia.​—⁠Matyu 25:​31-33.

2. ?Yumi mas mekem wanem blong gat gudhan blong toktokgud wetem ol man?

2 ?Olsem wanem yumi save gat gudhan blong toktokgud long ol man? Fastaem, yumi mas bilif long ol samting we yumi wantem tokbaot. I min se, yumi mas gat strong bilif se Jeova nomo i trufala God, Baebol hem i rili Tok blong God, mo Kingdom blong God nomo i save givhan long ol man. Long rod ya, ol tijing blong yumi bambae oli stap kamaot long hat blong yumi, mo bambae yumi folem advaes we aposol Pol i givim long Timote, se: “Yu mas traehad long evri rod blong kam we yu wan man blong wok we God i stap harem gud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo.”​—⁠2 Timote 2:⁠15.

Ol Mesej We i No Gat Toktok

3-5. (a) ?Olsem wanem yumi save givim wan mesej, nating se yumi no yusum maot? (b) ?Wanem store i soemaot samting ya?

3 Plante taem yumi mas toktok blong givim wan mesej. Be bifo we yumi openem maot blong toktok, yumi stap givim mesej finis long ol man. ?Olsem wanem? From ol fasin blong yumi, ol klos we yumi werem mo ol samting we yumi stap putum long bodi blong yumi. Long ol yia we i pas finis wan misinari i stap pas long wan sip blong mekem wok blong misinari long wan narafala kantri. Hem i finis long Baebol Skul blong Giled. Afta long sam dei long solwora wan strenja i askem hem se from wanem hem i defren long ol narafala man we oli stap long sip. Ol klos mo gudfala fasin blong misinari ya, i olsem we oli stap talemaot se hem i gat defren fasin mo i isi blong ol man i go toktok long hem. Samting ya i givim jans long hem blong talemaot gud nyus.

4 Mo bakegen wan sista i stanap wetem ol magasin, i stap prij long rod. Hem i smael long wan woman we i pas kolosap long hem. Nao taem woman ya i stat blong godaon long ples blong tren we i stap aninit long graon, hem i jenisim tingting blong hem, mo i go antap bakegen long sista ya, mo i askem stadi long hem. ?Wanem i pulum tingting blong hem? Nating se sista i no toktok long hem blong hem i tekem wan magasin, be hem i kasem smael from sista ya we hem i stap prij long rod.

5 Namba tri eksampel. Wan grup blong ol yangfala Wetnes oli stap kakae long wan restoron. Nao oli sek taem wan strenja i kam luk olgeta long tebel mo i pem ol kakae blong olgeta. ?From wanem hem i mekem olsem? From we hem i laekem fasin blong olgeta. Oli no toktok long strenja ya be fasin blong olgeta nomo i talemaot se olgeta wanwan oli man we oli fraet gud long God. I klia nomo se fasin mo klos mo kaengud fasin blong yumi i save ‘toktok’ bifo we yumi talemaot wan tok long maot blong yumi.​—⁠Skelem wetem 1 Pita 3:​1, 2.

I Impoten Blong Mekem Man i Tingtinggud

6. Soemaot from wanem i impoten blong mekem man i tingtinggud.

6 Blong tokbaot gud nyus wetem ol man, yumi mas rere fastaem. Yumi no mas talem nomo se trutok i olsem no i olsem. No gat. Yumi mas mekem man i tingtinggud blong hem i faenemaot se trutok i olsem wanem. Yumi ridim oltaem se taem Pol i traem blong talemaot gud nyus long ol man, hem i stap mekem plante toktok blong mekem olgeta i tingtinggud. (Ol Wok 17:​2, 17; 18:19) ?Olsem wanem yumi save folem eksampel ya blong hem? Tingbaot, maet ol trabol we oli stap kam antap tede, oli save mekem sam man i lusum bilif se i gat Hae God i stap we i laekem ol man mo i keagud long olgeta. Yumi save mekem olgeta i tingtinggud se God i stap mekem evri samting long prapa taem blong hem. (Eklesiastis 3:​1-8) Olsem Galesia 4:4 i talem se taem prapa taem blong God i kam, ale hem i sanem Pikinini blong hem i kam long wol. Promes ya, hem i bin mekem longtaem finis. I sem mak tede. Jeova i gat prapa taem blong hem blong bambae i finisim ol trabol we ol man oli stap harem nogud from, mo ol rabis fasin. Mo tu Tok blong God i soemaot we God i gat gudfala risen blong letem fasin nogud i stap yet. (Ridim Eksodas 9:16.) Taem yu toktok olsem, yusum ol pija tok mo Baebol blong sapotem ol toktok blong yu. Long fasin ya, man we i gat gudhat bambae i luksave se Jeova i stap mo hem i kea long yumi, nating se ol rabis fasin oli stap yet.​—⁠Rom 9:​14-18.

7, 8. ?Olsem wanem blong toktok long wan man Jyu blong mekem hem i tingtinggud?

7 Sipos yu stap prij long ol haos wanwan, nao wan man long wan haos i talem long yu se: “Mi mi wan man Jyu. Mi no intres.” ?Olsem wanem yu save go moa? Wan brata i talemaot olsem wanem hem i winim samting ya. Hem i ansa olsem: ‘Ating yu save finis we Moses nao i hae moa long olgeta profet we God i stap yusum. ?Be yu save wanem hem i talem long Dutronome 31:​29? Hem i se: “Mi save gud se afta we mi ded, bambae yufala . . . i save tanem baksaed long rod ya we mi stap talemaot long yufala. Mo tru, trabol i save kasem yufala from.” Moses hem i trufala profet blong God taswe ol tok blong hem oli mas kamtru. Ating tok blong Moses i kamtru taem God i sanem Mesaea i kam long ol man Jyu bifo, nao olgeta oli no wantem hem. Sipos i olsem, ol man Jyu oli mekem mastik. ?Nao yu ting se i stret blong yumi mekem sem mastik ya bakegen?’

8 Tingbaot tu long taem blong yumi tede ol man Jyu oli kasem ol trabol from Krisendom. Taswe maet yu wantem talem long man we i stap long haos se yumi no gat fol from samting ya. Olsem nao, yu save talem se: ‘?Yu save se long taem blong Hitler, ol Wetnes blong Jeova oli no joen long fasin blong agensem ol man Jyu? Mo tu olgeta oli no wantem blong salut long Hitler no joen long ami blong hem.’a

9, 10. ?Olsem wanem blong toktok long wan man we hem i bilif long helfaea blong mekem hem i tingtinggud?

9 Blong yu save toktokgud wetem man we i bilif long helfaea, yu save talem long hem se, blong wan man i save harem i nogud long helfaea hem i mas gat sol we i no save ded. Man we i bilif long helfaea hem i save agri nomo wetem yu. Biaen yu save tokbaot taem we God i wokem Adam mo Iv, nao wetem fasin we i kaen yu save askem hem sipos haf ya i tokbaot sol we i no save ded. Biaen, yu save pulum tingting blong hem long Jenesis 2:​7, we i talem se Adam hem wan i kam wan sol. ?Mo wanem frut Adam i save kasem from sin blong hem? God i talem se: “Bambae fes blong yu i swet, bambae yu hadwok blong kasem bred blong kakae, gogo bambae yu yu gobak long graon we yu yu bin kamaot long hem fastaem. From we yu yu graon nomo, mo bambae yu yu gobak long graon.” (Jenesis 3:​19, NW) Adam hem wan i sol taswe hem i mas gobak long graon.

10 Yu save talem se buk blong Jenesis i no tokbaot nating fasin ya blong harem i soa long helfaea. Taem God hem i givim woning long Adam blong no kakae long tri ya we i tabu, hem i se: “Tri ya, sipos yu kakae frut blong hem, be long sem dei nomo, bambae yu ded from.” (Jenesis 2:17) !I no tokbaot helfaea! Yu save talem olsem: ‘?Be sipos pei blong sin we Adam i mekem, hem i no ded, no “gobak long graon,” be hem i fasin blong harem i soa long helfaea, olsem wanem nao? ?Yu ting se i stret blong God i no talemaot?’ Tok olsem i kaen mo i keful. Ale wan man we i gat gudhat, bambae i luksave we bilif blong hem i rong, sipos yumi mekem hem i tingtinggud olsemia. Yumi no mas fogetem se i impoten tumas blong mekem man i tingtinggud taem yumi toktok wetem hem long saed blong trutok.​—⁠Lukluk 2 Timote 2:​24-26; 1 Jon 4:​8, 16.

I Nidim Gudfala Fasin Blong Toktokgud

11-13. ?Wanem ol Kristin fasin we oli save givhan long yumi blong toktokgud long ol man?

11 ?Wanem gudfala fasin yumi mas gat blong tokbaot trutok blong Kingdom moa? ?Wanem eksampel we Jisas i soemaot long yumi? Long Matyu 11:​28-30, yumi ridim tok blong Jisas olsem, se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan blong mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.” Long vas ya Jisas i soem wan rod we hem i yusum blong gat gudhan long fasin blong toktok. Hem i wan kwaet man mo tingting blong hem i stap daon. Ol man we oli gat gudhat oli faenem se hem i givhan long olgeta. Aposol Pol tu i soemaot eksampel. Hem i talem long ol elda long Efesas se long fastaem we hem i kam long olgeta hem i stap slef blong Masta ‘we tingting blong hem i stap daon.’​—⁠Ol Wok 20:⁠19.

12 Sipos oltaem yumi no flas mo yumi gat tingting daon, ol man oli save harem gud mo i isi blong yumi toktok wetem olgeta. Be sipos yumi no olsem, taem yumi stap traem blong toktok wetem olgeta, bambae oli no wantem. I tru tumas, “Waes i stap wetem ol man we oli no flas.”​—⁠Proveb 11:⁠2.

13 Blong gat gudhan blong talemaot tok, yumi nidim blong gat longfala tingting mo keful long toktok blong yumi. Aposol Pol i keful long tok blong hem taem hem i stap wetnes long ol man long Hil blong Mas. Ol man we aposol Pol i toktok wetem olgeta oli man we oli waes gud long fasin blong toktok. Taswe hem i talemaot gud nyus long wan fasin we i isi blong oli kasem save. (Ol Wok 17:18, 22-31) Sipos yumi wantem gat gudhan long fasin blong toktok, yumi mas folem advaes we aposol Pol i givim long ol man Kolosi taem hem i talem se: “Oltaem yufala i mas tok gud wetem ol man blong oli save harem gud long tok blong yufala, yufala i mas stadi olsem wanem blong givim wan tok we i gud long ol man we yufala i stap mitim.” (Kolosi 4:​6, The New English Bible) Ol man oli mas harem gud oltaem long ol tok blong yumi. Ol tok olsem, i save kasem hat blong olgeta we oli stap lesin long yumi, be ol tok olbaot nomo bambae i mekem se oli no moa wantem toktok long yumi.

14. ?Olsem wanem fasin kwaet mo isi i save givhan blong toktokgud wetem ol man?

14 Yumi no wantem hareap hareap oltaem. Fasin blong yumi i mas stap kwaet mo isi, nao bambae olgeta we oli lesin long yumi oli harem gud. Blong mekem olsem, yumi no mas toktok oltaem nomo. Olsem nao, bambae yumi no hareap mo yumi askem sam kwestin long kaen fasin. Fasin ya i save givim jans long ol man we oli lesin long yumi blong talemaot prapa tingting blong olgeta. Fasin ya i moa impoten taem yumi tekem wan jans blong prij. I waes blong pulum tingting blong narafala man blong hem i toktok. Wan Wetnes we i sidaon kolosap long wan Katolik pris long wan plen i mekem olsem. Bitim wan haoa olsem, Wetnes ya i stap askem ol kwestin long pris ya. Nao taem pris ya i stap ansarem ol kwestin blong hem, mekem se pris nao i stap toktok plante. Taem we tufala i seraot, pris ya i tekem sam magasin. Fasin olsem blong gat longfala tingting i givhan long yumi blong wokem wan narafala impoten fasin, se fasin blong haremsave filing blong narafala man.

15, 16. ?Olsem wanem fasin blong haremsave ol filing blong ol man i givhan long yumi blong toktokgud long olgeta?

15 Blong haremsave filing blong narafala i min se yumi putum yumi wan long ples blong hem. Long leta we aposol Pol i raetem long ol man Korin, hem i soemaot se hem i laekem fasin ya. Hem i se: “Mi mi friman nomo, mi no slef blong wan man. Be mi nomo mi putum mi mi stap daon, mi olsem slef blong olgeta man, blong mi save pulum plante man moa bambae oli kam man blong Kraes. Long fes blong ol man Isrel, mi folem fasin blong mifala man Isrel, blong pulum ol man Isrel oli kam man blong Kraes. Mi mi no stap aninit long Loa blong Moses. Be long fes blong olgeta we oli stap aninit long Loa ya, mi mekem olsem we mi tu mi aninit long Loa ya, blong pulum olgeta ya oli kam man blong Kraes. Mi mi no afsaed long ol Loa blong God, mi stap aninit long Loa blong Kraes. Be long fes blong ol hiten man we oli no save Loa blong Moses, mi mekem olsem we mi tu mi no save Loa ya, blong pulum ol hiten man ya oli kam man blong Kraes. Long fes blong ol man we oli no gat paoa, mi mekem olsem we mi tu mi no gat paoa, blong pulum olgeta ya oli kam man blong Kraes. Long fes blong olgeta defrenkaen man, mi mekem olsem we mi tu mi gat sem fasin we olgeta oli gat, blong yusum olgeta rod evriwan blong sevem sam long olgeta.”​—⁠1 Korin 9:​19-22.

16 Blong mekem olsem aposol Pol, yumi mas gat fasin keful mo luksave. Yumi mas haremsave ol filing blong ol man. Ale, bambae yumi save tokbaot trutok long olgeta we oli lesin long yumi long fasin we i stret wetem tingting blong olgeta mo filing blong olgeta. Taswe buk ya Reasoning From the Scriptures i givhan blong mekem olsem. Oltaem yufala i mas gat buk ya wetem yufala long wok blong prij.

Lav i Pulum Yumi Blong Toktok Long Ol Man

17. ?Wanem Kristin fasin we i impoten moa blong soem, taem yumi toktok wetem ol man?

17 Blong gat gudhan blong toktokgud long ol man, yumi no mas flas, yumi mas gat tingting daon, longfala tingting, mo yumi mas haremsave filing blong ol man. Antap moa long olgeta fasin ya, yumi mas gat tru lav we i pulum yumi blong no tingbaot yumi nomo, nao bambae yumi save kasem hat blong ol narafala man. Jisas i sore tumas long ol man from we oli olsem “ol sipsip we oli no gat man blong lukaot long olgeta.” Taswe lav nao i pusum Jisas blong talem se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala.” (Matyu 9:36; 11:28) From we yumi laekem ol man, taswe yumi wantem go givim spel long tingting blong olgeta mo halpem olgeta blong go long rod ya we i blong laef. Mesej blong yumi hem i lav, taswe yumi mas gohed nomo blong stap talemaot long fasin lav. Blong soemaot lav ya yumi save smael long ol man, yumi save stap kaen mo glad, mo keagud long ol.

18. ?Olsem wanem yumi save folem eksampel blong Pol?

18 Pol i folemgud fasin blong Masta blong hem Jisas Kraes. ?From wanem hem i gat gudhan blong statem plante nyu kongregesen? ?Yu ting se from we hem i wok strong? I tru. Be tu from lav we hem i stap soemaot. Yu save makem fasin ya blong hem taem hem i raet i go long ol nyu kongregesen ya long Tesalonaeka, se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.” Sipos yumi folem fasin ya blong Pol, bambae yumi save toktokgud wetem ol man.​—⁠1 Tesalonaeka 2:​7, 8.

19. ?From wanem tingting blong yumi i no mas foldaon taem ol man oli no lesin long yumi?

19 Sipos yumi traem bes blong yumi blong toktokgud wetem wan man, be man ya i no wantem lesin, ?olsem wanem nao? ?Tingting blong yumi i save foldaon from? No gat. Ol Baebol Studen (hem i nem blong ol Wetnes blong Jeova bifo) oli stap talem se blong man i akseptem trutok, man ya i mas gat “tri-h.” Hemia tri leta we i statem nem blong trifala fasin long Engglis (honest, humble, hungry), olsem laekem stret fasin, gat tingting daon, mo hanggri long saed blong speret. Mo i tru, ol man we oli no laekem stret fasin, oli no save lesin long trutok. Sem mak long olgeta we oli gat flas tingting, oli no save lesin long gud nyus. Mo bakegen sipos wan man i laekem stret fasin mo hem i gat tingting daon, be hem i no hanggri long saed blong speret, hem i no save akseptem trutok.

20. ?From wanem hadwok blong yumi i no blong nating nomo?

20 Ating plante man we yu stap mitim long eria blong yu bambae oli no gat wan long ol trifala fasin ya. I sem mak long taem blong profet Jeremaea. (Jeremaea 1:​17-19; skelem wetem Matyu 5:⁠3.) Nating se i olsem, hadwok blong yumi i no blong nating nomo. ?From wanem? From we yumi stap talemaot nem mo Kingdom blong Jeova. Taem yumi stap prij mo yumi stap long teritori nomo, i olsem we yumi stap givim woning long ol rabis man ya. (Esikel 33:33) Mo no fogetem se taem yumi stap traehad blong toktok wetem ol narafala man long saed blong trutok, yumi tu i save harem gud from. (1 Timote 4:16) Yumi holem bilif blong yumi i stap strong, mo yumi tingbaot oltaem Kingdom blong God. Mo tu yumi stap holemstrong long Jeova, taswe yumi stap mekem nem blong hem i tabu. Fasin ya i mekem hat blong Jeova i glad.​—⁠Proveb 27:⁠11.

21. ?Wanem samting yumi lanem finis?

21 Nao blong lukluk bakegen: Yumi toktok blong givimaot ol tingting long ol man. Fasin blong toktok tugeta i impoten tumas, plante trabol i save kamaot sipos i no gat fasin ya. Yumi luk finis we Jeova God mo Jisas Kraes tufala i nambawan man blong toktok long narafala, mo Jisas Kraes i putumap wan rod blong i save toktok long yumi tede. Mo tu yumi makem finis se ol klos mo ol fasin blong yumi oli sanem mesej i go long ol narafala man. Yumi lanem finis we fasin blong mekem man i tingtinggud i givhan long yumi blong traem toktokgud wetem ol man. Mo blong gat gudhan blong toktokgud, yumi no mas flas, be yumi mas gat fasin daon, yumi mas haremsave ol filing blong narafala mo yumi mas gat longfala tingting. Mo antap moa long olgeta samting ya, yumi mas gat lav we i kamaot long hat blong yumi. Sipos yumi wok long ol fasin ya mo yumi folem ol eksampel long Baebol, yumi save kam wan Kristin man we i toktokgud wetem ol narafala.​—⁠Rom 12:​8-11.

[Futnot]

a Blong faenem moa rod blong toktok wetem ol man Jyu mo ol narafala skul, lukluk buk ya Reasoning From the Scriptures, pej 21-24.

?Olsem Wanem Yu Yu Ansa?

◻ ?Bifo we yumi talemaot wan tok long maot blong yumi, olsem wanem yumi sanem mesej finis long ol man?

◻ ?Wanem eksampel i soemaot se blong toktokgud wetem wan man, yumi mas mekem hem i tingtinggud?

◻ ?Jisas Kraes mo Pol i gat wanem fasin we i givhan long tufala blong toktokgud long ol man?

◻ ?From wanem tingting blong yumi i no mas foldaon taem ol man oli no lesin?

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem