Leftemap Nyufala Wol Blong God We Fasin Fri i Stap
“[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem.”—REVELESEN 21:4.
1, 2. ?Hu nomo i save givim trufala fasin fri, mo Baebol i tokbaot Hem olsem wanem?
HISTRI i pruvum se tok blong profet Jeremaea i tru nomo taem hem i se: “Man i no naf blong jusum wanem rod hem i mas wokbaot long hem.” ?Hu nomo i save lidim man long rod we hem i mas wokbaot long hem? Jeremaea i gohed i se: “Plis Jeova, yu stretem mi.” (Jeremaea 10:23, 24) Yes, Jeova nomo i save givim trufala fasin fri long ol man from trabol we oli stap kasem.
2 I gat plante eksampel long Baebol we oli soem se Jeova hem i naf blong mekem ol man blong hem oli fri. “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Ol man oli raetemdaon tu ol jajmen we Jeova i mekem long ol gyaman wosip, ol store ya oli blong “wekemap yumi ya we yumi stap laef naoia, we Lasdei blong wol i kolosap.”—1 Korin 10:11.
Mekem Ol Man Blong Hem Oli Fri
3. ?Olsem wanem Jeova i soemaot se hem i naf blong mekem ol man blong hem oli fri long Ijip?
3 Eksampel we i soem se God hem i naf blong jajem gyaman wosip mo mekem ol man blong hem oli fri, i kamaot bifo taem ol man blong hem oli stap kalabus long Ijip. Eksodas 2:23-25 i talem se: “Hem i harem ol krae ya blong olgeta mo i luk we oli stap harem nogud tumas. . . . Hem i luk we olgeta oli stap hadwok tumas long ol strongfala wok ya, mo i stap tingting long olgeta.” Blong soemaot se hem i gat moa paoa long ol gyaman god blong ol man Ijip, Hae God i mekem ten trabol i kasem kantri ya. Ol ten trabol ya wanwan i blong daonem ol defren kaen god blong ol man Ijip, blong soemaot se ol god ya oli gyaman nomo, oli no gat paoa mo oli no save givhan long ol man Ijip we oli stap mekem wosip long olgeta. Biaen God i mekem ol man blong hem oli fri mo i kilim Fero mo ol ami blong hem long Red Si.—Eksodas, japta 7 kasem japta 14.
4. ?From wanem i stret nomo blong God i jajem ol man Kenan?
4 Jeova i kilim ded ol man Kenan we oli stap wosip long devel mo i givim kantri ya long ol man blong hem. From we Jeova i Hae long olgeta samting long heven mo wol, hem i gat raet blong jajem ol gyaman skul ya. (Jenesis 15:16) Wan buk (Bible Handbook blong Halley) i tokbaot ol gyaman skul blong ol man Kenan i se: “Fasin blong wosip long . . . ol god blong ol man Kenan i joen wetem fasin blong mekem bigfala lafet blong ona long olgeta. Ol tempel blong olgeta oli ples blong mekem rabis fasin nomo. . . . Ol man Kenan oli stap mekem wosip wetem rabis fasin, hemia kastom blong skul blong olgeta blong ona long fored blong god blong olgeta. Mo oli yusum fasbon pikinini blong olgeta blong mekem sakrafaes long ol god ya. Ples ya Kenan i olsem Sodom mo Gomora.” Man ya i gohed blong talem se: “?Olsem wanem, kaen laef olsem we i fulap long ol rabis fasin mo fasin blong kilim man i stret blong i stap? . . . Ol man blong digim graon blong faenem ol samting blong bifo oli digim graon long ples we Kenan i stap long hem bifo, mo oli stap tingting se from wanem God i no spolem ples ya kwiktaem.”
5. ?Olsem wanem fasin blong God blong mekem ol man blong hem bifo oli kam fri i pija long taem blong yumi?
5 Store ya blong God we hem i agensem gyaman wosip, mekem ol man blong hem oli fri, mo givim graon we hem i promes blong givim long olgeta, i olsem pija blong ol samting we bambae oli mas kamaot. Hem i poen long wan fyuja we i kolosap nomo. Long taem ya God bambae i smasem ol gyaman skul blong wol mo ol man blong olgeta, mo bambae hem i tekem ol man we oli stap mekem wok blong hem tede oli go insaed long nyufala wol we stret fasin i stap long hem.—Revelesen 7:9, 10, 13, 14; 2 Pita 3:10-13.
Trufala Fasin Fri Long Nyufala Wol Blong God
6. Talem ol gudfala fasin fri we God bambae i mekem long nyufala wol.
6 Long nyufala wol ya, God bambae i blesem ol man blong hem wetem ol gudfala fasin fri we hem i wantem se oli gat fastaem. Bambae oli fri long ol trabol blong politik, bisnes, mo ol gyaman skul. Bambae oli fri long sin mo ded blong kasem laef we i no save finis long wol. “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29; Matyu 5:5.
7, 8. ?Olsem wanem bodi blong ol man bambae i kam gud bakegen long nyufala wol?
7 I no longtaem biaen, ol man we oli stap long nyufala wol ya bambae oli kasem bodi we i stret gud olgeta. Job 33:25 i talem se: “Letem bodi blong hem i kam yangfala olsem we long yang taem blong hem. Letem hem i kasem paoa bakegen olsem long ol dei blong yangfala taem blong hem.” Aesea 35:5, 6 i givim promes ya se: “Long taem ya, ae blong ol blaenman bambae i open, mo sora blong ol man we oli no save harem bambae i no moa fas. Long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad blong hem.”
8 Sam long yufala we oli gat ol sik from we oli olfala no from bodi blong yufala i no strong, tingbaot sipos yu stap long nyufala wol ya, evritaem yu wekap yu harem se bodi blong yu i stap kam gud mo yu gat moa paoa. Skin blong yu we oli slak oli kam smut bakegen, skin i kam strong—yu no moa nidim pomad blong skin. Ae blong yu we i blaen no oli no lukluk gud oli kam gud bakegen—yu no moa nidim ol glas. Ol sora we oli fas oli kam gud bakegen—yu sakem ol smol samting we yu stap yusum blong harem. Ol leg we oli no strong naoia oli kam strong mo oli kam gud bakegen—yu no moa yusum ol stik mo ol wiljea blong wokbaot. I no moa gat sik—yu sakemaot olgeta meresin. From samting ya, Aesea 33:24 i tokbaot finis se: “Mo bambae i no gat wan man ples we i save talem se: ‘Mi mi sik.’” Mo tu hem i se: “Bambae oli singaot mo oli glad mo fasin sore mo fasin blong harem nogud bambae i finis olgeta.”—Aesea 35:10.
9. ?Olsem wanem faet bambae i finis olgeta?
9 Fasin blong yusum man blong mekem sakrafaes long faet i finis. “[God] i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.” (Ol Sam 46:9) Bambae man ya blong rul long Kingdom blong God, Jisas Kraes, we Aesea 9:6 i tokbaot hem i se “Prins blong Pis,” i no save letem ol tul blong faet oli stap. Vas 7 i gohed blong talem se: “Mo bambae bigfala rul blong hem olsem prins, mo pis, oli no save finis.”
10, 11. ?Bambae trufala pis i minim wanem long wol?
10 !Hemia bambae i wan blesing long olgeta man, mo long wol ya, from we oli fri long ol tul blong faet! Kam kasem naoia, ol tul blong faet we oli stap yusum bifo oli stap spolem ol man yet. Long kantri ya Franis, bitim 600 man oli bin ded stat long 1945 i kam, taem oli stap traem spolem ol bom we oli stap yet long ol laswan faet. Bos blong kampani blong spolem ol bom ya i talem se: “Mifala i stap faenem ol bolet blong ol bigfala masket we ol man oli stap yusum long taem blong faet ya blong Franko-Prasia long 1870. Ol reva oli fulap long ol hanbom blong Faswan Bigfala Faet Blong Wol. Samtaem taem wan man blong wokem garen i ron antap long bom we oli stap berem long taem blong Seken Bigfala Faet Blong Wol, wetem trakta blong hem nao taem bom i bosta man olsem i ded nomo. Ol samting ya oli stap long evri ples.” Tu yia i pas, magasin ya The New York Times i talem se: “Long 45 yia afta long Seken Bigfala Faet Blong Wol, [kampani ya we i stap spolem ol bom] i faenem long graon [blong Franis] 16 milyan bolet mo 490,000 bom mo 600,000 bom blong wora. . . . Plante taosen hekta blong graon i stap we ol tul blong faet oli stap haed yet long hem, mo oli pulum fenis raon long ol graon ya, mo oli putum ol saen long olgeta blong givim woning se, ‘No Tajem. !Hem i Save Kilim Man i Ded!’”
11 !Bambae nyufala wol i defren olgeta! Ol man bambae oli gat gudfala haos, plante kakae, mo ol man oli harem gud long wok blong mekem wol i kam paradaes. (Ol Sam 72:16; Aesea 25:6; 65:17-25) Bambae ol man, mo wol ya oli no moa kam fulap long plante milyan tul blong faet. Wan nyufala wol olsem i stap long tingting blong Jisas taem hem i talem long man we i bilif long hem, i se: “Bambae yu yu stap wetem mi long Paradaes.”—Luk 23:43, NW.
Skul Blong Kasem Laef
12, 13. ?Jisas mo Aesea i tokbaot wanem wok blong tij long olgeta ples long wol long taem blong yumi?
12 Taem wan man i save long nyufala wol blong God, hem i lanem tu se long taem blong yumi, Jeova i mekemrere wan kongregesen we i kavremap fulwol blong mekem trufala wosip. Kongregesen ya bambae i stampa blong nyufala wol, mo God i yusum hem naoia blong tijim ol narafala man long ol plan blong hem. Kristin ogenaesesen ya bambae i mekem bigfala wok long wol blong tijim ol man, wan wok we ol man oli neva luk bifo. Jisas i talem finis se samting ya i mas kamtru. Hem i talem se: “Nao bambae ol man oli stap talemaot [gud nyus blong kingdom long, NW] olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.”—Matyu 24:14.
13 Aesea tu i tokbaot bigfala wok ya blong tijim ol man, hem i se: “I mas hapen long laswan haf blong ol dei [hemia taem blong yumi naoia], se bigfala hil blong haos blong Jeova [klin wosip blong hem] bambae i stanap strong . . . mo ol nesen oli mas kam wanples long hem, we oli fulap. Mo tru ya, plante pipol bambae oli go, mo oli talem se: ‘Yufala i kam, blong yumi go antap long bigfala hil blong Jeova, . . . Mo hem bambae i tijim yumi long ol fasin blong hem, mo bambae yumi wokbaot long ol rod blong hem.’”—Aesea 2:2, 3.
14. ?Olsem wanem yumi save makem ol man blong God tede?
14 Taswe, bigfala wok blong talemaot Kingdom blong God i pruvum se yumi stap kolosap long en blong rabis fasin blong naoia mo trufala fasin fri i kolosap. Ol Wok 15:14 i tokbaot ol man ya we oli stap talemaot mesej blong nyufala wol blong God long ol man se “oli holem nem blong [God].” ?Hu i holem nem blong Jeova mo i tokbaot Kingdom blong hem long olgeta ples long wol? Store long taem blong yumi i givim ansa se: ol Wetnes blong Jeova nomo. Tede namba blong olgeta i bitim fo milyan mo oli stap long bitim 66,000 kongregesen long olgeta ples long wol.—Aesea 43:10-12; Ol Wok 2:21.
15. ?Long saed blong ol bisnes blong politik, olsem wanem yumi save makem ol trufala man blong God?
15 Narafala pruf se ol Wetnes blong Jeova oli stap mekem profet tok ya long Aesea 2:4 i kamtru long saed long wok blong talemaot Kingdom. Profet tok ya i se: “Mo tru bambae hem i talemaot jajmen blong hem long medel blong ol nesen, mo hem i stretem ol bisnes bakegen long saed blong plante pipol. Bambae olgeta oli tekem hama, oli tanem ol naef blong faet blong olgeta oli kam aean blong brekem graon long garen, mo ol spia blong olgeta oli kam sisis blong katem han blong tri. Bambae wan nesen i no leftemap naef blong faet agens long narafala nesen, mo bambae oli no moa lanem fasin blong faet.” Taswe olgeta we oli stap mekem wok blong talemaot Kingdom blong God long olgeta ples long wol oli mas “no moa lanem fasin blong faet.” Jisas i talem se oli mas “no man blong wol ya.” (John 17:16) Hemia i min se oli no mas joen long ol bisnes blong politik, oli no mas joen long ol tingting mo faet blong ol nesen. ?Hu ya oli no man blong wol mo oli no moa lanem fasin blong faet? Bakegen, store long taem blong yumi i ansa se: ol Wetnes blong Jeova nomo.
16. ?Olsem wanem wok blong tij long olgeta ples long wol bambae i gohed gud?
16 Wok ya blong ol Wetnes blong Jeova blong tijim ol man long wol bambae i gohed yet afta long taem ya we God bambae i spolem rabis wol ya. Aesea 54:13 i se: “Mo olgeta pikinini blong yu, bambae Jeova i tijim olgeta.” Bambae hem tijim gud ol man taswe Aesea 11:9 i talem se: “From we bambae wol ya i fulap tru long save blong Jeova olsem we ol wora oli kavremap solwora.” Jeova bambae i gohed blong tijim olgeta ya we oli laef tru long rabis fasin blong wol ya mo ol pikinini blong olgeta. Be tu, plante milyan man we oli laef bakegen long ded bambae oli nidim samting ya. Sloslou evri man we oli stap laef long wol ya oli save lanem olsem wanem blong yusum gud fasin fri blong olgeta insaed long ol mak blong loa blong God. ?Wanem frut i save kamaot from? “Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.”—Ol Sam 37:11.
Gudfala Fasin Fri Naoia Tu
17. ?Moses i talem wanem long ol man blong God bifo?
17 Taem kolosap ol man Isrel blong bifo oli go insaed long graon ya we God i promes blong givim long olgeta, Moses i toktok wetem olgeta mo i se: “Yu luk, mi mi tijim yufala long ol rul mo loa, olsem we Jeova, God blong mi i talem long mi, blong yufala i save mekem olsem insaed long kantri we bambae yufala i tekem. Mo yufala i mas kipim mo mekem ol loa mo ol rul ya, from we i save givim waes long yufala mo fasin luksave long yufala. Long lukluk blong ol man we bambae oli harem olgeta rul ya, bambae oli save talem se, ‘I tru bigfala nesen ya i waes mo ol man blong hem oli gat fasin luksave.’ I no gat wan bigfala nesen we ol god oli stap kolosap long hem olsem we Jeova, God blong yumi i stap kolosap long yumi taem yumi stap singaot long hem.”—Dutronome 4:5-7.
18. ?Wanem ol gudfala fasin fri we ol man blong Jeova oli stap kasem tede?
18 Tede plante milyan man we oli stap wosip long Jeova olgeta tu kolosap oli go insaed long wan graon we God i promes blong givim long olgeta—hemia nyufala wol. From we oli stap obei long ol loa blong God, hem i stap kolosap long olgeta mo olgeta ya oli defren tumas long ol narafala man. God i mekem olgeta oli fri finis long ol tingting blong ol gyaman skul, long fasin blong man we i no laekem narafala man from laen blong hem, long fasin blong yusum drag, fasin blong man i flas from kantri blong hem, long faet, mo long bigfala sik we ol man oli stap kasem from fasin blong seks. Antap moa, oli joen gud long lav olsem oli brata nomo long olgeta ples long wol. (Jon 13:35) Oli no fraet long fyuja be “oli singaot bigwan from we oli harem harem gud long hat blong olgeta.” (Aesea 65:14) !Oli harem gud long fasin fri we oli gat naoia taem oli stap mekem wok blong God olsem Man blong Rulum Man!—Ol Wok 5:29, 32; 2 Korin 4:7; 1 Jon 5:3.
Halpem Narafala Man Oli Fri Long Ol Gyaman Bilif
19, 20. ?Olsem wanem ol man oli kam fri taem oli lanem tijing blong Baebol long saed blong ol dedman?
19 Plante man we ol Wetnes blong Jeova oli stap prij long olgeta, oli faenem ol fasin fri ya. Eksampel, long ol kantri we ol man oli stap mekem wosip long ol bubu blong olgeta we oli ded finis, ol Wetnes blong Jeova oli talemaot long olgeta se ol dedman oli no laef samples mo oli no save spolem ol man we oli stap laef yet. Ol Wetnes oli soemaot ol tok blong Eklesiastis 9:5 se “ol man we oli laef oli save se bambae oli mas ded. Be ol dedman oli no save wan samting nating.” Mo tu oli soemaot ol tok blong Ol Sam 146:4, we i tokbaot dedman i se “i gobak long graon blong hem bakegen. Long sem dei ya ol tingting blong hem i finis.” Baebol i soemaot se i no gat wan samting olsem devel no sol blong man we i stap laef mo hem i save givhan no i save spolem ol man. Taswe i no nid blong ol man oli westem mane we oli stap hadwok from blong pem ol kleva no ol pris blong oli toktok wetem ol dedman.
20 Stret save long Baebol olsem i mekem ol man oli fri long ol gyaman tijing blong helfaea mo pegatri. Taem ol man oli lanem trutok blong Baebol se ol dedman oli no gat tingting, i olsem man we oli stap slip nomo, oli no moa wari long ol fren blong olgeta we oli ded. Be, oli lukluk i go long fyuja long nambawan taem we aposol Pol i stap tokbaot, i se: “God bambae i mekem olgeta man oli laef bakegen long ded, ol man we oli stret, wetem ol man we oli no stret.”—Ol Wok 24:15.
21. ?Hu bambae i girap i laef bakegen, mo wanem tingting blong olgeta?
21 Taem ol dedman oli laef bakegen, bambae oli laef blong olwe long wol ya mo oli fri long ded we i kamaot long Adam. Yes, long taem ya ol pikinini we oli stap yusum blong mekem sakrafaes long ol god blong ol man Kenan olsem Molek, ol yangfala man we oli stap yusum blong mekem sakrafaes long ol god blong ol man Astek, mo plante milyan man we oli stap yusum blong mekem sakrafaes long god blong faet, bambae oli laef bakegen. !Olgeta ya we bifo oli stap ded from ol gyaman bilif bambae oli sapraes mo oli glad tumas! Long taem ya olgeta we oli laef bakegen oli save talem se: “?E, Ded, ol nil blong yu blong stikim man, oli stap wea? ?E, Seol, paoa blong yu blong spolem man hem i stap wea?”—Hosea 13:14.
Lukaotem Jeova
22. ?Sipos yumi wantem laef long nyufala wol blong God, yumi mas tingbaot wanem?
22 ?Yu yu wantem laef long nyufala wol blong God, ples ya we bambae i gat trufala fasin fri? Sipos yu wantem, tingtinggud long ol tok ya long 2 Kronikel 15:2 i se: “Sipos yu yu soemaot se yu yu stap wetem Jeova, Jeova bambae i stap wetem yu. Mo sipos yu yu lukaot hem, hem bambae i letem yu yu faenem hem. Be sipos yu yu lego hem, hem bambae i lego yu.” Mo tingbaot samting ya se taem yu stap traehad blong kasem save long God mo mekem hem i harem gud, hem bambae i no fogetem yu. Hibrus 11:6 i talem se God “i stap mekem i gud long olgeta we oli stap traem faenem hem.” Mo Rom 10:11 i talem se: “Olgeta ya we oli bilif long God, bambae oli no save sem.”
23. ?From wanem yumi mas leftemap nyufala wol blong God we bambae fasin fri i stap long hem?
23 Nyufala wol blong trufala fasin fri i kolosap. Long dei ya, “God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” Mo “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem.” (Rom 8:21; Revelesen 21:4) Nao olgeta man blong Jeova bambae oli leftemap hed blong olgeta mo wetem glad bambae oli leftemap nyufala wol blong fasin fri wetem tok ya se, ‘!Tangkyu, Jeova, from trufala fasin fri naoia!’
?Yu Yu Ansa Olsem Wanem?
◻ ?Olsem wanem Jeova i soemaot se hem i naf blong mekem ol man blong hem oli fri?
◻ ?Wanem ol gudfala fasin fri we bambae oli stap long nyufala wol blong God?
◻ ?Olsem wanem Jeova i tijim ol man blong oli kasem laef?
◻ Talem sam fasin fri we ol man blong God oli stap kasem naoia taem oli stap mekem wok blong hem.
[Tok Blong Pija Long Pej 10]
Jeova i soemaot se hem i gat moa paoa long ol gyaman god blong Ijip, hem i mekem ol man we oli stap wosipim hem oli fri
[Tok Blong Pija Long Pej 13]
Tede, ol trufala man blong God oli stap tijim ol man long olgeta ples long wol mo oli karem nem blong hem